中環在線：零售王國第二把交椅吳光正愛女接棒差一步 李華華
2008-08-06 AppleDaily
商 界唔少女兒代父從軍，噚日The Lane Crawford Joyce Group（簡稱LCJG）宣佈，現任連卡佛總裁吳宗恩（Jennifer，吳光正愛女），8月尾開始兼任LCJG副主席。集團旗下嘅Joyce、 Pedder Group等總裁，都直接向佢滙報，加埋時裝女王Joyce Ma（Joyce創始人馬郭志清）退下火線，吳宗恩大有潛力成為第二個時裝女王。
老竇揼本二億試身手
家陣，吳光正透過私人持 有嘅LCJG揸住Joyce（647）近52%股權，上年Joyce Ma唔玩，由吳光正愛將吳天海做公司主席，照咁嘅安排，吳宗恩距離做Joyce話事人兼執掌連卡佛王國，仲差一步。Jennifer條青雲路一早由老竇鋪 好，9年前加入連卡佛學嘢，由市務推廣、買手到財務，乜部門都去實習，打好個底；跟住老竇揼本2億銀畀乖女，將國金二期同太古廣場兩間連卡佛嚟個大翻新。 老竇嘅苦心經營，Jennifer一啲都冇辜負，初次擔大旗落手落腳指揮project，連《時代》雜誌都讚佢Sharp eye（銳利眼光）。國金二期開幕時，吳氏一家三口齊齊亮相，吳光正夫婦擺明係撐愛女。之後，Jennifer整頓內地業務，將內地合營嘅連卡佛執晒，搞 到市場誤會連卡佛敗走，原來係重新定位再重鎚出擊，佢手起刀落嘅膽識，可以話技驚四座。
摺起內地合營顯膽識
除咗 Jennifer，富豪家族中叻女仲有幾個，好似富豪（078）主席羅旭瑞個女羅寶文，細時係資優兒童，04年開始幫老竇手，首次擔大旗賣赤柱富豪海灣， 結果喺沙士後嘅逆境中，依然賣到8000蚊呎，幫公司進賬唔少。至於糖王郭鶴年女兒郭惠光就喺SCMP（583）幫手，佢喺哈佛大學畢業，曾到SCMP做 財經同時裝記者，04年正式升做執董，不過暫時未見代表作。電郵：
[email protected]
中環在線：大陸前首富同愛將反目 李華華
2008-08-08 AppleDaily
昔 日愛將，今日反目，最新一單係大陸前首富、新希望集團董事長劉永好，同佢舊愛將杜誠斌。據《每日經濟新聞》報道，新希望旗下成都希望食品前經理杜誠斌，早 喺舊年8月已經離職，奇怪嘅係，事隔一年，成都希望食品先發聲明，要同杜誠斌劃清界線，話杜誠斌嘅一切華洋轇轕，都同希望食品無關。由佢做董事長嘅四川得 益綠色食品，亦同希望食品冇任何關係。究竟發生乜事？報道有好多猜測，包括話杜誠斌另起爐灶，又話佢帶走啲員工同資源，傳聞係咪真，華華好難求證。不過， 商場冇永遠敵人，何況杜誠斌本身係一隻千里馬，為新希望集團打造得益方便米飯同火腿腸等產品。劉永好亦係百樂，95年破格起用當司機嘅杜誠斌，仲畀升職機 會佢，後尾畀佢做埋新希望集團肉食品事業部總裁。究竟係千里馬對百樂造成威脅，定係百樂臨尾都仲係想幫千里馬做聲勢，所以先至有呢張遲出嘅聲明？
中環在線：奧運開鑼煙花股升得燦爛
2008-08-08 AppleDaily
今 日奧運開鑼，內地股民噚日就曲線燒定煙花慶祝。大陸上市嘅瀏陽花炮，股價雖在早市回軟，但午後逆市升10%，升停板，全日成交1.36億人仔。華華上網搵 番資料，位於湖南省嘅瀏陽市，原來係「中國花炮之都」，產品仲揚威國際，唔使問，全市幾乎包辦晒奧運嘅煙花。
