📖 ZKIZ Archives

授人以魚 / 授人以漁??? 老狐狸

呢輪小弟忙到甩曬碌，真係可以用日出而作，日入而息黎形容，唔知點解踏入2015年開始，所有project一齊殺埋身，又有新team成立，仲要同d同事做appraisal，做完都已經係晚飯時間了，日間只可以耐唔時望下報價機，連個日中資劵商大跌之日，老狐貍居然可以係3:59分落盤搏反之際，發生了老狐貍近幾年都無試過既野………..落錯盤，經apps想買中信證劵 （6030.HK），但卻用了海通證券的價錢，結果係偏離太遠被REJECT了，仲要唔知道錯，到收左市至發覺衰左，結果第二日眼白白見到中信證券急彈，真係老狐燒鬚。

老狐貍之前都講過國內最興係「一放就癲，一癲就收，一收就死，一死就放」，係今次國內兩融引發的事件係一個好好的案例去引證下老狐貍呢句說話。自滬港通開左後，反映國內想引入海外投資者，而大部份國內投資者在休養生息多年後重新入市，在大牛市下無論新投資者、舊投資者如蟻附膻地湧入去，令市場大魚急升，即時令中證監肴底，打擊兩融係最容易，亦係最明正言順既方法，但結果嚇到大市出現人踩人事件。無錯，老狐貍仍然同意中國市場係一個吸引的大市場，雖然去年GDP增長只係得7.4%，但現時仍然找不到一個有中國規模咁大既經濟體係有持續咁多年既GDP增長，所以市場開放下，全球基金必然會視佢為一個筍盤，結果鯊魚、大魚、小魚、魚毛都係埋度，機會在，風險亦在。

再講下全球經濟，美國雖然口講話今年後期會加息，但隨著中、日、加埋現時歐洲都量寬下，美國作為最大的債仔點會肯加重負擔去借呢？不如你問下一個欠貴利佬錢既債仔，如果息口可以任個債仔訂，你估佢會唔會願意加自己息呢呵？ 所以美國一定拖得就拖啦，有平錢唔通唔用咩，反正都係印之嘛。如果大家有留意到10年期美國國債，宜家息口都係得1.8%附近，比之前仲要跌左，一來反映左市場資金充裕，亦代表左D人有D怕死，少少息保到本都殺。

老狐貍雖然好忙，但小弟上落班搭車時仍然都會睇下書，近期行書局見到有本包到實一實既書，個名叫做「投資簡義」(“The Elements of Investing – Easy Lessons for Every Investor”)，中文版仲有張化橋寫序，當然買番本睇下，如果大家諗住可以靠呢本書可以做股神，大家可以唔駛諗，不如去買本什麼「向XXX借1億」、「如何靠財技賺取第一桶金」呢D書去發下夢好過。

呢主要都係講一D大道理，可能你會覺得鳩吹，但寫書呢兩位老人家身體力行地做左出黎，以一個過來人身分可以教下D廢青由儲蓄開始、不要亂買基金、如何資產配置等，正如老狐貍所講，佢唔係教你做年賺100%的神，只係做到每年20%左右，同老狐貍的目標好接近，而呢兩位老人家所講既老狐貍都幾BUY，雖然佢主要以講美國為主，但舉一反三，如果唔怕悶悶地用百零蚊我又覺得OK喎。

其實老狐貍寫野，唔係話俾冧把，而係希望可以大家睇完有所得著，當然我講的不一定巖，但都想大家找個合適的思巧方法，相對授人以魚，小弟覺得授人以漁更恰當。

老狐貍近日太忙，寫文少左，希望大家唔好介意。

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

都是你的錯，借孖展俾我 老狐狸

學特首話齋早前有個5歲既小朋友問老狐貍：「肥仔姓乜？」

我扮曬無知地俾個小朋友威威，小朋友好開心就答：「肥仔梗係姓『死』架啦！」

如果呢幾日走去問下D黃大仙銀行入面睇緊股票既王師奶：「呢幾日點解個市跌咁多既？」

王師奶一定會答：「咪係中證監咯，無個樣整個樣，無啦啦停乜兩融喎，我D股好地地都俾佢拖埋落黎。XY^&%#(*!(#_ ) 」    (下刪一百個字器官名稱和大量動詞。)

咁如果睇埋王師奶既答案，大家都知股民係姓乜架嘞。

無錯，股民一定係姓賴既!!!!!

