笑到最後：三大理據追合豐
1 :
GS(14)@2017-09-17 16:29:12上周本欄「問價」推介勝獅貨櫃（716），推介開市價被挾高至1.66元，隨後的確被震倉，翌日最低見1.58元，之後明顯展開升勢，上周五收市最高見1.75元，追回資產合理價值只是時間問題。大價股今年升勢強勁，近日則飽受外圍因素影響，市場對「績優＋折讓」有需求。合豐集團（2320）一隻股有齊「績優＋折讓＋出售資產」，業績公佈後吸引到連大股東都要掃貨。合豐中期純利多賺1.34倍，業務由去年第四季中後價量齊升，行業復蘇不會半年完成，計往績，下半年業績較上半年增逾倍，業績支持下股價勢將再升。事實上，其他紙業股今年中期純利升約六成，全年股價升5成至逾倍，合豐績更優但股價僅升18.56%，追落後只是時間問題。合豐最新每股資產淨值達1.96元，PB僅0.59倍，績優股不可能出現如此大折讓，僅僅追回資產淨值已有70%升幅。更重要原因：高明有朋友，喺大陸開廠，佢同我講，深圳樓價近年狂升，加上地方政府「三舊改造」，將唔值錢嘅廠地改造成住宅。中期業績顯示，合豐廠房資產有13億元，本身已高過該股市值9.16億元。合豐喺深圳、東莞及清遠仍有五間廠房，公司於2014年年底出售東莞鳳崗廠房，已證明沒有資產是非賣品，肯定當日出售後該區地價繼續上升。賣開有條路，一旦有人覺得早年出售資產賣平咗，不排除其他土地以高價出售，甚至自行轉型發展住宅迎接深圳樓市升浪。合豐現時有三大理據：「績優＋折讓＋出售資產」，隨便中一樣都足以引發股價升浪。大股東家族、副主席許森平去年6月股價0.6元大手增持，至今年初1.12元近倍升後反手減持。聯交所資料顯示，許森平及行政總裁許森泰在公佈中期業績翌日更立即以1.12元掃貨，我即刻諗：你都肯買，唔倍升都唔沽啦。首站先睇股價追回資產淨值1.96元，潛在升幅達70%，今次值得不問價追合豐。
高明
http://www.fb.com/bigricetea本欄逢周一刊出
來源:
http://hk.apple.nextmedia.com/financeestate/art/20170911/20149265
笑到最後：初段帶出放紙鳶
1 :
GS(14)@2017-10-09 02:46:38本欄讀者過了開快車的兩個星期。前個星期本欄「問價」推介勝獅貨櫃（716），推介理據是「績優＋折讓」，推介開市價被挾高至1.66元，該股最新每股資產淨值為1.78元，該股上周終於開車，最高升至1.97元，升18.67%。周五出現震倉但仍收1.86元，明顯已企穩資產淨值樓上。對於此股現時有以下兩個睇法：一、航運股似處於復蘇初期，過往慣常造貨櫃會領先行業跑出。已持貨不應被震走，參考東方海外（316）收購價市賬率1.4倍，勝獅貨櫃應值2.49元，但要肯等；二、推介當日是「績優＋折讓」，現時只剩下績優，值博空間不及推介之初。另一推介則是上星期推介的合豐集團（2320），因有「績優＋折讓＋出售資產」三大理據，值得不問價追，推介當日開市1.19元，同日以近乎最高位1.42元收市，兩日後最高見1.52元，升27.73%。合豐最新每股資產淨值達1.96元，全部理據條件不變，繼續放紙鳶。至於本星期，本來細價股市場熱鬧，理應乘勝追擊，但8月初跌千點重創後，高明枱頭寫了張字條，寫出三大股市凶兆，提醒自己出現類似情況便要收斂：一、每日炒股收入「球來球往」；二、窩輪長揸正股短炒；三、衍生工具市場旺過大市。最近高明觀察到類似情況出現，只是主角變成細價股。每年總有一至兩個月市場熱炒細價股，高明相信今年可持續更久，因為今年大價股搵到食，少量利潤流入二三線股已不得了。但炒風持續亦不等於期內會一支箭上升。熱炒中間一定有震盪，既然類似的凶兆出現，不如稍為收斂，繼續持貨但不開新戰線，視乎市場情況再出擊。一旦炒風持續，「績優＋折讓」組合仍然是市場主要追捧對象，現時持貨可以確保繼續有賺，不致市升時「零持」；相反，一旦調整，因為部份股份累績一定升幅，仍有緩衝位。今年細價股派對應該會炒得更久更熱鬧，犯不着剛開party便晒冷吧。
