對賭 百萬倉 - Start from One Million
http://philipleung168.blogspot.com/2010/04/blog-post.html
無嘢寫, 通常都係好事, 起碼唔使較位去入嘢, 即係大調緊, 賺緊高臥咪夠.
惠理今星期畀人洗到不似人形, 后悔都已太遲, 注碼太少怕且要留守了. 呢兩星期以為內房股調到夠啩,慢慢入咗啲上海姑爺,點知呢兩日畀阿爺追殺, 內銀股都要跟跌; 但壓呢樣嘢, 通常都係有起之勢先會有, 即係有升先至有壓. 國指已領先咁跌, 爭廿百天 2.5 巴仙, 牛熊 6.2 巴仙, 雖則 macd 有不利交差, 但上次掂完無幾耐, 一年唔會掂咁多次啩, 都係偏向追多啲 h 股, 快啲為主, 睇吓下星期點調. 美股就炒復蘇, 雖則美股唔係幾識升得顛, 但注碼搭夠, 咁就夠圍了.
入吓入吓, 都幾乎滿倉. 聴到有人話大調整將至, 都有啲銀耳. 但反唇咁低 b 怕且真幼稚, 諗吓係咪有得轉身, 兩手準備到先係緊要. 做到全倉, 即係百份百有信心, 要賺到盡咁話; 但投資一路走嚟, 都係要不斷係懷疑之中,否定之后再去肯定,然后又再重複嚟諗過, 所以無乜係百份百啩, 但都要係不太肯定中要作決定. 留太多現金亦不會,睇勢起碼一年內都唔會有乜大上落,走失大升既風險仲大啲, 見到喪升先算. 真係滿嘢既話, 以百萬倉經驗, 係高位保守啲, 係低位進取啲, 其實已可跑得贏, timing 其實仲難.
今日 a 股期指開鑼, 以往經驗通常現貨跟住起碼喪升番一二年 (美市 82 香江 86), 但實際有無人國內沽期, 香江買 2828 做套戥就莫宰羊, 但點都有 so 啩. 但如細戶無現貨做對沖, 日炒夜炒, 咪好似本地打蹾嗰啲, 咪得個輸字. 反而最近研究指數期權, 計吓怕且先覺得值得落注, 就好似賭場既廿一點枱咁樣. 技術性就上網或拎本書睇吓先嘞, 簡單啲咁講即係想做庄, 定係做閒先; 如果你有現貨, 係高位 sell call, 或者你肯 "真心" 係位買貨, 所以係低位 sell put, 咁去食時間值, 咁你咪係庄, 爭在會唔會將本來大賺既嘔番啲出嚟. 其他既咪係閒囉, 如做以上動作而無咁既條件 (無貨或無錢無心買嘢), 咁輸起上嚟真係唔講得笑, 切記. 記得零八年有網友收 2600 sell put 跟其他每月十萬咁話, 但十月一役輸咗三百個, 幾年收埋都怕且要嘔突, 如輸哂按金怕且真係要 total ko 囉.
百萬倉. 上路 百萬倉 - Start from One Million
http://philipleung168.blogspot.com/2010/04/blog-post_30.html
指數唔係跌咁多, 但呢兩個星期啲二三線係咁跌, 個個血崩咁話. 畀個二萬二拋窒, 加親啲內房資源起碼跌七八巴仙, 即做傻仔. 但見到咁低, 想溝都開始莫水, 啲抽新股都搞到乾哂塘, 好耐都未試過. 啲大盤陰吓陰吓跌, a 場仲低過牛熊七八巴仙, 今日先升番少少, 不得不令人警惕. 散水去避險而家似乎早得濟, 死症都要重複去驗, 睇番美港日股市, 同埋日元真係無乜唔妥出現, 但歐元同 a 場就真係幾弱, 但今次大跌都無辦法, 企咗邊就要堅持, 如唔係垃圾, 守幾年, 應回得番啩, 咁去博牛二三, 點都有蘇, 當然要犧牲可能低撈既機會, 但上年低位都無乜邊個 all in 喎.
滙豐同宏利輸咗幾多, 已不是重點, 要等平水先轉股係咪痴啲. 轉股睇吓相對值博與否而已. 既然呢兩隻唔係點郁, 亦再無興趣研究佢地黑箱盤數, 不如係低位轉去啲高波動好過. 睇番往績, 係上次牛市點解會跑輸, 通常都係買得太多 "價值" 點穴股同備用茄薯太多, 唔博又點會有平均或超回報呢. 唔會估調整完否, 差唔多就要出手. 既然估個市仲未玩完, 雖則內房技術上實在十分肉酸, 但亦代表而家最抵買啩. 中鋁係藍籌中都算最波動, 啱啱有得賺番, 咁就去馬吧. 開頭諗過不如轉 cop, 但未喪升住又賺緊, 緊係沽弱留强先嘞. 惠理畀五十天壓住, 要磨吓先.
