智取大市：牛市終極亢奮期
1 :
GS(14)@2017-10-09 03:05:39縮表消息當前，各位喺賭桌面前已買定離手，小弟估計搶攻潮仲會繼續，而噚日強勢股升勢唔比星期一弱幾多，一而再地唔係跌市就係喪炒，就證明市況進入真亢奮期，係升浪末段徵兆，亦係升浪最Juicy嘅時間。冇人有水晶球知道升到幾時，記住莫估頂，等龍頭股紛紛轉弱之時，先至收手。汽車股、內房股都追唔落手，點算？除咗上一期一口氣推介幾隻股之外，仲可以留意剛完成調整、股價再起動嘅強勢股。玖紙（2689）身披人民幣升值加上復蘇概念，噚日股價反彈，已收復調整浪黃金比率0.618倍，等如確認升浪未見頂，重拾固有中線升勢機會偏高。玖紙早前已發盈喜，盈利數字大概有個底，市況好到咁，業績前追入應該都冇乜問題。根據盈喜公告，玖紙全年撇除滙兌虧損及衍生工具虧損之後嘅溢利增長不低於60%，照計按半年溢利升幅達到26%，盈喜之後股價爆升四成，但預測2017年市盈率13.9倍，喺呢個市況下都算合理價，有種就博埋佢。晉佳
來源:
http://hk.apple.nextmedia.com/financeestate/art/20170921/20159105
智取大市：長命調整玩死人
1 :
GS(14)@2017-10-09 03:31:07恒指一直維持於250小時線嘅關鍵水平之下，即市阻力重重，現貨噚日跌220點，以全日最低位收市之餘，執筆時期指繼續低水。熱炒股近排都死跟恒指上落，睇嚟恒指未企穩250小時樓上，都費時積極建倉。如果恒指今日顯著下跌，更跌穿周二低位27300點，從技術走勢上，就可以確認係年初至今最差市況，進入今年最長調整浪。配合恒指月線圖、周線圖9 RSI高位由80嚴重超買水平見頂回落，唔係短線超買咁簡單，而係中長線超買。因此估計整個調整浪，有機會長至以月計。技術調整有可能為期較長，加上投資者已對調整有一定防備，情緒唔會太大起落，同時滿倉股民為數相信亦不多，未必冇龐大貨源喺市場上拋售，相信要形成類似港股大時代嗰隻連日急插嘅恐慌性拋售，機會唔高。結論係，中線調整相信會以反覆下跌嘅方式進行，短線會一浪低於一浪。如果係咁，每次反彈就成為沽貨機會，每次恐慌性拋售就成為博反彈機會，但賺錢難度會比1月至8月期間高幾倍。大家最期待急挫形成黃金撈貨機會？恐怕未有耐出現，如果唔夠耐性，恐防會太早撈貨，呢一刻要忍吓手。晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170929/20167861
智取大市：港股短線Plan A/B
1 :
GS(14)@2017-10-09 03:39:14港股噚日反彈非常吸引，融創（1918）升一成，舜宇（2382）升6%，其餘熱炒股反彈唔夠4%都可以恥笑佢弱雞。雖然係咁，但熱炒股普遍未收復星期一失地，就算彈最勁嘅融創，都仲未反彈到調整浪幅度嘅0.618倍。論指數，年初至今恒指支持位250小時線（延伸至27679點），呢一刻仲未收復兼企得穩，未足夠確認市況已雨過天晴。悲觀劇本下，如果大調整未完，未來一兩個日應該會再跌過；樂觀劇本下，調整已完，喺噚日反彈成交偏弱之下，預期會Chok住打底而非直線反彈，有耐性等多一兩日，就自然有更清晰picture，到時再入市加碼，睇怕都有位買，未算遲。熱炒股內房、科網之類，位處調整風眼，同恒指齊上齊落，唔算特別跑得贏，賭單邊嘅話，潛在升幅同跌幅差唔多，冇乜着數，反而濠賭股已普遍上番高位，例如銀娛（027）、新濠（200），只要確認市況回穩，兩隻強勢賭股可考慮先上車。晉佳
