📖 ZKIZ Archives

投資港股：一億(十四) 阿牛

http://hk.myblog.yahoo.com/yomagyomag/article?mid=3695

仲有一個好消息。

阿牛越嚟越覺得，今次樓市調整，股市可以全不受影響，甚至更上一層樓。

喺好幾年前，阿牛已經有一個相當肯定的估計，就喺有機會股市同樓市，各走各路。

在2007之前，呢個假設喺夷非所想的，因為樓股從來都是同步的。直至海嘯之後，本港樓市迅速回升，而股市就正常的慢慢走過熊市，牛一，牛二......

美國更加逆其道而行，股市慢慢反彈，樓市一潭死水。今次股災其中兩個要點，就是證明樓股可以分離，而且在美國更把樓市和股市推到舞台的兩極，分別飾演：害人、和被害者的角色。因為這次明顯是樓市害死股市的。

香港又如何呢？現在樓價漸高，資金入市速度漸慢，貨如輪轉的速度自然越來越 慢；假如新資金真的湧入股市，把底線拉高到二萬六、七點，投資者看見股市快靚正，一兩個月已經有兩成回報；自然就會從新部署，慢慢傾斜過去證券市場。只要 一開了頭，樓市的走資速度就會越來越快。此其一也。

而且今次的樓市，阿牛估計不須要等到加息，就可以爆煲。所以爆煲時，可能仍然 是相當低息的環境，資金不一定緊張，証券市場應該可以運作正常。尤其是這次對於樓市，港府真的做得不錯，步步為營，不會容許借貸過度，不會容許濫借；所以 到爆煲時，自然不會拖累銀行體制，更不會拖累經濟。苦主們只是苦，他們不會走投無路，更加不須要死。於是樓有樓爆，股有股炒。此其二也。

另外，到樓市盡頭時，貴貨漸漸會落到用家手上。這批用家，買的時候已經計算清 楚，應該長遠都供得起，不是投機性買樓的，所以他們又一次把投資用的產品，拿去當實用品用。而這批人喺投資市場的稀客，所以佢地買樓坐艇，用膝頭哥嚟抹眼 淚，慘就好慘，不過喺佢地自己慘，喺唔會影響到股市的投資力度的。

阿牛講過很多次喇，佢地唔聽我都冇辦法；阿牛幾個月前講過的幾個想買樓的親戚、朋友，一個最年青的，當時就疵之以鼻，立即買了，而家住緊。一個話賣樓嘅，真喺賣左，跟住買番間更大間的新樓。一個話唔買嘅中青，偷偷摸摸前個月買埋，唔敢話俾阿牛知，上星期completion。最後一個老人家，最硬淨，隔個星期問一次買得未，四出睇樓，不過仲忍得住，尚未落疊。到佢買埋，睇怕個市都怕差唔多喇。

市場就好似傳說中牛頭馬面上嚟陽間勾魂，點齊名，揾人齊喇，咪『起程番落去囉』，一鑊滿載而歸。所以有時有啲嘢，冥冥中整定要衰嘅，除非自己好有分析力同念力，可以走得甩，否則始終都要跟大隊犧牲。要死嘅人喺幫佢唔到嘅。

今次樓市、股市極有可能分道揚鑣，各行各路。而且可能會有一個新東西出現：

                                            牛 3. 2

投資港股：一億(十五) 阿牛

http://hk.myblog.yahoo.com/yomagyomag/article?mid=3883

呢兩日個股市都跌到阿牛十分雀躍。於是乎抽起左份牛3.2嘅稿，先講講今天形勢。

話說最近個股市載浮載沉，升吓跌吓，十月十四日弄左個23852之後，輾轉上落，好似想調整。曾經在十月廿六號單日跌四五百點，點之跟住hurhur聲升到十一月八號，24964高點，『撚化』阿牛。

幸好牛記投資最特別，亦喺阿牛想攞嚟同大家分享嘅，就喺『升跌都賺錢』，呢樣嘢真喺阿牛只此一家別無分店。所以呢兩星期阿牛都不停叫大家放鬆，唔好估市，等個市話俾我地聽，佢想點，然後我地先入去賺錢。

