📖 ZKIZ Archives

上周更新 (16 Jun - 22 Jun) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/16-jun-22-jun.html
組合單位值: 89.70
組合週回報: -1.18%

上週組合買回時代集團(1023), 加入中海外(688), 恆隆地產(101); 沽出銀娛6月$39 PUT OPTION, 減持港燃(1083), 創科(669), 網龍(777), 稻香(573). 目前現金水平約2% (前週3.8%).

恆指上星期繼續乏力反彈, 進一步下試20,000點. 觀察個股表現, 一份無甚特別既報告竟然將舜宇(2382)打殘; 申洲(2313)趁高抽水, 最終亦失守配股價; 強中強銀娛(27)星期五亦出現大幅度下跌. 強股愈收愈窄, 剩下既被逐隻擊破, 並非好事. 指數星期五低位出現反彈, 但2,3線股票明顯跟唔上, 整體氣氛其實並無改善. 指數一日未能重上21,400, 應該要減低持倉水平, 降低心理負擔.

自己周初已經著手減持股票, 最佳做法都係隻隻沽少少; 最唔想沽都係稻香, 但因為此股盤路太疏, 趁有高位點都要酌量減少少. 雖然已經放棄睇好, 但臨近月尾, 其實可以考慮下搏出現技術性反彈. 當然如果搏反彈就一定用藍籌大股, 跌得最急果隻值得優先考慮. 富時指數調整比重, 中國海外(688)有明顯沽壓; 搭多隻恆隆地產(101), 拎星期五低位做止蝕, 投機性買入.

有幾個SECTOR其實應該仲未死得住, 如手機零件, 科網及燃氣. 瑞聲股價開始轉弱, 且看今星期有否機會趁低吸納; 至於之前提及過既信利(732), 相對上技術優勢不高, 自己預估今年估值起碼都13倍, 唔算特別便宜, 決定放棄.

雖然開始降低長線持倉比重, 但餐飲界別自己仍然有一定信念去堅持. 稻香業績啟示本地餐飲業人工增長放緩, 若然加上食材價格受控, 毛利率改善的話, 整個行業利潤都有機會提升. 今個星期比較關鍵, 且看翠華, 大家樂, 大快活業績如何, 再為組合持倉定去留.

派得好投資組合年結 (2012-2013) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/06/2012-2013.html
===================================
32% - 長線倉位:

12% 路訊通 (0888.HK)
7% 大快活集團 (0052.HK)
5% 港華燃氣 (1083.HK)

9% - 中線倉位:

5% 信星集團 (1170.HK)
2% 網龍 (0777.HK)
2% 時代集團控股 (1023.HK)

9% - 短線倉位:

9% 中國海外宏洋 (0081.HK)
0.8% - 期權倉位:

0.3% 中國建材 07/13 7.00P
0.2% 工商銀行 07/13 4.70P
0.1% 建設銀行 07/13 5.00P

49% - 現金
===================================

投資組合單位面值: 90.30
月回報: -4.26% / YTD: -0.04%)
(上月月結: 94.31 / 2010年7月1日起始值: 60.00)

派得好投資組合每日表現


過去一年交易比以往頻繁, 而當中亦出現甚多失敗交易, 主要出自短線倉位部署錯誤. 以絕對金額計算, 傷得比較重係來自以下幾個交易:

平均買入10,000壹傳媒(282)@$1.65
平均沽出10,000壹傳媒(282)@$1.39

平均買入12,000理文化工(746)@$5.29
平均沽出12,000理文化工(746)@$4.75

平均買入10,000建滔積層板(1888)@$3.89
平均沽出10,000建滔積層板(1888)@$3.58

平均買入4,800敏華控股(1999)@$7.60
平均沽出4,800敏華控股(1999)@$6.53

平均買入1,500中信証券(6030)@$20.70
平均沽出1,500中信証券(6030)@$18.58

投機壹傳媒(282)係由於以為出售台灣業務勢必成事, 但事後證明整個賣盤交易所牽涉範疇太闊, 成功機會率未必如想像中清晰, 加上復牌日股價已經高開, 變相出錯空間太少, 值搏率亦下降. 今次算係嚴守止蝕位, 可以及早沽清; 但損失金額亦算多. 日後面對此類情況, 就算立心投機, 其實都只宜小注入場; 機會率難辨, 當買期權算數.

