📖 ZKIZ Archives

我想準時放工 人在中環

http://manincentral.blogspot.hk/2012/07/blog-post_13.html
今朝睇左一篇有關年輕人搵工既文章，裡面提到有位求職面試既朋友，響interview裡面同個interviewer講，揀果份工作係因為「準時放工，有更多時間做自己喜歡做既事。」被interviewer認為沒有珍惜機會，過於自我，求職只為自己想。(全文請按這裡)
對於那位響interview中說出這話既年輕人，坦白講，我覺得工作能力未必有問題，但「天真得滯」卻係事實。講真，佢所講既理由，其實好合情合理。只 係響有d場合裡面，係唔應該「太過坦白」。撇除佢五年轉左五份工既背景，如果你問我會唔會請佢，咁講真我都一定唔會，不過理由並唔係因為甚麼「過於自 我」，又或者「冇珍惜機會」之類，而係佢實在「太天真太傻」，傻到對住個interviewer咁坦白？「醒」成咁，點出黎撈呀？

*****

我公司既同事裡面，以我所知，有一部份之所以會一直留響度做，就正正係因為我呢度「準時放工，有更多時間俾佢地做自己喜歡做既事。」有問題嗎？一間公司裡 面，有好多唔同種類既人。有d同事拼搏心好強，習慣日做夜做冇停手，你唔開聲叫佢放工，佢分分鐘留響公司過夜。有d同事每日無驚無險又到六點，一夠鐘準時 就撇，但佢地依然能夠完成手上既工作。一間商業機構裡面，係需要有唔同種類既人，有個"mix"響度，公司既氣氛先會健康。假如全公司都係「搏殺格」既所 謂「工作態度好」既同事，查實都幾恐怖。

工作係用黎配合生活。你有唔同既生活要求，就需要有唔同既工作去配合。當然有時會事與願違，但如果呢個logic掉轉左，掉轉頭要用「生活」去配合「工 作」，短時間，又或者過渡性可能還ok，但長期如此的話，人生就冇乜意義啦下話。香港地既僱主，有時係習慣左，員工係應該用佢自己既「生活」去配合僱主所 提供既「工作」，亦視之為理所當然，於是乎不斷地引起矛盾。

我公司有個同事，早陣子做左媽咪。同事響生BB之前，係個會同你搏命，日日做到冇停手既搏殺型員工。當佢人生去左另一個階段，人生既重心有所改變既時候，作為老闆，你仲點可以要求佢，工作既模式要好似以前咁樣？

老闆同伙計既關係，係需要好多好多既互諒。你提供既只係金錢報酬，一個伙計能夠有責任心地完成你交俾佢既工作，雙方既「交易」就已經冇拖冇欠。總唔可以要求一個員工，一定要將工作作為佢人生既重心，甚至凌駕佢人生既其他重點吧。

祝大家有個愉快既週末。

一些辦公室的人和事 (1) 人在中環

http://manincentral.blogspot.hk/2012/07/1.html
星期三既早上，Amy正在向我做有關同事們schedule既例行briefing。

「Eliza銷左假。」Amy望住自己部laptop：「所以佢跟開既project應該可以唔駛share俾人做啦。」

「係喎…」我諗起啦：「我都奇怪點解尋日仲見到佢返工。佢唔係話同果位《長江男友》去歐洲玩咩？改期牙？」

「聽講…」Amy想了想：「Eliza俾人飛左lu。果條長江賤精原來有好多條女架。Eliza最初仲以為自己搵到個荀盤，點知原來只係做左人地其中一個後宮佳麗。」

「哦…」我點了點頭：「咁佢冇乜野嘛？」

「冇乜野掛…」Amy搖了搖頭：「我其實都唔敢肯定，不過表面上好似冇乜野咁囉。」

我腦裡面忽然諗起，尋晚我見到Eliza時既情形。

晚上八點幾，同事們都走得七七八八。我正準備離開，響pantry裡面卻見到Eliza。emmm，依家諗返起佢果陣好似真係有d眼濕濕喎。

同佢一齊遲遲都唔肯走既…唉，又係光仔。

光仔鍾意Eliza，怕且全公司都知。光仔呢個「觀音兵」，平日經常都同Eliza「出雙入對」，直到Eliza高調地同果條長江賤男拍拖之後，忽然間佢 地兩個就彷如陌生人一樣，連見面都唔打個招呼。尋晚佢地兩個又「和好如初」響度「談心」，我本來覺得奇怪，經Amy講一講之後，成個story，忽然之間 好似complete晒。