最近睇咗國內期貨作手壽江所著 "作手" 一書, 書中自道自哲學系畢業后, 於九十年代初至零五年操盤期貨經歷. 作者本身早期困於短期波動, 畀貪婪恐懼控制, 强迫性做短線買賣, 傷痕纍纍. 后來反思自己操盤記録, 及印證其他作手總結, 將操作改為中線順勢操作, 於情緒, 風險同績效管理上更為可取. 此書文筆通暢, 真誠反影各種情景及其情緒反應, 可為各投資者反照. 提及如何選擇指標, 雖不免老生, 但細微之處不乏礫金. 末章提道投機者如何釋放自己於生命之中, 亦少見其他書提及. 最近本人都常思有否短線常勝之炒法, 理性上知其為謬, 但人性不免陷於僥倖之不理性. 看到書上話賺到幾百萬但要用個頭去換, 咁無生命既錢, 要來何用呢.
洗單 百萬倉 - Start from One Million
http://philipleung168.blogspot.com/2010/05/blog-post.html
琴晚話有人按錯盤,杜指即跌千點洗盤, 日元都升番兩三巴仙, 避險情緒急升. 咁啱得咁蹺, 我就唔係幾信囉, 係跌市中個個都想套現, 啲人睇住你嚟急住走, 順勢推多一把, 咪震哂出來了.
大市已跌破牛熊第二日, 先前以為 ah 代跌夠, 點知都係要追補番, 當然判斷錯誤係要畀唔少差價出街既. 二三線已嘔突變蝕, 但已不理, 大市唔知係咪到底, 但睇估值都算抵買, 咁就入都唔停得手, 連荷包仔都乾埋. 唔係話歐元危機唔駛理, 當然勁起上嚟去到金融風暴, 咁惡劣都有之. 但要等一切釐清, 仲點係呢啲價先, 而家買既當然打包埋入面既風險嘞, 入面有害, 但亦可能有利, 爭在你想要幾多風險回報. 網友好多已轉番入淡, 話今次反彈只不過係廉價流動性, 虛幻咁做成而已. 但觀諸每次大跌之前, 都係有個泡沫顛吓, 令股民如痴如醉, 今次真係見唔到. 而歷史上亦未見過由政府打壓下而見熊, 反而係托住咁去跌, 前兩年見過嘞. 技術上斷估篇已反覆討論牛熊, 真係幾難令筆者信反彈論囉. 當然世事乜都有可能, 以上言論亦係本人所坐之盤及地圖推論出嚟, 筆者睇錯當然會被套牢幾年, 但如守得下去, 不過會損失更靚低溝機會而已. 如讀者不能承受, 就要調節持貨, 以瞓得著為準囉. 如估方向咁去賭, 長期啱短期槓桿咁賭隨時都要輸光喎.
中鋁變咗價外輪, 賭得太早后悔已太遲, 未有既怕可以落吓細注. 中旅先前估得太强, 洗落嚟都係無險可守, 二三線真係要睇緊啲, 下次咁話. 反而地產雙雄守得唔錯, 或者下星期都咁强可變為領先. 咁多隻, 最穏都係 cop, 攻守皆宜.
斷估-半半 百萬倉 - Start from One Million
http://philipleung168.blogspot.com/2010/05/blog-post_14.html
去到啲大位, 都係要重複檢討大市走向同展望, 寫吓斷估篇呢看清前面條路. 呢兩個星期大插以后, 日升日跌, 磨到啲人意志無哂, 一係清倉做番塘邊鶴, 一就係長嗟短嘆, 怕真係呢個大插.
