財金冒險號：FIFA變港交所第二
1 :
GS(14)@2017-01-12 08:07:27國際足協（FIFA）唔單止腐敗，仲荒謬絕倫，決定自2026年起，將世界盃決賽周名額增至48隊。「列強」（其實魚腩居多）會分為16組（A至P組），每組三隊踢單循環。16支種籽隊，已肯定包括二流國家，同組嘅非種籽隊有幾多斤兩，更不堪設想。例如波蘭、阿爾及利亞、卡塔爾同組，邊個想睇？而因為頭兩名晉身32強淘汰賽，肯定會出現一和一敗零入球都出到線嘅趣怪現象。如此「擴張」，無非為錢，因為決賽周比賽場數會由64場增至80場，但肯定犧牲賽事嘅刺激性，上年嘅歐洲國家盃正正係反面教材：決賽周本來得16隊，往往大戰連場，增至24隊後，北愛爾蘭、阿爾巴尼亞之流都有份玩，結果悶戰充斥。如果FIFA有參考港交所（388）嘅案例，就會知何謂more is less。2011年3月，港交所延長交易時段——縮短午休時間至個半鐘，2012年3月再減至一個鐘，話要同A股接軌，另一盤算應該係加時等於更多成交、更高收入。結果？首次加時前之一年，港股日均成交697億元，恒指日均波幅247點；之後一年縮至675億元，第二次加時後之一年，成交更跌至556億元，波幅縮至200點，刺激程度下降。近年港股淡靜，股民轉戰美股，港交所顯然「功不可沒」。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20170112/19893789
財金冒險號：寧做廢青不作樓奴
1 :
GS(14)@2017-01-26 18:18:28■對於大部份年輕人來說，買樓係「超離地」的目標。 資料圖片
有個82歲婆婆，一炮過530萬銀買咗個荃灣新盤，話「驚銀紙貶值」。喺香港呢片彈丸之地，買磚頭唔單止抗通脹，更係發達嘅不二法門，呢種傳統智慧，婆婆奉為真理毫不出奇。奇在點解要買新盤？呢個新盤預計年半後至收樓，期間嗰530萬銀一個仙利息都無，倒不如買個二手盤即時放租收息。其實今日唔係想講投資，係講人生目標。婆婆唔係富二代，可以一炮過買樓，全靠「捱，後生時打好多份工，每晚瞓兩個鐘」。婆婆「努力工作、量入為出、努力儲錢」，固然係美德，而佢寄語時下年輕人要「人望高處」，幾時講都啱，但潛台詞係「你哋好似我咁死慳死抵，終有一日都買到樓」，就十分不合時宜。婆婆嗰一代香港人，後生時未有公屋，可能住木屋，又無綜援，手停口停，日捱夜捱係為咗「生存」。時下年輕人，縱有百般鬱悶，總算衣食無憂，講究「生活」。雖然人人都要住，唔想「幫人供樓」，就自然想買樓，有調查話超過一半80後想喺三年內在港置業。但係想還想，佢哋會為咗買樓，以婆婆為榜樣嗎？咪玩啦，連去少次日本都未必肯啦！對於大部份後生仔來說，樓價已超離地，18年不吃不喝至買到樓，而飛一轉日本狂食喪買，不過花一萬幾千，不如及時行樂。你話我廢青，我笑你樓奴。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20170126/19908680
財金冒險號：富豪仲移民香港？
1 :
GS(14)@2017-02-03 02:55:14內地富豪肖建華離奇在本港失蹤，據聞被黑幫挾上大陸，然後發聲明（姑勿論係自願定被迫），內容極有黑色幽默感：「中國政府是文明法治的政府」，令人諗起電影《整蠱專家》中，食咗謊言豆沙包嘅周星馳話「李鵬係我哋最偉大嘅領袖」。「本人為加拿大公民」更可圈可點，足以震驚14億人：原來走資落嚟香港買樓買股，甚至擁有西方文明國家護照，根本唔安全。上年10月底，胡潤與諮詢公司發表報告，指中國最有錢嘅人當中，超過六成計劃喺未來三年投資海外物業，而美國係移民及投資嘅熱門地方。呢一點毫不意外，中國人「口裏說不，身體卻很誠實」，平日鬧美帝，但發夢都想做美國人。報告嘅另一點更有趣：只有1.1%的中國富豪想移民香港並置業，可見中國富豪心知肚明，移民香港難保證身家性命安全，尤其係超級富豪，邊個自問發迹過程全無犯法貪腐、唔怕被強力部門「跨境執法」？不過，兩年前巴克萊銀行訪問過2,000個中國富豪，有近半話會離開中國，而竟然有三成人首選移民香港。點解胡潤同巴克萊嘅調查結果差咁遠，小生唔知，但我肯定如果今日再問呢班有錢佬，眼見香港經過三權合作、人大改基本法、李波、肖建華事件，有得揀嘅話，移民一定唔揀香港。如此轉變，或者會對香港嘅樓市有微妙影響。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20170202/19914854