我心裡面不禁響度諗：「妖，光仔你醒下啦好嘛？出面仲有大把女啦，咪咁死心眼啦。Eliza查實有乜咁特別咁吸引呢？雖然都算係幾靚女…」

每次提起呢件事，果對「長boot訓響地下」 既畫面，又會不自覺地浮現響我既腦海裡面。對於Eliza呢個同事，我唔知應該點樣係形容佢。我知道佢家庭環境唔係幾好，所以我總係「冇根據」地偏見認 為，佢可能好想「搵番個好碼頭」，改善一下自已既環境。佢工作能力ok，打工搵兩餐當然冇問題，但要改善生活，我作為佢老細，心裡都明白，佢如果打我一世 工，即使我年年加佢人工，佢要脫離現在呢個階層，十年八載後都唔知實唔實現得到。然而除左佢個大學學位之外，佢最大既本錢，可能就正正係尚算幾好睇既樣 貌。趁後生，仲有樣有身材，努力去搵個好碼頭有冇錯？我查實覺得唔怪得佢，我只係唔高興佢，搞到我兩位男同事。

我都係屬於比較「天真」果一派人，睇電影都總係喜歡睇果d會有happy ending既故仔。我其實心裡面，多少希望光仔真係有一日「感動」到Eliza而成為一對。不過咁樣既老土故事，現實生活發生既機會，真係微乎其微。我 見到光仔，雖然有d同情，但心裡面又不自覺地暗罵佢實在有d「唔夠長進」。我有時真係好想同佢講：「光仔，出去闖下啦。留響我呢度，冇前途架。」自私既我 當然冇將呢番說話直接同佢講，不過作為男人，明白到年輕時太過安逸，虛渡光陰既話老左會後悔。如果我係Eliza，儘管知道光仔對自己幾乎到達「迷戀」階 段，可能拍下散拖還ok，但要揀終生伴侶既時候，又會唔會夠膽去揀一個善良知足，但唔知養唔養得起自己既人？

*****

Eliza被人飛，同事們既反應，多少有d幸災樂禍。我明白，呢個情緒同之前佢晒命晒得太緊要有住割唔斷既關係。我唔知點解，反而有些少同情佢，儘管佢果對死人boot，實在令我覺得好討厭。

時間回到去差不多三年前。

Amy:「兩個candidates都in左啦，Nick話兩個佢都冇問題。我地是但揀一個佢都ok喎。」

我：「Nick佢冇preference咩？」

Amy：「佢『堅稱』自己『真係』冇preference喎。」

我將兩份CV拎上手，兩份CV上面，都貼左一張證件size既相片。我望了一望，心諗：「妖！Nick你冇野呀？兩個學歷條件經驗都差唔多，但樣貌差咁遠，你真係唔識揀定係唔好意思揀呀？」

「Amy，如果你要我揀呢…」我說：「揀呢個Eliza啦。個樣望落好似甜d，應該易相處d。」

「唉，都知你一定係咁揀架啦。」Amy陰陰咀笑：「不過老細…」

「乜呀？」

「查實你地d男人，分唔分辨得到，『甜美』同『姣』既分別既呢？」

Shit。

祝大家有個愉快既週末。

偏遠的太古城 人在中環

http://manincentral.blogspot.hk/2012/07/blog-post_25.html
呢個有關打風既小故事，我記得以前寫過架啦。當日呢件事，曾經讓我發過一場好大既脾氣，但同時亦讓我學到更多。

應該大約係四、五年前，同樣係一個準備掛八號風球既下午。同事們響朝早返工既時候，早就「收到風」個風球似乎真係會有料到。包括我自己在內，個心早就唔響office裡面，每隔幾分鐘就響電腦reload天文台個網頁，留意住幾時會掛八號。

記得大概係下晝三點左右，天文台就發出左「八號預警」，宣報將會響兩個鐘頭之後會掛八號風球。我響房間裡面，聽到外面同事既一片「歡呼聲」。

我既公司屬於服務行業，同客人簽訂左服務合約：我地如果響天文台仍未正式掛八號風球之前，私自停止對客人既服務，客人係有權告我地違約。然而我亦都清楚，八號預警一出，九成九既客人都會選擇飛番屋企啦，仲有邊個咁得閒響呢個時候call你要service？

