金手指：積極不干預回歸了
1 :
GS(14)@2016-09-06 22:45:12親愛的AO和準議員們：選舉有結果，孫柏文對你哋得一個忠告，就係呢四年，除積極不干預外，真係唔好試其他嘢，唔好諗住仲想攞「政績」。點解？首先唔講機械票，因立法會休會休足四年，機械票選民會唔care照投，所以齋安撫其他票就得。而非機械票今次可被雷動計劃郁得咁緊要嘅最核心原因，就係反對派議員功能個個一樣！因選民只係希望阻住政府做嘢！選民要議員守住議事規則，最好拉布拉足四年。你，例如朱凱廸、劉小麗，可能話：「有民意認受，仲唔發揮左膠力？」如攞朱劉做例子，朱凱廸最出名就係阻政府，阻拆嘢、阻起嘢，而劉喺網上最高收視段片，都係一開始問建制派候選人，點解支持三跑、高鐵。做「有得傾」嘅左膠，支持度會跌得快過雷曼喺2008年嘅股價，唔信問吓工黨。結構上，而家每次政府行使威迫權，永遠都係大陸人受惠，香港人找數。由證監拉沽空機構、全民退保、三跑高鐵、連醫委會改革都被定為「益大陸醫生、醫學院」。「確認書」後非機械票選民已杯弓蛇影、草木皆兵咁唔信啲AO，任何出台政策為「明益大陸人，我哋找數」，我都只係苦口婆心勸你哋為自己重返積極不干預。推任何強迫嘢，反彈大到你玩完。英國人當年積極不干預，唔係因皇恩浩蕩想賜經濟奇蹟，而係冇民主認受下，點維持政治控制權。不過培訓為技術員嘅你又點會明工程師嘅原意？祝你們好運，天佑香港。 孫柏文上孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20160906/19761241
金手指：爆煲後果會點？
1 :
GS(14)@2016-10-11 08:10:51十年前，孫柏文叫大家一注獨贏白銀嘅主要原因，就係預視到世界金融秩序已經跑到不可持續嘅階段。成個系統，近乎輕機，要reboot。而要監粗將系統繼續，將會更破壞系統嘅穩健，最終爆破時，破壞力更強，生靈嘅塗炭將會更慘烈。當時，我諗住花旗國嘅次按炸彈爆時，理應會令嗰派唔知自己做緊乜嘅專家被取締，建制會換一派知道要做乜先啱嘅人。點知，真係監粗將系統延續。例如，08年金融海嘯時，白痴都會明放貸過度會出事。收拾殘局，應該係要破產嘅人破產，要爆破嘅銀行爆，要損手、輸錢嘅人就要被懲戒。點知，印銀紙、包底、所有地區段萬億貸款。建制「專家」不但唔reboot化壓力，仲要將壓力轉移落政制系統。搞到出事嘅人更發，無辜、甚至之前料會出事嘅人就被迫夾錢埋單！結果？歐盟，解體在望。花旗國，聯儲局獨立性四面楚歌，特朗普抬頭。大陸則越借越多，銀行啲數根本資不抵債，14億存戶齊齊造反會點？你唔知？問蘇哈托。而最大問題，就係世界已踏不歸路，冇得救。呢個周末，睇好多關於香港樓市嘅新聞，我感到非常不安。價格根本已被貨幣政策完全扭曲。望住嗰啲對現狀滿意或覺得自己喺爆破時「會搵到位走」嘅人，我就諗起花旗銀行前總裁Chuck Prince喺07年7月嘅一句：「講貨幣供應，音樂停時，情況會變複雜。不過音樂繼續奏，舞就要繼續跳。而我就跳緊。」不過就算係我，睇到爆，都未知應點部署先安全，下周繼續講。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20161011/19796842
金手指：揸現金唔會咬人
1 :