其實阿牛都好想個市調整同下跌，繼續玩牛二嘅上上落落，唔好就咁就進入牛三；所以呢輪升市雖然日日賺錢，但其實只喺麻麻地開心。

因為如果用『牛投』投資緊，而唔喺貪得意睇吓阿牛個Blog嘅朋友，應該同阿牛一樣，揸緊滿倉；如果個市不停升，我地冇錯喺不停賺錢；但萬一個市好似呢幾日咁開始跌，我地就更開心，可以換個辦法再炒，因為跌市喺賺多好多嘅。

呢兩日咁跌法，怕者都喺『嚟真』跌市。所以阿牛又拿拿聲揾番啲跌市protocol出嚟，睇吓點玩法。

今次阿牛話左以八月三十一日20500點為低位。以最近所創高點為高位，而家即喺十一月八日嘅24964為頂點。分三截嚟睇市，跌到45%為第一級，跌到55%為第二級，跌到65%為第三級；亦即喺：

                             24964 → 22955 → 22620 → 22286

跌唔夠22955，就按兵不動，當俾佢再撚化一次。如果一碰到22955，就用5%亂炒基金，以最少嘅按金買期指好倉，買明年六月嘅。如果止左唔跌，回升，呢5%就以25000點為目標，作短線賺2000點一張。如果繼續跌，就以22620為中心點；當去到22620就沽一半股票，換入期指。但今次再買期指就用厚倉，要有幾千點margin。到跌到22286就全數沽股票，買埋淨番嘅期指。至於五月18811揸上嚟的期指，由於獲利已深，而且早已安排好按金，所以今次唔關佢地事。

今次有另外一個諗法，就喺從新開一個HKD60000細倉，俾有興趣嘅Blog友，用牛記投資法，試試效果。

明天講呢個迷你倉。

投資港股：一億(十六) 阿牛

http://hk.myblog.yahoo.com/yomagyomag/article?mid=3886

今晚零時十分段稿，阿牛決定提早出街，等大家多啲時間研究一下：

尋日又講到阿牛句口頭禪：機會又嚟喇！

上幾個星期，講緊一億元嘅時候，講到上幾個月阿牛剛開Blog時嘅第一役，估計同阿牛並肩作戰嘅朋友數目喺：”0” 個，只有阿牛孤身一人。

呢樣又唔怪得，因為日日都有儍佬喺個網上亂噏一通，點知呢個阿牛堅定流呀；是關儍佬呢吓嘢冇樣睇嘅，講嘢有文有路，一樣可以儍嘅。所以在5月28日，阿牛都話：

『今次破萬九，大家睇阿牛自編自導自演，咪當睇表演囉，到整個過程完畢，大家可以再看看賽後檢討。

想試吓？

下次啦。』

而家到下次喇。

今次如果閣下有閒錢，或者有雄心，就不妨試試。

策略就喺，揾六萬蚊本金，去開一個期指倉，然後坐喺度等。如果恆指跌到22955，就『market揸一張明年六月細期好倉』，咁樣你股票行就會check你倉有冇萬鬆啲蚊按金，見到你有六萬咁多錢，就會幫你做。記住唔好猶豫，一見到22955，乜都唔好諗，唔好理佢『晏啲會唔會跌多啲』，又唔好理點解佢跌，預早抄定經紀個姓名，電話，你個account no.喺張紙度，唔好抄喺個手機度，因為你打緊電話又要左㩒右㩒，好易出錯。當時就立刻攞起個電話，然後念左上面句台詞：唔該『market揸一張明年六月細期好倉』，跟住三秒攪掂，抄番低個買入價。記住好多証券行股票倉同期指倉喺分開嘅，記得問清楚，調動好啲錢去期指倉。

跟住就收工，等股市自由發揮，睇吓點發展。如果已經到底回升，到25000點就平左張期指，賺就賺2000點，等如HKD20000。

六萬賺二萬就喺33%，幾好㗎喇。如果閣下有超過六萬，就可以做兩份，三份，四份；如此類推。

但如果大市繼續跌呢？

咁明日講喇。

今次唔知募唔募集到『光猪七壯士』呢？

投資港股：一億(十七) 阿牛

http://hk.myblog.yahoo.com/yomagyomag/article?mid=3902

各位兄弟姊妹，如果大家有興趣用六萬揾兩萬嘅話，請睇埋呢篇嘢先瞓，如果你冇咁興趣我都希望你再考慮一下，睇番吓阿牛之前寫嘅嘢。

六萬揾兩萬唔喺乜嘢特技，但喺阿牛誠心希望你試吓，因為幾乎喺零風險，而且可能喺你人生一個新階段嘅開始，喺脫離苦海嘅起點。大家再睇吓阿牛個版頂嗰兩行字：發達邊個唔想吖。試想想有足夠嘅錢買嘢，去旅行，住得好食得好，唔駛返工。仔女亦唔駛愁，唔駛谷到佢地咁盡讀書，因為你會留足夠嘅錢俾佢地。剩下來就只係開開心咁生活......