做生意要講誠信，總唔可以「估」班客人唔搵你，就私自違反合約提早收工掛？然而響「預警」發出之後，當時仲響度做既Kelly同我就決定，跟隨天文台建 議，放果啲住得比較遠既同事返屋企先，住響市區同地鐵沿線既同事就留守office直至兩個鐘後，八號波正式掛先離開，萬一真係有客響呢兩個小時內 call in，都唔會provide唔到service。

問題就係咁樣出現。天文台發出「八號預警」既原意，係希望打工仔分批咁離開，唔會響同一刻一齊放工搞到交通大混亂。原意係好。佢地suggest僱主應該 先放住響偏遠地區既同事離開，其實亦好合理。但係，點樣先算係偏遠地區？係咪一定住離島先叫做偏遠地區？一個同事要轉三程車先返到屋企又算唔算偏遠？

當日我既諗法係咁既，反正呢段時間，唔會有太多客人call in，我就盡量唔留咁多人響office啦，總之夠人應付就算。天真既我以為咁樣應該有「最多」既同事「受惠」，但結果係，被要求留多兩個鐘既同事，向我 大發雷霆，認為我妄顧佢地安全，為左「賺多一單半單」生意要佢地冒生命危險芸芸。

最記得當時有位情緒失控既年輕女同事鬧我：「我都住響偏遠地區架！你知唔知由中環返太古城，要搭好多個站架！」

*****

星期一既下午，當天文台宣報，預計會響下午五點至八點之間掛八號既時候，呢件「舊事」既畫面忽然又響我腦袋裡面閃過。

當年果件事，我事後去諗，自然明白同事向我「怒吼」，怨我唔俾佢響掛八號前兩個鐘頭就閃，真正原因並唔係覺得我妄顧佢既人生安全。令佢不滿既，其實係我 「不公平」既處理。點解我隔離果個同事可以早走，而偏偏我就要留守到最後？莫非佢真係天真到覺得住響太古城真係算得上係「偏遠地區」？當然唔係啦。令佢憤 怒既，係覺得我呢個老細「唔公道」，同「偏心」。當然，果一刻我以為自己既決定係「合情合理」，而且盡可能讓最多同事能夠「受惠」，但所謂「公道」與否， 當你有自身既利益牽涉其中既時候，就只會各說自己既道理。

呢件事俾我既教訓同記憶都好深，自此之後，我亦經常提醒自己做決定既時候要諗清楚一啲。好多時候，響自己既角度睇以為冇問題，但即使係合情會理既決定，亦同樣會引起無限既矛盾。

果一次之後，我發左一次好大既脾氣，讓同事們都嚇親。我響打風之後果日就落左order，以後我話之你住響火星都好，總之天文台一日唔official掛個八號風球出黎，大家都唔駛旨意有得走。

同事收到我呢個「憤怒」既order，當然好唔高興。除左暗地鬧我仆街之外，佢地私底下響搵，當日究竟係邊個同事「咁唔識做」激嬲左老細，搞到全公司陪佢 地一齊受罪。我冇公開當日邊個同我發瀾渣，但同事們自然估到，必然係當日「被遲放」既其中一個(或多個)同事所為。於是乎所引致既結果係，早走果班同事， 同當日「遲走」既果班同事出現左啲完全冇必要既誤會的芥蒂，一切都只係由一個八號風球開始。

*****

對於呢件事，我既九流處理引發左公司既一場小風波，對我黎講係個極深刻既教訓。後來呢件事，都係靠Kelly週圍拍膊頭擺平。之後Kelly諗左個方法出 黎，每次風季來臨之前，HR都會發email俾同事，聲稱公司為左能「更有效」地安排惡劣天氣時既工作人手，請佢地如果認為自己係住響偏遠地區，當天文台 發出兩小時「八號預警」既時候，需要提前放工的話，請預先同HR登記。登記左既同事，當真係有天文台預警出現既時候，就可以先行放工離開。

結果係點？太古城只會響情緒失控既時候先會忽然變成偏遠地區。事實上，我覺得呢個方法其實有啲卑鄙，事關我好清楚，響無風無雨既日子，跟本唔會有人願意做第一個自稱「住得遠，要早走」既同事。幾年下來，預先「登記」既人數，依然係零。

星期一既下午，我望見一班等待天文台掛八號先走得既同事，心裡面總覺得有點點歉疚。

到底誰是火星人(上) 人在中環

http://manincentral.blogspot.hk/2012/08/blog-post_9.html
有時我倒搞唔清楚，到底係我已經老啦，對社會一般「規矩」既認識已經過時，還是佢地真係來自火星。我總是每隔一段時間，就會響公司裡面發現一個半個我覺得好似係來自火星既怪人，工作上佢地未必有咩問題，但日常待人接物同處事方法，總係讓我諗極都諗唔通。

