中環在線：盲人算命佬變蘑菇大王 李華華
2008-10-13 AppleDaily
呢 排太多令人垂頭喪氣嘅新聞，今日華華想講一個勵志故事。好多打工仔都想創業發達，浙江就有一個盲人算命師轉行種蘑菇，喺短短兩年間種出一盤生意，成為當地 有名嘅「蘑菇大王」。據《中華工商時報》報道，浙江紹興上虞市有個盲人算命師叫何幼定，因為聽到阿仔篇題為《我的父親》嘅作文，形容佢嘅謀生手段，可能唔 多光彩，所以算命師決定發奮創一番事業。三年前佢諗到種蘑菇，種落先知蘑菇唔易種，成本又高，搞完一大輪，第一批種出嚟嘅蘑菇竟然衰咗，蝕咗13萬人仔。 佢痛定思痛，搵省農科院嘅專家求教，先至成功種出白蘑菇。
荒廢農田大搞農業
盲人推銷亦唔易，算命師話，除咗受同行敵視，仲得 唔到客戶信任，不過因為佢唔服輸，終於成功將蘑菇推銷到紹興、寧波同杭州。之後盲人算命師見唔少農田荒廢，就包咗87畝田嚟種蘑菇，又種埋西瓜同菜，仲成 功攞埋食品公司包銷合同，贏得「蘑菇大王」嘅稱號，o依家佢同搞餐飲管理嘅朋友開咗間農家樂餐廳。所以話啫，創業唔只要有腦，決心都唔少得。
中環在線：蒙牛、伊利、光明高層上電視表演飲奶 李華華
2008-10-13 AppleDaily
企 業出事，唔係吓吓都要拖主席同全體高層出嚟集體道歉。要知萬一再有大事發生，到時仲可以搬個大啲嘅老細級出嚟。好似內地毒奶事件咁，搞到中港澳嘅BB同細 路集體生腎石，噚日內地三大奶企蒙牛（2319）、伊利同光明乳業高層上中央電視台節目《對話》，向全國人民道歉，兼做場飲奶show，三大企業都只係派 高層，老總欠奉。據《東方早報》報道，噚日出席央視節目嘅內地三大奶企高層，蒙牛總裁兼大股東牛根生並冇現身，只派出集團營銷總裁趙遠花出面，佢形容今次 嘅教訓，令內地乳品業由零開始，重新建立質量安全同恢復市場信心。當講到蒙牛喺呢次問題奶事件受到重創時，佢仲淚灑當場。
中國乳品業八級大地震
光 明就由總經理郭本恒解畫，佢義正詞嚴話，無論問題出喺邊度，內地乳品企業都要承擔根本責任。至於伊利，就由集團副總裁靳彪出馬，佢話為咗恢復消費者信心， 所有上架嘅產品都要先得到國家認證。內地三大奶企嘅代表形容今次事件，係中國乳品業一場八級大地震，據佢哋初步統計，損失高達兩億銀人仔。公司股價更被全 線震散，當中以蒙牛跌幅最甘，事件發生以嚟股價插水六成，跌至兩年半低位，伊利同光明股價則分別蒸發35%同11%。李華華
[email protected]
中環在線：楊惠妍穩企女富豪榜No.1 李華華
2008-10-14 AppleDaily
上個禮拜二，《2008胡潤百富榜》公佈新一年大陸富豪，頭三位分別係國美電器主席黃光裕、日照鋼鐵董事長杜雙華，同碧桂園（2007）大股東楊惠妍，三甲當中只係得楊惠妍係女士，所以剛公佈嘅《2008年胡潤女富豪榜》，好明顯由楊惠妍嬋聯大陸女首富。
身家縮水七成半
排 名係以上市公司今年9月1號嘅收市價計。雖然楊惠妍蟬聯大陸女首富，但身家大蒸發，受金融海嘯同內地樓價急跌拖累，碧桂園股價暴瀉，年初至今插水近八成， 身家由舊年1300億人仔，急跌75%至330億。楊惠妍身家大縮水，但財富仍然大幅拋離第2位嘅張茵同陳麗華超過八成。玖紙（2689）股價今年挫逾九 成，主席兼大股東張茵身家由舊年770億人仔，蒸發77%，得番180億。 不過佢喺女富豪榜嘅排名同舊年冇變，繼續做阿二，但就要同富華陳麗華並列第2位。有「香精女王」之稱，華寶（336）主席朱林瑤嘅排名就微升一級，進佔第 4位，佢間華寶國際今年跑贏大市，股價只跌三成，身家僅跌5億至130億銀。SOHO中國（410）主席潘石屹太太張欣，喺榜內排名就跌兩級至第5位，身 家由270億跌至125億。
2008年胡潤女富豪榜
今年排名：1前年排名：1女富豪：楊惠妍財富：330億元公司：碧桂園股 價今年跌幅：77.3%今年排名：2前年排名：2女富豪：張茵家族財富：180億元公司：玖龍紙業股價今年跌幅：91.2%今年排名：2前年排名：4女富 豪：陳麗華財富：180億元公司：富華國際股價今年跌幅：不適用#%今年排名：4前年排名：5女富豪：朱林瑤財富：130億元公司：華寶國際股價今年跌 幅：29.9%今年排名：5前年排名：3女富豪：張欣財富：125億元公司：SOHO中國股價今年跌幅：68.9%註：財富以人民幣計算；#公司並沒上市