中國諺語中有一句：「文無第一，武無第二」，如果老狐貍可以加一句「股民無第二」，我相信我可以拎到諾貝爾經濟學獎，如果大家唔信，大家係1月18日前走去D股票行，大家一定會聽到以下呢幾句：

- 「信我啦，呢隻OK架，呢個板塊好勁呀，總理話會開放金融市場呀，梗係買中資劵商啦。」

- 「習主席話一帶一路呀，贏番D餸錢先」

到左1月19號下午，大家都會聽到：

-「我都話乜乜乜咯…….點解你會買架？」

-「我隻物物物得架，無啦啦搞乜融拖低曬。」

老狐貍一直強調中國市場太多魚，而且近年經濟好，衰左復元力強，無樓炒後個個湧曬去炒股，仲有得借就借，完全實現出中國人既賭性，所以大市要你滅亡，必先令你瘋狂，所以當全國股民湧去「融」既時候，就有隻黑天鵝出現了。

其實近日大家可能少左睇外匯市場，如果大家有玩開外匯的話，一定知道瑞士法郎同歐元脫左鈎，事件甚至令人重新討論港元聯匯的制度，我唔係想講外匯，而係當日個個諗住瑞郎會堅守之際突然脫鈎，令瑞士法郎單日暴升兩成以上，令好多借左孖展俾客戶，又或者空左重倉瑞郎的外匯公司輸到爆廠，令某間外國上市的大型外匯公司股價單日跌88%，可知又係借錢的禍。

當然，孖展（或者槓桿）永遠係雙面刄，輸起上黎可以百年基業都番轉，贏起上黎早前長和重組大計後，持有長和輪的朋友在復牌後狠狠地殺左D輪商一刀，好多輪商hedge 唔切重傷，又係槓桿的禍。

老狐貍係一個唔鍾意借錢的人，孖展對於我的影響力有限，但炒股票的人，尤其係愛槓桿的股民應該引以為戒，不要只睇贏個面，到跌既時候係度怨點解要借貸，好好的風險管理才是跑贏大市的法門。

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

中國股民的小數字 老狐狸

上一篇給有意投身證券業的年青人得到好多朋友的讚許，老狐貍亦收到好多私訊向小弟作查詢，如果我有時間的話必定會抽空作出回覆，作為一個行內的「老鬼」，我覺得要略盡綿力，為行業作出貢獻，亦係我開Fanpage的主要原因。

在以往的中國小肥羊和中國式宰羊兩文中我曾經提出過呢次A股升勢或會令國內一放就癲，最終新一批的勇士會壯烈殉國，在該文章後不久中證監已即時出招向三間劵商出招，並停了他們新開兩融戶口三個月，事件引發了早前的1.19事件，到了昨天，中國政府再向「傘形基金」出招，咁究竟呢D傘形基金又係乜呢？

傘形基金

呢種基金的結構下，有多種子基金基金或成份基金，根據一份總的基金招募書中可以根據規定的程式進行轉換的基金，而不同子基金擁有共同的管理人和託管人。

點解會有呢種基金？

主要係國內銀行不能直接成立基金投資股市，故國內銀行會與一些私募基金、信託公司等打包一些包括證券的基金產品作銷售，以避開監管，令其客戶可以投資股市，不至於提錢走，但問題是這些產品的槓桿很高，監管不到的情況令股市加熱。

股市加熱唔好咩？

中國當然希望股市好，而當權者更想見到的是慢牛，但老狐貍睇左中國網的報導後也認同「中國股市係要管的」，簡單數字如下：

1. 中國股民：1.2億人，即每十個人有一個在炒股

2. 在2014年上海人佔了成交額的16%

3. 30歲以下的人數佔36%

4. 學歷越低的越愛炒股，碩士及以上的高學歷股民佔比不足4%

即係話，好大風險集中在學歷低、年青力壯的人口，呢批人學識經驗都唔高，錢財唔多，都係抱住搏一博的心態，無經過跌市的洗禮，如果股市出現動盪，呢批人既破壞力會好大，故寧可慢牛，不能亂來。

