財金冒險號：有種關愛叫人顫抖
1 :
GS(14)@2016-08-18 06:01:13是的，那是一個注定要用黑色筆填寫的日子——8月17日。深港通終於宣佈了，但市場好唔畀面，所謂嘅受惠股全部插水，恒指都先升後跌。如果說9年前那個驚心動魄、恒指一度跌1,200點，然後因為從來無通行過的「港股直通車」而反彈千點的8.17大奇蹟日，係港股進入牛三的開始，那麼今天，當久聞樓梯響、毫無驚喜的「深港通」終於公佈，投資者應該意識到走得快好世界，港股已進入大調整了。李小加喺記者會講咗幾次「好事多磨」，深港通對大陸無疑係好事，但對香港呢？消息公佈當晚，新華社就發文，強調深港通點樣利好香港。小生一路睇篇文，一路諗起曹仁超嘅名言：「香港是好乾淨的水，內地是好污穢的水，『通』完後，你認為香港的水會變得更乾淨還是更污穢？」大陸人從此可以輕易炒賣本港小型股，爛股炒到市值過百億然後暴跌嘅悲劇，肯定越來越多，最終只會令人對細股避之則吉，成交及估值不升反跌。新華社篇鴻文又話：深港通「再次體現了中央政府對香港繁榮發展的重視、關愛與支持」，更加打冷震。香港嘅支柱係金融業，而香港嘅剩餘價值、比上海深圳優勝嘅，係法治、廉潔，近3年警隊、廉署已被閹割，加埋銅鑼灣書店、梁天琦事件，如此「關愛」，令人感激流涕。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20160818/19740590
財金冒險號：國家隊冇免死金牌
1 :
GS(14)@2016-09-17 16:11:29郵儲行（1658）開始招股，咁啱近月內銀股強勢，究竟係有心人推高內銀為呢隻巨無霸新股做勢，定係投資者真係睇好內銀？講親內銀，都要講壞賬，早排提出的債轉股已令人懷疑係糖衣毒藥，最近輪到銀監會發功，出通知要求各銀行幫助企業解困：「不得隨意停貸、抽貸；可通過收回再貸、展期續貸等方式，最大限度地幫助企業解困。」咁嘅要求，等於閹割銀行嘅風險管理，壞賬有排未見頂。萬一壞賬失控爆升會點？好多散戶睇好內銀（尤其四大行）嘅理據，係「國有銀行出事，國家唔會見死不救嘅」。政府一定會救，但只係救間銀行，唔係救小股東。睇番2008年，雷曼冇人救，股東固然渣都冇，同期嘅AIG獲美國政府注資打救，唔使執笠，股東都幾乎血本無歸。獲拯救前，AIG股價已較一年前蒸發95%，獲注資後之半年，股價再跌多近九成，捱到今日至大概升番去獲注資時的股價。小生唔係話內銀股都會衰成咁，只係想指出政府打救，小股東一樣可以蝕到嘔。至於話北水吼內銀，其實講唔通。如果想避開人民幣貶值，一來唔應該經港股通，因為係封閉系統，資金始終要換番做人仔；二來唔應該買番大陸股。中證金等國家隊喺第二季已趁低掃入唔少內銀股，保險資金會喺高位接貨咁笨？笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20160915/19770926
財金冒險號：人幣貶值福定禍?