只要你跟住下面嘅步驟；今晚早十五分鐘瞓，明日早十五分鐘起身，落街買份經濟日報睇吓。

頭版一定喺雞乸咁大隻字，話股市崩圍。如果你心血少，就唔好睇內容，因為冇嘢講嘅，講嚟講去三幅被，話調整未完。

請你用最快嘅速度，揾揾昨晚美國股市收市升定跌。美國嗰個叫『杜瓊斯指數』，簡稱『杜指』。如果今晚跌多過五十點，咁明天多數到價要做嘢喇。又或者開機睇睇阿牛個Blog，阿牛一瞓醒就揾揾杜指收市價俾大家參考。又如果邊位人兄人姊，喺夜鬼嘅，等得到美國收市，就唔該留個留言喺阿牛呢篇Blog度，大個啲字，俾大家參考。

如果杜指唔跌，可能明日企得住，唔瓜得，要多等一等。咁大家就平常心番工先，睇定先算。

如果個市高危，咁跟住就諗諗辦法揾部機睇住個市，一見到恆指掂到22955，就立即行動。阿牛明日都會對實個市，一到價亦會在本欄通報，雖然如果閣下冇睇實，到見到阿牛出通告都已經遲左少少，但其實都唔緊要，最緊要喺入貨訊號已經出現左，咁買貴少少，買平少少，也就算了。

美國朝早十點九，香港晚上十一點九，杜指微跌0.64點，未有方向。

投資港股：一億(十八) 阿牛

http://hk.myblog.yahoo.com/yomagyomag/article?mid=3933

今朝阿牛一早起身，攞定支酒，叼住口鏹，望住部機等開市，但結果喺點，大家都知道了。

等吓喇。

昨晚都有Blog友支持阿牛，喺呢度先多謝大家。

留言當中有朋友有好實際嘅困難，就喺冇錢；嚴格嚟講，唔喺冇錢，喺鎖死晒啲錢，郁不得其正。其實大家都彼此彼此，阿牛都冇錢。

咁點買期指呢？

個答案就喺賣左啲股票嚟做按金。

下一個立即浮現嘅問題，就喺『股票蝕緊喎』，蝕賣呀？

冇錯。

點解呀，咁笨星都都制？

咁我地攞啲數據研究吓；首先揾到高點十一月八號嘅24964點。然後再揾個最接近我地目標價嘅日子，十月八日嘅22944點；假設我地倒番轉嚟玩，22944揸一張細期，到24964先賣，咁就會賺2020點，亦即喺HKD20200。假如我地用HKD60000嚟做按金，就賺33.7%。

好喇，是但揾隻股票睇吓，例如匯豐；十月八日匯豐值HKD81.3，到左十一月八日，匯豐值HKD86.7，假如我地在恆指跌到22944時，匯豐可以賣HKD81.3；但到我地張期指升2020點，賺33.7%時，匯豐只賺HKD5.4等如6.6%，即喺匯豐跑輸大市，我地期指跑贏。

你一定會話，匯豐跛㗎，點可以比較呢；都啱，我都覺得喺。阿牛三隻股票，南航由HKD4.7升上HKD5.51，有17.2%。鐵鈦HKD3.49升至HKD4.33，有24%。中信泰富HKD18.3升至HKD22.7，有24%。三隻都跑輸。

你又可能暗暗話，阿牛你都跛啫，我啲股票好勁喎；咁樣你可以攞你自己個組合計計十月八日同十一月八日嘅差價，睇吓有冇33.7%便可。

投資港股：一億(十九) 阿牛

http://hk.myblog.yahoo.com/yomagyomag/article?mid=3960

港府今晚出重招打擊樓市，睇怕今次個樓市必定頭破血流。

點解？

且看金庸先生的鹿鼎記，第五回，康熙勇擒鰲拜：

『康熙見韋小寶與眾小太監拾奪不下鰲拜，勢道不對，繞到鰲拜背後，拔出匕首， 一刀插入了他背心。鰲拜猛覺背心上微痛，立即背肌一收，康熙這一刀便刺得偏了，未中要害。鰲拜順手擲開韋小寶，猶如旋風般轉過身來，眼前一個少年，正是皇 帝。鰲拜一呆，康熙躍開兩步。鰲拜大叫一聲，終於明白皇帝要取自己性命……』