GS(14)@2016-10-18 08:14:05如果有睇開利世民嘅專欄，都會覺得佢係個講世界大事多過投資建議嘅作者。不過，咁多年來，孫柏文聽過咁多投資建議中，其中最深刻兼實用就係利兄同我講嘅。記得2007年夏天，由政府喺150蚊入股港交所（388）嗰日，利兄就一注獨贏買港交所call輪。咁喺溫總宣佈「港股直通車」胎死腹中嗰日，我記得問利世民佢手貨會點，咁佢就話：「都宣佈冇啦，今日會沽清囉。」咁我就追問：「啲錢你諗住點？」佢就好簡單，不過亦令我記到今日咁講：「擺住喺到先囉，揸現金又唔會咬人。」今日無端端同大家講歷史，係因又到要沽清貨揸現金之時。咁講有好多原因，可以係大陸銀行壞賬嚴重到啲銀行資不抵債，仲要大陸已開盡政府使費，財赤極嚴重，令錢落唔到啲企業令佢哋可還債。信貸、財赤，似谷到爆點，一係資產價格大跌，一係就走資人民幣跌。如果再加重落閘（連啲澳洲賭場職員都拉，即連去澳洲賭錢呢條路都想封實），就會人都反。不過更重要係，聯儲局、歐、日央行等都好似行棄車保帥政策。全球銀行、退休基金等喺長息、短息冇息差下，多年冇錢賺，令本身資本越來越弱。已為下浪金融危機埋下炸藥。所以啲央行想將長息踢高，yield curve拉斜。為保銀行系統，就算長息升、經濟差，都會做。喺知道「踢高長息」計劃會點之前，真係揸現金好。始終，現金又唔會咬人。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20161018/19803972
金手指：救人幣搵羅康瑞
1 :
GS(14)@2016-11-15 08:12:13世界仲有好多人仲估邊個做總統，都係一切照舊。佼佼者莫過於我國中央啲喉舌，例如《環球時報》。照舊即點解？即繼續話「大國崛起能打瓜你美國」，所以警告特朗普唔好玩嘢。咁搞，勢必引火自焚。特朗普，最要面。幾個寫佢參選歷程嘅作者，都異口同聲話佢出選，係因2011年被奧巴馬公開笑咗幾分鐘，話佢冇料到。所以中央再繼續，特朗普勢必標籤中國為「貨幣操控國」，而一標籤，美政府會向中國入口貨抽四成五關稅。我唔知最終結果會點，係咪開拖，甚至引發中國經濟大危機，共產黨倒台，不過人民幣肯定會大鑊。點搞？首先，特朗普要有落台階。花旗國人唔怕為世界犧牲，不過佢哋想大家grateful少少。你啲喉舌再恐嚇話「有後果」，對要面之人兼佢後面5,000萬個唔好feel嘅美國選民，只會弄巧反拙。所以，如我係習主席，我會搵羅康瑞做駐美大使。點解？全中國，最清楚特朗普份人係點，就一定係羅康瑞同鄭家純。佢兩位1994年出手救面臨破產嘅特朗普，買佢塊地、幫佢還債、出錢發展，仲要最後有得賺，分三成畀佢。到2005年，羅同鄭賣出項目，當想分錢時，特朗普突發嬲，話點解唔同佢講，一定賣更高價，所以就瘋狂告羅同鄭。到今日雙方都係冇偈傾。不過到今年，當《紐約時報》問特朗普呢單嘢時，佢話：「其實個賣價好靚。如果你見到羅同鄭，同佢哋講佢哋好好人。」特朗普咁感性，冇羅康瑞冇佢，點都會畀啲面。仲有，除中央亦信羅康瑞外，羅有解釋畀美國人知中國經濟苦況嘅魅力。最後，當然就係羅康瑞夫人，靚過佢哋未來第一夫人啦！以上，多數唔會做。《環時》繼續玩，言論在美網廣傳，好快火燒人民幣。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20161115/19833659
金手指：只要聽話輕鬆獲利
1 :