理文化工(746), 建滔板(1888), 中証(6030)三項交易死狀同出一轍, 六個字概括: 中國復甦概念. 大中國美夢過去數年締造無數倍升股, 但必需接受現實, 中國目前經濟狀況肯定比想像中壞. 最低工資不斷抽升, 匯率許升不許跌正在不斷削弱企業盈利能力; 而技術附加值不高既工業, 製造業公司最受直接影響. 目前行業處於漫長整合期, 低潮甚難捱, 因此市場根本不會給予此類公司過高估值. 買入後期望市場遷就自己睇法, 倒不如改變自己, 去迎合市場.

投機中國復甦概念失敗, 得到相當重大教訓. 目前投資股票, 一定要撇掉以往中國必贏既想法. 目前只有幾類中國公司仍然可以力爭上游, 其一係勞工密集: 客戶需求有穩定增長而產品亦有一定技術要求; 大型如瑞聲(2018), 小型如時代集團(1023), 理文手袋(1488)等等工業股其實仍然有投資價值; 其二係產能轉移: 公司能夠早已, 或漸漸將產能移遷至其他人工低一大截既東南亞國家, 對盈利能力及競爭力幫助甚大. 如申洲(2313), 聯泰(311)等等, 目前估值仍然比過去三年最高多出一截, 絕非無的放矢; 信星(1170)目前正朝此方向走, 期待明年業績可以慢慢重拾增長正軌. 長期受政策打壓, 練得一身好武功既內房; 受惠國家重視重視環保政策, 大力推動清潔能源既燃氣; 估值不便宜但盈利增長強勁, 想像空間夠闊既科網都其餘值得看好既中國股票. 除此之外, 都係少碰為妙.

投資股票信念不足本身能夠造成既後果未必會太嚴重, 但若然信念不足之餘, 注碼又落得太大, 下場一定會相當淒慘. 投機敏華(1999)失敗, 正正係最佳例子. 事後證明當日睇敏華其實並無睇錯, 但INITIAL BET落得咁大, 當日傳出發CB消息後股價大瀉, 根本係不能不割席離場; 信念不足, 亦埋下翌日股價低位大幅反彈沒有重新進場既伏筆, AND THE REST IS HISTORY.

檢討今次失誤, 最大問題都係買得太大; 其次係當時根本無足夠心理質素呢頭斬倉, 第二日就重新追貨. 經歷過不斷挫敗, 其實已經開始明白自尊於股票市場之中根本一文不值. 拘泥於無謂既綁縛, 操作上反而不夠得心應手. 其實今年來已經比較多係先買入後再做功課, 但正如人與人之間相處, 開始時認識不深, 投放過量感情, 斬纜時痛得死去活來, 何苦? 投資為贏錢而非贏啖氣, 適當既做法係將注碼慢慢疊上去, 由市場決定是次操作正確與否 -  MAKE SURE BET ON THE RIGHT SIDE.

近日富士高(927)績後急挫兩成. 富士高之死, 根本非如管理層受訪時所講, 與派息下降有關; 最大問題係由於下半年業績嚴重走樣. 個個睇住上半年業績做VALUATION, 下半年遭與如此滑鐵盧, 事前根本無從預計. 沒興趣繼續談富士高, 反而今次事件令我回想起一年前重倉股聯亞(458)發盈警後股價急挫既慘況. 人生流流長必然會遇到幾隻大跌股, 停牌股, 清盤股, 若然未遇上, 只係時辰未到. 要將最壞情況出現後所造成既震撼減至最低, 最起碼要做既係注碼控制.

公司業務太難理解, 其實已經不值得重倉持有; 其次係交投太過疏落既公司, 亦不值得過份關注. 目前股票市場高手如雲, 所謂錯價很大可能係"自己睇錯價"多過"市場錯價". 普遍投資者都對此間公司提不起勁, 買賣兩閒, 就算公司無問題, 都肯定叻極有限. 更關鍵係買又無對手, 賣又無對手, 一個壞消息, 個個爭先恐後沽低幾格; 買賣高難度股票沒有特別獎金, 其實又何必枉費精神? 日均成交幾萬股, 倉位細, 尚且勉強可以; 但我總唔信十年, 廿年後大家仍在打理一個數十萬股票倉位. 良好習慣, 必須從小開始培養. 自己已經全線撤出低流通量股份如永旺(984), 聯亞(458), 利亞(831), 永安(289)等等. 昔日愛股又如何? 今日回望, 除笨有精. 投資股票, 根本從來不應投放感情.

