遭《歌手》封殺後 與王菀之踩入紅館軒仔唱被消失的歌 跪地謝Fans
1 :
GS(14)@2017-02-18 09:51:46■軒仔感激歌迷入場支持，前晚以嗌爆咪聲量向大家講多謝。
張敬軒與王菀之（Ivana）這對老友，前晚起一連四晚踩入紅館，舉行「The Magical Teeter Totter張敬軒．王菀之」演唱會，二人又唱又跳，加上不時鬥嘴互窒，場面搞笑。軒仔被內地封殺，早前被飛出節目《歌手》，軒仔前晚在台上重提「被消失」之餘，又唱兩首本來在節目唱的歌圓夢，還單腳跪地答謝觀眾。
張敬軒早前上內地節目《歌手》被踢出局，他完成第一集錄影後，內容卻全被刪走，用CG、剪接刪除所有拍到他的鏡頭，原因軒仔被翻舊賬，指他是撐港獨撐佔中，雖然事後他再談被飛，表示細節記得不清楚，又謂對節目得失看得不重，但前晚在演唱會台上重提此事，還唱出陳百強的《等》，以及其代表作《櫻花樹下》，表示兩首歌本來是在節目內唱，又向台下觀眾鞠躬，再單腳跪地答謝觀眾。
微博多十幾萬Fans
軒仔在台上說：「唱呢兩隻歌，其實係我特意揀嘅，大概喺差唔多一個月之前，我諗大家都有睇報紙喇。」此時有觀眾大聲叫他「唔好講」，軒仔聞言向四面觀眾作90度鞠躬，然後以嗌爆咪聲量向大家講多謝。他續說：「當時呢個節目想我唱多啲廣東歌，呢兩首歌原本打算喺節目唱，一首係代表作，一首係粵語流行曲最輝煌嘅歌，係我偶像陳百強作品，今次可以把握機會，向觀眾致意，唱畀大家聽，算係圓咗心願。」完騷後，軒仔與王菀之齊齊接受傳媒訪問，問軒仔是否好感觸要多謝觀眾？軒仔說：「唔係，只係好開心有咁多觀眾嚟支持，有啲歌迷喺台灣、馬來西亞飛過嚟睇。」至於是否刻意選唱那兩首歌？軒仔謂：「我又冇咁諗過，只係當時畀個導演睇，覺得呢個版本好好聽，係想個演唱會好好聽。」前晚不少內地歌迷專程來港捧場，軒仔表示知道：「人生就係咁，每件事都有兩面，嗰件事之後我微博多咗十幾萬fans，Ig都多咗，今晚係一個我同Ivana嘅演唱會，想帶畀大家視覺同聽覺享受，冇諗太多嘢！」
■軒仔前晚在紅館開騷，重提被飛出《歌手》，更下跪多謝歌迷。
■軒仔與王菀之扮鬼扮馬?觀眾。
■一班舞蹈員化身迴轉壽司，在軒仔與王菀之身邊團團轉。
針唔拮到肉唔知痛
問軒仔是否好感動？他坦言：「感動㗎！其實話針唔拮到肉唔知痛，對於我嘅感覺，我冇歌迷咁心痛，或者好多歌迷支持我好多年，佢哋心痛我捲入咗呢啲事入面，所以今晚我都冇留力，將最好嘅留畀佢哋，我知好多搭飛機同火車嚟，可以振興埋零售業！」前晚演唱會於8時35分開場，王菀之以全黑打扮現身，配襯穿白西裝的軒仔，之後二人鬼馬跳舞，又唱《娥姐賣粉果》兼在台上猜包剪揼，結果軒仔輸了，王菀之就扮連續掌摑軒仔。另外，王菀之於唱《表參道》時，穿黑色deep V性感大露背裝與男dancer跳辣身舞。採訪：馬建華攝影：沈健程
■軒仔任由性感女舞蹈員在他身上摸來摸去。
■着低胸裙的王菀之被男舞蹈員又攬又錫跳辣舞。
【演唱會曲目】
1.《開籠雀》2.《相對論》3.《柳暗花明》4.Medley：《相逢何必曾相識》、《叉燒包》、《牛油蛋撻》、《娥姐賣粉果》5.《找對的人》6.《好時辰》7.《畫意》8.《酷愛》9.《水百合》10.《留白》11.《井》12.《最好的》13.《該死的快樂》14.《迷失表參道》15.《等》16.《櫻花樹下》17.《羅賓》18.《頭髮亂了》19.《小團圓》20.《青春常駐》21.《迷失藝術》22.《笑忘書》23.《末日》24.《伴我啟航》25.《低科技之歌》、《粒糖有毒》26.《Chotto等等》27.《友誼的小船》28.《My Way》29.《我真的受傷了》30.《下次愛你》31.《風起了》32.《擁抱一個人》33.《手望》
來源:
http://hk.apple.nextmedia.com/entertainment/art/20170218/19931737
【馮仁昭四圍超】許鞍華褒獎王菀之高手
1 :
GS(14)@2017-07-05 03:49:45許鞍華（Ann）執導新作《明月幾時有》，搵嚟周迅、葉德嫻、彭于晏同王菀之主演，以日本侵華嘅「東江縱隊生死營救」事件，講述香港傳奇女性「方姑」（周迅飾演）為代表嘅仁人志士，喺1940年亂世中嘅生死救援故事。Ann話好難得拍到香港歷史：「我70歲，拍得一套得一套，盡量搵晒自己鍾意嘅演員合作。」Ann感激一班演員傾力嘅演出：「其實今次周迅、葉德嫻同王菀之嘅角色好難做，佢哋都係高手先至做到。」
■王菀之戲中扮演村姑。劇照
■許鞍華同王菀之大談新片《明月幾時有》拍攝感受。
挑戰嫩口村姑
王菀之戲中扮演村姑，佢話只能用「緊張」兩個字嚟形容演出心情：「好複雜，未拍前複雜過拍緊嘅時候，知道係許鞍華導演已經好興奮，但又唔可以掛住自己係一個影迷，而唔記得演戲，好驚自己做得唔好，我係拍喜劇較多，知道今次有歷史背景兼真人真事，我識嘢又唔多，好似一張白紙，只能信任大家教導我點做。」今次最大挑戰王菀之覺得係角色年齡比自己細20年，好彩嘅係可以望住葉德嫻同周迅去演，佢話：「只要望住佢哋雙眼，已經可以帶動到我嘅情緒。希望經今次之後令自己有所成長，我好驚自己做得唔好，呢個班底實在太專業太叻，原來我之前擔心同冇信心係唔使驚，入到去大家就令到你知道點做，由驚變咗享受。」撰文：馮仁昭
來源:
http://hk.apple.nextmedia.com/entertainment/art/20170703/20076647