高明
http://www.fb.com/bigricetea本欄逢周一刊出
來源:
http://hk.apple.nextmedia.com/financeestate/art/20170918/20156297
笑到最後：折讓主宰買樓決定
1 :
GS(14)@2017-10-09 03:54:08上星期本欄建議手上持倉放紙鳶，某程度上是早了一星期放慢手腳，皆因二三線股的炒風冇變，只要恒指不升不跌，細價股便會開派對。直至上周五，大市跌229點，破壞了少少氣氛。高明相信今年細價股派對未完，但中場有休息時間，股份只要仍有折讓，再放多個星期紙鳶都不壞。近期投資市場的焦點由股市回到樓市，特別是「首置上車盤」搶了話題。現時所謂「首置上車盤」至少有兩種：第一種是傳聞政府會於施政報告中推出；另一種則是發展商擬自行推出的。要了解首置有沒有用，要先知道為何近年住宅短缺？住宅短缺的根本原因，是樓價上升。因為樓跟股票、比特幣及鬱金香一樣，越升越多人想買，越跌越唔想買。只要樓價繼續上升，高明大膽預言，即使移平香港所有郊野公園起樓，住宅樓會繼續短缺。反之，如果樓市因縮表或其他原因展開跌浪，即使停建新樓，貨源仍會源源不絕。現時才諗首置的人，一定是驚冇份賺多於怕輸錢，這種心態入場，一定要買樓價上升後能分享成果的樓，否則白做。傳聞中政府推出的是「首置上車盤」，政府大折讓賣樓，但出售後十年八載轉售單位，只能賣給政府，初步傾向公屋租戶可獲優先認購。若然屬實，計劃一聽已知抽唔過。上述計劃的潛在買家，是已晉身「現代中產」的公屋住戶。所謂「買得樓冇諗過跌」，諗住升先會買樓，到樓價再升的時候，即使買入「首置盤」有折讓，都冇份分錢。一旦樓價下跌，雖然有政府包底，但你本身有間公屋，早已立於不敗之地。至於發展商搞的首置，就要睇跟市價折讓夠不夠大，以及一旦樓價再升能否分享成果。因為發展商搞首置，目的是換取政府將手上農地轉住宅地的權利，真正大錢是日後起樓，推首置不僅要令人覺得有着數，更要無爭議。若果折讓夠大、捆綁年期跟辣稅相若、鬆綁後可以市價沽，其實有一定值博，可用作賭樓價不跌。當然前題是：一、發展商會唔會咁好死；二、有咁筍就搶崩頭啦！
高明
http://www.fb.com/bigricetea本欄逢周一刊出
來源:
http://hk.apple.nextmedia.com/financeestate/art/20170925/20163488
笑到最後：「樓價產品」有得諗
1 :
GS(14)@2017-10-22 16:23:44一個不方便說的真相，因為太過政治不正確，無人夠膽講，所以就由高明嚟講得白啲：香港樓市嘅問題並唔係住嘅問題，而係冇份贏嘅問題，對樓市咁大怨氣，因為未上車嘅人冇份贏。高明7月寫過「冇份贏係慘過輸」，其實應用喺樓市亦一樣。樓市家陣最大嘅問題並唔係冇得住，而係冇份贏。更大嘅民怨係，過去10年，聰明人知道咁多外圍不穩因素，係唔會買樓。10年過去，樓價飛升，聰明人仲等緊時機，反而一個天水圍師奶，發咗個小達，鬧番人食屎專家轉頭。聰明人的財富大落後於一個師奶，民怨就係咁嚟。今次份施政報告講明要解決市民置業嘅問題，證明咗特首都明白，主要問題唔係住屋，絕大部份怨買唔起樓嘅人都有地方住。今次施政報告話要起首置，詳情未寫明，但賣出條款一定嚴，如果最後類似「十年內只可以原價賣畀政府」，變相令首置變成升冇份贏，跌就當儲錢。