動物園缺監管遊客冒險開車窗影黑熊
1 :
GS(14)@2017-02-05 10:39:31■黑熊追着私家車，拍打車窗。
浙江寧波雅戈爾動物園大年初二發生老虎咬死人事件，但內地動物園仍不加強監管！在重慶有野生動物園的黑熊園區，有人為近距離拍攝亞洲黑熊，竟不怕危險打開車窗，有網民直指有關行為愚蠢，批評片中遊客「不出事永遠不知道生命的可貴」。
黑熊自由走動追車拍打
在重慶樂活樂都主題公園的黑熊園區，遊客可乘旅遊巴或自駕遊參觀，從網上近日流傳的一段遊客拍攝影片可見，體形粗壯、性情兇猛的西藏棕熊被關在圍欄內，看見車輛經過，便張牙舞爪，相當有攻擊性；相對較溫和的亞洲黑熊則在園區內自由走動，有黑熊追着私家車，拍打私家車車窗。有導遊在園區旅遊巴上向遊客介紹，「門口的黑熊要收過路費，牠的過路費是蘋果」，並鼓勵遊客買蘋果拋出車外，「牠可想吃了，你看牠在這裏」。然後有人大膽打開車窗，一頭黑熊攀着窗框好奇觀望車內，看起來像覓食。亦有黑熊趴在關閉車窗上，遊客擔心牠會開窗爬入車內，導遊坦言黑熊懂得打開車窗，但隨即安撫遊客，聲稱車窗已鎖上。影片在網上引起熱議，據知動物園的猛獸區一律不准開窗，不過有網民聲稱前天看到園方司機打開車窗，「提醒了都不關，太可怕了」。新浪微博
來源:
http://hk.apple.nextmedia.com/international/art/20170203/19916297
財金冒險號：唔同人癲轉買REITs
1 :
GS(14)@2017-03-03 00:58:14樓價破頂，大陸發展商又癲價搶地，香港人一係陪佢癲，一係等爆煲，但等咗好多年都未爆，如果想投資物業，可以參考吓全球有錢佬嘅部署。英國物業顧問萊坊（Knight Frank）新鮮出爐《2017年財富報告》，綜合全球超級富豪（唔計自住物業擁有3千萬美元資產）嘅投資意向。有錢人愛磚頭，平均佔資產淨值24%，亞洲人更明顯，平均佔29%，但佢哋都嫌唔夠，仲想增持物業。不過物業分好多種，未來最吃香嘅唔係住宅，因富豪平均已有三、四間，好多國際都會都有辣招限制外國人買樓，成本增加，不如買商用物業。超級富豪較有興趣買寫字樓，以及日益受歡迎嘅物流倉庫，因網購盛行，物流中心需求大。相反，零售商舖受累購物模式改變。商用物業仲貴過住宅，上唔到車嘅港人更加買唔起，但唔係叫你學人炒舖、炒劏場，初哥隨時輸死，而係買REITs（房產信託）。香港大約有十隻REITs，大部份息率超過5厘，好過買樓收租，又唔使被SSD鎖住3年。大部份REITs估值亦低，資產淨值折讓閒閒地達5成。物業組合有商場、停車場、寫字樓、酒店，尚算多元化。大陸資金來港唔止搶住宅地，肯定會再出手買全幢商廈，到時有望推高REITs嘅估值，咁就財息兼收。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20170302/19944481
財金冒險號：法國女媧補天
1 :
GS(14)@2017-03-24 17:06:29李首富拋下一句「女媧補天」。究竟下屆特首係男定女，禮拜日就知，但無論男女，無非係中共嘅傀儡，只係一個難睇啲，一個得體啲。對於搵錢至上嘅香港人，奶媽定薯片做，對港股同樓市影響分別唔大。反而法國會否爆出個女媧，影響就深遠得多。法國下月23日舉行總統大選第一輪投票，焦點係「女版特朗普」右翼勒龐（Le Pen）會否爆冷跑出。Le Pen主張大減移民數量、驅逐失業移民、脫離歐盟、重用法郎。咁極端嘅立場，幾年前全無市場，但多得歐洲左膠政客「無限量接收」敍利亞難民，歐洲連番爆發恐襲、難民強姦非禮，民意極速右傾。民調顯示，Le Pen同中間派馬克朗（Macron）支持率都係約26%，可雙雙進入5月7日嘅第二輪投票決戰。按照慣例，法國選民會喺第二輪投畀較溫和嗰位，所以從未出過極左或極右嘅總統，正路推測，支持偏右共和黨菲雍（Fillon）嗰18%選民，第二輪會轉投Macron，Le Pen就功虧一簣。但時勢造英雄，上星期巴黎機場恐襲，兇徒被及時射殺，昨日倫敦就冇咁好彩。一年前，法國、比利時又係接連被襲，搞到英國脫歐。今次倫敦恐襲等於幫Le Pen拉票。女媧傳說：水神共工被火神祝融打敗，頭撞西方世界支柱不周山，天塌陷而天河洪水衝落人間，於是女媧煉五色石補天。伊斯蘭恐襲就係衝擊緊西方世界，法國選民會否推舉女媧補天？笑笑生