來源:
http://hk.apple.nextmedia.com/financeestate/art/20170928/20166036
智取大市：過山車正往下衝
1 :
GS(14)@2017-10-09 03:58:07點形容大市嘅狀況？就好似坐過山車一樣，年頭開始架過山車一直向上衝，衝到有咁高得咁高，點知去到頂，然後，啱啱feel到個頂嘅時候，就已經跳樓式向下墜，非常震撼，但呢吓其實只係一個開始？架過山車會衝到有幾低？坐喺架車嘅人，根本難以睇得清。熱炒股由高位跌到如斯田地，只用咗短短兩日時間，由於掟落去嘅速度太快，部份當炒股已經掟散咗，反彈動力大減；加上短時間急挫證明股票供應轉眼間變得好大，個個原本都諗住Lead住由佢放紙鳶，變成跌起上嚟就個個一齊沽，由於霎時間沽貨成為潮流。短期內就算有反彈，相信好快有人乘機再質低。至於另一個劇本，亦有可能根本冇反彈呢回事，連續咁急插，去到極超賣嘅時候，先至展開V彈。噚日港股一大劫數，表面上跌380點，但以個股慘況睇，似係跌足800點咁嘅款。大戶見手上累積升幅多嘅就沽，至於非熱門二三線股例如鞍鋼（347）、馬鋼（323）、江銅（358）之類，好多只跌約2%左右，但似乎只係大家遺忘咗佢哋，唔代表佢哋有承接力。大家要防範噚日可能只係人踩人嘅開始，成手Cash喺手嘅戰友，暫時唔好手多多撈貨了。晉佳
來源:
http://hk.apple.nextmedia.com/financeestate/art/20170926/20163944
智取大市：港股科技大時代
1 :
GS(14)@2017-10-15 15:54:06今日同兩年半之前嘅港股大時代比較嘅話，50隻藍籌當中，有27隻股為恒指帶入正回報，23隻為負回報。一隻騰訊（700）已經為指數貢獻2,061點，即係唔計騰訊，恒指喺26,397點，其實都係高。至於其他有貢獻恒指嘅股份當中，有能力或市場預期能以科技提升產品質素，呢類公司為恒指正面貢獻較大，包括吉利（175）同瑞聲（2018）。至於正在被新科技蠶食嘅行業股份，例如中移動（941）、聯通（762）、中石油（857），兩年半期間股價下跌22%至46%不等。中游份子就係地產、金融呢類未被新科技正面衝擊嘅行業。呢種趨勢長遠仍未止步，而科技開始加快步伐去改變經濟，正正係股市未來希望所在。未來留意番，一啲已經上市嘅舊經濟股，會唔會成功加入新科技元素嚟提升競爭力。吉利係已跑出例子，比亞迪（1211）亦係其一。至於市況，星期五恒指由單日高位回落百幾點，未算出現派貨迹象，嚟緊一個星期繼續且戰且走。短線方面，眾安（6060）爆升，緊隨其後有同樣為半新股為主嘅教育股開車，可見貨源歸邊、有概念炒上就有錢追捧，預計教育股短線未見頂，夠勇可小注。晉佳
http://fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20171009/20177200
智取大市：大陸錢由樓轉股
1 :
