中環在線：永隆新舊老闆齊派利是 李華華
2008-10-03 AppleDaily
招 行（3968）正式將永隆銀行（096）收歸旗下，就喺呢個日子，永隆員工收到兩封信。唔使驚，唔係大信封！華華據聞，永隆員工收嘅第一封信係由創辦永隆 兼經營咗75年嘅伍氏家族所發嘅，係用已故伍宜孫同伍絜宜嘅名義發出，主要係向各員工表示謝意。永隆係老牌華資銀行，對員工特別有人情味，除咗講心，據永 隆發言人話，伍氏舊掌門人10月中會向員工派利是，估計會多過1800蚊。
朱琦網站致函客戶
點解要強調「多過1800蚊」？ 係同永隆員工收嘅第二封信有關。招行作為新僱主，自然要穩定軍心。首先就喺銀行網站刊登新任行政總裁朱琦嘅致客戶的信，同時又向各員工派信，內容大致係希 望大家繼續努力之類。封信嘅內容係乜唔重要，最緊要係隨信附送一封大利是，聽聞有成1800蚊。而且仲係未過試用期嘅員工都有份，以永隆全職員工1600 個嚟計，即係新老闆攞咗288萬嚟做見面禮攏絡民心，都算大手筆。有員工喺網上討論區話，公司今年2月為慶祝75周年，已經派咗成千銀花紅，新老闆上場又 大派利是，家吓舊掌門再派，一年收3封利是。不過，話晒新人事新作風，收利是之餘都有員工對未來有啲不安。有個叫阿仙奴人波記嘅網友員工問：「話保證18 個月唔裁員，係幾時開始計？」oppower就話：「係唔會裁，不過，會叫你去sell嘢。」裁員sell嘢就個個打銀行工嘅朋友都要面對，但一年收3封 利是就唔係家家銀行嘅職員都有份，所以唔好呻咯！李華華
[email protected]
中環在線：傅成玉買嘢要靜雞雞 李華華
2008-10-06 AppleDaily
中 海油（883）董事長傅成玉3年前睇中美國能源商優尼科，但埋到收銀處想話買，俾美國政府截停，搞到買唔成。衰咗唔緊要，最緊要學精，上個月系內海油服務 （2883）終於成功買咗間挪威鑽井服務公司Awilco Offshore ASA（AWO），早前傅成玉接受內地《英才》雜誌訪問，講到兩次購物經驗，話上次衰咗，原因之一係太高調，樹大招風，一單商業買賣俾人搞到政治化，今次 學精咗，一於靜雞雞買完先話畀大家知。《英才》引述傅成玉話，中國企業以往未搞過咁大嘅收購，所以嚇親全球，今次買嘢內部保密做到足，事前雖然歐洲有報 道，但國內就冇。同時接受訪問嘅海油服務CEO袁光宇就話，呢段時間有幾次走漏咗啲消息出去，佢哋好擔心俾人攞嚟炒作，好彩最後都買得成。
冇俾人佔便宜
袁光宇仲話，談判對手，即係AWO嘅董事長同佢年紀差唔多，都算精明咁話，不過佢補充多句：「但是我覺得也沒有精明到佔便宜的份上。」
中環在線：港人投資愛問屋企人 李華華
2008-10-08 AppleDaily
雷曼苦主呢輪日夜追討想攞番血汗錢，唔少人話係聽咗銀行同證券行啲職員講先買。原來香港貴為國際金融中心，但散戶仍然係人講乜，佢就買乜，投資態度唔多成熟。不過，最近有調查發現，香港人投資理財其實唔多鍾意搵專業人士幫手，理財投資寧願問親戚朋友。
7%受訪者寧問老闆