身為行業「龍頭」嘅瀏陽花炮，仲因為舊年業績 終於轉虧為盈，今年6月中除去等同「垃圾」嘅ST股標籤，認真巴閉。除咗燒煙花，勁賺廣告費嘅賽廸傳媒、有東道主優勢嘅北京旅遊、專門造奧運火炬嘅華帝股 份，股價噚日都相當標青，依次升10.04%、9.92%和9.45%。之不過，港人怕且都得個恨字，皆因冇得炒A股，由「體操王子」掌舵嘅李寧 （2331），臨陣腳軟，早市最多跌1.5蚊，收市仍跌4.92%或0.88蚊，報17蚊，該煨。
中環在線：「雙李」合璧sell運動服 李華華
2008-08-08 AppleDaily
萬 眾期待嘅北京奧運今日開幕。華華聽到，作為中國第一本土運動品牌、啱啱喺噚日夠18歲嘅李寧（2331），有意同國際動作巨星李連杰合作，推出全新運動服 系列。市場人士話件事搞得七七八八，一去馬就可以火速推出咁話。據講，呢個運動服系列嘅特點係sell中國功夫，同李寧做開嘅市場唔同，所以唔驚會自己打 自己，亦都係因為呢個原因，所以公司先至選擇同李連杰合作。
華華都好認同，因為又要好打又要有知名度，李連杰真係啱晒嘴形。華華就「雙李」合作同李寧發言 人傾過，佢哋話暫時未獲悉此事。李寧啱啱宣佈攞咗個Lotto嘅20年經營權，又傳想推出一個新品牌，出得咁密，唔知係咪想借今年爆晒燈嘅運動氣氛，谷一 谷個品牌呢？
中環在線：市值勝和黃恒生做一哥 李華華
2008-08-11 AppleDaily
受 美股拖累，上個禮拜五港股下跌218點，唔少藍籌股亦錄得相當跌幅，但恒生銀行（011）就逆市升1.5蚊，公司市值急升至3078億港銀，反而超人李嘉 誠旗下嘅和黃（013）跟隨大市下跌，市值得2995億銀，唔覺唔覺，恒生就過咗和黃，市值高出83億銀，成為以本港為總部嘅上市公司中，市值最高嗰一 間。
恒生有咁好成績，相信最高興莫過於公司副董事長兼行政總裁柯清輝。柯大班真係幾好腳頭，自佢獲委任為恒生副董事長後，公司股價就不斷升，無懼今年逆市。今年2月恒生先至慶祝75歲生日，公司股價表現咁好，柯大班可以向班股東交代，真係飲得杯落。
中環在線：中移動破奧運紀錄 李華華
2008-08-11 AppleDaily
講 到08奧運嘅贏家，相信除咗奪金嘅運動員，就輪到中移動（941），點解華華咁講？據新華網報道，喺8月8號北京奧運開幕期間，國家體育場同奧林匹克中心 區內，中移動網絡「通話峯值」（即係最高峯時嘅通話量）達到每小時110065次，創咗奧運史上最高峯通話量嘅紀錄，雖然冇金牌攞，但就賺到真金白銀。咁 都難怪，除咗新聞工作者要爭分奪秒，用手機向公司滙報奧運開幕禮最新消息，唔少北京市民同遊客都打手機同朋友分享開幕禮嘅喜悅，自然推高中移動網絡通話峯 值。
據中移動嘅新聞發言人講，網絡通話高峯出現喺開幕前60分鐘，通話量超過上屆奧運會1.9倍。報道話，喺開幕進行期間，奧運主場鳥巢同附近，共有25 萬人講緊手機，而用國際漫遊嘅人就達到2.28萬人。好在中移動早有準備，預計唔少市民會喺奧運開幕期間打手機，所以早就提升咗網絡通話量，咁先至可以應 付到上個禮拜五嘅情況，咁多人同時用手機都冇話「塞車」。
中環在線：福娃唔益股民 李華華
2008-08-11 AppleDaily
北 京奧運如火如荼舉行，喺北京街頭巷尾都掛滿奧運吉祥物福娃，專程飛去北京嘅外國遊客，除咗睇奧運比賽，為自己國家嘅運動員打氣，梗唔少得買手信畀親朋戚 友，講到手信首選，當然係5隻福娃──歡歡、迎迎、貝貝、晶晶同妮妮嘅公仔，同佢哋嘅紀念品啦。據《東方早報》報道，福娃嘅玩具特許生產同經銷商之一、內 地上市公司海欣股份，就因為生產福娃而大賺1000多萬銀人仔。其實就算唔做外國遊客生意，單係做中國人生意，條數都好襟計，話晒中國10幾億人口，有一 半買福娃都賺到笑。