GS(14)@2016-11-29 07:51:55久不久，啲求職雜誌、網站訪問孫柏文，都會問：「其實做財演最緊要係乜？」我深信財演其實最核心都係要答一條好簡單嘅問題，就係：「點解個市價錯咗？」太高叫你沽，太低則叫買。咁特朗普當選，政策將會大改。而到今日啲市價仲大把錯晒嘅原因有兩個。一，係仲有大把人話：「邊個做都係咁㗎啦！」連本版附近啲朋友，有啲都係抱呢個態度；二，就係有班人，特別係外國傳媒，講到世界末日咁。所以仲有好多好多資產嘅價格，待郁，有啲則郁過火。個挑戰就係搵啲未郁嘅出來，買完等收錢。上周二，叫大家不問價追嘅俄鋁（486）就係最佳例子。上周我話過特朗普將會同大陸喺貿易上開拖，而其中會最早打嘅項目，將會係鋁。所以習大大會好聰明咁畀面花旗國，叫自己啲鋁公司減產，鋁價就升。咁點解唔買中鋁（2600）？因俄鋁係俄羅斯公司，即係原本同花旗國最唔friend變最friend之國，所以冇減產風險。上周鋁價節節上升時，俄鋁股價亦跑贏中鋁。建議前，周一俄鋁收3.05元。周二我篇文出街，即裂口高開到3.1元。不過如果你聽話，真係開市嗰刻不問價追，當日收3.25元，而去到三日後即上周五，就最高見3.63元，噚日收3.45元。五百幾億市值，升勢咁急，可考慮獲利先。特朗普概念當然仲有，下周二同大家分享。我知下周係深港通開車日，我嗰隻當然避呢個唱到爛，價反映凸嘅政策啦。僅記，只要聽話輕鬆獲利呀！孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20161129/19848491
金手指：彩星玩具隨時落鑊
1 :
GS(14)@2016-12-07 07:38:53特朗普當選，嗰啲話希拉利有九成贏面嘅分析員嚴重滯後，市場仲有好多概念股未郁。兩周前叫不問價追俄鋁（486），你聽話兩日後賺兩成。上周應承，今日畀隻終極概念股。佢上台，最勁係美元。即在美賣平價消費品成首選，而家人民幣跌，最着數應係出口股。不過，出口股唔升。點解？人民幣對美元雖暴跌，不過對其他冇。出口去歐洲、英國等冇用。特朗普仲話要振奮美國工業，港出口股嚇死。大家要買嘅，係一隻中國製造只出口美國，同做嘅產品，因某理由，連特朗普都唔想攞番美國。有冇？有，就係彩星玩具（869）。佢做玩具，近全靠美市場，人幣暴跌，毛利激增。仲有，唔同開利冷氣、福特汽車、蘋果iPhone，玩具人力太密集，價值太低，如玩關稅，無助美工業，家長亦會勁嬲。不過你最擔心，一定係佢太倚賴忍者龜。如果唔係，點會10億淨現金，一年賺2億，市值得16億？今日推介最勁呢到！彩星符碌撞棍，年初簽咗Voltron嘅玩具權。呢套Dreamworks動畫，第一季年中Netflix播嘅翻拍卡通，贏盡口碑，成影評評分最高卡通。不但Netflix即訂第二季（下月播），福布斯報道話已請編劇拍電影版。有冇人知勁？有。我十億老炒家朋友同公司管理層。點解？公司上月忽然多次回購股份，對上一次咁做已係2013年4毫升到4蚊前冇耐。老炒家問我點解回購，我就發現原來因Voltron，市場仲要未知，因問梁心欣都唔知。昨收1.32元，老炒家睇第一站兩蚊，想發就要聽聽話話不問價追彩星玩具！孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20161206/19856055
金手指：樓按息率待爆單邊
1 :