Robert係我最近所發現比較「火星」既一個。Robert響我公司做左兩年，係我公司既其中一個支援人員。第一次我發現佢好似同我身處響唔同既「星球」，大約係一年前左右，一件讓佢同我assistant有點磨擦既事。

當日我要出差，咁岩果次我需要帶一個支援人員陪我一齊去，所以我就安排Robert陪我了。Emma係我既assistant，每次出trip，機票酒店 都係佢代為安排。咁果一次，我就麻煩Emma順便幫同行既Robert訂埋啦。我唔係特別慳家，不過公司的確唔係咩大財團，冇必要既錢就無謂嘥啦，所以我 自己出trip，每次查實都係經濟客位就算。反正機程唔長，唔會太過辛苦。Robert唔知係嘆慣還是唔知規矩，佢居然要求Emma幫佢訂商務位。

Emma話，公司規矩，同事出trip只會俾經濟客位，佢要商務，唔岩規矩喎。而且連老細都係坐econ，你同佢一齊，你反而坐business，都唔好 啦下話？好多人會認為咁既安排，係好「唔俾面」個老細，不過講真，我查實自己就冇乜所謂。公司規矩係從「錢銀」方面著眼，公司只會負責俾econ既錢，要 upgrade既話，你自己俾錢囉。我自己本人其實就唔係好介意，下屬出trip時既食住行「豪」過我，反正係你自己荷包俾既話，我話之你包架私人飛機去 出差丫。

Robert諗左諗，於是佢同Emma講，佢有信用卡積分，可以換到足夠Asia Miles。Robert於是就將一大堆信用卡資料，交左俾Emma，叫佢幫自己換積分再將積分轉Asia Miles，然後再用Asia Miles upgrade佢張ticket上商務。Emma見到，當然覺得「有冇搞錯」，第一，Emma唔係Robert既assistant，幫Robert訂機 票酒店，純粹係「順便」咁解。第二，Emma同你既關係，係公司同事，如果係做公司野，我覺得天公地道。但「私人信用卡積分換飛行里數」，我點睇都係「私 人野」。連我自己都唔夠膽叫同事幫我處理呢亭私人事務，Robert卻理直氣壯咁叫Emma做，除左因為係火星人之外，我諗唔到仲有乜野理由。

自此之後，Robert同Emma就有多少「心病」啦，佢地兩個既關係，就變得麻麻地。好彩佢地既工作本身冇乜太多來往，如果唔係，都幾麻煩。

兩個幾月前，Robert辭職了。佢辭職既故事，我響am730既專欄裡面寫左出黎。

我知道可能有朋友會覺得，反正如果佢話肯賠錢，佢要劈炮唔撈即時走，你都冇得話佢。坦白講，我曾經係非常懷疑，到底Robert係咪有d乜野，好不滿公司 同老細，所以決定以一個咁既方法離職，以為可以「玩」公司一鑊？撇除Emma之外，佢同其他同事，特別係佢部門既其他「手足」，以我所知一直關係良好，當 然當中有冇內情我唔敢講，但至低限度，表面上我的確係睇唔出。我唯有再一次將原因，歸咎我認為佢係有些少「火星血統」既關係。

佢既新公司早陣子send左電郵過黎，要求我填番份問卷，目的係為Robert做個reference check。我其實覺得奇怪，果個reference check，唔係通常響佢仲未被錄用之前send過黎既咩？正計佢以經入職近兩個月，點解呢個時候先會收到呢個電郵？reference check上面，指明係要我回覆。咁我有理由相信，我既contact information，係Robert親自交俾新僱主架啦。俾你選擇交俾新僱主去做reference check既人，好多時除左係你舊上司舊老細，通常都係個你「信得佢過」既人，認為佢唔會「寫衰你個底」。Robert響我度做既時候，我其實同佢相處機 會並唔多，但佢離職時候既做法同表現，就的確讓我有點「勞氣」啦。我係奇怪，佢點解會「夠膽」將我個contact填落去，唔通佢真係唔擔心，我會將佢離 職時既處理「如實」咁寫出黎？還是佢覺得自己既處理其實好ok？