調 查係蘇黎世國際人壽搞嘅，由舊年10月開始，6個月內同400個高資產值客戶做調查，再喺今年4、5月時做詳細面談。54%受訪者多數搵家人同朋友畀理財 意見，而唔靠專家。33%就話靠自己判斷。不過，都有30%受訪者話會向保險從業員徵詢理財意見，36%就話會向私人銀行嘅職員查詢。嗱，唔好以為佢哋嫌 專家收費貴噃，只係得7%受訪者話會因收費問題，唔搵專家畀意見。咁究竟係咪因為信自己人好過信外人呢？最有趣係，有7%話會問自己個老闆。咁都可以理解 嘅，老闆成盤生意都搞得掂，應該理財有道。
中環在線：華為猛人過檔百度 李華華
2008-10-08 AppleDaily 內地渴市求人，除咗金融人才，IT精英一樣難求，唔夠人就惟有挖角。百度就挖咗華為前副總裁李一男過檔，據《通信世界》報道，百度董事長李彥宏已向同事發出內部郵件，指李一男擔任百度嘅首席技術官（CTO）。 CTO呢個位查實都成年冇人坐過，上任劉建國06年辭職自己搞網站生意，今次李一男坐鎮，會帶領百度一隊IT勁旅，包括首席科學家威廉張及產品副總裁俞軍等。據報道，李一男將直接向李彥宏滙報。 27歲做副總裁 李 彥宏喺內部郵件度大讚李一男，話對方係中國創新技術領域嘅頂尖專家，喺全球領先嘅技術公司擁有傑出管理經驗。咁查實李一男又的確幾猛料，27歲就做咗華為 副總裁，管住超過5000人。佢00年跳出去創業，06年重入華為做首席電信科學家。之但係華為做通信技術為主，百度主力搞網站，呢次跳槽可以話係新挑 戰。
中環在線： 股市大跌賭王：我身家冇少到 李華華
2008-10-08 AppleDaily 噚 日重陽，咁啱係賭后何超瓊（Pansy）旗下嘅天機公關廿周年紀念，佢哋搞咗個酒會，賭王老竇何鴻燊同世伯彤叔鄭裕彤一齊嚟捧場。唔知係咪市況差，一向受 傳媒歡迎嘅彤叔，似乎冇乜心情同傳媒講股，反而啱啱喺葡萄牙攞咗傑出企業家勳章返港嘅賭王，依然興致勃勃。佢話經濟唔好係歐洲嘅事，唔關香港事，仲不改牙 擦本色，話港股咁跌法佢「一啲都唔擔心，身家又冇少到，有乜所謂啫，我又唔買股票，唔買唔賣。」 唔掂股票冇損手 賭王咁講，即 係唔掂股票就冇損手啦。華華記得上個月中賭王都話自己唔炒股票，全部放晒喺夾萬，所以跌市都可以照樣大覺瞓。既然身家冇少到，咁究竟佢老人家身家有幾多個 零呢呵？佢忽然謙虛話：「好少啫。」咁有冇十個零？佢嘻嘻笑回應：「冇！」咁即係唔過100億啦，不過，華華記得，今年初《福布斯》公佈香港40大富豪 榜，賭王以超過700億身家，排第五。咁究竟係賭王身家縮咗唔認，定係有百億身家佢自己都唔知呢？究竟賭王邊句先真呀？賭王身家真係唔受市況影響？好難 講。前日幾隻濠賭股全線報跌，賭王揸住超過一成股權嘅信德（242）跌5.11%。睇埋半年前4月份高位，信德由10.84蚊跌到得番前日收市2.23 蚊，跌近八成。仲有佢揸控股權嘅澳博（880）前日都跌咗3%。睇嚟賭王都好睇得開！ 何超瓊呻俾人累 佢愛女Pansy就未到 呢個境界，佢噚日喺同一場合，向傳媒大呻俾人拖累。佢話：「我哋（指信德）唔係一隻賭業股，受牽連都有少少無辜，我哋有資產、有土地。」不過佢補充，若然 澳門博彩業受影響，佢哋都會受牽連，仲話覺得整體經濟會進入一個低增長期，要幾時先彈番起呢？就要等整個經濟市場康復，佢哋好難做到一枝獨秀咁話。李華華 [email protected]
