財經CAREFREE - 順叔 合景三兄弟(下) (2012年10月10日)
1 :
GS(14)@2012-10-10 23:02:35http://www.am730.com.hk/article.php?article=124815&d=1860
【am730專欄】照合景泰富(1813)所講，同廣州富力(2777)合作投得廣州獵德商住項目後，主動邀請新鴻基地產(016)加入合作發展。
到咗2010年初，新地開始在內地再有動作，3個月內，斥資近80億元(人民幣，下同)，投得佛山兩塊毗連大型商住地皮，今次掉番轉，新地搵合景泰富入股項目20%股權。
佛山項目規模唔細，加埋兩個太古城咁大，又係舊城改造，市政府交地時間長，有排都未有嘢睇。新地點解重注佛山，唔知，但內地玩磚頭係一個入廟拜神行業，新地在內地探路，出面多數只係見到主席辦公室經理錢炳輝，據佛山市政府網頁資料，新地搞佛山項目，竟出動到郭老太鄺肖卿，可見呢個項目有幾重要，而呢個省招牌項目又竟然預埋合景泰富一齊玩。
2007年底，新地入股廣州獵德項目，跟住公司管理層出現地震，原主席郭炳湘出局，新地內地業務亦沉寂咗兩三年，捲土重來都係搵合景泰富合作，可見在新地眼中，合景泰富最少屬於「信得過」的生意拍檔，郭氏三兄弟鬩牆之後，相中合景泰富孔氏三兄弟，呢份信任更加有意思。
除咗新地，合景泰富亦有同置地合作，2010年底，近40個億投得成都商業地皮，各佔50%股權，呢個「環球匯」項目，聽講已經差唔多可以出街，有興趣上開去可以望吓，傳統英資加新興民企搞出嚟的地產項目究竟係乜樣。
在廣州起家的地產公司大老闆，唔少香港散戶都好熟悉，因為曝光率高，例如恒大地產(3333)主席許家印，大家對呢位前度「中國首富」唔會陌生，恒大同富力，都搞咗隊中超球隊，搞得足球，自然有好多免費宣傳同埋曝光機會，相對恒大及富力，合景泰富孔氏三兄弟非常低調，冇留意內地地產的散戶，分分鐘將合景泰富同合富輝煌(733)撈亂。
合景泰富群得香港地產商多，好學唔學，學咗好多香港所謂豪宅的浮誇之風，例如個樓盤名中間要加一點，斷開兩截先開心，又例如天乜天物大門小門咁，不過咁講，即係話你知合景泰富定位做高端市場，所謂精品豪宅，都叫做同一個行業同一個市場位置，合景泰富樓盤名的浮誇之風，最少冇在管理層上出現，好似SOHO中國(410)老闆潘石屹咁，日吹夜吹魚蝦蟹，俾你做銀行大耳窿，你會放心借錢俾邊個管理層？
低調即係冇新聞，局外人冇乜公開資料去判斷孔氏三兄弟係咪「信得過」的債仔，不過新地及置地兩間相對謹慎的公司，在內地發展都搵咗合景泰富做盲公竹，可以合理推斷，合景泰富唔係一間亂衝亂撞的公司。
合景泰富同其他絕大部分內地地產商一樣，高負債，本帳簿唔慌靚仔得去邊，至6月底，坐住約460億元資產，資產淨值約140個億，市值約120億港元，股票唔算特別吸引，現金近60億銀，40億元短期銀行負債，除非突然冇賣樓收入，否則冇即時流動性壓力，132億元長期債項當中，近一半係美元優先票據，當中去年3月發行5年期美元債券，年息12.75厘，穆迪所謂評級係「B1」，標準普爾係「B+」，唔知佢哋講乜，大概係唔屬於投資級別咁，不過最新息率，根據彭博數據，已經炒到唔夠9厘，升咗成幾兩成，講緊2014年合景泰富有權贖回，現價買入可能要蝕少少價，即係話唔少投資者查實已經當信貸評級發噏瘋。
合景泰富有冇機會爆煲，當然有，問題係成個中國千千萬萬間地產公司都面對同一個問題，加埋一齊，外國評級機構可以話佢係一個大得不能倒的道德風險，不過倒咗就全地球攬住一鑊熟咁解，銀行爆煲可能渣都冇，地產公司爆咗，當磚頭秤至少仲有啲斤両，中國地產公司賣項目套現應急例子都唔係咁多，如果冇估錯，好似新地及置地等香港發展商，日日求神拜佛內地地產快啲爆煲，咁先有市場空間出現，可以執平貨，合景泰富爆煲，新地或分分鐘會食咗佢添。
財經CAREFREE - 順叔 間諜公司(上) (2012年10月11日)
1 :