展望第4個投資年度, 自己投資理念從來無變. 組合挑選長線持倉成員, 優先考慮條件仍然係業務簡單, 派息穩定既公司. 以往單純沉醉股息回報, 但其實更重要既係盈利穩定兼且能見度高. 若然基本因素沒有大變, 大快活(52), 稻香(573), 港燃(1083), 路訊通(888)都會係組合核心成員, 其餘長線成員選擇尚有莎莎(178), 佐丹奴(709), 置富(778), 領匯(823), 金沙(1928), 中國海外(688)等等.

中線持倉成員會傾向挑選盈利增長具確定性, 又或者正處爆發週期公司. 時代(1023), 網龍(777),信星(1170)便屬現時選擇. 仍打算加入瑞聲(2018), 聯泰(311), 維他奶(345), 合生元(1112)等等.

短線持倉反而無特別喜好, 嚴守止蝕, 主要挑選有特別催化劑既公司作短線持有. 指數換馬必然要參與; 其次係估值極殘; 其三係52週新高, 價量異動既股票, 亦可以加入考慮. 有過以往經驗, 來年操作上仍會傾向先買入後了解. 風險用注碼控制, 短打INITIAL BET極限可能係組合2%, 等證據愈多, 再放大注碼. 另外亦會多用期權長倉, 為長線成員對沖風險.

投資組合第三年回報持平, 但若以期間個股表現作標準, 如此戰績當然完全不及格, 但可貴既地方係今年學到既野比之前兩年加埋更多. 曾經以為買中倍升股就眼光獨到, 今日回望簡直貽笑大方. 愈美麗的東西我愈不可碰, 挑選倍升股皇, 故事太淒美動人; 其實只要組合平穩增長, 股災唔會一役沒頂, 就係個人來年投資最大目標.

======================================================
上月月結: 派得好投資組合月結 (May 2013)

第3年半年結: 派得好投資組合月結 (Dec 2012) / 半年結
第2年全年結: 派得好投資組合年結 (2011-2012)
第1年全年結: 派得好投資組合年結 (2010-2011)

投資組合第3年(07/2012-06/2013)回報: -0.83% (最高: +3.78% / 最低: -5.17%)
投資組合第2年(07/2011-06/2012)回報: +20.7%
投資組合第1年(07/2010-06/2011)回報: +26.4%

上周更新 (30 Jun - 6 Jul) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/30-jun-6-jul.html
組合單位值: 90.22
組合週回報: -0.0%

上週組合加入中石油(857), 維他奶(345), 瑞聲(2018); 減持路訊通(888), 賣出中海宏洋(81). 小注短炒世房(813), 微蝕離場. 將招行(3968), 工行(1398)即月PUT OPTION平掉, 換馬至安徽泥(914), 江西銅(358)即月PUT OPTION; 將中建材(3323)即月PUT OPTION行使價不斷下移, 繼續持有.

上星期恆指先見21,000然後急劇回吐, 最後兩日又可以急升超過700點, 價位波幅之巨, 上落步速之快, 極難捉摸. 用心感受市場, 其實來來去去大家都只敢炒指數股. 所謂強股, 其實早已所剩無幾. 合生元(1112)之死, 除反映於大陸做生意容易受政策風險影響, 中國模式, 國進民退之外; 港股目前相當相當難炒, 亦係一大問題.

恆指"高倨"兩萬點樓上, 但國指早已除除向下, 往2011年低位進發. 就算不計科網股, 其實仍然有甚多股票遠高於2011年低位. 信手拈來, 中國建築(3311), 金沙中國(1928), 中海外(688), 新奧燃氣(2688), 恆安國際(1044), 信義(868), 創科實業(669), 申洲國際(2313), 莎莎(178)...但相反, 亦的確有一堆股票正向當年低位邁進: 建滔(148), 理文(746), 馬鋼(323), 中國龍工(3339), 重慶機電(2722), 至於內地消費型百麗(1880), 達芙妮(210), 利邦(891)等等早已仆直更加不在話下.