幫離職轉工既同事寫reference，我其實做過好多次。通常大家都好黎好去，我盡量都會寫得同事既表現「出色」一d。大家都係搵兩餐，無謂寫花人地個 底。Robert既情況都係一樣，撇除佢時不時果d「火星行為」之外，工作上我對佢並冇太多不滿。所以我還是準備一貫做法，幫佢寫得「好好睇睇」，畢竟山 水總有相逢嘛，無謂搞到人飯碗啦，老實講我也難保有日我要靠返佢幫忙轉頭也不定。不過當我還未有時間寫好佢份reference之際，又有另一個有關佢既 「新消息」收到返黎…

寫住咁多，下次再講。

到底誰是火星人（下） 人在中環

http://manincentral.blogspot.hk/2012/08/blog-post_15.html
我有一個好朋友，佢有一個習慣：佢每份工必定唔會做超過兩年，而每次辭工既時間，亦必定係響五月尾。大家估唔估到點解？

****

上集請按這裡

Robert以前既直屬上司David，一直跟Robert情同手足。當日Robert亦係David一力引薦入黎做既。Robert單野對我黎講，冇乜 感情包袱，我除左有過短暫既勞氣之外，其實冇乜大問題。相反David，可能係公司裡面，因為Robert呢件事覺得最唔開心既一個。

Robert「出走」既時候，只係留左個email俾HR同我，話會賠番代通知金俾公司。然而email裡面並冇提及「幾時賠」，更冇講清楚會「賠幾 多」。兩個月過去左，公司收唔到佢一毫子既賠償。HR嘗試call佢，佢就連手提電話號碼都改埋。完完全全係一個「著草」既格局。我唔知Robert係有 心避我地唔想賠錢，還是有其他諗法，但係我諗如果係前者既話，單單改左個手機號碼，根本就唔會阻到人家去刮佢。況且為左區區一個月既代通知金，值得嗎？

響公司pantry見到David，David問：「CK，Robert到底還咗錢俾公司未？」

我將情況如實答佢，老實講，我其實可以搵律師處理呢件事，不過畢竟一場同事，無謂要搞上法庭啦。兼且搵律師出信上法庭都有cost，即使追返果一個月代通知金，七除八扣其實所餘無幾，追得返都唔係特別化算，所以，算數啦。

「其實尋日我撞到佢。」David嘆了口氣：「佢原來又辭左工。」

我心裡面覺得奇怪，我早幾日先至收到佢公司send黎既reference check，轉個頭就收到佢話「又辭左工」既消息，我心裡面總係覺得，呢兩件事應該有點關連。

「佢…」David有點吞吞吐吐：「佢仲問我可唔可以返番黎做。」

聽完David講，我心裡面忍唔住爆左幾個「門」字部首既詞語出黎。我諗，我可以certify，Robert係百份百既火星人血統。一個人一句唔該話劈 砲即走就即走，去外面玩完hea完一圈，仲要衰到「著草」避你唔還錢，跟住返轉頭同你講問你可唔可以返黎做？大佬呀，正常人唔會厚顏成咁架下話？面皮成尺 厚既「地球人」，我見得多。佢地厚顏地做出一啲奇人異事，背後佢地查實都知道，自己既所作所為，其實係唔係幾好意思。只有「火星人」，響大家面前做完一場 「奇幻show」之後，會完全覺得「冇問題」。係，佢真係覺得「理所當然」果一下，先至係最令你頂唔住。

我呆了呆，定神之後我故作鎮定問David：「咁查實你自己點諗？我知你部門等人用，你想唔想請返佢丫？」

「請佢條命咩。」David心裡有氣地說：「佢話要請返佢既話，要等到下個月尾喎。」

「點解？」我問。

「佢過兩日又要同條女『再』去旅行喎。」

我終於明白，原來火星人並唔止Robert一個。佢應該搵到個「同鄉」做佢女朋友。事實上，印象中既Robert，剛入職既時候，言行舉止都仲比較似個 「地球人」。後來佢拍拖，之後佢啲行為就越黎越「火星」。David話，佢響新公司，probation都未過就想請大假去玩，咁新公司梗係睬你都傻啦。 於是，佢又辭職囉。不過今次佢唔駛賠俾人咁多，因為probation未過，賠七日就得嘞。

救命。

「就算我肯請番佢…」David搖了搖頭：「我班手足都唔肯過佢啦。佢乜X都唔交低就走，搞到對上果個月，班手足做到踢曬腳。家陣個個一講起佢就咬牙切齒呀，我真係俾佢返黎既話，班手足殺左我都似。」