GS(14)@2017-10-22 16:52:10前一期講到，內地樓市未來一年放緩嘅程度或比預期大，或成為內地金融市場最埋身嘅不明朗因素，可能形成港股震倉。放眼全球，資產市場價格確係偏高，但港人望住全球最黐線嘅港樓，難免覺得地球好危險。其他主要國家嘅資產泡沫，並冇咁誇張，因此唔少人認為中國境內埋下全世界最大嘅炸彈，只要有風吹草動，就有人掟貨都掟唔切，但驚，同真爆煲，層次差得遠。自金融海嘯後，美國即使連環QE，聯儲局資產負債表增加超過3倍，但M2每年增幅只係以低個位數跑贏GDP增長，似只有「輕泡沫」。反之中國金融泡沫越谷越大，M2長期大幅超過GDP增幅。中國資本賬同貿易賬冇同步開放，近年金融體系似係一分為二，影子銀行、壞賬、樓市泡沫繼續泡沫，同實體經濟活喺唔同嘅平行時空，於是有定向降準呢回事，希望將資金疏導去應該扶持嘅地方，可惜，最終總被破解，錢依然流返去資產市場。港股會唔會先因內房放緩而中線調整，然後於定向降準放水嘅資金喺樓市調控之下選擇流入股市，令A股爆上？2015年港股大時代正正係類似嘅資金由樓轉A股嘅故事，值得留意。晉佳
http://fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20171018/20186634
智取大市：習近平之大冒險
1 :
GS(14)@2017-10-22 17:47:29習近平喺十九大開幕會份政治報告，讀出「創新」41次，讀「小康」16次，呢兩個詞語的確係過去5年中國發展重點。乜創新都好，中央近5年多數採取放任態度，喺初期無規無矩之下，由得你去試新嘢，當出出哋事嘅時候，先定潛規則或負面清單去規範，最後成功快一步去創新，缺點係睇唔實就隨時失控。例如餘額寶，當初都係無秩序亂咁嚟做，到最後成為主流理財渠道，暫時睇係成功例子。中國呢種模式鼓勵創新，亂得嚟有其套路。「小康」又點？中國經歷近幾年樓市瘋癲，造就唔少農民地主變土豪，一線城市急促發展，令到普通市民收入力追國外發達城市嘅水平，至少中國一線城市嘅中產已經係真中產，大學畢業生嘅入職薪酬亦爬過台灣水平。亂咁印銀紙，部份國民富起來，突破中等收入陷阱係原本不可能嘅經濟終極大任務，得咗就王朝千秋萬世，但同時形成龐大嘅金融泡沫有待收科，無論係成功避開定不幸引爆金融泡沫，保住「小康」係一大關鍵。習近平好似驚都未驚過咁款，通常頂尖領袖就係咁，就算個煲有幾大，就算未諗到解決方法，都自信滿滿去到最後能迎難而上。正如一個魔術師，玩到完晒啦！差唔多俾人除晒衫！都能夠喺頂帽度抽隻白兔出嚟！但我哋作為蟻民，到樓市唔對路時始終要走，皆因命得一條。晉佳
https://www.facebook.com/advanceguy1/
來源:
http://hk.apple.nextmedia.com/financeestate/art/20171019/20187167
智取大市：乞人憎的一單deal
1 :
GS(14)@2017-10-30 00:10:28港股似進入調整期，市況變得反覆，即使噚日升百幾點，戰線睇起上嚟仍有所收窄，近日升勢集中喺內房、水泥、醫藥、電動車電池概念，亦唔係全線升，收窄到去三幾隻被選中嘅細路。醫療股、水泥股已悉數爆上，市況反覆之下，大升股Miss咗就唔好監硬追，寧願等回吐時測試其承接力，有承接力嘅話先考慮撈貨。另外，日用股消費股如旺旺（151）、恒安（1044），假若配合市況靠穩，稍後都有機會保持升勢。值得一提，係中化肥（297）向中化集團出售A股鹽湖股份20.52%股權，現金作價80.6億人民幣，足足係中化肥市值九成！受消息拖累，中化肥股價急挫一成，扣除咗出售款項，中化肥剩餘化肥業務價值10億港幣左右，真係慘過做殼股。中化肥消息後被掟到飛起，原因係幻想破滅。鹽湖股份原來電動車電池概念股，旗下藍科鋰業開始生產電池級碳酸鋰，公司計劃年內量產1,000噸電池級碳酸鋰，明年產量增至1萬噸。中化肥冇咗佢，乜嘢幻想空間都冇晒。呢單嘢反映兩件事，第一，中化集團真係唔益股東，好嘢留返畀母公司，呢啲公司以後唔買都唔駛恨；第二，股價大跌反映市場對電動車電池概念珍而重之，相關資源更加係物以罕為貴，同為電動車電池原料嘅鈷價近一年升咗成倍，難怪市場對於鈷礦概念嘅洛鉬（3993）不離不棄了。晉佳