唔得既股票會繼續唔得, 有好一堆公司自己睇得相當淡, 延續中國無運行主題, 淡倉三寶水泥兄弟搭江西銅, 應該都算係今個月長沽之選; 但另一方面, 就算得既股票, 亦唔知邊日會隨時變成賤過地底泥. 合生元(1112), 舜宇(2382)便屬最好例子. 自己都開始有D迷惘, 究竟現時仍買進估值貴至完全無出錯空間之維他奶(345); 或者以$40以上價錢買進瑞聲(2018), 是否將組合自行引爆之導火線?

太多UNKNOWN, 又唔係非持有股票不可, 立心迴避風險, 其實最佳做法係儘快將錯誤修正, 覺得有疑問的股票就不如斬左佢就算數. 相對美股仍保牛氣, 香港太多股票正在拉牛上樹, 實在很難說服自己現時在牛市之中. 買正股炒唔起, 做淡倉又隨時俾人挾到嘔電, 自己實在未想到有更好應對方法. 淡倉當然會繼續持有, 但就無謂亂咁加注. 無端端買大左, 輸起上黎心理上比買錯股票更難過.

操作短評 (10 Jul 2013) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/10-jul-2013.html
1. 低成交下大家繼續廝殺指數股, 飄上飄落唔駛十分鐘, 正常穿兩萬一就要追貨, 但今日早段明顯中伏; 暫時靠邊站, 減少Day Trade.

2. 淡倉三寶(358, 3323, 914)價外期權時間值流失速度開始加快, 今早江西銅隊穿祥上身即月12蚊PUT竟然只升得不足五成, 暫時將個股PUT全數清倉離場, 等挾返高D再買好似比較抵搏.

3. 藍籌股中石油仍算可以, 起碼能夠完全跟足指數走, 頂得順INTRADAY波幅, 其實可以繼續持有; 自己會換馬至恆地(12), 止蝕位放$45.5, 搏重上$50.

4. 亞太衛星(1045)穩守突破點, 止蝕位放$5.55, 小注投機性買入.

5. 上週末完成信星集團(1170)分析 (1170.HK 信星集團), 近兩日成交開始增多, 算係佳兆. 似乎係有少少成功機會既MID-TERM TRADE, 自己已經開始加注. 只要守穩裂口高開日低位, 順勢操作, 暫時問題不大.

6. 瑞聲(2018)成為繼舜宇(2382), 合生元(1112)後第三隻強股被擊落, 喜幸星期一及早修正錯誤, 否則已經坐艇. 走勢甚差, 暫時唔會沾手.

上周更新 (7 Jul - 13 Jul) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/7-jul-13-jul.html
組合單位值: 91.17
組合週回報: +1.05%

現金水平: 4.8%

上週組合加入聯泰(311), 亞衛(1045), 恆地(12), 聯想(992), 中海外(688); 加注信星(1170), 重新加入中石油(857). 賣出維他奶(345), 瑞聲(2018). 小注短炒世房(813)失敗, 中海外(688)失敗; 中石油(857)成功, 潤地(1109)成功, 恆安(1044)成功. 期權方面, 安徵水泥(914)即月PUT平倉; 江西銅即月$12 PUT繼續持有; 趁中建材(3323)反彈開即月$6.75 PUT.

上週比較多短炒, 先做賽後檢討:

1. 星期一低位接中石油(857), 當時股價$8.65, 拎當日低位$8.6止蝕, 上望$8.8左右, 最後成功達標, 而及後再升, 只屬後話;

2. 星期一同一時間分注出擊潤地(1109)與世房(813)兩隻內房, 前者$20.15買, 止蝕放當日低位$19.8, 翌日$20.7沽出; 後者$14.46買, 止蝕同樣放當日低位$14.28, 翌日升幅竟然跟不上兩隻龍頭內房, 及後更加自行倒地. 觸及止蝕位但走唔切, 輸多左幾格. 總結兩隻內房一勝一敗, 來回得個吉.