1 :
GS(14)@2016-10-13 08:07:23上周講起要小心啲年輕富二代接棒嘅大陸民企，話口未完，虎都（2399）就爆出核數師畢馬威辭任。呢隻福建男裝股，CEO郭漢鋒係主席個仔，舊年上任時只得25歲，比起29歲供甩層樓更巴閉，簡直係傑青中嘅傑青。人民幣兌美元失守6.7，創六年幾新低，而恒指就兩日內由高位急跌800點，兩者冇關係就假。近兩個月炒北水南下，港股通淨買入確係罕有地多，市場解釋為大陸人要避開人民幣貶值，搬錢到境外，於是人仔貶值就被當作利好港股因素，到昨日仍見此論調。如果港股好似A股咁主要得大陸人炒，塘水滾塘魚，咁都講得通，但主導港股嘅仍然係外資，佢哋買咗中資股嘅話，想唔想人仔貶值？大好友會話，日圓四年前狂貶，日股就勁升；英鎊近排急跌，英股反而創新高；人仔貶，通脹升，企業盈利就會升，一樣利好H股。英國做到嘅，中國未必做得到，因兩地重磅股性質唔同。英國富時指數重磅股有藥廠葛蘭素史克、滙控（005）等國際公司，業務遍全球，海外收入換算成弱勢的英鎊，變相盈利增加。日本重磅股如汽車、電器就更加倚賴出口。中國呢？雖然人仔貶有利出口，但出口商都係小微企，巨型嘅跨國企業一間都無。就算工行（1398）係全球最賺錢銀行，絕大部份收入來自國內，人仔貶值，外資股東會笑定喊呢？笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20161013/19798957
財金冒險號：滯脹殺到買乜好？
1 :
GS(14)@2016-10-20 08:04:03聯儲局前主席格老斯潘擔心嘅滯脹，如今開始見到通脹苗頭。唔單止美國，英國、歐元區、中國通脹全線升溫。自從2008年雷曼冧檔，發達地區央行都係驚通縮，扭盡六壬都要推高通脹。印咗無數銀紙，通脹終於向目標邁進，本應鬆一口氣，奈何市場已被零息及QE搞到亂晒龍，如果通脹急升，隨時篤爆史上最大債券泡沫，爆發金融危機。有乜嘢會搞到通脹飆升？油價或者會。油價已經由今年低位反彈38%，但按年大概持平，仲未好反映通脹指標。萬一油組出奇地齊合協力減產，加埋特朗普當選，油價就好可能再挾高啲。睇番2012年美國通脹（核心PCE）曾升越2%目標，但之後油價見頂，而且失業率仍高達8%，人工無乜得加，通脹至回落。今日美國已接近全民就業，人工加多咗，通脹就會逐步升。耶倫當然都留意到通脹升溫，但佢冇有怕，忽然提出「高壓經濟」政策，即係為求刺激經濟持續復蘇，可容忍通脹暫時高於目標。耶倫明年仲有冇得撈都未知，視乎特朗普會否爆冷勝出炒佢魷，但聯儲局多年來都係製造泡沫，冇邊個好似伏爾克（Paul Volcker）咁果斷加息，邊個做都好，通脹都係易升難跌，有閒錢可買定啲通脹掛鈎債券，香港iBond或美國TIPS都得。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20161020/19806139
財金冒險號：特朗普非科網剋星
1 :
GS(14)@2016-11-17 11:15:25特朗普當選僅一周，市場已經唔怕呢隻「黑天鵝」，反而炒特朗普概念股，暫時以資源、銀行之類舊經濟股最吃香，科網為首嘅新經濟股就捱沽。通脹預期升、加息呼聲升、計劃放寬銀行業監管，無疑利好銀行股，跟炒美國銀行股無妨，滙控（005）、渣打（2888）卻博唔過，佢哋唔被美國佬告已經偷笑，何況英國銀行隨時又藉脫歐及意大利下月公投等風險向下炒。至於科網股，係咪真係會被特朗普剋死？加州係民主黨票倉，全個矽谷都唔妥特朗普。對於競選時嘅佢，敵人嘅朋友都係敵人，所以毫不客氣地批評矽谷，到處辣火頭。當選後，再無敵我之分。商人特朗普從政，一定明白商場上無永遠的敵人，政治上都係。正如佢競選時抨擊聯儲局主席耶倫，只因大姐係奧巴馬提名，上任後未必炒佢魷魚。特朗普上任後大把嘢做，邊得閒針對科網公司？按照市場趨勢，科網股其實係贏家。債息升，利率快要跟住上，科網巨企都揸住大把現金，加息起碼會多少少利息收入。咁點解科網股要跌？無非獲利回吐。近幾年科網領導大市，既然市場轉炒低殘嘅銀行、資源股，就先從升得最勁嘅科網股抽資。特朗普明年1月上台後，市場對佢嘅政策憧憬好快會冷卻，對時sector rotation完成，科網股可望回復強勢。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20161117/19836038