GS(14)@2017-01-18 08:02:50香港買樓做港元按揭，除非當時市場覺得港元會脫鈎，如果唔係，最影響按揭息率就一定係美元美債息率。如美元供過於求，美債息率就會不斷向下，香港按揭利率，亦會鐵索連舟咁跌。由1980年起，聯儲局成功將通脹殺低，美債息率一浪低於一浪，直到舊年破晒紀錄，連美國政府借十年錢嘅利息都跌穿1.4厘。當時就有好多報道同分析話如果學日本、德國等，十年債息跌穿零厘會點。不過，11月初特朗普一當選，債息就開始狂飆，最高見2.6厘，現報大約2.4厘，舊債王Gross就話睇實2.6厘。而新債王（兼孫柏文偶像）Gundlach，則話睇實3厘呢個水平，如果升穿，香港按揭息率都會爆上。咁有乜會令佢郁？其實，個個?家都睇實特朗普同美國國會。如果特朗普減稅、加開支，美債息口將會大單邊咁爆。而最大變數，將會係美國是否推全國性銷售稅。如推，入口貨即貴成半，出口有退稅，而美元會爆升，債市極波動。如果你係個借咗好多錢買樓嘅人，除咗睇美國國會會否睇實特朗普外，可以安慰嘅，就係啲「散戶」（當然，炒得美債嘅「散戶」，個個閒閒哋都億億聲）破紀錄咁拋空美債博債息升。歷史以來，「散戶」喺咩市場單邊落注，就係掉轉頭造倉之時。不過「散戶」唔係次次錯，2016年就係「散戶」連續贏之年。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170117/19899011
金手指：聯儲局將玩謝侵侵
1 :
GS(14)@2017-01-26 07:42:50建制，其實係乜呢？孫柏文記得個故事，當年克林頓當選花旗國總統，就職日就喺其中一個晚會到，坐咗喺個喺華府權貴社交圈活躍多年嘅闊老太旁。咁克林頓就同佢分享好多雄圖大計，想點想點，闊老太就靜靜咁聽。臨散場，闊老太卒之開口，就咁贈咗克林頓一句：「Hope you get to stay（希望你留到喺度）。」闊老太呢隻，就係建制。2016年，全球建制都進入全面捱打狀態。傳媒、學界、大企業、政黨大佬、政府官僚，就算聯合一起，都抵抗唔到英國人脫歐、美國人選「侵」嘅呢個浪。仗，輸就輸咗。不過唔等於戰爭結束。建制一定諗方法反撲。相信大家同我一樣，都聽過啲人估建制會點反撲。暗殺、彈劾等，都有人信會發生。當然，建制同顛覆派嘅角力，又關投資版乜事呢？我今日講得呢個題目，當然就係建制反撲會直接影響大家啲錢啦！因如要我估，建制中最核心嘅權力機構，必定係各國嘅央行。所以，反撲會喺嗰度來。反撲最容易嘅方法，就係要令人民學一次深痛嘅教訓。咁樣投票，「係有後果」。美國股市、債市、樓市，因多年嘅零息政策，泡沫味濃。聯儲局只要將水抽走，夾吓息上，賣走手上國債，全球資產市場將會大跌。到時傳媒、學界合作，將呢個跌市推落特朗普、脫歐等現象，就會狠狠咁教訓世人。到時，希望你喺港股、港樓嘅佈署會令你冇事啦。孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170124/19906493
金手指：薯片政綱充滿智慧
1 :