GS(14)@2012-10-11 23:02:29http://www.am730.com.hk/article.php?article=125003&d=1861
【am730專欄】今期開中興通訊(763)。
首先聲明，財經茄哩啡係資訊科技白癡，至今拒絕「愛瘋」，網上興緊乜完全唔知，3G同4G有乜分別、TD-LTE又同WCDMA係乜東東，更加一頭霧水。
不過，中興通訊及華為兩間中國電訊設備生產商，被美國佬開名指為間諜，可以攞正牌大噴陰謀論。
即係咁，間諜呢家嘢，由上帝創造第一個女人時已經存在，夏娃做咗二五，搞到人類從此要在世間無間道煎熬，由阿當食咗啖禁果之後，由古到今，從中向西，間諜活動就無處不在。
正所謂明槍易擋，暗箭難防，間諜往往係一場戰爭的決勝因素，好似10年前，美國第二次攻打伊拉克，一群群歐美反戰人士，衝咗去做「人盾」，後來美國有傳媒報道，「人盾」當中，原來滲入咗美國中情局間諜，去到收集情報，兼收買伊拉克官員，成為戰事速戰速決的關鍵之一。
打仗時有間諜，冷戰更加要間諜，對歷史有少少認識的香港人，應該好明白，香港幾十年以來，本身就係一個間諜中心，地理位置方便，易出易入，共產黨派間諜、國民黨派間諜，美國又派英國又派，如果話你知，現在已經冇晒間諜滲透活動，你估會唔會信，今時今日一個鋁窗跌落皇后大道中，分分鐘仍然會擲中一兩個間諜。
1997年香港主權回歸中國之後，首任特首董建華，唔肯搬入前港督府(即今時今日叫禮賓府)，其中一個最主要的原因，聽講就係因為擔心英國人，留低太多間諜裝置拆唔晒，費事煩，故最終拒絕搬入去做特首官邸。
至於家陣到梁振英做咗新一屆行政長官，上任啱啱過咗100日，禮賓府仲裝修緊，普通工程約兩、三個月乜都搞掂，家陣仲未搬得入去，唔通前特首曾蔭權當日開P太多，搞到禮賓府爛熔熔咩？
成功反間，好多時作用又遠遠大過間諜本身，舉個例，假設閣下係某公司老闆，發現競爭對手派咗個間諜入嚟貴寶號，閣下第一件事，當然唔應該做瓜嗰個二五仔，而係特登放啲山埃流料跣對手一鑊金。
從呢個角度睇，中興同埋華為，就算真係有在美國從事間諜活動，都唔係乜嘢特別高級機密情報，如果真係，高科技到美國五角大樓，又或者係白宮要擔心的程度，投資者查實更加應該對中興及華為兩間公司另眼相看。
美國人對國家安全其實好敏感，敏感到有點杯弓蛇影的地步，已經唔係新聞，好似早排美國總統奧巴馬就第一次以國家安全為理由，否決三一重工一間關連企業收購美國風電項目的投資，聽講因為有關風電場太接近美軍設施咁話。
再遠少少，10年前左右，美國人亦曾經想郁和記黃埔(013)，理由亦類似係和黃控制咗巴拿馬運河的碼頭，而和黃主席李嘉誠又同北京好稔熟，相信極有可能影響到美國國家安全咁話。
至於舊年維基解密亦曾經踢爆，李嘉誠為咗釋疑，曾經帶隊去美國約見當時的美國國土安全部長，甚至表示願意破格俾美國政府隨時核查其公司的帳目咁話，以澄清同北京的關係，可見美國人有幾惡。
美國政客今次向華為同埋中興開刀，其實已經搞咗年幾兩年，舊年11月，以兩間電訊設備商，可能為中國情報機關服務、在通訊零件以及系統植入間諜硬件軟件的可能作為理由，正式展開調查，並在今個星期一發表正式報告。
財經茄哩啡查實好想開吓眼界，睇睇一啲電訊設備公司，在乜嘢位可以落焊，加入間諜裝置。
不過，當順叔打開美國嗰份報告一望，認真大吉利是，由頭到尾，都冇講到乜嘢間諜科技，只係喋喋不休的質疑華為同埋中興兩間公司，同中國政府，以及軍方等有解釋唔清楚的關係。
其實講到尾，只係想指向一個結論，唔能夠排除兩間公司做間諜的可能，威脅美國國家安全，呼籲同中興及華為有生意往來的美國公司，考慮過主，並要求聯邦政府阻止兩間公司在美國的併購活動等。
今次被美國搞一搞，中興通訊近日的股價已被牽連，昨日才反彈5.8%，收市報12.6元。
下回再續。
2 :
GS(14)@2012-10-11 23:05:39http://intelligence.house.gov/si ... t%20%28FINAL%29.pdf