中環在線：法巴搞歷險遊戲應景 李華華
2008-10-09 AppleDaily金 融海嘯浪接浪，咪話散戶，就連唔炒開股嘅市民，睇見全球銀行輪住嗌救命，都感受到市況好似玩過山車嗰種驚險法。偏偏法巴銀行竟然仲搞個銀行業歷險遊戲，唔 知係想應景，定係覺得唔夠刺激！法巴個銀行業歷險遊戲叫「Ace Manager」，其實係畀大學生玩嘅，內容環繞銀行業及網球世界，設計咗三個任務，包括為企業家創業、籌辦網球錦標賽同為網球明星理財，好似玩角色扮演 遊戲，有埋現實生活場景，參加者完成任務期間，會接觸到零售銀行、企業及投資銀行，同埋資產管理及服務呢三個法巴核心業務。 據法巴講，個遊戲旨在測試參加 者喺銀行業嘅天資喎，相信係為佢哋嘅請人大計鋪路。法巴計劃今年內請2.4萬人，6月為止已請咗超過1.3萬人。咁嘅時勢，估唔到佢哋既唔裁員反而繼續請 人！
中環在線：彤叔二孫終於有嘢做 李華華
2008-10-09 AppleDaily
噚 日新創建（659）公佈業績，華華記得今年3月新世界發展（017）嘅業績記招，台下坐咗個重要人物，今次梗要金睛火眼，『目及』實呢位重要人物有冇到 場，結果冇令華華失望，見到彤叔鄭裕彤第二個孫仔，亦即係彤叔長子嫡孫鄭志剛個細佬鄭志明（洋名Brian）。Brian今次由新創建執董、彤叔外孫杜家 駒陪住，同上次一樣好靜咁坐喺台下。華華記得上次見Brian時，佢只係入咗公司冇耐，仲係觀察同學習階段，未有具體嘢做，張卡片上只係寫「特別項目」經 理，今次再見面，梗要睇吓佢有冇進展。
當華華上前問Brian有嘢做未？佢好開心答話：「有喇！」仲即刻摷張卡片畀華華，原來係新卡片，「特別項目經理」 變咗「基建經理」。不過Brian都係怕醜，未有話畀華華知負責乜嘢基建項目囉。 |
中環在線：金勞詹去「仁大」講迷債 李華華
2008-10-10 AppleDaily
噚日收到封邀請函，當讀出個活動嘅主題時，其他同事牛咁眼望住華華，乜嘢活動咁特別？咪就係「詹培忠到仁大談金融危機」囉！睇清楚，金勞詹去嘅係「仁大」──樹仁大學，唔係「人大」。佢下個禮拜二會去樹仁大學，以「金融危機與香港政治發展前景」為題演講。
曾將次按當二按
記 得今年初，金勞詹喺立法會諗住藉次按問題，挑戰任志剛，點知將次按當二按，搞到有啲失禮，唔知今次佢又想講邊方面嘅金融危機？邀請函所見，佢今次係介紹香 港嘅政治境況、剖析吓金融海嘯對香港嘅影響、分析銀行流動資金嘅去向，仲會講吓「雷曼事件」嘅成因，同雷曼迷你債券苦主嘅情況。啱啱過咗嘅星期二，有好多 散戶粉絲嘅曾淵滄，應邀出席一個政黨搞嘅雷曼苦主大會做嘉賓，佢同樣係講解雷曼迷你債，話呢樣係複雜嘅投資工具，有啲投資者貪高息，唔詳細了解就去買，所 以苦主都有責任。呢句說話一出，群情洶湧，曾淵滄俾人圍兼大叫佢「收聲」。金勞詹以敢言見稱，華華只係希望樹仁學生裏面冇乜邊幾個係雷曼迷你債苦主。