中環在線：董建華大公子家族生意擔大旗 李華華
2008-10-14 AppleDaily
前 特首董建華個大公子董立均（Andy），喺家族檔東方海外（316）做企業策劃同市場推廣都有一段日子，佢即將有新任務，據東方海外公佈，明年1月1日 起，董立均會擔任首席營運官（COO）。呢個位可以話係特別為佢而設，具體做啲乜，通告冇講，不過行政總裁鄒耀華特別讚佢，話對Andy好有信心。
咁董公子又的確幾猛料，飛天入海都難佢唔到。佢早喺93年至99年到家族企業學嘢，之後做過Boom.com同美國聯合航空，跟住到港龍航空做咗近5年，喺出邊打滾完，兜個圈再返家族企業幫手，唔知有冇將航空業嘅管理偷師，再應用喺航運企業度。
中環在線畢菲特被拒之謎解開比亞廸王傳福欲拒還迎 李華華
2008-10-14 AppleDaily股神畢菲特8月接受美國CNBC電視台訪問時，自爆曾經出價5億美金，入股一隻中國股票被拒。呢單嘢當時震撼整個中環金融圈，仲成為唔少投資者茶餘飯後嘅話題，究竟係邊間公司咁大牌，竟然拒絕股神，呢個謎終於開估喇！
8蚊買入2.25億股
噚 日《證券時報》解開咗呢個謎，向股神say no嘅原來係上個月同意股神入股10個巴仙嘅比亞廸（1211）。哦，原來比亞廸主席王傳福鍾意跳草裙舞，不過最後都係抵受唔住股神嘅誘惑，呢招叫欲拒還 迎！當日股神唔肯講睇中邊隻股票或者行業，以一招mind blankout大耍太極，中環人惟有喺佢漏出嚟嘅口風，按前文後理推敲。股神一句「 It's bigger than……」，唔少人估股神睇中大陸銀行股，包括中行（3988）、工行（1398）同建行（939），就連中信銀行（998）都唔知點解俾人傳係股神 目標，結果股價一度急升5%。不過，原來大家搞錯晒，股神嘅心思真係唔易揣摩。據報道，王傳福解釋當時拒絕係因為巴郡提出投資至少5億美金，但比亞廸管理 層唔係咁願意賣出太多股權，所以say no。後嚟經過內部評估，認為有利開拓比亞廸北美業務同打響品牌，最後決定向股神出讓10個巴仙股權。股神當時仲話，如果比亞廸願意，佢會繼續增持公司股 權。就係咁，股神上月底斥資18億港銀，以每股8蚊買入2.25億股比亞廸，按噚日13.7蚊收市價計算，股神短短半個月，賬面已獲利近13億銀。李華華
[email protected]
中環在線：楊超唔買富通執身彩 李華華
2008-10-15 AppleDaily
金 融海嘯淹沒美國保險巨人AIG，搞到要賣仔（AIA部份資產）救母。近日市傳國壽（2628）有意投資AIG，據中國證券網報道，噚日國壽董事長楊超否認 呢個傳聞，仲大爆AIG兩任總裁都曾經搵國壽入股，但佢覺得風險太大，所以最後都冇投資。好彩楊超當日忍到手唔入股啫，唔係分分鐘大鑊過平保 （2318）。
楊超仲大講風凉話，指國壽對外投資係「有進有退」，投資策略絕對唔係死揸唔放，好似40億美金入股VISA，以70億美金放咗，盈利進賬超 過七成。佢仲爆當日保監會曾經批准國壽入股比利時富通，但後尾因為各種原因先放棄。家陣平保因為入股富通損手，要大嗱嗱撇賬達157億人仔，搞到公司今年 隨時冇錢賺，相信主席馬明哲聽到楊超呢番話，心口唔赤赤痛都幾難。
中環在線：畢菲特為部車買比亞廸？ 李華華
2008-10-15 AppleDaily噚日先講過，曾經拒絕股神畢菲特入股嘅中國公司，原來係比亞廸（1211），其主席王傳福仲爆咗樣嘢，雖然全電動車仲研製中，但股神已經好恨玩，講到明希望係第一個揸呢款車嘅人。一向貪玩嘅股神，入股比亞廸背後嘅原因，會唔會係為咗買架玩具，同埋爭做最先玩嗰個呢？
希望第一部由他開