當Robert用咁既方法辭職既時候，我曾經懷疑，佢對公司係咪有啲乜嘢怨氣，要用咁樣離職既方法發洩。我以前打工既時候，遇過一啲心智唔多成熟既同事， 以為咁樣可以「搞」到公司，同埋佢地一直討厭既老細。但實情係，佢地即使幾「唔交帶」地辭工，公司既根基還是冇被動搖，乞人憎既老細依舊響冷氣房裡面嘆冷 氣，而真正「被搞到」既，往往係一直以黎同你一齊捱生捱死既同事們。

不過就事情既「發展」黎講，我都係傾向相信，「火星」血統先至係導致Robert選擇咁樣出走既真正原因。再加上佢位同鄉女友，火星人真係開始侵略地球啦。

「尋日有樣野我真係聽完之後火都黎埋。」David忍唔住說。

「huh?」我問。

「條X樣問我，如果真係返番黎做，人工可唔可以調高啲喎。」

*****

講番我果位，每兩年辭一次工既好朋友。

佢係一位超級足球迷，每次有大型足球賽事直播，佢都必定一場不漏咁去睇，那怕係捱更抵夜。所以每次歐洲國家杯同世界盃之前，不論佢份工幾有前途，個pay幾好都好，為左睇波，響比賽揭幕前一個月，佢都必定會先辭工。

我曾經認為，佢都算係其中一個善良既火星人。

大學畢業之後，睇左兩屆歐國杯，兩屆世界盃，年近三十歲，佢忽然覺得，自己唔應該再係咁樣。自此之後，佢就努力地工作。三十歲，對好多男孩子黎講，都係一個重要既關口；亦可能係讓火星人變回地球人既最後機會。

炒人作業 人在中環

http://manincentral.blogspot.hk/2012/08/blog-post_24.html
講明先，呢篇全篇都係抽水文。事原係尋晚響facebook見到條片，一連四集有關一間本地科技公司既「炒人」片段。睇完之後實在覺得太過匪夷所思，第一個反應係：「超，條片係咪堅架？」

故事既內容唔響度重覆啦，但我之所以第一個反應覺得，條片唔知堅定流既原因，係因為「炒人」呢個動作，我自己都做過。但係要落手炒人，邊會咁樣做架？「炒 人」係一件目標為本既事，但求用最快既速度，最少既說話，將「被炒」既對象送離開間公司。然而「被炒」既人，不論係「罪有應得」，抑或係「含寃受屈」都 好，被人炒，心裡一定覺得氣難下，對你充滿怨氣。一個對你，對公司充滿怨氣既人，如果再受多點刺激，你能夠控制佢唔做出啲會傷害人傷害公司既事？我都係果 句，即使係罪有應得都好，跟曾經共事既夥計「分手」，字裡行間還是「好來好去」比較妥當，雖然虛偽，但山水總有相逢，無謂結怨太深。

第二樣我覺得匪夷所思既係，你都既然準備好解僱信，表示你都已經早有決定。炒個人遮，仲乜要嘥咁多口水去講到天花龍鳳，自己有幾咁正義，而對方又有幾咁邪 惡呢？莫非你會以為，單憑你果半粒鐘「好有氣勢」既說話，會令到被你炒果一位同事，忽然「茅塞頓開」，感動流涕地認同你炒佢係件天經地義、替天行道既好 事？都去到「分手」一刻啦，做老闆，呢個彩，唔駛攞啦。冇必要響呢一刻都要「贏」埋先安落啦下話。

據說條片，係呢位老細自己放上網既。觀乎條片既角度，應該係偷拍既。咁我估呢位老細拍片既原因，應該係想錄低同事既口供，作為證據去告佢。先唔評論「偷 拍」呢個行為正唔正確，但如果真係如傳聞所講，係佢自己放條片上網的話，佢既立心，我就相當懷疑。我諗，咁做既原因不外乎兩個：一；佢真係好憎好憎果兩個 夥計，想將佢地既樣同做過啲乜野供諸於世，等佢地啲衰野揚左，以後都唔駛旨意有人肯請。呢個係一個「報復」既心態，人有情緒有弱點，我明白。但選擇得做老 細呢條路，就要接受作為人家老闆，你係需要具備比下屬有更廣闊既胸襟，否則下屬就唔會願意跟住你。儘管有時的確係非常激心同勞氣，但向下屬「報復」既心， 則絕不能有。不然的話，只會輸得更慘。第二個可能嘛…我估佢可能覺得自己鬧人鬧得咁行，好型好Man，不得不跟大家「分享」一下掛？OK，呢期最型係你 啦。