要香港人有份贏，就應該發明同樓價掛鈎嘅資產，例如賣地表現掛鈎債券或者認購居屋期權，同iBond一樣，香港人優先認購，買賣單位拆細到一萬蚊，確保大部份人買得起，並且喺港交所（388）掛牌買賣，令到未有能力上車嘅人，都可以分享樓價上升嘅成果。無論樓價高定低，買樓成本大，一定有人無法上車，加上現金長年跑輸任何資產，極難靠儲蓄上車。如果發明資產將樓市拆細，喺資產上局部上車，到真係買樓時都冇追得咁辛苦，叫做救得一個得一個。最後，跟進高明喺第四季投資導航推介嘅中州證券（1375），當時推介原因有二：一、旗下「中原期貨」分拆釋放價值；二、H股相對A股大折讓。前者因為係中國新聞，香港較靜，報導講過董事長菅明軍話計劃有5間子公司在新三板或香港主板上市，可能要到分拆公司香港上市先有較多焦點。至於折讓，現時仍維持66%。季初推介時3.63元，上星期最高見過3.79元，幾肯定股價已經見底，但要炒得起，都要時間去蘊釀，惟有繼續耐心等待。高明
http://fb.com/bigricetea本欄逢周一刊出
來源:
http://hk.apple.nextmedia.com/financeestate/art/20171016/20184563
笑到最後：問價追新宇環保
1 :
GS(14)@2017-10-29 23:31:15今年港股隨慢牛附送每月震倉，持貨力是今年贏錢的關鍵之一，另一個關鍵則要數基本因素，始終公司食正行業增長期，可以無懼市場波動，隨績優而炒上。下一隻盈喜股就是新宇環保（436），將食正未來三危險廢物行業供不應求增長期。高明得悉，新宇下半年純利好過上半年，明年的純利將會倍翻。2016年新宇下半年較遜色，2017年下半好過上半年，即肯定要發盈喜，連同明年盈利倍增，合共至少要發出兩個盈喜。新宇環保是江蘇省危險廢物（危廢）處理的龍頭股，處理危廢產能佔省內已經營量的9成。危廢是環保業最當旺的行業，源於2013年中國司法機關解釋《新環保法》：非法處置3噸以上的危廢便是刑事；2016年再釋法，棄置100噸以上將判入獄3至5年；十九大習近平大篇幅講環保，未來執法只會更嚴。新宇根據地江蘇在全國危廢量排第三，2016年產生338萬噸危廢，但截至2017年5月，已發的許可證僅24萬噸產能，已經營的僅7.3萬噸產能，基本上產能幾大，便會有幾大生意。資金亦瘋狂併購，危廢業於2017年已有16宗併購交易，最新中金環境（A股）以18.5億元人民幣全資收購危廢廠金泰萊，市盈率達33倍，如此高溢價，證明行業供求完全失衡。新宇2017年上半年純利已佔去年76%，中期業績露玄機，報告期後產能由6.5萬噸增至9.5萬噸，增幅達45.97%，產能一增加便會有生意。保守估計下半年每股盈利較上半年只增長4成，即全年每股盈利至少0.038元，折算今年市盈率約15倍。現時行業併購則以33倍為標準，即使不計新宇的龍頭溢價，新宇目標價1.24元，潛在在升幅以倍計。今年3月新宇收購三間南京危廢公司，其中一部份以0.8元溢價發新股支付。我即刻諗：溢價發股，肯定有料到。蟹貨喺0.8元，盈喜將至，想買爆升股，就係呢隻，記得問價追新宇環保。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20171023/20191942
笑到最後：港股走勢「樓市化」
1 :
