智取大市：智能汽車的威力
1 :
GS(14)@2017-05-18 02:13:06股價，賣嘅係兩種事情，第一種係價值，第二種係希望。今時今日，港股市場裏面有價值嘅嘢，唔算少，但未來嘅銀行都係銀行，磚頭都係磚頭，銅鋁鋼繼續係銅鋁鋼，藍籌入面賣M巾的，相信未來的M巾都不會識飛。賣價值容易，賣希望的，喺港股市場確係稀有產物。淨係睇蘋果，33年前成功開發Macintosh，然後24年後再將Macintosh變到一部手機大小嘅iPhone，下一步竟然係開發汽車，將來會好似Model S咁幫你將汽車改做電動，再加上無人駕駛功能就算？定係整出一架汽車咁大、但威力比iPhone放大以幾何級倍數嘅機械怪物？蘋果份野心唔使畫出腸。智能汽車，未來似乎唔止係運載血肉之驅嘅死物，配有無人駕駛、電動、網絡連接，可以做到乜嘢？有可能係你喺室外一個步兵，有睇《火影忍者》嘅話，更貼切會係你嘅一個「影分身」。與其話佢係一部汽車，倒不如話佢係順便有汽車功能嘅機械人。由Macintosh變做iPhone需要廿幾年，?家iPhone都十周年，蘋果要成功將Apple Car推出以至普及化，相信仲有一段頗長時間，但電動、無人駕駛技術阻力不大，餘下政策阻力，歷史告訴我們阻力亦不會大，進度或比想像來得近。呢個機械人普及化嘅概念，蘋果係長線首選之一，至於其他概念股，小弟會更重視供應商如何捕捉機會，多過所謂嘅沽空報告。
晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170515/20021259
智取大市：基金揸科網心態
1 :
GS(14)@2017-05-19 05:40:00周二本欄目即時新聞講過要逢高減持，點知股災話咁快周四出現。揸科網股唔清倉都逼住要減倉避風險，係大跌市常識，否則再大跌死咗都唔知乜事。科網股大跌原因係太貴、升太多、超買，大家睇住Facebook、蘋果、Amazon、Alphabet走勢才至關重要，呢幾隻加埋係萬億美金計嘅市值王國，係市場真正風向，IGG（799）炒唔炒得起，咪又係睇住班大佬。?家每個基金總會重倉揸實兩三隻科網龍頭股，業績先能夠見得吓人。港股基金裏面，內地金融股係基本注，但冇基金經理會旨意佢哋成為進攻點，大型科網股呢種坐定定就贏嘅賭注，令佢哋一直珍而重之，呢兩年賺表現費就係靠科網股，所以升極都有，一跌就有人撈，直至有一日市場買科網股嘅子彈耗盡為止。究竟基金驚股價跌多啲？定係驚唔夠貨跑輸大市多啲？正常驚後者多啲，因為齊齊輸錢事小，自己升市跑輸事大。只要龍頭大跌市限於一兩日，相信市場共識未改。除非美國科網龍頭連續幾日大跌，形成另一股「今日唔掟，聽日輸更多」嘅預期，由唔夠貨恐慌變成唔沽貨就恐慌，先至會引發真科網股災，暫時牌面機會唔算大。
晉佳
http://www.fb.com/advanceguy1本欄逢周一、三、五刊出
來源:
http://hk.apple.nextmedia.com/financeestate/art/20170519/20025870
智取大市：舊經濟只限短敍
1 :