在一個有13億，普遍學歷不高而流動人口大的發展中國家，動盪隱憂必然要顧及，當然風險在機會亦在，大家好好把握吧。

如大家有興趣，歡迎大家加老狐貍的FANPAGE交流下

https://www.facebook.com/oldfoxfanclub

老狐貍

給有意投身證券業的年青人 老狐狸

你好，自老狐貍fanpage 開通之後，不時收到好多90後後生仔女私訊，問我如何投身證券行業，有咩工種，工作要求等等，加上昨晚見到阿「查死你們」話香港缺乏金融人才雲雲，作為香港金融從業員的我決定寫封信給你們分享一下，為行業帶點新血。

曾經後生過的我好明白有理想，可以高呼「I have a dream」係一件好浪漫的事，而且「男怕入錯行，女怕嫁錯郎」，多點認識自己的興趣，選擇到適合自己的行業固然好，若然可以寓工作於娛樂就真的無憾。

話說以前有個後生仔，在大學時代的一個暑假，見到一個一齊做暑期工的師兄好努力咁溫書，個位讀工商管理既後生仔不看還不看，一看之下就改變了佢呢世既命運，個位後生仔決心跟個師兄一齊去考個經紀同期貨牌，在人人係圖書館溫緊書預備校內試之際，佢就預備去考牌，並把當時的GRANT LOAN拎左去同學買股票，並努力拎住張GRAPH PAPER 去學人一筆一劃去畫股價圖，因為當年沒有現時的報價機，亦未有互聯網，但個後生仔就做得好陶醉，最後個師兄考唔考到就唔知，而當時呢個後生仔就係畢業後第二年至搵到從事證券的工作，一做至今，我諗大家都明白呢位後生仔經過多年煎熬後，成為了今日的老狐貍。

唔知好彩定唔好彩，老狐貍真真正正由低做起，由盤房幫經紀落單、股票出市、期貨出市、經紀、分行管理、前線和研究團隊管理都做過，宜家做乜就唔好講啦，好彩係當年會再有咁多位置俾你去認識呢行，唔好彩就係會用好多時間至上到位。

好多人都會話想投身金融業，但其實金融業好闊，包括銀行、證券、期貨、金屬、外滙等都係金融業，而銀行業都可以分為投行、商業銀行等等，但偏偏問我的小朋友所講的金融業只係得證券業，問佢地想做D乜位置基本上係完全答唔出，至於原因仲簡單：搵多D錢，其實睇到佢地咁答法，老狐貍都好痛心，如果抱住呢D心態入行，我會好擔心佢地會走歪路，輸死事少，一不留神仲可能……..，反正行行出狀元，不如好好諗下自己點解一定要做呢行呢？

其實要搵一份適合自己的工作好唔容易，同一道理，一間公司要搵適當既人亦好難，以近期小弟面試盤房接盤員的應徵者當中，見到明顯騎牛搵馬既有，股神上身亦有，甚至亂吹一通都有，呢個位只係請你接下客盤，你咁神勇又點敢請你呢？不如自己做經紀吧。亦見到有D應徵者，靜到同佢講野都怕，問下佢股票知識係零，你話又點可以請佢做前線銷售呢？

不如好簡單咁講下證券業有D乜野工種。

前線人員

- 落盤員                       – 經紀

- 交易員                       – 分析員

後臺人員

- 交收部                       – 代理人服務

- 託管部                       – 會計部

除左前線人員必須取得證監會或金管局牌照外，後臺人員只要不用對客戶係唔駛攞牌既，而前線人員當中對學歷要求最低的是經紀，只要你有牌和有客，無人理你係中五程度定係博士，反正你自己養自己，客戶走佬你又要上身，唔犯例無人會理你。

有好多人會想做分析員，呢個POST係要求高的，當年我考佢地除左學歷之外，仲要佢地寫個REPORT我睇下得唔得，唔係所謂學識兩野財技就可以的，記住證券業係好現實，你無料到係無人會俾機會你講野。

至於後臺，其實同一般公司無乜分別，例如貿易公司船務部你要識SHIPPING野，證券公司的交收部你要懂交收工作一樣。

至於講到大家關註的搵錢能力，老狐貍不財，捱左咁多年仍然未上岸，如果大家仲認為做證券業就一定發的話，咁做周大福的SALES 咪個個成屋企都係金？講真，現在的證券業唔易做，成本高(包括租金、機器、人手、RISK MANAGEMENT、COMPLAINCE等等)，傭金又降，你話公司賺錢能力低左，又點會分得多呢？可能你會話去大行等分花紅咯，咁你唔係林生個女、郭生個仔、任生個女又點會請你呢？人地睇中你都係因為你屋企有錢同有CONNECTION咋。

