從五天半到五天 人在中環
http://manincentral.blogspot.hk/2012/08/blog-post_23.html朋友Alan響大半年前創業，捱左大半年，生意算係勉強能夠企穩。然而佢最近搵我出黎「訴苦」，話留唔住班同事，因為同事們認定佢「刻薄」，呢個comment亦讓佢個心唔多舒服。
我認識Alan多年，我清楚佢為人。佢同「刻薄」應該有相當大段距離。之不過，創業既人拎左大半副身家出黎搏一搏，駛錢方面自然會慳家。然而「慳家」同夥
計口中既「刻薄」，往往唔知點解又會被劃上等號。老實講，呢亭被人認為刻薄既日子，我係過來人。我諗，除非你拎住億億聲銀紙出黎玩，否則呢個可能係每個創
業既人，都必然經歷過既階段。
*****
我唔知各位讀緊我呢篇文章既朋友，所返既工作係五天，抑或係五天半？我創業既時間係好耐之前。果陣大部份既公司，都係返五天半，星期六係要返半日。能夠只
返五日既公司，絕大部份既都係規模大既跨國機構。中小企既麻煩之處係，你其實非常被動。你既競爭對手提供五日半既服務，你如果只提供五日的話，你基本上係
輸曬。所以我響做生意既初期，係要求同事返五日半工既。
後來社會慢慢有點改變，要求work-life
balance既聲音亦越黎越大。越黎越多機構，選擇星期六唔返工，加埋政府帶頭響應，我地呢班仲要求員工星期六要返半日既老闆，就忽然變成一班「只為咗
賺多些少」既刻薄老細。老實講，我唔係唔想返5日，但係同你差唔多級數既行家，個個都依舊提供5日半service，你夠唔夠膽做敢死隊踏出第一步？
我明白我呢個擔心，係冇辦法作為同事「體諒」既理由，所以「刻薄」既標籤，我受。
後來公司被注資，注資後公司既規模以倍數地壯大。我地既主要「對手」，亦由本地既中小企行家，變成有財團背景既外資企業。壯大之後我第一件做既事，就係將
五日半既工作時數，改為五日。我將呢個「減半日」既「project」，製定左歷時半年既「transition
calendar」。呢個transition要半年時間，主要係因為要時間同客戶交代，與及預留足夠時間去應付existing客人既索償。兼且同事既
工作時間一下子由5日半變成5日，日常既schedule可能都要時間適應，部門同部門之間既合作流程，亦要因為呢個時間上既改變而重新安排。半年，我最
初擔心唔夠添。
「半年咁耐？有冇搞X錯？」呢個係同事們第一個反應：「駛唔駛咁耐呀？CK係咪有心玩嘢架？有心改既，呢個星期六就即刻可以唔駛返工啦！」
後勤既同事對呢個半年計劃非常不滿，認為CK其實冇心實行呢件事，所以刻意拖長實施既時間。但同一時間，銷售部門既同事亦對呢個安排非常不滿，認為無啦啦
少左半日service，實俾existing
client追究同鬧爆。而且少左呢半日既服務，會嚴重影響我地公司響市場上面既競爭力，從而影響佢地既commission收入。
我既角度係，in the long
run公司一定要5天工作。我地依家既對手同以前唔同左，我地除左響價錢同服務質素上同佢地競爭緊之外，響請人既市場裡面，我地同樣係競爭緊。半日既工作
差別，對好多打工仔黎講，分別實在太大。如果我唔改變，我只會不斷將我train好既員工，送走去其他返5日工既行家手上面。長遠黎講，公司會頂唔住。於
是呢個「半年改革計劃」，兩邊都唔討好。後勤既話你冇心做，前線跑數既鬧你唔顧佢地既收入。再加埋客人鬧你無情情由五日半變成五日service係貨不對
辦，收左唔知幾多封投訴信以致律師信…儘管佢地從來未試過星期六早上call-in要求服務。
我同Alan講起呢個故事，其實係想話俾佢聽，響員工既角度，好多事情一眼望落去，好似一件簡單不過既事。但老細要顧及既事情，覆蓋既範圍會大好多好多。
當覆蓋面一廣，一件疑似簡單既事，就會變得複雜。同事們未必會明白，何以一件「咁X容易」既事，條低能老細要搞咁耐，甚至左閃右避。老細亦未必會事事向同
事解釋箇中原因，有時並唔係想刻意隱瞞，但卻怕事情會越描越黑，好地地既一個解釋被同事認定為掩飾。於是你又唔講，佢又唔問，大家都斷估，好多事情，都會
被誤會成為一件「老闆可能又想諗縮數」既壞事。
果半年，係公司其中一段人手流失得最多既時間。transition period，永遠都係難捱既。
之但係值唔值得？老實講，返少半日工既，除左班同事之外，仲包括我自己。單單係一個星期可以多一個「夠訓」既晚上，乜都抵返曬啦。你估做老闆既，就真係會好鍾意返工架咩。
我同Alan講：同事覺得你「刻薄」，唉，正常不過啦講真。特別係我地呢班資金足襟見肘既小商人，當同事將你offer既package同公司福利，跟外
面大機構一比，你好難唔被認為係「刻薄」架喎。你亦冇可能要求同事們體諒你既處境，唯一可以做既，就係努力地將檔生意壯大，去到有能力offer到更好
package俾同事既階段。呢個大概係一個永無止境地向上追既過程，而且transition往往係相當痛苦，但呢個係創業既一部份，做老闆，呢樣野你
冇得避既。
祝大家有個愉快既週末。