外人而家睇香江股市係中國股市分枝, 雖則直接畀國內, 本土及外來資金角力影響. 所以睇港升跌, 首要睇 a 場走勢為先, 正如九七前專跟美市走. 但 a 場今趟微調直情係重量級宏調,筆者都低估咗其威力, 食到應一應, 所以國內股民都話 a 場係政策市,今次真係有一番親身既體會. 國市未必跟外圍走, 今次就走前半年; a 股有時仲唔跟國內經濟唔同步, 好似零一至零五年咁反住走, 直至股改同 qfii 同外圍帶動回升為止. 而香江受 a 美兩市帶動, 外力都不容勿略, 上年三月美市創底都要令香港做多個底, 另邊 a 場早已一支箭飛走囉.
a 場大浪由 2008/11/4 (y/m/d) 日 1707 點開動直升至最高 2009/8/31 日 3471 點, 中間最低點為 2009/8/31 2668 點, 最近覆跌回附近, 今日收 2697 點. 三份一回調位及牛熊位早破, 中間位為 2589 點, 應為極强支持, 去到附近當局可能有啲嘢會做. a 股歷史高位為 2007/10/16 日 6092 點, 跟最近低位之中點為 3900 點, 今次升浪仍未觸及. 現五十天線同長期線交會於三千點左右, 現低過牛熊十巴仙過一星期, 不得不令人憂慮, 雖然反彈幅度超高, 不過以技術角度嚟睇其實未夠確定, 而且而家形勢都幾尷尬, 所以今月餘下走勢都幾緊要, 要睇緊啲. 所幸現在估值已比較合理, 周三晚啲外資係度吸 2823 同隘價升番去七八巴仙, 就算套戥都算值租啩.
香江今次牛市由 2008/10/27 11015 點開始, 升至牛一高點 2009/11/16 22944 點, 1/3 及中位為 18968 點及 16980 點, 牛一高位后最低點為 2010/2/8 19551 點. 技術上比 a 股强, 雖則上高收緊銀根, 外面猛印銀紙托番一把啩. 美市則由 2009/3/9 6547 點升至今, 未見高位, 亦已升破中位 10320 點 (2007/10/8 14093 點), 形勢現最强, 控到條水喉真係唔同啲, 跟足戱美市遲啲都要跌番啲啩.
而家每日后悔入得太早, 不過是零頭一巴仙以內, 點樣斷后向先係戲肉. 如睇位大出大入, 似乎最為理性. 技術上可以等確認先買賣, 但賭徒咁去買賣係咪投資緊先. 上次睇大跌都唔會清倉, 唔係既話可能入得仲少. 今次緊張咗可能坐貨重過以前, 如仲有一定現金可能從容啲, 但落注后其實分別咪一樣. 所以要回報, 相應壓力一定有無得避, 爭在係咪超出你預期. 又要唔跑輸大市, 又要跌市輸少啲, 邊有咁理想, 如咁做咪係咁出出入入. 估值現家唔算價值, 但亦唔係貴算合理, 睇大圍都係行牛為主, 大圍轉勢肯定信号真係未見到住 (a 股就幾半半), 如真大插插既話, 咁唯有換番啲散紙哂冷, 或等低位賭啲超反彈, 硬食囉.
百萬倉 . 自由 百萬倉 - Start from One Million
http://philipleung168.blogspot.com/2010/05/blog-post_31.html
今個月最低跌十幾個, 啲二三線都跌番去未升時或更低處, 散仔係咁平倉,癈事輸突上年賺嗰啲. 今個月最低點為 5/25/2010 18986 點, 收稍低於黃金位 19126 點, 之后就彈番上去無再落番. a 股呢兩星期除一交易日外, 全都能收高過中位. 道指則追跌破中位, 調回牛熊線附近. 如以內房股做領先指標, 既然再跌唔落, 冉冉上番, 可視為調整完既訊號, 睇番各指標亦頗脗合. 而家阿爺變咗做房產稅同歐元專家, 大把人做佢代言人, 猶其倫敦班鬼仔.
都諗過以信號嚟睇, 而家真係有幾多見熊信號, 例如 ah 同港股跌破牛熊多時, a 仲調多過十巴仙遠牛熊同離高位二十添. 之所以大把 blogger 話要清倉去反手食熊咁話, 上年波動咁大, 如無走既話蟹咁多, 都唔好話受得了, 都唔怪得啲人驚青既. 自己坐咗咁多貨, 話唔少少担心就呃你既, 但事實比起零八年坐咁少, 都係無嗰時咁担心. 既然坐嗰啲都係有實力既同分散持股, 就算惡劣如今次海嘯, 挨過了還不是一樣, 唔好畀波動大到就得. 其次, 亦重複反思投資既原意, 就係以合理既價錢, 以長期策略持有及調整優質既證券組合, 以作長期資產增埴及保存. 當然筆者唔會否定而家會再跌回萬七, 甚而仲低啲. 但打開過購物表, 真係樣樣都好鬼吸引, 就算蟹咗都幾有信心三五年內都去得番啩. 其次, ta 前提就係每個循環都會重複, 但以經驗睇, 每個 cycle 都有自己特性同波幅, 如只用上次路紙去估, 咁都幾危囉. 所以今次都係會以盈利線增長趨勢為主, 如大圍仲升緊, 同股價唔係偏高得太離譜, 咁就當係牛, 唔會點避險, 好似先前話齋, 睇到而家既離泡沫還遠呢, 但讀者如怕咗波幅, 就適量調整存貨比例囉.