3. 星期二恆安(1044)無厘頭低開近3%, 無特別新聞, 當然紮衡馬衝入場. 開市後見低位回升, 正路當然立即追買. $78.65買, 止蝕放當日開市$77, 結果$80.25沽出;

4. 星期三指數一下子挾上21,000點, 見如此情況當然追貨. 追買藍籌中最有信念兩隻: 中海外及中石油, 另加農地催化劑恆地(12). 結果當日走勢超級飄忽, 十分鐘內指數由升300變幾乎倒跌, 收市前又升返兩舊. 可惜當日短炒其中兩隻中海外及中石油早已被震走.

總結幾個短線交易, 好多都係一蚊搏一蚊既交易, 問題不大. 當然要考慮埋交易費用, 但以當時市況如此又快又飄, 可以選擇唔賭; 但若然參與, 短炒其實係唯一出路.

不過經過上星期幾日好淡角力後, 星期四指數出現大成交裂口上升, 短期都一定係睇上. 星期五小幅調整, 係一個幾好既上車機會. 趁機減低現金水平, MARK實幾隻大股; 寧願放遠少少止蝕位, 都要一定要買.

雖然追買大股, 但基本概念仍然未變. 中國相關股票如內銀內險證券股, 暫時係點都唔買, 所以變相自己會小左好多選擇. 中石油(857)基本因素扭轉, 2 Jul大成交裂口上升後一直無回補跳空位意慾, 買大股的話係根本無可能走甩呢隻. 自己決定於$9.2左右買回, 寧願預輸6毫子, 都要重新上車;

恆地(12)情況類似, 農地算係少少催化劑, 5 Jul大成交裂口升穿6月大跌後整固橫行區, 本地地產股要PICK一隻寧願揀跟4叔買; 中國海外(688)賣樓數字理想, 市場反應正面, 11 Jul大成交裂口上升, 次日亦未有回補意慾, 立即買回; 聯想(992)個人電腦市佔率稱霸地球, 小注投機性持有.

大股之外, 組合亦加入聯泰(311)及亞衛(1045). 兩者皆會於8月份公佈中期業績, 先行小注進場; 剔出瑞聲(2018)及維他奶(345), 主因係前週買入時明顯太衝動. 兩股估值已升至沒有任何出錯空間, 揸得唔舒服, 倒不如唔買. 星期一微蝕離場, 事後睇係執番身彩.

開始加注信星(1170), 自己有少少信心, 逐個禮拜慢慢買, 主因係交投問題, 不能一次過買太多; 網龍(777)走勢甚有股王風範, 熊市中難得既牛股. 雖然不可能買得大, 但點都繼續持有.

雖然目前大市基本上已經無太多強股或領導股, 但燃氣界別走勢則明顯轉強. 中國燃氣(384)升勢甚勁, 週線圖亦準備突破, 應該多加注意; 另外味千(538)剛公佈同店銷售數字比首季理想, 實地觀察, 本地店午市亦要排隊等位; 早前品牌遭受嚴重破壞, 但銷售網絡仍然強大, 挽回食客信心後有機會扭轉長期弱勢.

期權方面目前只有江西銅(358)及中建材(3323)淡倉, 約佔組合0.7%. 睇淡中國大方向不變, 但短線可能會走走位, 畢竟現時已經係月中, 時間值流失速度可以甚快.

上周更新 (14 Jul - 20 Jul) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/14-jul-20-jul.html
組合單位值: 89.00
組合週回報: -2.38% (YTD: -1.47%)

現金水平: 1.9%

組合持股變動:

• 中線 - 增持 信星集團(1170)
• 短線 - 加入 味千中國(538)
• 短線 - 加入 中國軟件(354)
• 短線 - 加入 華潤燃氣(1193)

• 中線 - 剔出 網龍(777)
• 短線 - 減持 聯想集團(992)
• 短線 - 減持 恆基地產(12)

自己立定短線看好, 上週減少短炒, 專心坐貨. 重點繼續增持信星(1170); 另外亦加入味千(538), 經營固定成本高, 營業額見底有機會帶來營運槓桿. 當然目前復甦力度並不算強, 估值亦甚貴, 所以操作上只好見步行步: 先入一注, 希望八月份中期業績會再有啟示.