單睇幾條短片，就去評論成件事情誰是誰非，可能並非太過恰當。不過對於短片裡面，呢位老闆炒人既手法，我就只能用「愚蠢」去形容。響商業社會生存得耐既 人，都會明白，凡事做得太盡，通常都冇乜好結果。你以為你在置人於死地，但同一把刀卻往往會掉頭將你刺傷。山水總會相逢，凡事留一線，這話真的不會錯。

從五天半到五天 人在中環

http://manincentral.blogspot.hk/2012/08/blog-post_23.html
朋友Alan響大半年前創業，捱左大半年，生意算係勉強能夠企穩。然而佢最近搵我出黎「訴苦」，話留唔住班同事，因為同事們認定佢「刻薄」，呢個comment亦讓佢個心唔多舒服。
祝大家有個愉快既週末。

又回到中港融合 人在中環

http://manincentral.blogspot.hk/2012/09/blog-post_25.html
我家離開新界東北地區頗遠，果度要發展，我感受相對唔係好強。呢件事唯一觸動我神經嘅，係當中有關邊境模糊化，加強「中港融合」嘅意圖。

幼稚園功課 人在中環

http://manincentral.blogspot.hk/2012/09/blog-post_28.html
輕輕鬆鬆又到禮拜五。

上個星期，光頭仔所讀既幼稚園，搞左個「敬師」活動。活動既其中一個部份，係要每個小朋友製作一張「感謝卡」送俾班主任作為功課。

光頭仔三歲都未夠，要佢有本事自行完成呢項功課，當然冇乜可能。正如老師所講，呢個係一項「親子功課」，佢地其實早已預左家長要從旁協助先會有機會搞得掂。不過「協助」幾多，倒又冇乜指引。

我係個懶惰到爆既家長，聽到要幫手做功課，當然面色一沉。老婆話我咁既態度「唔正確」，okok，響公司我係老闆最惡係我，但返到屋企老婆先係老細。「老細」開聲，梗係即刻做嘢啦。

我落樓下文具舖，買左幾張畫紙同一盒粉彩，為免麻煩我仲買左兩包Thomas火車頭貼紙仔，準備俾光頭仔亂貼一通。學校既講法係，家長「從旁協助」小孩子 完成呢份功課，咁我響呢個「project」上最大既貢獻，就係買左所須工具俾亞仔，同埋用垃圾膠袋鋪好張飯檯，以免心愛既傢俬受到光頭仔無情既摧毀。至 於張卡點樣畫，我完全係採取「放任」策略。放任策略所得到既結果，當然係「烏呢媽叉」。我望住呢張烏呢媽叉既「感謝卡」，卻覺得都幾滿意，我心諗，咁先係 童真，先至真正係細路仔作品嘛。

老婆從廚房裡面行出黎，望左一望我地兩仔爺既呢幅「作品」：「譁，乜黎架？」

「抽象畫囉！」我自豪地回答：「聰明人先睇得明既藝術作品囉，嘿嘿。」

*****

事隔一個星期，我有半日假期，於是「老細」叫我不如負責去接光頭仔放學。

入到去光頭仔上堂既課室，壁佈板上面貼滿曬上個星期，各位小朋友送俾老師既感謝卡。我自己有份參與「製作過程」，一眼就認出光頭仔果份功課。正當我慢慢將視線移去其他貼左響壁佈上面既作品時，我當堂O曬咀…點解人地果份功課會靚成咁架呢？

我個仔果份肯定係「抽象」style，實情係聰明人同蠢人都唔會有機會睇得明，但好多其他同學仔既「製作」，不單止唔抽象，而且美學設計份量其高。佢地既「畫功」了得，而且顏色配搭得宜，再加上非常精細既「裁剪」，簡直可以拎去hallmark賣錢。

最深刻印象既一張作品，卡上面畫有兩幅一大一小既鉛筆人像素描。大啲既一幅係班主任Miss Chan Chan既畫像，細啲果一幅，則係小朋友既…emmm…「自—畫—像」。兩幅素描既像真程度，直達九成以上。

望見幼稚園課室裡面既呢個「Art Show」，我係咪應該有啲慚愧呢？我開始懷疑，老婆堅持要我今朝去接光頭仔放學，背後係有「目的」既。

Miss Chan Chan拖住光頭仔走到我面前：「光頭仔，話俾爸爸聽，你張卡貼左響邊？」

光頭仔一臉自豪，跑左埋去壁報板前面，指住自己果幅「抽象畫」，大叫：「呢度！」

「係喎，真係響呢度喎！」Miss Chan Chan帶住微笑，摸了摸光頭仔個頭：「好靚呀，多謝曬光頭仔。」

我跟Miss Chan Chan微笑點了點頭，望住呢一大堆「美術作品」，心虛既我總覺得有啲尷尬。

縱使我覺得，一幅真正出自小朋友手筆既「真跡」，雖然烏呢媽叉兼冇人睇得明，佢依然係比一幅接近99%由大人「請槍」既作品來得珍貴，但當近距離放在同一塊壁佈板上，我不自覺地響度諗，我可能真係一個太懶惰既家長。