瑞安跌勢以喘定, 反而信和追跌番, 香江對政策啲敏感度點都低啲. 各資源股都做咗大底, 中鋁都買得過了, 上高口氣都鬆咗好多. 惠理同中旅都升番, 其實係人都知今年咁鬼多人換回鄉證, 盈利必然爆升, 但係啲人都係咁沽, 真係無哂計.
李生話通脹一定嚟緊, 睇番連歐央行都要印銀紙買番歐債, 好似花旗咁量化寛鬆, 最尾又係水淹金山嚟多濟, 亦為本人無睇得咁淡一原因. 但佢話功能組別有功於香港, 咁又係, 佢既香港係唔同於小市民既香港, 小市民唔會係 target 買嘢食, 只想係街邊檔買吓菜揾歺晏仔, 但而家李生都食埋. 以前啲人收割, 都會唔會攞盡啲禾穗, 等啲孤兒寡婦都可以拾啲為生, 而家連餅碎都唔畀你, 唔通個個都要炒股同做 sales 先可以係香江生存. 最搞鬼就係泰國整咗個實彈射擊區, 合法殺人咁話, 各國都噤聲, 但債係要還既. 民主行咗咁多年, 實會遇到爭論同鬥爭, 但唔係體制鬥爭同改善其機制, 而係用第三者武力打壓自己玩哂, 咁又算係乜民主. 諗番臺灣忍咗阿扁咁多年, 雖然眼寃, 但真係太值得囉.
地舖月租百萬 左丁山
|
|
前些時，收到獅 子山學會電郵，有一個時事討論會在蘭桂坊舉行，地點就係Hong Kong Brew House，時間就係放工後快樂時光。呢間酒吧嘅名字依稀記得，好似五、六年前去過一次咁大把，但印象模糊咯，畢竟左丁山並非蘭桂坊蒲友。打電話問專門向 餐廳供應西班牙葡萄酒及橄欖油嘅餐飲Ｍ，餐飲Ｍ告知正確地址，加多一句：「快啲去咯，呢間吧就快要被逼遷。」哦，本來想去嘅，不過支支左左因啲事冇參加獅 子山學會嘅討論會，只得作罷。
呢日餐飲Ｍ在飲茶時話：「蘭桂坊嘅租金猛升，HKBH嘅舖位連同隔籬兩間，屬同一業主，聽聞將三個舖位一齊招 標，出租金最高者勝，結果現有租客全部輸晒，要搵地方搬，但蘭桂坊並無甚麼吉舖，佢哋可能無法在原區繼續經營。」原租客投標失敗，新租客會係邊一間酒吧餐 廳呀？飲完茶後，八卦起嚟，打電話搵一啲對蘭桂坊熟悉嘅人士打聽吓，卒之聽到傳聞話，新租客大有來頭，十分豪氣，一舉租下三個相連舖位，會打通晒做一間全 新嘅Hard Rock Cafe，預料今年年底前可以開業。咦，呢間餐廳好似以前位於舊太古大廈，後來停業，估唔到現在會捲土重來，進軍蘭桂坊，一舉殺敗原來租客o忝，相信出手 幾重下。消息人士話每月租金去到七位數字，真係mama mia，他日要賣幾多杯咖啡或啤酒先至可以交租？
中環與尖沙嘴彌敦道嘅地舖租金愈 來愈貴，大舖位月租動輒係七位數字，如果冇大陸遊客幫襯，唔知點樣交到租，在呢啲地方經營餐廳酒吧而賺到錢嘅，要好有真本事至得，經營手法直情叻過富士 康！
一位廠家講起郭台銘，就話鴻海生意額雖大，佢一啲都唔羨慕，佢話做電子裝配生意，標準毛利率係1%至4%，多啲都冇，富士康在09年之 稅前利潤係總收入之1%，佢估計富士康之員工薪水佔總收入8%，加薪三成，即係要從收入減除2.4%，仲邊度有錢賺呀？但點解富士康肯如此大方，加薪三成 呢？呢位廠家話：「睇吓郭先生點樣變魔術，唔好眨眼呀！」
|
| |
百萬富翁 ckm001
http://hk.myblog.yahoo.com/jw!G9qPswuRGxoAjkVjcnY-/article?mid=37496
香港富翁增逾倍 升幅全球之冠
「炒樓」、「炒股票」令不少香港人成為百萬富翁。去年經濟復 蘇，樓股皆升，令本港富裕人士（資產值最少達一百萬美元）的人士上升超過一倍，是全球增長最強勁的地方。