GS(14)@2017-05-26 23:53:43科網股震倉後，資金流番去傳統板塊，近日靠內地金融股谷起恒指，尤其之前大弱勢券商股反彈得較快，建行（939）同工行（1398）喺保歷加中軸有支持，一浪高過一浪，牌面睇升勢未完。金融股都爆上，相信戰線會蔓延其他板塊，商品資源股近排築底似準備反彈，包括洛鉬（3993）、江銅（358）、中鋁（2600）、馬鋼（323）呢批，當然亦要睇銅價、鐵礦石價能否觸底反彈配合。港股似乎唔超買唔肯停，大市成交越嚟越旺，氣氛仍有所提升，舊經濟股炒得起，就開始逼近見頂，大家要注意落車時間，越旺越要準備減持獲利。短線資金換馬輪流炒追落後嘅行為，毋須太費唇舌。不如講吓近排同公司管理層見面嘅發現，大家都不約而同討論以東歐國家作為生產地嘅價值。唔經唔覺，近年唔少有能力嘅製造企業，選擇喺中國以外增加產能。據上市公司高層講到，波蘭人工約4,000蚊人仔，同大陸高學歷畢業生相若，亦擁有良好嘅基建同engineer人才；烏克蘭係平價之選，月薪略多過100歐元。能夠未來有能力喺海外增產，節省人力以至產品運輸成本，大搞國際化，係成為工業股贏家條件之一，其他容後再談。
晉佳
http://www.fb.com/advanceguy1本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170526/20033907
智取大市：再尋找恒大模式
1 :
GS(14)@2017-06-10 12:21:46港交所（388）上星期五嘅大陽燭，令到近期審慎嘅戰友，都覺得港股大時代可能重演。雖然小弟覺得未到見頂日，但講緊隨時以日倒數，至於大時代？機會唔大，就算有個似樣爆升，功力最多得番30%。切勿期望過大，尤其當大時代憧憬成為市場主流心態之時。吉利（175）近期成為「恒大2.0」，汽車股接力內房股喪炒，睇得出北水玩法勁誇。吉利以至強勢汽車代理股，都切忌估頂，恒大爆升兩成幾當日，單日成交可以45億元，吉利上星期五爆升成交18億元，剩係靠恒大啲錢去湧，都已經唔講得笑，嚟緊有乜癲況做唔出？而中升（881）、正通（1728）一樣超強。汽車股之後，相信有超強板塊接力，係濠賭？定科網翻生？再觀察。汽車股跑出，科網股等翻生，介乎兩種概念之間，ASM太平洋（522）兩邊都食正條水。ASM太平洋生產半導體封裝設備，目前主要照顧手機市場，未來就照顧無人駕駛市場，佢算最有前途港股之一。股價只需升多1%，突破117.5元，就從近期調整低位反彈逾0.618倍，確認調整結束。之前連日守住50日線再向上，似乎追汽車股落後、同時較科技股提早發力，破117.5元買得過。
晉佳
http://www.fb.com/advanceguy1本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170605/20044391
智取大市：高成數按揭警號
1 :
GS(14)@2017-06-10 12:39:20海之戀排長龍賣樓，連低調發展商建灝嘅啟德新盤天寰都爭崩頭，當然顯示到樓市有幾熱，亦可以睇到，發展商喺寡頭壟斷嘅新盤市場當中，定價方面有幾大優勢，賺得有幾盡。新盤排隊萬人空巷，每次卻以唧牙膏式賣最多幾百單位，以大家中學讀過嘅入門經濟學已經可以簡單解釋到，純粹係寡頭壟斷情況下，發展商做到price discrimination，賣完見反應好，再加推再加價，價格可以不停提升，個盤賣晒，下個盤又再賣貴啲，長期以高於均衡價格定價。目前發展商可以透過財務公司引入高成數按揭，加大市民槓桿入市，係消耗購買力嘅非常重要一着，情況唔多健康。以承擔能力計，連買二手樓能力都冇嘅準買家，過唔到銀行壓測，反而可以利用高成數按揭、繞過壓測去買一間更貴嘅樓，簡直係笑話，例如揸住300萬cash，而家連七百幾萬兩房樓都買唔到，但竟然可以去搶一間價錢高水嘅過千萬新樓。發展商高成數按揭遲遲未見政府出招打壓，唔難理解。目前正值特區政府接班期，剩返一個月，除非有中央指令，否則可能形成政府出招慢半拍嘅死穴。去到林鄭接班前後，如果冇能力快速出招限制發展商高成數按揭，隨時進入出招太遲會整瓜樓市、唔出招催谷泡沫嘅死局。撇除買樓賬面贏輸問題，對於買家嚟講，好似阿仔笑騎騎有阿爸阿媽full pay買樓當然另作別論，而本來冇能力買二手樓嘅用家，係咪仲要勉強、甚至動用全家力量，以高成數按揭去追高水嘅新樓？未有現樓喺手仲要鎖死三年？的確要冷靜、三思。晉佳