GS(14)@2017-12-18 03:48:2611月6日本欄寫「博年底前見三萬點」，結果唔使等到年底，11月已見三萬點。惟好景不常，11月底至12月出現2,000點的龐大調整。高明再度預測：博年底前再上三萬點。先回顧表現，當日推介兩隻股份：騰訊（700）及平保（2318）正股，同時係調整元凶。但係如果上兩個禮拜冇睇市，睇股價完全唔覺有異樣，仲升咗幾蚊添。冇錯，你係無法喺騰訊400蚊樓上食糊，但同樣亦都唔會喺366蚊被震走。買正股好處，就係明知強勢股震倉，你可以選擇扑暈自己，輪證就冇呢個優勢。今年升市一路靠騰訊及平保，情況有如07年升市孖寶匯控（005）及中移動（941）。情況唔同嘅係當年大牛市用整體上升去推郁大市，今次只係集中幾隻，某程度上港股氣氛仍未及當年熾熱，少部份人好癲，大部份人冇份享受。由此推斷牛市仲未完，新股以及上次三萬點只係暖場活動，明年牛市先會見真章。一般分析會覺得，近期見底極速反彈約600點，隨即會喺此水平整固，甚至再度調整。高明反而認為將會升得更快，務求甩開所有被震走嘅弱者，令佢哋無法再上車。事實上，今年港股唔係A股化，而係「樓市化」。基本因素永遠偏貴，令「聰明人」成日諗住落車、偷位、沽空，但一個長升局面令落車嘅人只能以更高價追價上車，或者眼見價格絕塵而去。騰訊已經係一個例子，從業績之中總會搵到股價不合理嘅原因，但係每個月破頂，間中喺10天至50天線調整，之後開展升幅，而非回落至低位任人買入。港股走勢「樓市化」，箇中原因可能係背後炒賣嘅係同一班人，今年將錢移去股市，再用同一種手法炒港股。無論如何，港股已過咗齊齊發達、全股皆升嘅局面。臨近結算、基金經理收爐、大調整後猶有餘悸，全部都係年底前爆升至三萬點樓上嘅動力，令所有猶豫不決嘅人明年望股興嘆。以兩萬八點為界，一日唔跌穿，短期目標先睇三萬點，並且估計升市純以騰訊及平保推動。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20171211/20241320
笑到最後：一出糧買恒指牛
1 :
GS(14)@2018-02-04 23:14:29港股稍為調整一日便再開波，高明認為類似情況會持續，所以早喺2017年11月12日寫嘅「十條狂牛必守戒律」已強調，「趁未到三萬點、狂牛未到，求其買兩手盈富基金（2800）參與吓啦」。不過，如果有跟但震走咗，又或完全冇跟，咁點好？高明建議一出糧買恒指牛。喺每月消費入面，搵出最無謂嘅開支使費，停咗佢，拎返出嚟。假設最後大約每月有10%開支係純浪費，香港人月入中位數16,000，每月出糧時，直接將嗰1,600蚊，不問價買入一隻恒指牛證，然後唔再睇。下一個月再出糧，又再買過。直至確認大市掉頭為止。重申一次：做實業最值得尊敬，靠打工搵食亦受人尊重。但牛市持續，總有朋友有參與股市受惠，即使努力工作，長久下去一定心理不平衡，最大壞處係：往往一路升時唔買，等股價升至最高點先仆入去。去年底騰訊（700）已係一例，300蚊冇人敢「高追」，要升至439蚊後回落先覺得有買貴冇買錯，最後一下子殺到落366蚊，貼價騰訊牛全軍覆沒。幸好升勢未完，當日血肉長城嘅正股客至今全部大賺。不過，升市至今，一手騰訊或平保（2318）正股已接近五萬元、港交所（388）亦要三皮。折衷方法惟有用生活中最無謂嘅消費開支買恒指牛證，該筆開支本來已經係浪費，轉化為牛證有兩個可能：一係打靶，一係坐牛市順風車。即刻變成有一半機會唔使輸晒。至於買咩條款，可以選擇同現價相差約1,000點收回價嘅恒指牛，博大市唔出現千點以上嘅調整繼續上。可能有人會話，咁細注搵唔到食，不如瞓身？如果舊年你冇瞓身，證明你眼光都唔係太好，今年先瞓身隨時瞓街。趁住月底出糧，拎一少部份出嚟，逐步重新入市，埋單都叫有享受過今浪大牛市。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20180129/20288480
笑到最後：「沈判日」自救攻略
1 :