祝大家有個愉快既長週末。

我是一頭經濟動物 人在中環

http://manincentral.blogspot.hk/2012/10/blog-post.html
「我係一隻銅臭嘅經濟動物。」

呢句說話，我響過往既文章裡面寫過好多次。寫呢一句說話既原因嘛，好多既。曾經試過係因為，有網友嘗試叫我就某某政治議題表個態，找個立場，我既唔想而且又唔敢，於是我就答咗呢句說話，諗住「耍」過就算。

自稱經濟動物，代表政治冷感，對政治上既道德，冇標準可言。As long as政府既施政，與及因政治而生既營商環境，冇影響到自己搵錢，一切就ok。

但係「自稱」經濟動物既商人，其實都有情緒，時不時都總會有啲睇唔過眼既時候。例如擔心自己既子女要接受我唔希望佢要讀既課程，又例如見到有自己人放棄自 己應有既價值，盲目妥協做矮仔然後聲稱咁樣做只為生存同適應大環境之類。我發覺自己偶然都會對某啲政治議題，會有一丁點既「上心」。「上心」代表認真，而 一認真你就輸鳥。

於是我又會再重申多一次呢個立場：「我係一隻銅臭到極嘅經濟動物」。

對政治上心會令人迷失，會影響情緒。我作為一個理智既商人，應該懂得避之則吉。

唔係特別想懷緬殖民地年代既日子，事實上按照現在好多識時務既人既講法，殖民地年代，政府既施政依舊有大量失誤，社會同樣存在不公，而且同樣係冇民主可 言。然而趣怪既事情係，當時既人係有本事對政治「唔上心」，做一頭徹底既經濟動物。反而現在既人，卻冇咁既「本事」。係香港人變左，還是政治環境唔再容許 「經濟動物」既生存？

老實講，我認為一頭徹底既經濟動物，其實係一個快樂人。能夠真正做得到既話，其實係福氣。

我有時都奢望能夠有呢個福氣。

*****

五毛

有朋友同我講，話我既博客裡面有「五毛黨」既蹤影。

我同朋友講：「咁我其實係咪應該開心呢？」需要五毛黨出現既地方，通常人氣都唔會太差。咁假如五毛黨真係出現響我個場上面，係咪代表，我個爛文扑都算係有唔錯既人流？

朋友話，我唔應該高興。因為有五毛出現，代表我既文字被某啲機關「盯上」了。以後寫嘢要小心啲嘞。

「哦，知道了。」

每逢寫一啲敏感既題材，總會有人提出相反既意見。當中是否真係有五毛，我唔識得分辨。反正五毛既意思，只係代表「收錢」去寫一啲有利某部份人既意見同留 言，增加某個立場留言既「數量」，試圖去製造民意同氣氛。有啲朋友覺得這個做法好卑鄙，然而我則覺得，大家都係搵兩餐，唔係偷唔係搶，冇必要太過動氣。至 於佢地既言論，大家都明知係「膳稿」，同樣一認真就輸鳥，何必上心？

問題係，點解香港地會有五毛黨？正如剛才提過，五毛既存在價值，係人為地在網上增加某種立場既「數量」，籍以影響民意同氣氛。愚昧既我認為，呢個模式應該 係響落後地區先至行得通既方法。一個有足夠知識水平既人，對一個議題既立場，應該主要係依賴自己既獨立思考。相反，如果人民普遍知識水平偏低，思考能力薄 弱既話，言論既「數量」多少，就會對佢地既立場有決定性既影響。如果有關機構真係選擇要響香港既討論區滲入五毛，咁係咪代表佢地都認為，香港既網民，其實 係屬於水平偏低思考力弱既類別？

我就傾向相信，香港係個先進同文明既社會囉。

坦白講，其實我覺得響香港地，「五毛」呢個模式，行唔通嘅。香港人對政治議題既立場，不論正方反方，響未上網之前就已經壁壘分明。即使再寫十萬九千條留言，我覺得其實都影響唔到太多。