http://fb.com/advanceguy1
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170606/20045733
智取大市：大家有選擇遠離市場的自由
1 :
GS(14)@2017-06-10 13:07:54瑞聲（2018）停牌近三周先復牌，葛咸城出埋2.0報告，理據比1.0更不足，阻唔到股價反彈，不過要爬返上去110蚊樓上，要等投資者慢慢失憶。瑞聲特登等三個星期先復牌，時間表一定諗過度過，究竟係估計手機設備股係適時轉強？定係估計大市接近短線見頂，趁高位復牌？單睇其餘手機股今日反彈勢頭唔算強，相信瑞聲決心趁市況近高位復牌，更貼近形勢。近期喪炒內房股、然後帶起金融股、人民幣升值概念股、汽車股，再到本地地產股，到今日嘅資源商品股水泥股，升勢持續性，似乎一蟹不如一蟹。熱炒板塊嘅上行空間開始有限，如果剛剛跑出、借「雄安新區」概念炒上嘅資源商品水泥股，火速後勁不繼的話，反映整體市況有需要調整，先能夠令股價再度出現值博空間。買賣股票，係可以選擇幾時遠離市場一陣，有時等三幾個星期甚至只係幾日，就可能睇到更清晰嘅方向同機會。恒指9周RSI79.7，從來唔係埋身肉博嘅好時機，有冇下一波攻勢？先等調整再講。晉佳
http://fb.com/advanceguy1
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170608/20048220
智取大市：有食好食的時代
1 :
GS(14)@2017-06-10 13:26:25港股幾乎日日玩法唔同，前日又點會知道，噚日啲話題股如瑞聲（2018）同國泰（293）、仲有5月數據令人失望都拗腰狂彈嘅吉利（175），全部拔足狂升？恒指幾可肯定正在倒數，但近期玩法日日新鮮，今日喪炒科網股，聽日唔肯定仲有冇得繼續開turbo，轉去第二個sector？還是齊齊見頂？即市狗衝只得兩途，第一，強勢股壞消息跌唔落、拗腰能力超高，呢啲一起動就一條氣炒上，今日吉利係好例子；第二，大哥炒上，二哥未起動，但二哥圖表都仲係靚，就仍有追落後空間，中升（881）噚日未跟吉利升，但高位橫行，兼連續兩日呈下影線較長嘅十字星，短線似有計。策略似打電競，唔多唔少要考反應，就係今日唔知聽日事，被逼變得短打。長期持有？要搵有潛力但估值合理嘅股？仲要唔好咁細隻所謂令人安心？去到二萬六呢個位，好難又要平、又要靚。隻隻強股炒到貴一樣喪升，就吉利而言，預測2017年市盈率15.3倍，反映佢係國產車大贏家、新能源車概念，雖然有概念就有想像空間，但打開業績睇盤數都感覺意義不大。強勢股估值貴、累積升幅又多，確難放心長揸，惟有邊升邊食糊，保得住盈利，方為大師傅。晉佳
http://www.fb.com/advanceguy1本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170609/20049335
智取大市：最可靠的領袖股
1 :