http://fb.com/sneeringman
來源:
http://hk.apple.nextmedia.com/financeestate/art/20170324/19968051
財金冒險號：輝山爆煲與內銀壞賬
1 :
GS(14)@2017-04-08 19:37:49輝山乳業（6863）爆煲，據《壹週刊》報道，遼寧省政府介入及撐腰，要求輝山之債權銀行承諾「不抽貸、不壓貸、不起訴」。這難免令內銀的壞賬憂慮揮之不去。內銀上月底公佈去年業績，壞賬率普遍較第三季回落。輝山有上市，且股價單日喪跌九成，自然多人關注，但相信只係冰山一角。最近山東爆發危機就顯露更多問題：魏橋集團旗下魏橋紡織（2698）及中國宏橋（1378）都延發去年業績，後者被沽空機構指造假；齊星集團及天信集團亦陷入債務危機。咁大間上市公司都涉嫌造假，斷估有大量非上市民企都係咁，只靠地方政府撐腰至未爆。政府係咪撐得住亦成疑。銀行出名落雨收遮，一旦有銀行call loan，其他銀行都會一窩蜂，結果本來無事嘅企業都出事，造成債務連鎖危機。早於輝山上市初期，金融圈已盛傳其造假，點解理應最重視風險管理嘅銀行都中招？其實都有銀行睇穿，建行（939）喺2014年收回畀輝山嘅信用額度，指輝山「不僅財務有問題」。奇在去年底渾水（Muddy Waters）唱衰輝山後，平安銀行仍將部份輝山貸款延長一年。諗真啲，平安銀行未必沒警覺，只係深知債仔冇錢還，與其撇賬，不如延長貸款拖住先。無論係邊種情況，都揭示內銀經營有問題：一係被政府粗暴干預、一係自己風險管理差、一係民企以債冚債已成常態。建行話「不良貸款已見頂」，信不信由你，反正我不信。笑笑生
http://fb.com/sneeringman
來源:
http://hk.apple.nextmedia.com/financeestate/art/20170407/19982026
【火車情意結】中年夫婦冒險追夢 山旮旯開鐵路模型Cafe
1 :
GS(14)@2017-04-10 23:36:33模型火車迷Peter，兩年多前在山旮旯開了一家模型店，希望給其他志同道合的車迷一個喘息的空間。
中年創業或轉型，很多人覺得冒險，但其實也是一種堅持，而家唔做，仲等幾時？
48歲的林欣Peter，從事模型貿易接近三十年，自小就愛上鐵路模型，「我大約四、五歲時，爸爸出差買了套鐵皮火車玩具給我，我玩到不亦樂乎，就慢慢開始對火車有情意結，長大後都要擁抱這玩意。」鐵路模型的玩家，十之八九都是男性，其實有咩咁好玩？「鐵路模型係好多人的兒時回憶，除咗可以了解唔同國家嘅鐵路文化，睇下啲模型造得有幾精細外，仲可以用想像力創造理想的情景，還可在上面操控火車速度、整到出煙、出聲，我覺得對身心健康有很大的樂趣和吸引性呀。」
Christine則在丈夫的模型店對面開了一直想開的Cafe。
兩夫婦一起在中年追夢，也是一種浪漫。
2014年底，他決定開舖與人分享自己的心頭好，「都算係夢想之一」，近二千呎的店舖除了賣模型，也放有自己的珍藏，更重要的是有幾組大型路軌，在有土地問題的香港，很多人的珍藏只能放在櫃頂或床下底，不見天日。如果想在家中找個地方玩路軌，更是天方夜譚。「有好多客人都係夾份租個工廈小單位，得閒上去個小天地放車。」Peter又覺得，現今很多大人細路拿電話做低頭族，沒有互動，但玩火車模型則不然，在現實生活中可看到實物，甚至將相關知識應用在真實環境中。」
店舖選址在青嶼幹線觀景台，人流極少，雖然在這開店有點冒險，但卻有別一番景緻。
每逢周末，總有不少車迷專程帶同珍藏到店內放車，順道交流心得。