中環在線：招行踩入海嘯源頭開分行 李華華
2008-10-10 AppleDaily
家 陣啲人對美國銀行失晒信心，紐約人會唔會轉投中國嘅銀行呢？喺金融海嘯下，招商銀行（3968）大膽走入風眼，進駐海嘯源頭紐約，喺曼哈頓麥廸遜大街開分 店。據《金融時報（中國）》報道，新店8號開幕，係自91年美國實施《外資銀行強化監管法案》以嚟，第一家喺美國開分行嘅中資銀行，可以話係過江龍挑戰地 頭蟲。
足證挺得住風浪
招行紐約分店上年尾獲批准設立，籌備近一年，雖然遇上金融海嘯，間分店又喺海嘯源頭嘅紐約，但招行似乎 冇有怕，行長馬蔚華親自飛去主持開幕儀式，佢話呢次係招行國際化嘅重要一步，雖然預計喺金融海嘯下，紐約分行要面對好多困難同考驗，但依然睇好美國經濟、 中美貿易同投資前景咁話。紐約分行提供批發性存款、貸款、貿易融資等業務同其他銀行服務，報道仲話呢個時間開張，正好顯示中國金融業挺得住風浪喎。起碼紐 約分行一開張就有客，馬蔚華仲喺開業儀式上向呢批捧場客頒證書。
中環在線：滙豐、蒙牛大灑金錢挽人心 李華華
2008-10-10 AppleDaily
市 場失晒信心，少少風吹草動都可能引起大騷動，好似滙豐（005）高層明明出嚟講話冇事，但依然消除唔到客戶嘅疑慮，要今日喺報章登聲明。無獨有偶，近排俾 三聚氰胺搞到人心盡失嘅蒙牛（2319），雖然已掟8000萬人仔搞檢測，傳媒都有報道，但佢哋噚日亦喺報紙登全版聲明。係咪咁就可以挽回信心？好難講 囉，但報館肯定係贏家。強調唔使央行泵水
有朋友同華華報料，話噚日去滙豐銀行時，聽到有個客專程走去問啲職員，英國嗰邊係咪會有政府注資？ 心水清嘅讀者都知，英國政府前日話會攞500億英鎊為英國嘅銀行泵水；而有睇噚日報紙嘅都知，大笨象嘅執董兼亞太區CEO霍嘉治，已即時回應內部水源充 足，唔使政府幫手咁話。講完都仲係有客戶唔知（或者唔放心），要親自去分行問個明白。
呢啲開銷唔慳得
為咗令事情清楚明白，大 笨象今日喺報章登聲明，再向客戶強調「沒有計劃運用英國政府的注資方案」，兼且向倫敦嘅同業伸出援手，拆出約20億英鎊嘅3個月同6個月流動資金，今日仲 會繼續，希望紓緩到同業借貸嘅困境，最緊要顯示到實力。一版廣告值幾錢，對大企業嚟講濕濕碎，若然呢招真係可以安撫人心，絕對值得使。
花8000萬自己檢測
另一家要登全版廣告澄清嘅，係被三聚氰胺搞到冇人敢買嘅蒙牛。創辦人牛根生深明喺邊度跌低，就喺邊度企番起身，與其日日見報俾人列出旗下邊啲產品唔合格，不如自己檢測兼公佈，希望重拾消費者信心。
蒙牛話用咗8000萬人仔買咗檢測三聚氰胺嘅設備，又將通過香港食物安全中心檢測嘅16款產品名單，喺聲明度列晒出嚟，唔使勞煩各大傳媒，兼可以加多句──「讓廣大的香港市民放心飲用」。
都係為咗登一句話
不過，華華留意到，蒙牛嘅聲明只係三兩家報紙刊登，多心嘅朋友問呢啲算唔算揀消費者喎，華華都唔知點答。
李華華
Next Page