最重要的就是最後一句：炒家們終於明白政府要取自己性命。

即喺唔會再有運行，今次萬一唔死，仲有下一次，總之一定要死。

咁投資者可以點呢？只有準備撤退，可以嘅話就一步步嚟撤退，唔得嘅話，就人踩人都要囉。

今次政府出手比阿牛想像中重；可能因為昨日香港政府直情俾IMF點名批評，話國際熱錢繼續流入香港，以及推動通脹與資產泡沫，且未來泡沫爆破時，將會造成漫長而痛苦的衰退，促請港府採取措施應對。

加上近日國內又剛要嚴厲對付通脹，於是所有客觀條件都成熟了，於是政府決定出手。阿牛覺得減按揭和資產增值稅本來是獨立的兩招數，今次政府希望效果顯著啲，於是決定一次過耍出來。阿牛恐怕今次落藥偏重，這次樓市應該差不多了。

樓市今次唔死，頂晒磅只可捱多政府一棍，政府是旦出多一招，應該就氣絕了。

題外的話，星期一股市有可能會觸碰到22955點了，大家有興趣買期指的朋友，又要準備了。

投資港股：B計劃(二) 阿牛

http://hk.myblog.yahoo.com/yomagyomag/article?mid=3991

投資港股：B計劃(二)

阿牛今朝得Blog友毛仔兄提點，先記得原來唔記得講一樣重要嘢，於是唯有學董建華個X人講嘢：

乜你地唔知八萬五冇左喇咩？冇左好耐喇！

乜你地唔知道而家喺牛二咩？牛三嗰個推論冇左好耐喇！

冇錯，而家證實喺牛二，而且喺繼五月之後嘅最大一次中期調整。

照茶餐廳理論，即喺午市未完，大家繼續賣快餐。

                                                ㊣！

按照昨日嘅分析，其實祖國加保證金，已經幾次和港滬股市的調整，息息相相關。今次11月10日加50點子，上海已經250天線都穿左，不過香港尚算硬淨，比起上海下跌的7.3%，港股只跌3.5%。一個可能喺跌得較為緩慢，下星期續跌。亦有可能喺QE2之故，憧憬緊會有新資金到港，所以跌幅較慢。但喺前日第二棍朴落嚟之後，應該都要跌足10%，if not more，因為阿牛都未同佢計埋樓市嘅不利因素。

大家如果睇睇下面幅宏觀圖，就會比昨日的放大圖更加清晰；阿牛為左方便起見已經將三次下跌的起點mark左出嚟，以供各位參考。

如果以第一棍之前的24500點為頂點，跌10%就喺：

                                            22050

所以和星期五的23605相比，『可能』尚有555點下跌

阿牛都贊成大家暫時由『駱駝』轉抽『555』。 

→  

之前阿牛定嗰個45%，55%，65%的65%最勁都喺預跌到22286點，和22050比較都仲高236點。呢三個percentage其實喺參考港股呢一兩年嘅中期小調整計出嚟，以作參考。所以前兩日有Blog友問阿牛，跌唔到22955嘅45%第一關，仲好唔好入市，阿牛都勸大家，『稍安無燥』，雖然阿牛都明白大家入唔到市的失望心情。到左今日，阿牛呢個45%，55%，65%已經功成身退，因為佢地已經成功帶領我地『忍、忍、忍』到今天都尚未仆入市撈底。既然今天已經明朗化，我地就『貪新忘舊』，以22050為準。

等阿牛去小個便，番嚟再講……

幸得Redhot兄提醒：

            23605 - 22050 = 1555

至啱。

555喺阿牛計錯，僅此致歉，及感謝Redhot君提醒。原來一包駱駝，換三包555至啱。

投資港股：B計劃(三) 阿牛

http://hk.myblog.yahoo.com/yomagyomag/article?mid=3999
下午講到阿牛『棄暗投明』，做左反骨仔，將22955入貨點變左22050點。