GS(14)@2018-02-13 01:50:36美股跌666點，夜期及黑期顯示，星期一港股好大機會都會跌600點以上，高明今年剛開牛證即遇打靶，即使只係騰出部份閒錢買，面對「沈判日」，亦都覺心情沉重。不過，「沈判日」跌600點已成定局，持貨者只有兩個選擇：打一半定打晒？總之，唔啱就要打。可能會有人話：強勢股、有業績可以長坐。但高明唔認同，保持彈出彈入，先係應付癲市嘅最佳方法。畢菲特式長坐可以帶嚟豐厚財富，前題係你要係畢菲特。事實上，畢菲特同拍檔芒格所用嘅係經過改良嘅價值投資，唔單止要接觸管理層，更加會自行或派員入董事會，了解盤數，即係話佢哋得到嘅資訊，同一般投資者不同。萬一旗下公司股價大跌，一個電話叫經理交盤數上嚟，一睇，現價嚴重低於公司價值，即刻打電話叫盤房掃貨。一般投資者就冇呢個優勢。所以，如果想長坐一隻股票，要考慮兩個問題：一、自己有冇強勁嘅現金流；二、可否一個電話打畀公司經理問佢要盤數。是但一個問題答案係YES，歡迎長坐，如果兩條都係NO，咁就至少有部份股份要彈出彈入。無故一出一入，可能會被人覺得好多餘、驚死、怕跌，但今次牛市強勢股狂升，買入明顯係跟癲，冇人知道幾時癲完，可能今次已經癲完，亦可能唔係。信自己主觀判斷，不如信市場，價格係一般街客惟一得到嘅即時資訊，買騰訊（700）、平保（2318）之類嘅股，係因為佢升；倒返轉，如果佢跌，就要沽。寧願出現升勢再買過。呢個方法稱之為：「唔啱就要打」。寧願付出使費俾經紀、寧願一買一賣可能蝕差價，只係計一次可能係好笨，但呢招目的不爭朝夕，而係在於大牛市完結時，有沽貨嘅習慣，唔會一直揸到落熊市。買股票，唔啱，真係要打。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20180205/20296028
笑到最後：狗年投機攻略
1 :
GS(14)@2018-02-13 03:29:162017年係神奇嘅一年，唔需要揀股、唔需要有技巧，見升嗰隻買嗰隻，就會有錢賺。更奇嘅係，每逢轉角市，有懷疑十五十六，買股票一定係正確嘅選擇。2018年，特別係立春過後，明顯轉變，變成「疑點利益歸於現金」，稍為有懷疑，啲人沽都沽唔切。錯咗都唔怕認：即使高明按紀律「跌就沽、升就買」，星期一已大幅減持，無奈到星期二凌晨未瞓，見美股反彈，以為港股一樣見底並重展升浪，開市見股價已升，貫徹「升就買原則」，高追三寶，點知一個鐘後發現唔對路即時止蝕離場。當時高追都知反彈有啲條件未被滿足。通常反彈先決條件有幾個，包括跌幅夠多、市場夠恐慌，星期三開市前已有上述條件，但未滿足嘅因素係（1）時間唔夠，未足夠令博反彈嘅人心死；（2）股價低位逐級跳，升幅一個鐘高過另一個鐘。當時高明仲以舊年嘅心態買股票，結果當頭棒喝又跌錢。高明預期，今年至少首季，股市要重展升浪，必須要達至冇合理疑點，所有負面因素清除，啲人先敢落注，同舊年有唔同。當然，人人炒股方法唔同，已經有人覺得夠平而買入，唔想阻人發達，高明唯一建議：用盡自己所識嘅分析工具，確認冇死角先下注。返到上星期，本欄「沈判日自救攻略」文章一出，留言有讚有彈，部份留言覺得：股價下跌唔應該止賺。一個星期過去，恒指已跌3,421點，衷心希望當日留言覺得不應止賺嘅網友今日唔會太傷。我老豆成日話：通常唔買嗰個最多意見。留言嘅人，估計多數都冇買。但我憂慮，有跟開嘅讀者睇完我嘅文章，再碌落去睇留言，見留言恥笑沽貨獲利嘅人，覺得唔夠型而一直持貨。事到如今，希望大家投機當機立斷啦！回顧雞年，高明喺應該買貨時叫買、應該沽貨時叫沽。今次係農曆年前最後一篇，高明祝大家狗年笑到最後。高明
http://fb.com/bigricetea本欄逢周一刊出
來源:
https://hk.finance.appledaily.co ... e/20180212/20303294
Next Page