GS(14)@2017-06-23 01:35:04科技股當中，除咗騰訊（700）長揸長有之外，去到美股嘅FAANG，以至阿里巴巴，其實左揀右揀，好似齊上齊落，短線只在乎個別股份好壞消息而分辨出強弱，長線揀股，投資者各有心水。
FAANG當中，蘋果受到新iPhone連線速度差過對手嘅壞消息拖累，股價明顯跑輸同業，假如要博FAANG短線大波幅破頂爆上，咁就要捨棄蘋果。其餘股份當中，小弟認為Amazon同Facebook創辦人固然都極具吸引力，如果用預測2017年市盈率30.7倍去投注朱克伯格呢個人，又真係抵到爛。朱伯一舉一動，都令小弟汗顏，睇住呢個人為咗征服網絡世界可以有幾盡。日日着灰色汗衫、娶華裔妻子、學普通話、幫個女起埋中文名叫陳明宇，當年首次令小弟驚訝嘅係，早喺2014年10月，朱伯喺清華大學以普通話演講，見證呢個人為盤生意乜都肯做肯學。早年李嘉誠買佢股票，確實相映成趣，因為朱克伯格正正係一個李嘉誠嘅化身。朱伯識英文懂西方文化，同時嘗試了解華人文化、語言、思想，表面睇係想Facebook進入大陸，但睇嚟唔係咁簡單，作為一個網絡世界統治者，精通中西文化，或許係必要條件，因為中西文化正正佔據咗大半個地球嘅社交網絡世界。要將自己嘅積蓄投注一個人，以前係李嘉誠，今時今日應該要揀朱伯了。
晉佳
http://www.fb.com/advanceguy1本欄逢周一、三、五刊出
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170619/20060332
智取大市：李嘉誠退休的潛台詞
1 :
GS(14)@2017-06-23 02:49:28記者問李嘉誠幾時退休，都問咗好多年。《華爾街日報》最近傳出李嘉誠出年之前辭任長和（001）主席，即係快將退休，傳得咁實，成事機會睇怕不低。李嘉誠已經88歲，長和系亦已完成重組，系內業務分散風險程度同穩健程度，都遠高於長和系全盛時期，經營複雜度則比以前為低，李澤鉅加一眾管理層，要好好handle長和系上市公司，難度不大。正如李嘉誠話齋，佢想退休就隨時退休，所言非虛。李嘉誠本身係超人，雖然你估唔到佢諗乜，不過你能夠想像到，除咗鍾意賺到盡之外，佢本身亦係一個非常熱愛做生意嘅人，所以去到88歲，佢發現新事物時仍興奮莫名，你叫佢唔做生意，等如唔畀佢玩，會更加身癢。你亦要相信，連李嘉誠都唔睇好嘅生意，呢個世界都冇乜人可以做得好。李嘉誠若如傳聞般今年退休，或許有兩個可能性，第一，長和系已經冇乜新業務方向可以再補充，未來只會保持沉悶，連誠哥自己都覺得唔好玩；第二，長和系未來潛在大型長線投資機會有限，令佢老人家發揮所長嘅機會都唔多，反正磨爛蓆多幾年都冇乜大建樹，呢個moment不如索性退休，畀李澤鉅多啲機會。長和千億上市王國，如果連佢老人家都唔覺得可以搵到令佢興奮嘅巨型收購，唔知誠哥會唔會覺得金融市場估值貴？定係對於未來環球經濟增長動力存疑？不過佢願意幾乎全身而退，或許證明未來世界唔夠好玩，就咁已經唔係一件好事。無論點都好，如果要開個盤，估李嘉誠退休後個金融經濟世界好咗定差咗？估差咗勝算應該都幾高。晉佳
http://fb.com/advanceguy1
97年主權移交至今，香港前進還是倒退？「蘋果」與你細數廿載風雨。【回歸二十年】專頁：
http://hksar20.appledaily.com.hk
來源:
http://hk.apple.nextmedia.com/financeestate/art/20170622/20064173
Next Page