根據美林全球財富管理和凱捷顧問昨天發表的《全球財富報 告》，香港是二○○九年亞太市場富裕人士 增長最快的地方，由於去年港股表現良好，加上零八年股市重挫令富裕人士基數減少，香港富裕人士的總數去年上升百分之一百零四，是全球最強勁的增長。不過， 富裕人士的總數於二○○八年大幅減少百分 之六十一，因此，至去年底該總數只有二○○七 年的百分之七十九。
以上是昨天的新聞報導，大家已經看過，你們會發覺，上年香港百萬富翁大升 104%，但人數只等於07年的79%，相比2007年，2008年百萬富翁數目勁跌61%，經過財富大轉移後，07年的一批百萬富翁已經被09年另一批 百萬富翁取代，回顧06、07年香港股市大牛，只要你夠膽下注，無論你買藍籌、中價股、細價股或是窩輪與牛熊證，都一樣賺大錢，但到08年股市大瀉，許多 投資者都連本帶利輸凸，創富容易守富難，投資人應該以此為鑑。許多人投資理財，只求回報最大化，但卻無視投資風險，三更窮，五更富，正是投 機賭徒的寫照。現在是四年一度的世界盃，賭徒們正放棄炒股，轉移去賭波，如果大家看一下世界盃歷史，論攻力，意大利隊平平無奇，只靠穩守突擊，昨晚更二比 三不敵斯洛伐克出局，但竟然之前在世界盃歷史上拿了四屆冠軍，只次於拿了五屆冠軍的巴西，無論投資或是踢足球，都是人與人之間的一種競賽，要求勝，先要求 不敗，又一例證。
死等 百萬倉 - Start from One Million
http://philipleung168.blogspot.com/2010/06/blog-post.html
無寫幾個星期, 都掙扎好無寫落去, 但百萬倉每月都要報數, 點都要每月一篇啩. 啲網友問倉係咪真倉操作, 筆者就無咁傻, 真係將成副身家畀人睇, 只可以說, 與真倉成份操作基本一樣, 雖則風險取向有時少啲, 猶其係想避險時. 雖則避險方法唔同, 但年回報則巧合地一樣, 先前保守得制, 希望往后追得勁啲, 話要做到股神廿二巴仙年回報, 怕仲要切切實實調好啲手法同心力囉.
道指都算守得穏, 力守中線同牛熊, 唔破萬點問題不大. a 場則追貼番 h 股, 而家平水, 前幾日仲低過 h, 講咁鬼耐直通車, 而家咪係最好時機, 如可以既話, 一定開番個 a 股炒入面去, 起碼套番十廿個先. a 跌唔落, 香江市亦見守得住, 彈番牛熊去磨, 如無意外, 年尾前應突破 23000 位創新年高. 但先前熊一反彈高點係二萬六, 未必咁易突破, 破咗就海闊天空了. 以上次牛二經驗, 估計下年中先有力破向上. 呢一年都要揾啲大小概念炒炒波幅, 而家咪炒緊賭業股.
今期隻桑 x 徹回第二上市, 本人無抽慳番手續費, 見到啲價畀人係新加坡舞, 又搬啲舊股嚟套戥, 點夠佢地玩. 農行定得唔平, 市面都平過佢, 抽嚟做神功第子嚤. 抽前問吓啲經紀入非熱否好過, 都算係一種服務啩.
睇信報話隻超值傳媒股, 講到咁明顥, 望向日出咪真係無窮人. 呢間嘢都好搞鬼, 差唔多七成市值係現金, 計番剩得嗰啲咪即係兩年咪回本. 你見到, 唔通人地見唔到, 試過低過一蚊搞私有化, 怕且無咁易死心, 呢隻仲值博過鬼佬報, 但同馬氏去鬥磨, 要鬥耐性, 而家唔派息去趕客, 我就幾鐘意呢啲信號囉,等幾耐就唔知, 斷估一年內點都要成事, 盤數迫住靚啲仲點有肉食.
百萬倉. 半年 百萬倉 - Start from One Million