組合週回報-2.4%, 相對指數, 大市而言表現算差. 網龍(777)高位大幅回落影響甚大; 其次短線倉位中海外(688)及亞衛(1045)本週調整亦拖低組合回報. 由於兩者仍未到止蝕位, 目前唯有繼續死坐.

網龍接刀失敗, 最後止蝕離場. 交易過程中, 仍有地方值得記存. 當日早上自己亦有留言:

PARTIPRAL 派得好 said...

網龍將91業務售予百度，意味上市夢落空；原先大家都唔知分拆後值幾多錢，依家賣價確定，公司由無限想像概念，變成毫無前途，早前買入搏實物分派投資者今日止賺離場，算係正路做法。

出售後手頭現金近百億，會派特別息。既然現時市值已貼近現金水平，低位可以接刀。

July 16, 2013 at 11:45 AM

公司由無限概念變到手揸現金不知有何出路, 其實根本不可能贏到估值溢價. 就算以接近每股現金水平買入, 上升空間亦甚有限. 見刀即接, 操作上幾近賭博 - 賭的是公司出售後所得大部份資金會以現金股息形式派送. 可是整個想法最大問題在於特別股息多寡根本難料; 而最終管理層會否用"特別"方法變走大筆現金, 亦是另一風險所在.

整個燃氣界別目前表現並不算差, 潤燃(1193)屬行業龍頭, 相對新奧(2688), 港華燃氣(1083), 中國燃氣(384)等公司估值溢價收窄, 私有化屬主要陰霾; 而貪污新聞亦對整系公司有所打擊. 下星期一股東便會投票決議私有化方案, 按目前發展, 通過機會微乎其微; 若深信華潤系不會因為董事長貪污而從此收檔, 整系股價大幅回落, 當有可搏之道.

潤電(836)屬超級風眼, 沽空比率亦甚低, 沒有挾倉誘因, 低位反彈幅度應該有限; 潤地(1109)情況相若, 其次亦跌得不算多, 值搏率一般; 反而潤燃(1193)基於私有化方案所限, 近月股價窄幅波動. 出現如此轟動新聞, 令私有化大有機會落空, 反而對股價追落後有一定助力. 因此環顧整個華潤系, 最值搏當數潤燃(1193); 確認私有化未能通過, 可以加注.

要套回現金買潤燃(1193), 操作上唯有將恆基(12)賣出. 自己短線仍然相當看好此股, 賣出正股後用即月深度價內期權代替. 付上一定交易費用及溢價, 仍算值得.

上周更新 (21 Jul - 27 Jul) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/21-jul-27-jul.html
組合單位值: 90.60
組合週回報: +1.80% (YTD: +0.30%)

現金水平: 6.25% (前週: 1.9%)

組合持股變動:

• 中線 - 增持 信星集團(1170)
• 中線 - 增持 聯泰控股(311)
• 中線 - 增持 時代集團(1023)
• 短線 - 增持 華潤燃氣(1193)
• 短線 - 增持 亞太衛星(1045)
• 短線 - 加入 招金礦業(1818)
• 短線 - 加入 中國燃氣(384)

• 短線 - 剔出 恆基地產(12)
• 短線 - 剔出 聯想集團(992)
• 短線 - 剔出 中國軟件(354)
• 短線 - 剔出 中國海外(688)

上週二恆指國指雙雙向上突破, 成交增加. 上週三公佈匯豐7月份中國製造業PMI, 初值47.7再創新低, 但中港股市對壞消息反應不大, 利好. 目前恆指已經逼近二萬二, 7月11日裂口大升一棍應該屬於真突破, 未見有轉弱跡象之前, 策略上繼續順勢而行, 專心坐貨; 尤其可以開始慢慢提升二, 三線股票比重, 可望迎頭趕上, 追貼指數股表現.

組合持股方面, 恆地(12)突破, 事後回望當日換馬潤燃(1193)明顯早換一步. 幸好有補回即月價內, 價外期權作後備雙箭頭, 否則眼光光大石揼心口. 即月期權只剩兩個交易日, 價外CALL牌面睇變廢紙機會甚大. 一度贏近倍半但沒有食糊, 當然有些少後悔. 下次應該不管有理無理, 起碼先食一半. 賣出中海外(688), 主要想套回注碼加注二, 三線股票. 要買藍籌股可用期權代替, 早前月中擔心市況牛皮才買正股. 踏入八月份業績高峰期, 按理市況會繼續波動, 如有期權, 就不用犯本.