Report
財經CAREFREE - 順叔 老共BB班(中) (2012年10月17日)
1 :
GS(14)@2012-10-18 00:24:20http://www.am730.com.hk/article.php?article=125791&d=1866
【am730專欄】十八大雖然叫做決定中國未來10年辦事人，但既然講到明係「黨代表大會」，即係只是中國共產黨自己搓嚟搓去的權力遊戲。
上回講過老共黨員過去10年增加約2,600萬人，最新已經增加到超過8,000萬人，不過，有資格行入5年一度黨代表大會的，由1987年的十三大開始，都係維持在2,000人左右，到今屆十八大可以投票的，仍只有2,270個黨代表。
黨代表究竟點樣選出嚟，綜合各老共網站資料所得，成個選舉工程在舊年11月至今年7月進行，將全國各級共黨組織，分成40個選舉單位，提名由基層黨委開始，「黨委常委會」考察拗數再考察拗數幾輪之後，確定本身選舉單位的黨代表候選人名單，再開黨代表大會，或者工委擴大會議，以多於15%的差額比例，選出所屬黨代表。
例如上海作為40個選舉單位之一，可以分到73張凳仔，咁上海共產黨組織的「黨委常委會」，就會搞張不少於84人的候選人名單，進行所謂「黨內民主」投票。
各選舉單位可以分幾多黨代表席位，唔知，斷估都係上屆黨中央決定，或多或少反映所屬單位的黨員數目以及其重要性。
40個選舉單位，包括31個省或直轄市，中央國家機關、解放軍、武警、央企系統(在京)、中央直屬機構、中央金融系統加埋又有6個，以上37個選舉單位，全部都有公布代表團的名單，佔黨代表2,155人，剩低4個選舉單位，冇公開黨代表名單，呢115位神秘人，來自邊3個單位，好容易估，就係全國台聯、澳門工委，同埋香港工委，今次亦係中國共產黨第一次公開將「中央香港工委」列為單獨的選舉代表團。
雖然名單冇公布，不過，如果邊位得閒無事，可以先下載新華社或者人民網公布的十八大2,270個黨代表的名單，再比對其他37個選舉單位的黨代表名單，2,270減2,155，剩低115個，咁就易認好多。
按港澳台三地的人脈分辨一吓，就大概可以Shortlist到一份十八大「疑似香港工委」名單。
呢份疑似名單，應該只反映「中央香港工作委員會」的組成，唔一定代表香港的基層共產黨員有幾多人，有人估計過香港的共產黨員有二、三十萬之眾，如果真係好似中共組織部咁講，搞乜嘢黨代表「陽光選舉」，就算搬去深圳起壇，都一定有風聲漏出嚟，所以一係香港共產黨黨員並冇傳聞中咁疊馬，一係香港工委的黨代表選舉，仍然停留在小小圈子遊戲。
「疑似香港工委」黨代表有乜人，查實都唔難估，例如中聯辦主任彭清華，仲有李剛、郭莉、王志民、郝鐵川等西環官員，唔會死錯人。
仲有幾個靠肉眼都認得出的「疑似香港工委」黨代表，包括香港投資者熟口熟面的中資老總，例如香港中旅(308)前主席張學武、招商局國際(144)主席傅育寧，仲有華潤創業(291)阿媽華潤集團的大佬宋林。
3間公司都係國資委樓下的央企，不過3位黨代表都冇出現在央企系統的公開名單，斷估都係「香港代表」，亦即係香港工委的成員之一，仲有中銀香港(2388)總裁和廣北，亦屬於「疑似香港工委」黨代表。
反而中信泰富(267)主席常振明，作為中信集團的高層，名字就在中央金融系統的黨代表名單之上，可能一定程度上反映，中信泰富已經冇乜搞香港工委的工作，例如專心去澳洲掘鐵礦。
呢班既係上市中資公司高層，又聽命黨中央指揮的香港工委，除咗做生意仲有乜嘢任務，唔知，不過中共組織部都話要乜嘢「陽光選舉」，在香港呢個國際城市，共產黨的黨內民主選舉，仲係要神神秘秘，黨代表名單又唔可以公開，點講都唔係幾講得過去，中國共產黨點解唔肯在香港公開活動，純粹靠估的話，就係老共的所有理論，都唔可以合理解釋到，「中央」點解要同香港的「地方政黨」或政治勢力，平起平坐咁講數，
下回再續。
Next Page