不過，福娃幫到海欣賺錢，唔代表旺到公司股價，海欣嘅股價年初至今插水超過六成，淨係喺奧運開幕嘅上個禮拜，公司股價就跌超過一成，都 咪話唔甘，最唔抵就係海欣啲股東。奧運效應已經到水尾，根據北京奧組委規定，福娃紀念品仲可以賣到出年3月，就算係咁，都未必幫到公司股價幾多囉。
中環在線：奧運火炬燒旺李寧股價 李華華
2008-08-12 AppleDaily
昔 日「體操王子」李寧，喺京奧開幕禮上做最後一棒火炬手，佢嘅飛簷走壁技驚四座，除咗令大家對中年李寧嘅體能刮目相看，呢次燃點奧運火炬，仲燒旺埋佢公司嘅 股價。李寧（2331）噚日嘅股價好似北京鳥巢支奧運火炬咁，燒到烘烘聲，最高升咗1.04蚊或6%，收市報18.24蚊，全日升3.5%，遠遠拋離5隻 同類體育用品股。李寧喺體壇上金牌就攞得多，今次可以話喺股場上奪金。查實開幕當日已傳出話最後火炬手係李寧，李寧嘅股價上個禮拜五已經偷步升咗 3.7%，咁又係嘅，話晒奧運開幕係全球直播，李寧做最後一棒火炬手，對佢嘅公司進軍海外市場有好大幫助，淨係廣告費都慳唔少啦。不過，同人唔同命，搵咗 謝霆鋒做代言人嘅特步國際（1368），雖然霆鋒有份喺奧運開幕禮獻唱，但對公司股價一啲幫助都冇，噚日插水逾兩成，成為5隻體育用品股跳水之冠。
中環在線：黃英豪因傅明憲變高調
2008-08-13 AppleDaily
黃 英豪上個月揼咗兩億做白武士，拯救藝人傅明憲老公葉劍波間海域化工（2882），仲做埋大股東。佢噚日同華華講，當日個清盤官朋友同佢講海域搵財團招標， 咪入標試吓，仲話細劉劉鑾鴻都有入標。健談嘅黃英豪好坦白咁話只係想買隻殼，相信9月份會搞掂晒復牌。佢話不嬲都有收購嘢，不過好低調，今次本來都想低調 啲，但係間公司（海域化工）同前老闆屋企人比較高調，所以多人留意。
黃英豪捐咗百萬銀畀香港管理專業協會（HKMA），噚日出席交收儀式，佢一家大細包括太太、外母同四個由外國返港放暑假嘅仔女都有出席。同場仲有身兼HKMA主席嘅李國寶，華華本來想同佢傾幾句，但儀式之後佢匆匆離開，話要飛去北京睇奧運喎！
中環在線：畢菲特自傳下月面世 李華華
2008-08-13 AppleDaily
要 睇股神畢菲特嘅心得，只可以一年一度睇佢旗下嘅巴郡年報當秘笈。不過，就嚟會有本真正股神秘笈面世──首本由畢菲特親自授權嘅個人自傳，下個月29號出 版。呢本股神自傳由大摩前保險分析員Alice Schroeder撰寫，Bantam Dell出版。原本股神自傳諗住喺今年5月巴郡股東大會出版，但後尾趕唔切，搞到推遲4個月先面世。 股神自傳書名叫《The Snowball：Warren Buffett and the Business of Life》，取自股神講過嘅一句說話，「Life is like a snowball. The really important thing is finding wet snow and a really long hill.」全書976頁，作者Alice花咗過千粒鐘訪問股神，當中股神會分享佢嘅生活同事業。Alice仲得到御准，可以睇股神嘅files同訪問佢 嘅朋友。華華諗，應該唔少得佢老友微軟前主席蓋茨講吓對股神嘅感受。
定價35美金
股神自傳定價35美金，約273港銀，花唔夠300蚊就學到股神嘅投資心得，可以話物有所值。據美國財經雜誌《福布斯》全球富豪最新排名，股神身家超越蓋茨成為全球首富，個人資產高達620億美金，約4836億港銀。
Next Page