經濟數據欠佳但股市沒有太大反應, 商品, 商品股價格超殘, 其實值得重點留意搏反底. 上月做淡江西銅(358), 如今反手做好, 早應該知道股市中無永遠敵人. 金價亦似乎在蘊釀一波反彈浪, 宏觀因素不懂, 如果純粹看好短期商品表現, 金礦股亦應該加入考慮. 自己選擇搏招金(1818), 就算現價$5.54買, 止蝕放$5.1~$5.2, 上望$6其實難度不大.

潤燃(1193)合併潤電(836)失敗, 股價反彈力度比想像中弱, 不明原因, 但會繼續持有. 上週五傳出中石油(857)調高液化天然氣(LNG)原料氣價, 加幅或達一倍, 燃氣股股價受壓, 未知是否與此有關? LNG加價, 應會打擊LNG汽車增長速度, 對主力擴展LNG加氣站公司不利. 參考早前經濟日報專題 - LNG高盈利誘惑 燃氣商搶先機 一文, 受影響最大應該是昆能(135)及新奧(2688); 不過向工商用戶銷售燃氣仍然是新奧主力業務, 因此消息傳出後前者大跌超過4%, 後者則平收. 港燃(1083), 潤燃(1193), 中國燃氣(384)等下游城市燃氣供應商所受影響應該更加有限, 週五回調, 應該是吸納機會. 中國燃氣(384)前週已經確認向上突破, 本週調整, 藉此機會加入組合.

對某些公司有信心, 便值得加大注碼投入. 繼續加注信星(1170), 此股本身有大型沽盤長期置於$1.5, 如今終於完全消化, 且看會否重拾升勢. 自己暫時完成建倉, 或者要等多一點証明, 再決定是否加注. 加注時代(1023), 則純粹因為見價錢夠便宜. 扮演價值投資, 小注逆勢而行. 聯泰(311), 亞衛(1045)看法不變, 酌量加注.

沽出聯想(992), 主要為換馬招金(1818); 中國軟件(354)微蝕離場, 純粹嫌等得太久.

派得好投資組合月結 (Jul 2013) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/07/jul-2013.html
==================================
30% - 長線倉位:

10% 路訊通 (0888.HK)
7% 大快活集團 (0052.HK)
5% 港華燃氣 (1083.HK)

21% - 中線倉位:

12% 信星集團 (1170.HK)
6% 聯泰控股 (0311.HK)
3% 時代集團控股 (1023.HK)

23% - 短線倉位:

9% 華潤燃氣 (1193.HK)
5% 亞太衛星 (1045.HK)
4% 中國燃氣 (0384.HK)
3% 味千中國 (0538.HK)
1% 招金礦業 (1818.HK)
0.7% - 期權倉位:

0.3% 匯豐控股 08/13 85.00P
0.1% 利豐 08/13 12.00C
0.05% 利豐 08/13 12.50C

25% - 現金
===================================

投資組合單位面值: 88.86
月回報: -1.59% / YTD: -1.63%)
(上月月結: 90.30 / 2010年7月1日起始值: 60.00)

派得好投資組合每日表現


吊詭的七月, 月頭起步, 最後恆指升過千點. 雖說指數迫近二萬二, 但主要升勢其實只集中於匯控(5), 騰訊(700), 友邦(1299)及和黃(13)等幾隻藍籌股; 國指突破9,400點後暫算企穩, 但不明白為何平保(2318)如此弱勢? A股不濟, 水泥及商品股近日亦表現一般; 內房股表現則尚算不錯. 七月份二, 三線股表現乏善足陳, 就算六月份跌得多, 今個月反彈力度亦只屬一般; 更大疑問在於整體中小型股交投量甚弱, 升跌走勢已經無特別啟示, 反映市場仍然只在集中追逐大價股.