我唔係想打沈大家，當然我好歡迎有心從事呢行的年青人，但係入行前真係要知道呢行不似以前的搵錢，反正宜家傭咁低，幾蚊一單TRADE都收得，如果你股神上身，做客會唔會好D呢？

金融業係香港最後支柱之一，希望大家真的全程投入才考慮入行吧。

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

中國股民的小數字 老狐狸

上一篇給有意投身證券業的年青人得到好多朋友的讚許，老狐貍亦收到好多私訊向小弟作查詢，如果我有時間的話必定會抽空作出回覆，作為一個行內的「老鬼」，我覺得要略盡綿力，為行業作出貢獻，亦係我開Fanpage的主要原因。

在以往的中國小肥羊和中國式宰羊兩文中我曾經提出過呢次A股升勢或會令國內一放就癲，最終新一批的勇士會壯烈殉國，在該文章後不久中證監已即時出招向三間劵商出招，並停了他們新開兩融戶口三個月，事件引發了早前的1.19事件，到了昨天，中國政府再向「傘形基金」出招，咁究竟呢D傘形基金又係乜呢？

傘形基金

呢種基金的結構下，有多種子基金基金或成份基金，根據一份總的基金招募書中可以根據規定的程式進行轉換的基金，而不同子基金擁有共同的管理人和託管人。

點解會有呢種基金？

主要係國內銀行不能直接成立基金投資股市，故國內銀行會與一些私募基金、信託公司等打包一些包括證券的基金產品作銷售，以避開監管，令其客戶可以投資股市，不至於提錢走，但問題是這些產品的槓桿很高，監管不到的情況令股市加熱。

股市加熱唔好咩？

中國當然希望股市好，而當權者更想見到的是慢牛，但老狐貍睇左中國網的報導後也認同「中國股市係要管的」，簡單數字如下：

1. 中國股民：1.2億人，即每十個人有一個在炒股

2. 在2014年上海人佔了成交額的16%

3. 30歲以下的人數佔36%

4. 學歷越低的越愛炒股，碩士及以上的高學歷股民佔比不足4%

即係話，好大風險集中在學歷低、年青力壯的人口，呢批人學識經驗都唔高，錢財唔多，都係抱住搏一博的心態，無經過跌市的洗禮，如果股市出現動盪，呢批人既破壞力會好大，故寧可慢牛，不能亂來。

在一個有13億，普遍學歷不高而流動人口大的發展中國家，動盪隱憂必然要顧及，當然風險在機會亦在，大家好好把握吧。

如大家有興趣，歡迎大家加老狐貍的FANPAGE交流下

https://www.facebook.com/oldfoxfanclub

老狐貍

給有意投身證券業的年青人 – 面試篇 （上集） 老狐狸

自前一篇給有意投身證券業的年青人上載後，引來很多不俗的評價，加上小弟的一隻愛股雅天妮（789）爆上，一時間查問股票和想投身呢行的年青人私訊如雪花咁湧埋黎，幸好呢期的Appraisal接近尾聲，否則好難快速回覆各位的查詢。

老狐貍當初開設專頁，就是想建立一個可以跟大眾接觸的小平臺作交流，不想自己的文章無償地給人作宣傳工具和賣課程的工具，寧可在另一平臺全民媒體上載，加開一個小小的fb fan-club作交流，當初目標希望在2015年內取得1,000名fans，承蒙錯愛，自14年12月6日開設了自己的FB專頁以來，未到兩個月時間已有超過800個fans，反應遠超小弟的預期，真的感恩。但亦借呢個機會俾大家知道「老狐貍」專頁只是one man band，沒資金支持，沒有助手，所有野都係出自老狐貍的手，故對電腦能力有限的老狐貍確係有點難度。

作為一個入行廿多年的老seafood，宜家開始希望把自己的小小心得傳承下去，但工作關係，老狐貍不會公開搞甚麼財技班、進階班、操盤班、實戰班、高級實戰班、金牌實戰發達班，又或者教金鐘罩第10重天，之後一定練第11重天咁，務求把閣下的一分一毫搾盡。(主要係唔想推介完出街俾人揼，更不想誤人子弟)。

