中環在線：奧運火炬燒旺李寧股價 李華華
2008-08-12 AppleDaily
昔 日「體操王子」李寧，喺京奧開幕禮上做最後一棒火炬手，佢嘅飛簷走壁技驚四座，除咗令大家對中年李寧嘅體能刮目相看，呢次燃點奧運火炬，仲燒旺埋佢公司嘅 股價。李寧（2331）噚日嘅股價好似北京鳥巢支奧運火炬咁，燒到烘烘聲，最高升咗1.04蚊或6%，收市報18.24蚊，全日升3.5%，遠遠拋離5隻 同類體育用品股。李寧喺體壇上金牌就攞得多，今次可以話喺股場上奪金。查實開幕當日已傳出話最後火炬手係李寧，李寧嘅股價上個禮拜五已經偷步升咗 3.7%，咁又係嘅，話晒奧運開幕係全球直播，李寧做最後一棒火炬手，對佢嘅公司進軍海外市場有好大幫助，淨係廣告費都慳唔少啦。不過，同人唔同命，搵咗 謝霆鋒做代言人嘅特步國際（1368），雖然霆鋒有份喺奧運開幕禮獻唱，但對公司股價一啲幫助都冇，噚日插水逾兩成，成為5隻體育用品股跳水之冠。