返屋企要冒險過馬路新西蘭小企鵝有專用隧道
1 :
GS(14)@2016-11-23 07:53:16新西蘭南島海邊城鎮奧瑪魯（Oamaru）的小藍企鵝（blue penguin）每天要?過繁忙馬路來往海邊和巢穴，危險重重，當局為牠們的安全起見，特意在地下興建首條「企鵝隧道」讓牠們穿越馬路，聰明的企鵝們一發現有安全秘道，也立即使用呢。小藍企鵝會到海邊捉魚，日落後帶着魚穫回巢穴餵哺小企鵝，但牠們每天要走過一條繁忙馬路來往海邊和巢穴，除汽車車頭燈令牠們看不到前方外，牠們也是遊客拍照的目標，閃光燈亦會對牠們造成滋擾。研究藍企鵝棲息地的科學家阿格紐(Philippa Agnew)表示︰「在夏季的每個晚上，企鵝要面對大批嘗試接近牠們的人群，又要跟車輛使用同一條路道，這是都市生活的不幸寫照」。幸好在市政府、旅遊當局以及土木工程公司的合作下，為企鵝們興建了一條地下隧道，裝有鏡頭和有光源引路，讓企鵝們不必再受騷擾地安全過馬路。科學家每晚帶一部份企鵝去過隧道，當牠們發現這條道路安全可靠之後，就慢慢學懂並變成習慣。牠們搖頭晃腦地踱步過隧道，樣子可愛萬分，也叫人安心了。英國《獨立報》/美國有線新聞網絡
來源:
http://hk.apple.nextmedia.com/international/art/20161123/19843215
財金冒險號：唔好俾米老鼠榨乾
1 :
GS(14)@2016-11-24 07:35:12有一間公司，成立十年，累計蝕超過70億港元，四年前曾經扭虧為盈，但最近一年又蝕11億銀，管理層話為咗救亡，掟109億銀擴張，要供股抽水。你身為大股東，眼見呢行喺海外正萎縮，大陸又剛剛出現競爭對手，你仲唔唔肯供股？呢隻股叫「香港迪士尼」，已唔係第一次抽水，2009及2014年擴建，大股東特區政府都以債轉股支持，將借畀迪士尼嘅債之中約80億轉成股份，利息都冇得收。抽水發展未必唔好，大部份科網公司都經歷好幾輪融資，但上年加州、巴黎迪士尼樂園遊客減少，可見迪士尼品牌已過時。香港迪士尼本身只能吸引大陸客，劣幣驅逐良幣，歐美日遊客唔會嚟，本地客則多數為博仔女一笑，至甘願同「同胞」逼。弊在上海開咗大你幾倍嘅樂園，只有官僚至講得出「上海迪士尼不構成威脅，反而有助香港迪士尼吸引客源」。唔止上海，東京都好大威脅。大陸人口裏反日、骨子崇日，東京迪士尼入場費仲平過香港，去到順便買電飯煲、廁所板，仲嚟香港做乜？迪士尼樂園作為其中一個景點，冇問題，正如東京、巴黎。但靠晒佢帶動旅遊業就死梗，老懵董年代留低嘅泥氹，現屆政府又何必越踩越深，不如學吓特朗普撕漽奧巴馬傾開嘅TPP啦。散戶炒股都唔好咁懵，見唔對路就要止蝕，千祈咪亂咁溝淡、供股呀。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20161124/19843541
財金冒險號：零售寒冬並未過去
1 :