GS(14)@2017-02-07 05:14:09曾俊華周一早上宣佈政綱，可以話劣評如潮。例如好友利世民，率先狂批累進利得稅。而孫柏文都收到唔少選委朋友短訊，問搞啲乜，喺之前近乎完美嘅競選動作下，佢哋覺得完全反高潮。話如果要扶植中小企同startup，銀行開戶、勒住證監等有用得多啦。我睇完，發覺啲批評完全get唔到曾俊華嘅功力，個政綱係充滿智慧。首先，嗰啲例如累進利得稅嘅建議，雖普通人唔明為乜，不過現實係佢要先喺1,200名選委中攞150個提名，再攞600票，味道似係要喺1,200人制贏，就要做呢樣。因贏唔到，其他都唔使講。曾俊華攞廿三條、八三一出來，就係因為知香港未來幾年對中央嘅嗰盤棋，要捉，同埋點捉。中央同中聯辦有冇分歧？如果有，棋點捉？你覺得喺主動攞廿三條、八三一出來嘅曾俊華好啲，定係2.0填鴨產物下會好啲？彭定康當年喺立法局解釋佢嘅95選舉方案時，高舉本基本法問：「新九組違反邊條？」（可惜另起爐灶時，泛民企太硬）又或者曾蔭權為2012年將功能組別「直選化」，已經證明只要落棋落得準，有得玩。2.0填鴨產物敢捉咩？識捉咩？八達通都未識用啦。仲有，未來幾年，將會係香港喺中央最高領導眼中，地位提升嘅最大時機，因國家可能面對金融大動盪。我哋係要搵個幫到手為國家救火，之後可平心靜氣攞讓步嘅棋手。最後，好多人估緊2.0填鴨產物可唔可以攞多過1.0嘅689票。呢個我唔知。不過2.0填鴨產物喺西環插手下贏，台灣民進黨下次總統大選就肯定唔止689萬票。
孫柏文獨立股評人
http://www.fb.com/shuen本欄逢周二刊出
來源:
http://hk.apple.nextmedia.com/financeestate/art/20170207/19920058
中環迷你裙：金手指口袋裏的股票
1 :
GS(14)@2017-02-07 05:14:11雞年首次見面，祝蘋果讀者橫財就手，長贏長有。Samantha昨才正式埋位，假期讀畢有關謝清海的熱門讀物，基金經理與股民除了注碼不同，致勝關鍵都是心理質素，揀啱隻心水股不代表股價能如你所願，一買就跌可說是家常便飯，當捱多幾枝陰燭，心裏或不禁問，究竟市場錯？還是自己看錯？炒股最痛苦的情景應該是認輸沽出，翌日爆升。 Sam股齡尚淺，對謝清海最深刻一幕是2015年大時代高位減持惠理，套現16億，當年還有一件事，就是惠理連環增持青島港（6198），不過其後該股股價隨著大市往下沉，直到近日青島港重見強勢，大家值得留意。中遠海運港口入股青島港16.82%成為催化劑，當日股價曾飆逾一成，重點在於入股價，作價約6.45元較現股價仍有38%溢價。雖涉及發新H股，但溢價入股為近年少見，客觀事實在於市場沒有那麼多貨讓中遠海運港口入股，溢價入股是控制成本的辦法。溢價入股看中的是青島港營運碼頭的能力，並且食住一帶一路的機遇，去年全球貿易萎縮，運力低迷，青島港上半年貨物吞吐量按年增6.1%，跑贏全球以至中國市場。今次訂立戰略合作協議，目標是致力將青島港打造成東北亞國際航運中心，並共同投資海外港口碼頭項目，如阿聯酋阿布扎比哈裏發港二期集裝箱碼頭項目。另外，青島港業務轉攻擁更高毛利的物流及港口增值服務，以及港口配套服務，佔整體業務近半。再者，承著資源價格反彈，金屬礦石、煤炭、液體期貨（如原油）處理及配套服務利潤提升均利好公司前景，若剔除轉讓日青集裝箱股權收益，實際利潤增幅為24.6%至3.07億人民幣。青島港連升多日可待回調後吸納，吼4.5元買入，暫不設目標價，跌穿4.2元止蝕。
Samantha
http://fb.com/stocksamantha本欄逢周二刊出
來源:
http://hk.apple.nextmedia.com/financeestate/art/20170207/19919923
Next Page