燃氣, 風電, 環保概念, 出口股仍處相對高位, 但已不算特別可以領導群雄. 網龍(777), 合生元(1112), 瑞聲(2018)相繼倒下之後, 領先股更加買少見少. 選股難度逐漸增加, 但單睇指數仍然貌似可以. 上月尾以為七月會繼續走弱, 結果完全睇錯; 今日要估八月如何發展, 亦甚難.

市況波動不外乎大升大跌, 市況繼續轉好的話應該有資金重投二, 三線股懷抱. 不過目前表面證供實在不足, 手持一堆二, 三線股搏之餘亦要開始留意現金水平不能太低. 八月份乃業績高峰期, 公司業績理想, 甚有機會突然跑出, 短線要搏, 業績股乃不二之選; 其次, 強勢藍籌只集中三, 四隻, 但目前已經明顯跑贏甚多, 不排除有力再上, 但業績公佈後會否成為強弱轉捩點?

回顧自己組合, 七月份平倉交易 (包括中, 短線股票, 期權) 表現欠佳, 整個月主要虧損亦來自此類短線炒賣, 期權反而不算太差. 要檢討的是炒得太濫, 微觀再睇, 掌握內房升跌節奏能力亦明顯欠佳. 參與太多很多表面OK實際PK既交易, 會成為拖累組合回報元兇.

超短線操作, 主要仍然靠特殊催化劑. 本月有大量業績出籠之外, MSCI季檢, 申洲(2313)六月份大手配股逾16億, 今期MSCI中國指數必然會因應流通量增加而調升比重. 詳細如何操作, 等接近換馬再作討論, 但應要暫時記存. 至於如何炒業績, 個人認為最好仍然是等業績公佈後先睇市場如何反應再決定是否追買. 業績好壞根本並非短線炒賣重點, 市場反應正面, 股價才有再上動力. 如果立心要做聰明仔, 打算行快一步, 反而值得多花時間, 心機推敲潛在盈喜股. 自己未做好功課, 暫時只搏一隻聯泰(311); 味千(538)今日剛出盈喜, 但連蘋果上星期日都已經大肆報導, 市場應該早有預期, 明早應該不會太特別.

上周更新 (28 Jul - 3 Aug) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/08/28-jul-3-aug.html
組合單位值: 89.19
組合週回報: -1.56% (YTD: -1.26%)

現金水平: 18.8% (前週: 6.3%)

組合持股變動:

• 中線 - 增持 聯泰控股(311)
• 短線 - 加入 中銀香港(2388)

• 短線 - 減持 招金礦業(1818)
• 短線 - 減持 華潤燃氣(1193)
• 短線 - 剔出 中國石油(857)

上周指數繼續向上發展, 二, 三線股亦開始輪流發力. 成交額繼續低迷, 略嫌美中不足. 自己目前比較看好品牌代工類股份, 尤其看好已經或逐步能夠將產能轉移至低成本東南亞國家的公司. 預期今年盈利有力再上一層樓, 因此上周繼續吸納聯泰(311). 中期業績如何大家目前純粹靠估, 視乎有多大信心. 東亞(23)公佈業績後市場反應正面, 自己則比較喜歡中銀香港(2388), 純粹因為比較穩陣而且股息率吸引. 可以搏業績後再向上衝, 而大股之中本地銀行股亦算穩陣之選, 不會發達但亦應該不會PK, 龍頭兩隻其實可長可短.

招金(1818)跌穿止蝕位, 機械式減持大半. 目前只剩小量, 暫時放入籠底置之不理; 燃氣股普遍回落, 潤燃(1193)私有化失敗後股價亦沒有太大反應, 無謂買太大, 亦順手減持一半.

和黃(13)業績遠勝預期, 翌日股價大裂口上升, 成交大增. 技術上理應超級利好, 自己績前搏即月價外PUT, 大有機會變廢紙. 等有回調出現, 應該反手做好; 匯控(5)明日公佈業績, 已經有心理準備又會捱挾多次. 做淡強勢股永遠輸面甚高, 所以注碼一定要適可而止.

保持一定現金水平, 繼續瞄準業績股去打; 尤其出現績後大成交裂口上升, 便值得予以跟進.

上周更新 (18 Aug - 24 Aug) PARTIPRAL - ROAD TO FINANCIAL FREEDOM

http://partipral-hk.blogspot.hk/2013/08/18-aug-24-aug.html