有網友話你上次講左入行前的心態，不如講下應該點面試喎，好啦，今次就講下以老狐貍的標準如何去選擇面試者，原先打算一篇過，但打打下又太長，所以都係分番上下集。

好，開始啦，準備好未？

面試最簡單的道理係，你愈留得耐就機會愈大，所以第一大原則係： 你千祈唔好乞人憎

學歷 / 經驗

呢行係好現實既，你無料係唔會有機會俾你，好簡單，你係一個中學畢業，如果我請了你之後出左事，我又好難同老細解釋既，所以一般大學學位係基本了。

如果係經紀，我又唔會理既，最緊要你有客咯。

衣著 / 化妝

無論你in 乜野位，只要你in 金融業的位置，基本上的要求都差不多，金融業係一個先敬羅衣後敬人的行業，呢行d人都比較鍾意睇靚野，著得好D始終都係著數DD。

男生：西裝打呔，但不要見到頭皮，不要頭髮蓬鬆，記得剃鬚，衣著整潔，切忌D衣著黴黴爛爛、恤衫發黃，註要體味等等。

女生：一般套裝，著裙一定比著褲著數，化淡妝，少量香水。切忌濃妝抺艷，勁SHOW身裁，因為我們不是夜場，雖然我地可能like，但場合不同嘛，就算負責面試那位想睇都唔好意思啦。

無論係男定女，記得入面試室前照一照鏡，記得老狐貍好耐之前見過有兩個candidates，男的一入房有陣汗臭味，仲有少少口氣（遠處都聞到），我都盡快完成面試，試問你仲有無機會。另一個女的外表都嗒得杯落，但面試途中見到佢雙眼之間有眼屎，咀角有口沫，結果唔傾得耐，叮走。

至於你話靚仔靚女係咪著數d？老狐貍同好多行家都有傾過，靚女一定有著數，單單係你面試都傾耐d啦，之後如果入埋你個team唔打得都睇得，right? 至於男仔，我就覺得太靚仔我反而唔like，多隻香爐多隻鬼，後生仔俾心機做啦。

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

給有意投身證券業的年青人 – 面試篇 (下集) 老狐狸

上次講左學歷 / 經驗 同 衣著 / 化妝，有讀者指呢d野見咩工都一樣啦，其實都係既，就當係小弟俾大家的貼士咯，今次再講埋談吐 / 能力。
談吐/能力

當你開始面試，就係睇你真材實料既時間，所以你要發揮同表現到你所識的，令面試者對你有興趣，令自己係面試室留耐D。

1. 前線

作為證券前線，除非你係經紀（因為只要你有客就得），如果你係見CS或者dealer等，你一定要有正能量，對市場有一定認識，所以我好多時都會問我下個市況，近期炒D乜，如果我宜家叫佢俾一隻股票我，你會有乜推介，點解等等…. 當然我未必認同佢地D答案，但最緊要係要睇下佢答案有無LOGIC，但切忌股神上身，否則下下叫人買仙股，好易殺左D客。

一個前線幾時都要笑容可鞠，好簡單者， 一個前線人員，好多機會會接到D衰客，一玩就一個鐘，真係少D EQ都唔得，所以我有時都會問D難題，睇下個個CANDIDATE 的即時反應，有D會塊面會紅曬，叻D既會好快無事，如果即時變曬臉，咁都可以BYE BYE，唔係請左你以後都幾難捱。我都試過我曾經問問題問到有個candidate粗口都爆埋，雖然粗口係我地呢行好普通，但面試緊喎大佬，你咁樣我點夠膽請你做前線呢？相反，你靚靚女女，講野又溫溫柔柔，d客都冧曬啦，點會搞唔掂呢？Interviewer都俾你搞掂啦。

如果你係SALES，你更加要預左俾人捽數，你無番咁上下口才同知識都幾難做，當然，我一定會睇下佢有幾多客啦。如果你諗住係公司坐住等客上門，你遲早就乞米了。

2. 分析員

好多人都想做呢個位，老實講，呢D位好多時都係係第二間行搵番黎，所以佢地跟開邊個INDUSTRY，寫野係點，推介得唔得其實一早就知，甚至可能之前係D推介會呀，飲酒時都已經識，所以呢D係無乜要見，係就係，唔係就唔係。識人好過識字，係呢行係最明顯見到既。