男人買模型大概和女人買衫買袋買化妝品一樣，要偷偷摸摸，最好不要被另一半或家人識穿，否則很大機會換來兩個字：「嘥錢！」但Peter比一般男人好彩，因為另一半不但無反對，還出力支持，「開得成都係要多謝太太支持，佢話我成個貨倉都是珍藏，亦好多人唔知道我做呢行(模型貿易)，無機會畀人認識，不如試試轉型。」比丈夫Peter年經四年的林卓娜christine説：「我覺得人生在世，一定要有嗜好、追求和夢想，玩模型係正常嗜好，好健康，所以我選擇支持。」做了時裝貿易廿多年的她，多年來都因為工作和丈夫聚少離多，今次她決定辭職和丈夫拍住上，連舖位都幫他找好，更開始愛上這些玩意，「其實拍拖時，我都唔係完全唔玩嘅，而係玩周邊情景設計、幫人仔上色，我會同佢一齊玩，有互動的。」幫丈夫圓了夢想，哪她自己的夢想呢？「其實開cafe係我心願」，幾年前，她機緣巧合下找到現有舖位招標，剛巧店舖連同對面的小舖位一起出租，他們就開了一間小caf?，實現二人的夢想。
開舖做生意的，都總想開在人流旺的地方，不過他們卻選址在青嶼觀景台，客人要前往，除了自駕，就只能乘搭一小時只有一班的小巴，平日人影都無隻，點解仲揀？Peter笑説：「我選擇做模型呢行作為終身職業已經好冒險，都唔介意冒多一次險吧。」身旁的太太也補了一句，「自己都話自己傻，成日都有客問我哋點維皮，好擔心我哋，老實講，開頭係蝕錢的，但我哋諗法同其他香港人唔同，唔使話要搵好多好多錢，我哋覺得開心更重要，開心行先，而家比以前開心得多，錢方面，生活得到就可以。有時真係要諗下，點解每日要晨早去番工，披星戴月先返屋企，無時間同家人相聚，做自己喜歡嘅事。」雖然店舖地點隔涉，但每逢周末都有很多車迷專程來放車，兩夫婦希望車迷在這裏有個喘息的空間。「我哋好多客人係做工程師、醫生嗰啲，承受的壓力較大，佢哋話好鍾意嚟呢度，話我哋荼毒佢哋，總之想放鬆一下就嚟。有個客人已經92歲，話每日都要玩兩轉火車，唔玩會有高血壓。」店舖雖然山旮旯，但來這裏的人，總是帶着一份閒程逸致，在那小小的路軌旁，他們都能暫時忘掉壓力，全情投入在火車的世界，Peter說：「希望透過呢度畀車迷有機會聚會同玩，見到佢哋開心，我就好安慰架喇。」
Hobby Nana Café地址：青嶼幹線訪客中心觀景台記者：黃子配攝影：梁志永2017果籽繼續認真知味。識買惜用。行以求知。好事多為。重修舊好。緊貼果籽報道，即like：
http://fb.me/AS.AppleDaily
來源:
http://hk.apple.nextmedia.com/su ... t/20170410/19985091
財金冒險號：沙頭角的置業故事
1 :
GS(14)@2017-04-29 23:02:062017年5月：我叫阿強，28歲，同家人住東涌、喺東涌返工，女友都係東涌人。最近有篇潮文，講喺東涌拍拖連搞嘢嘅地方都冇，簡直講中晒我嘅心聲。為求「有樓有高潮」，我一直留意樓市，但連東涌上車盤都要四百幾萬，直至上星期見到沙頭角新盤入場價257萬，忽然覺得生命滿希望。257萬嘅單位得277呎？唔緊要，我用早排某發展商金句「紫禁城再大，皇帝都係瞓張牀」自我洗腦。樓盤位於禁區，要有沙頭角居民身份至買得？唔緊要。我搵到個沙頭角劏房，月租千八，當係租個迷你倉，咁就得到居民身份。沙頭角去東涌返工，Google Map顯示來回要五個鐘？都唔緊要，發展商話「禁區或在不久將來解除」，到時區內創造成千個職位，唔難轉工。我傾盡全幅身家廿幾萬，借埋發展商二按，成功上車。唔靠父幹、未夠30歲就買到新樓，剎那間由廢青晉身人生勝利組！兩日後，上女友屋企食飯，故作輕描淡寫地向未來外母自爆買咗樓。我當然無提沙頭角，而係話新界東：「《蘋果》財經作家曾博士都話，新界東係中產新樂園。仲有，特首最近帶團去大灣區考察，我買嗰層樓就食正大灣概念，對住大鵬灣，再遠少少就係大亞灣。」未來外母四萬咁口，夾咗件雞脾我食。2022年5月：入咗伙三年半，禁區仲未解除，我個屋苑嘅二手成交全部係蝕讓，我唯有自我催眠「自住無所謂、自住無所謂……」笑笑生
http://fb.com/sneeringman
來源:
http://hk.apple.nextmedia.com/financeestate/art/20170428/20004260
Next Page