GS(14)@2016-12-01 08:01:48本港金飾化粧品零售股，今年股價普遍升幾成，最近公佈中期業績後，又不約而同話零售市道已見底，係咪真係咁好景呢？小生反而信太古地產(1972)管理層：「下半年本港零售仍面對挑戰，未見有復蘇迹象。」「自由行」實施十幾年，香港旅遊、零售業只識逢迎「同胞」，極度單一化。有咁耐風流，有咁耐折墮，旅發局剛公佈10月份訪港大陸客連跌三個月，而人民幣不斷貶值，美元（即港元）獨強，來港消費冇兩年前咁抵，何況香港已無乜新鮮感，不如飛轉日韓。好明顯，單靠大陸客係死路一條。唔靠大陸，本土客又撐唔撐得住？香港物價越來越貴，網購固然平，加上廉航興起，日本機票千幾蚊就買到，除咗趁日圓弱掃貨，更唔使喺香港受黑面店員氣，因日本服務出名好，就算店員內心幾咁鄙視「支那」，都會專業地掛上笑容兼鞠躬。不過，10月份日、韓、印尼、馬來西亞、菲律賓訪港旅客上升，會唔會好似台灣咁，蔡英文上台後大陸客大減，反而日韓歐美港旅客回升呢？難矣，因為主權移交近廿年，香港漸由國際都會淪為珠三角城市，失去殖民地色彩。外國遊客如想遊中國，倒不如揀北京、上海。小學時，教科書話香港係「東方之珠」、「購物天堂」、「中西薈萃」，原來已於1997年隨彭定康乘不列顛尼亞號遠去。
笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20161201/19850922
財金冒險號：2017年N大驚奇（一）
1 :
GS(14)@2016-12-30 02:05:21又係時候展望明年，估吓有乜「驚奇」。小生今年4月預測嘅四大驚奇，兩中兩唔中，中咗英國脫歐、特朗普當選，估錯美國6月加息、香港樓市減辣。今年太多驚奇，小生仲未諗定出年有幾多，暫名為「2017年N大驚奇」，今日講住兩個先。（1）美元4月份見頂。講得上驚奇，梗係同主流唱對台，而現時最主流嘅睇法，就係美元續強，主流到成為crowded trade。記得前年同上年呢個時候，買美元都係crowded trade，結果？2015年初升咗兩個半月就見咗全年高位，2016年就一路跌到英國脫歐至反彈。今輪強美元係憧憬Trumpflation——特朗普大搞基建、推升通脹、加息加快。政客競選時講嗰一套，上台後能否兌現？特朗普1月20日上任，頭一百日最關鍵，如果市場覺得政策無料到，美元就會轉勢。（2）黃金反撲。目前市場深信強美元、加息都不利金價，如此「傳統智慧」有冇數據支持？對上一次加息周期由2004年中至2006年中，勁加4.25厘，期間金價卻由400美元升至逾600美元，明年最多加0.75厘，又有幾不利金價？反而當美元見頂，近月捱沽嘅黃金就會翻生。何況當年環球大致上風平浪靜，金價尚且大升，明年政局動盪，黃金更有避險需求支持。
笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20161229/19879697
財金冒險號：2017年N大驚奇（二）
1 :
GS(14)@2017-01-06 02:06:30上周估計，今年頭兩大驚奇係美元4月份見頂及黃金反撲，今日講埋餘下四個。（1）美國十年債息升穿3厘。美國零息加QE已經八年，通脹一直唔達標，但現時撞正油價大幅反彈，今年上半年通脹會升得幾急。就算單計核心通脹都不得了，因為美國已算全民就業，薪金升幅會加快，從而推高物價。通脹升，債息就跟住升，十年期國債孳息嘅超長期降軌大約喺2.5厘，確認升穿就會升勢加劇，直指3厘。（2）德國連環恐襲，兩年前豪言「接收難民無上限」的總理默克爾夫人競逐連任失敗，右派政黨上台。（3）歐元區債務危機重燃。歐央行最近延長咗QE買債期限，但減咗每月買債金額，部署逐步退市。德國最新通脹急升至1.7%，對惡性通脹極有戒心嘅德國佬，可能向歐央行施壓，加快收水，債務對GDP比率仍高於100%的「歐豬國」，到時再成狙擊對象，重演2012年的震盪。（4）藍籌股風水輪流轉。恒指成份股之中，澳門賭股係去年股王，市場炒定行業復蘇，但博彩收入唔會係V型反彈。人民幣貶值，大陸政府只會不斷出手阻止資金外流，肯定再有不利濠賭嘅政策。反而上年最衰嘅聯想（992）省減成本同整合Motorola措施將開始見效，只要業績稍有驚喜，股價唔難翻身。笑笑生
mailto:
[email protected]本欄逢周四刊出
來源:
http://hk.apple.nextmedia.com/financeestate/art/20170105/19886574
Next Page