據 《上海證券報》報道，王傳福前日喺「中外CEO論壇」上講到佢哋研製中嘅電動車。之前都有報道話畢菲特入股比亞廸，係睇好佢哋開發新能源汽車嘅前景，只係 估唔到，股神自己對部車都好有興趣囉。王傳福話，最遲12月可以推出市場嘅係混合電動車，已通過10萬公里路測同安全碰撞測試，家陣只等國家批文；但股神 睇中嘅唔係呢部，而係全電動車，呢部預計明年下半年先推出，充電一次可以行400公里，據王傳福講：「畢菲特很喜歡這款車，希望第一部由他來開。」
中環在線： 郭炳湘收代通知金郭老太繼續做主席 李華華
2008-10-15 AppleDaily
新地（016）家族兄弟內訌，郭老太鄺肖卿5月走馬上任公司主席兼非執董，鎮住江山。早排市場傳聞郭老太只會做到年底，二仔炳江即刻出嚟澄清，話冇聽聞阿媽唔do，三仔炳聯仲力撐阿媽會繼續做主席。係真唔係，答案噚日揭盅！
新地通告披露，郭老太會喺12月嘅股東大會告退，但就符合資格兼願意連任。雖然話要得到股東投票通過，但相信有郭老太坐鎮做主席穩定軍心，冇乜邊個股東會say no。
噚日新地刊發郭老太做主席以嚟首份年報，華華梗要第一時間拜讀，本年報仲登咗幾張郭老太嘅靚相，咁即係話畀大家知，佢老人家唔只係做個掛名主席，仲好積極參與新地業務。至於被「貶」為非執董嘅大仔炳湘，華華揭嚟揭去都搵唔到佢幅玉照。
284萬人工多過細佬
講 完權梗要講金，三位郭公子08年人工，仍然以老大炳湘最高，284萬銀，升幅近四成，不過人工最高唔係焦點，華華覺得重點係喺註釋度，「上列薪金，津貼 及實物利益已包括港幣七十七萬的有薪假期，按比例的雙糧及代通知金。」根據勞工處網頁，代通知金係畀啲被炒魷嘅員工，堂堂郭家大少、藍籌公司前主席要收代 通知金，都算創紀錄喇！而據新地之前嘅通告，被貶為非執董之後郭炳湘每年只收10萬蚊董事袍金。至於兩位細佬炳江同炳聯08年度就分別攞210萬同227 萬，人工升幅6%。新地一眾高層中，以執董黃植榮人工最高，08年1398萬銀，升幅3.5%。論到人工加得最勁嗰個，就非執董黃奕鑑莫屬，佢總酬金加 咗55%，至1341萬銀；當中酌情花紅升近一倍，有成921萬銀。李華華
[email protected]
中環在線：施永青「冇能力養咁多人」 李華華
2008-10-16 AppleDaily
金 融海嘯殺埋身，地產代理首當其衝，搞到差唔多每日都傳有地產代理裁員及執笠。日前更言之鑿鑿話中原地產噚日炒三百幾人，雖然消息未經證實，但華華有好多老 友喺中原做，自不然要打電話畀佢哋關心吓，點知有兩三個老友話已經放緊「大假」，聽講東南九龍同將軍澳都係重災區。中原炒人咁大件事，梗係要搵老闆施永青 求證，施生話：「係咪炒咁多就唔知，但o依家嗰市咁差，以現時成交量去計，根本冇能力養咁多人。」
日進員工仲有工返
佢仲話中 原為咗顧全大局，保住大部份人嘅飯碗，點都要縮減開支，除咗舖租貴、冇生意嘅分行要關閉外，仲要裁減部份人手，裁幾多就要由市場決定。傳聞中原子公司日進 測量師行都唔掂，面臨倒閉。施生話一間公司如果長期蝕錢，蝕得多自然會執笠，「曾經諗過執咗佢算，但好多夥計唔想死，所以繼續做落去。」華華最後搵到日進 員工，佢話仲有工返，頂得住咁話。
中環在線：裁員減薪潮殺入中國 李華華
2008-10-16 AppleDaily
一 場金融海嘯，搞到全球金融市場大亂，華爾街大行周身蟻，間間都即時減開支削人手。家吓裁員減薪風潮吹到祖國，傳聞指中金裁六分一人手，中信證券就「不裁員 只減薪」，減幅最多兩成，東航（670）更被指要全體員工齊齊減薪。據《每日經濟新聞》報道，中金同中信證券都話冇聽聞裁員或減薪。中金仲話一直請緊人， 尤其o依家正係吸納華爾街人才嘅大好機會喎。
傳中金炒六分一人手
之不過家陣市場萎縮，中金自己都出過研究報告，預計內地股市 每日成交額會由1200億（人民幣．下同）跌到600億銀，申銀萬國甚至話會縮到500億o忝。所以傳聞未必空穴來風，報道仲話券商減薪，其實係業內公開 嘅秘密。就好似東航要全部員工減人工，雖然公司照例否認，發言人仲話：「（就算有）減薪，都只係為咗控制成本。」
中信證券、東航走唔甩
不過，新浪財經引述東航員工講，上個月嘅內部會議，高層話，今年底公司嘅負債率會去到100%，仲話會實行全員減薪。
Next Page