咁阿牛忽然轉舦，有義務要解釋吓點解可以咁樣，變得咁快咁得人驚。

其實之前的45%，55%，65%都喺圖表派嘅皮毛功夫，喺攞港股的近期數據計出嚟嘅。用佢個好處就喺會推算到今次大大約約會跌到乜程度，因為如果連45%都唔到，個市已經到左底嘅機會，就真喺好低好低，但要跌到55%就難啲，跌到65%又再難啲。

有 左呢個概念，我地就大約知道自己會去到乜上下位，先會有入貨嘅位。之但喺統計歸統計，只能作一個概念，上次喺咁，今次唔一定要跟足。等如你老婆日日飲檸 茶，都喺落匙半到兩匙糖，但唔表示佢明日會落番匙半到兩匙；佢落一匙或者三匙都得㗎喎。所以如果有進一步貼士出現就立即要改；例如你太太一早睇報紙，又咁 啱今日報紙話食得糖多會生腸癌，咁你小心啲喇；睇清形勢先好幫老婆落糖，唔好亂嚟；如果唔喺，分分鐘捱鬧。

亦都喺因為咁，所以話圖表派危險，就喺因為佢地攞啲統計，就當正實啱咁用，如果環境一變，就即刻瓜得。

好喇，下一個尷尬問題，就喺：

咁即喺幾時入貨呢？

呢個決定，喺要平衡兩個因素的：

1)盡平，所以要等跌多啲先好買。

2)又唔好等到過晒廟，買唔到。

要搵呢個最佳入貨點，可以用三個辦法：首先喺計日子，睇吓幾多日後會跌到底，然後買貨，或者喺用點數計算，跌夠多少點然後入貨，第三，仲有一個反彈入貨法。

我地先放大一月和五月，兩次下跌的詳圖再睇一次。如果以時間計，一月嗰次，跌了19個交易日就到了底部；五月的一次，跌了17個交易日就到了底部。如果夾硬攞嚟套用，今次底部將會跌至12月14至12月16日，星期二至星期四之間出現。

如果使用點數計算，一月的底部在跌了2776點之下，即12.4%跌幅；五月的一次，低點在跌了2123點之下，也就是10%跌幅。

值得一提的是，兩次調整都有一些像樣的反彈，一月的一次，在20033的初步底部到達後，五天就反彈上20722的高位，相等於3.4%反彈。五月的一次，在初步低位到達後，翌日就反彈上去20426的高位，相等於2.5%。

所以另外一個辦法，就是等反彈高位出現後，再下跌的時候，到下一個低位時，讓它再反彈到相若的%，就確定底部已到，然後入市。

阿牛這次建議三法俱用，到了十二月中時，大約跌了10%之後，又之前反彈過2%至3%後再跌，就到了入貨點。

為甚麼要這麼複雜呢？

明天再說。

這裡可以肯定說，明天按兵不動。

投資港股：B計劃(四) 阿牛

http://hk.myblog.yahoo.com/yomagyomag/article?mid=4008

昨日講到今次可能要用一個異常複雜嘅辦法搵入貨點，因為後市非常難估計。

今次利好利淡消息一齊出現，如果貿貿然入市，好有機會買定之後，個市繼續下跌，例如再跌一千點，咁雖然有6000點 margin，喺定過抬油，但個心就會萬分不爽。咁就無謂喇。

壞消息當然就喺加存款準備金，和政府打擊樓市；但好消息方面QE2又剛出左，通脹又睇升，冇樓炒，資金又擁向股市，有利股市上升。所以好消息勁，定壞消息猛，又究竟好同淡，邊個發威先，變數甚多。呢啲環境唔喺講道理嘅，因為市場講理性又得，唔講理性你都吹佢唔脹，走勢喺跟大眾感覺點樣，同有冇大戶想乘機攪嘢而決定。鹿死誰手，真喺難料。

尋日星期日嘅報紙，喺打擊樓市措施發表後，過了第一個交易日後嘅第一套報紙；就正如阿牛11月12日，第壹玖玖篇咁講，傳媒發揮左威力。昨天星期日，經濟日報例假，星島日報仍然有，而且最多人睇嘅東方日報，同蘋果日報，就全版報導，話樓市『謝晒』『食蛋』，已經到了寒冬嘅地步。

