我主場：君如儲火 撩秋生開拖
1 :
GS(14)@2015-07-23 01:31:33一個性格火爆、一個外表兇惡，會變成怎樣？就好像舞台劇《狂揪夫妻》，演喜劇多年的吳君如，今次處女下海成為舞台劇初哥，壓力大得很，在劇中可以「狂揪」秋生，笑言真是難得機會。現實中的君如自認火爆，試過與另一半陳可辛嗌交嗌到反枱，外表兇惡的秋生則自言怕老婆，經常被老婆呼喝，二人性格剛好相反。撰文：溫敏芝
吳君如拍過無數喜劇，但從未試過演舞台劇，今次與秋生合演的舞台劇《狂揪夫妻》將於下月6日在灣仔演藝學院公演，君如坦言班底好、劇本好才被吸引，加上由好友秋生邀請，才放膽去演。日前君如與秋生在九龍灣接受本報專訪，君如說：「其實之前都有人搵我演舞台劇，有時劇本唔啱，有時時間唔啱，今次因為有秋生、甄詠蓓同潘燦良咁好嘅班底，所以先試吓，對自己都幾大挑戰，我唔怕比較嘅，佢哋會就住我，如果做得好，咪好囉，做得唔好係應該嘅，不過我都要對自己有信心。」君如在劇中有多場「狂揪」秋生戲份，問到會否動真手打對方時，她笑說：「堅啦，佢咁多pat（墊）怕乜，不過佢啲肉好難打得入，成日話自己習武。」在旁的秋生即笑說：「因住我擋一擋你，你骨都斷埋，哈哈。」君如坦言現時最困難是要熟讀對白及劇本，她說：「啲對白又抵死又陰濕又好笑，好難記，一人一句彈嚟彈去，舞台劇就係咁。」
■舞台劇開始綵排了一段時間，君如坦言已感受到很大壓力。微博圖片
■從未試過演舞台劇的君如，讚《狂揪夫妻》班底好、劇本好才被吸引。
鬧老公訓練有素
自從舞台劇開始綵排後，君如坦言已感受到很大壓力，每日由朝早綵排到晚上，與拍電影完全不同，她說：「拍戲可以分鏡頭，可以NG，但今次連續做成兩個鐘冇得唞。」問到有否後悔答應演出？她坦言：「我又冇好後悔，始終好多人做舞台劇都係想提升自己演技潛能，咪試一次咁多囉，如果太簡單做嚟做乜。」講到鬧交，君如一點也不輸蝕，平時跟另一半的陳可辛已經訓練有加，她說：「成日都鬧，我會喝佢，有時鬧佢做乜食咁多牛扒，因為佢好為食，不過一齊咁多年，佢都俾我感染咗，而家開始做運動，我哋都有做吓情侶瑜伽，佢幫我拉筋。」問到相處久了，會否已減少鬧交？她說：「而家係少咗，我性格火爆，佢就斯文好多，不過都試過同佢為咗拗一個題目，我嬲到反枱，佢扮晒知識分子咁，我係老粗嘛，拗唔贏佢就反咗成張木枱，我啲火就係咁，話嚟就嚟，不過呢幾年生咗個女之後，都收斂好多。以前大肚試過食食吓飯，佢同我老竇阿媽一唱一和，我即刻拍枱走咗，諗起都好幼稚，不過最後多數係個男人氹番我，我好硬淨。」君如笑言現時見到囡囡的脾性，都有少許自己影子。
■有豐富舞台經驗的黃秋生（右），去年夥拍張敬軒為舞台劇《EQUUS馬》演出。
■君如坦言平時跟陳可辛都經常鬧交，又會喝對方。
■外表兇惡的秋生自言怕老婆，經常被她呼喝。
秋生被喝到失魂
現實中的秋生又是怎樣？秋生笑言與劇中一樣，被老婆喝到「三魂唔見七魄」，問到結婚多年，有否試過與太太鬧交？他說：「都有嘅，之前試過一次自己病緊，一個人行衰運就會睇術數，玩紫微斗數，嗰時個仔好細，我幫佢開盤，見到話佢嘅朋友非富則貴，我咪話我哋又唔係有錢，佢仲唔係擦鞋仔嚟咩，點知我老婆即刻係咁鬧，佢話『係呀，個仔做乞兒。』，我火滾起上嚟，就打爛晒啲門，無啦啦話個仔做乞兒做乜嘢，又成日話我唔瞓覺，你瞓咪瞓囉，我又冇嘈住你。不過而家冇囉，我哋最近一次討論個仔食乜嘢，我俾佢喝到我成個坐低㖭呀，而家鬧乜嘢交吖，冇鬧交，鬧交等於同拳王比武，邊有得比。」劇中秋生與君如會為小朋友出頭，秋生指兒子學校的事，由老婆去處理，自己不會出手，君如則說會盡量交由學校處理，也盡量不插手，印證江湖事江湖解決。
來源:
http://hk.apple.nextmedia.com/entertainment/art/20150718/19223338