來源:
https://hk.finance.appledaily.co ... e/20171026/20194479
智取大市：打巷戰兩大要訣
1 :
GS(14)@2017-10-30 00:48:15港股投資者反應之快，可以從近期港股氣氛轉冷之中睇得出，只係幾日偏軟，就令散戶情緒由亢奮轉變為割禾青、控制持倉，短短一星期就令唔少投資者情緒作出一定程度改變，反映散戶對市場靈敏度大增，一有風吹草動，散戶已經將持倉減到安全水平。港股年初至今直線上升，冇大調整，散戶反應靈敏亦係主要原因之一，因為震一震，啲冇信心嘅短線客已經震晒出嚟，於是一日未見終點，大戶亦毋須大震倉多此一舉。當然，呢個劇本唔會無限Loop落去，畢竟升咗10個月了。兩三星期前，小弟發表中線調整至少一兩個月嘅睇法，恒指如預期回落幾日。最近兩日，市場上唔少人估後市調整，小弟變為主流，多少有點不安，試問個個估調整，又點會個個成功高沽低買咁爽？於是喺市場反應過敏之際，整固初期較大機會進入巷戰，唔似直線下跌。打巷戰要注意乜？第一，夠唔夠打。如果閣下近期於大市調整期間一直戰鬥，但戰績保持喺歷史高位水平，證明你夠打，手風順後市尚可再戰。如果近期股票倉淨資產開始偏離高位，證明唔夠打，可選擇忍手。第二，都係嗰句，宜撈不宜追。可以買乜？不妨睇返上一期。晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20171027/20196276
智取大市：我們要多謝恒生
1 :
GS(14)@2017-11-05 16:39:09一隻閱文（772），火熱起上嚟可以有成40萬人認購，以18歲或以上超過600萬嘅香港人口計，大約每15個成年人就有1個抽閱文，凍資成5,200億。最出奇嘅係，身邊有唔少細佬妹同事平時唔炒股，一拎就坐底十幾萬蚊出嚟，透過恒生提供嘅「一口價」，借夠一球抽閱文。喺港股市場內，佢哋平均冇機會贏錢，就連拎幾千蚊出嚟博都費事，但只要出現連自己都十拿九穩有得贏嘅局，原來多多錢都敢拎出嚟博，甚至要借一世人都未必儲到嘅一筆錢，都狗衝埋佢。小弟平時對抽新股興趣一般，今次都由冇得抽新股嘅IB，搬番少少錢去恒生「一口價」抽孖展，奈何恐怖到堂堂大銀行恒生，上星期五「一口價」孖展都爆埋。事後諗深一層，恒生做嘅係普羅大眾生意，一次「一口價」，就為一班連耀才、致富證券戶口都懶得開嘅用戶，打開進入股市之門，所以「孖展爆得快，其實冇乜壞」。呢40萬人今次相信能夠贏到蠅頭小利，正因為絕大部份嘅百萬孖展客平時冇乜留意股票，於是抽一抽新股賺過一次，亦會提高佢哋對股市嘅興趣。一隻閱文，能夠刺激咁多潛在新手入場，一班戰友自然笑逐開顏：「嚟緊又有魚吃咯！」仲要留低句：「多謝恒生！」晉佳
http://fb.com/advanceguy1本欄逢周一、三、五刊出
來源:
https://hk.finance.appledaily.co ... e/20171101/20201092
Next Page