如果淨喺靠睇報紙，就只有相信個市瓜左，壽終正寢；雖然阿牛從相熟經紀口中知道，其實市場平穩，觀望，同埋淡靜；只此而已，根本就唔喺好似講得咁差。

跟住一如所料，陸續有經紀覆盤，問阿牛嗰兩個關聯單位嘅情況；覆盤為名，鋤價 為實，個個經紀講到第二句就已經想要牛嫂減價，因為有人減價，就好向佢阿頭交差；幾間大行，趕住要覆晒盤，死驚有賣家減價，俾『友行』攞到盤先，執輸行 頭，慘過敗家。佢地可能心情欠佳，阿頭又要監佢地覆晒所有盤，加上有同事落左新盤，扯薄左人手，於是乎業主唔肯減價嘅，想同佢地講多句都唔高興，嫌業主 煩。

講得肉酸啲，就好似剛剛天災地震，家家都死左人，賣棺材嗰個仲逐戶去問，喺人地傷口上灑鹽，如果有棺材賣，貴啲你買唔買。如果問佢：我肯俾錢，咁棺材有冇貨吖？(我肯減價，你有冇客要我間屋吖？)

個答案喺：冇。

幾時有呀：唔知。

然後問番你：間屋再平啲你考唔考慮賣吖？

我肯。咁有冇客吖？

都冇喎。齋噏咋。

各位有樓在手，仲想賣貨嘅朋友，阿牛奉勸一句：最後召集喇。

所以阿牛唔敢估實個市會點走，就喺咁解；因為個樓市已經受到唔公平嘅利淡消息 充斥，就恐怕佢跌得太急，拖累股市，明明股市本來輕輕跌破二萬三千點，就已經可以，偏偏市場氣氛太差，萬一指數繼續再向下陰吓陰吓，仲要慢慢跌，陰乾幾星 期嗰隻，咁如果揸滿手好倉，就會由個心一路路寒出嚟。

呢個就喺11月1號，阿牛講嘅雙鬼拍門，一隻都唔夠，整夠一對，唔喺驚佢，喺煩啫。有時啲大鱷質得兩日，見唔多跌，急抽高個市都得。

與其喺咁樣受無窮無盡嘅折磨，就倒不如隔岸觀火，到真喺個市跌定先郁。

今次採取個辦法，因為需時甚久，要等到十二月中近尾先會入市，反而仲穩陣，可以等樓市塵埃落定先再算。嚴格嚟講，喺阿牛專登揀個要等最耐嘅辦法，唔想冒險。

大家可能會覺得：咁好悶喎。

尤其喺冇乜貨喺手上嘅朋友，更覺冇癮。甚至乎如果個市唔喺好跌，迅速又爬番上去，咁就完全錯過晒今次調整可以賺錢嘅機會添。

但喺大家認為，悶同錯失機會好吖，定喺死好吖？

阿牛仲想去到熊市，可以斬瓜切菜咁賺錢，唔想在牛二不明不白咁犧牲左，冇晒副身家。

投資港股：B計劃(五) 阿牛

http://hk.myblog.yahoo.com/yomagyomag/article?mid=4082

南北韓今日炮戰。

阿牛就覺得完全冇料到。因為發生左幾個鐘之後，南韓先公報，今朝在延平島附近練過炮，而且北韓已經警告過，叫南韓唔好亂嚟，同唔好射過界，如果唔喺就唔客氣。

再夜啲，消息漸漸再明朗啲，原來南韓而家正在延平島附近，進行緊軍事演習。而且仲喺海陸空軍聯合演習，叫做『護國訓練』，即喺大規模演習，唔喺操炮咁簡單。

咁今朝護國訓練，俾北韓警告，中午就受到炮擊；大家聽完之後，諗到乜嘢？

阿牛就覺得，喺咪南韓操炮射過界，令人唔高興呀。

如果北韓真要挑釁，就唔喺炸個島仔，一定炸啲有軍事價值嘅設施，亦唔喺射完二百炮就收工，點會冇下文吖。

咁多地方唔演習，揾邊界有爭議嘅地方演習，仲要大規模行動。結果擦槍走火，人地還手，咁有乜好講呢。

簡單啲講，即喺小便射過界，整污糟人地嘅地方。

唔好以為進步，富有，識拍韓劇嗰個就實啱；窮到燶，落後，淨識做樣版戲嗰個就實錯。

未必嘅。

大家守吓規矩好啲。