至於有D中小行會請下TRAINEE，入行時可能只係跟下D DAILY COMMENTARY，做到咁上下至分行業去睇，所以中英文好都係必然，有時我會俾隻股佢地去睇下，好短時間內寫下d bullet points，當然我唔expect佢地一定巖，因為投資係藝術，各師各法，最重要係佢地可唔可以找到focal point，切忌人雲亦雲，搬字過紙，一定要有自己的reasoning。

3. 後臺 (如交收/代理人)

呢d位就無乜特別大要求，最緊要似隻牛，仲要任人X都唔駁咀，所以如果你有心入行，呢個位都係比較易入D。

其實證券業仲有好多位，包括近年興既Risk management 同Compliance，經驗同學歷要求都好高，不過新人就好難入了。

去到呢度，面試都差不多了，祝大家好運吧。

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

Less is More 老狐狸

新年伊此，先同大家拜個年先，老狐貍祝各位讀者係羊年出入平安，身體健康！

“Less is more”，我唔係講緊乜隻牌子的護膚品，而係講緊一些投資者心態，如果大家以為今篇係推股票的文章，可能會令大家失望了。

老狐貍在「2015年預測和推介」呢兩篇文之後，主要推介了兩隻股票（即789.HK雅天妮和952.HK華富國際），有D朋友多留意我個FANPAGE的，可能亦見到我不時上載的短炒，例如：浙江世寶、東北電氣和四環醫藥等，托大家的鴻福，除四環醫藥我平手走人外，呢期的推介都有D表現，但多與讀者交流後，發覺部份讀者作為投資者的心態確有改善的空間，小弟希望可以係呢度總括一下，希望大家可多留意，對各位日後投資必定大所裨益，如果咁巖講中係你，希望不要介意。

1. Less is More
近期對less is more的感受都好深，係小弟兩隻股票稍稍靜落黎既時候，收到好多讀者問我仲有乜好野，其實小弟都無乜所謂，無論買黎渣既，又或者炒既，甚至係day-trade既，我都希望可以同大家分享，但唔知係宜家d小朋友無耐性，定係佢地唔可以俾自己靜落黎呢？佢地似乎好心急，希望每一隻股票都有份，就呢隻又買個隻又買，其實老狐貍每日聽聽埋埋咁多，要我俾幾個冧把你又有幾難呢？但唔想你地中伏者，好似賭俠2000劉德華話齋：「你想悶悶地咁贏，定過足癮咁輸？」其實買股唔駛多，中就得啦，反正老狐貍只希望平均每年20-30%回報者，如果你想再多d，咁我呢個欄似乎唔係好巖你睇，你轉睇「股神」個fanpage吧，日日都有架，仲隻隻都話好，一年搵幾千萬，買左仲會大隻左，讀書都叻d呀！

2. Make it Simple
唔知係咪宜家多左人上個d財技班，好多人只要見到d公司無論批又好、供又好、出CB又好，隻股乾又好，只要有呢D野出黎，就會覺得間公司古古惑惑，必定話係好野，又話要CHECK CCASS，又話數倉又剩咁，最經典係我聽到有D上完什麼操盤班的讀者，講什麼A盤、B盤，又話咩星星盤，只要見到星星盤就有莊家做野，就掃佢啦，聽到老狐貍一頭霧水，知道後當堂嚇一跳，然後得啖笑，個D導師連個x呀 *呀係乜都未分得清楚，最終令到個個學生都買到一蘿柚都係股仔，個市無事就好彩，如果個市有咩事點算？

老狐貍自問都讀過下書，亦係呢行做左咁耐，對財技都叫知道係甚麼一回事，當然我都有時會捉下呢類股票，但不會隻隻都話正，如果我睇唔通我就算數，點都唔會買，但呢班小朋友既做法就好似識左用袖箭、飛標呢D暗器就以為獨步武林，要去爭武林盟主一樣，唔會明白天外有天，人外有人，當然我好欣賞呢份PASSION，但何必要鑽入去俾人殺呢？

投資？Make it simple吧。

3. 每事問
我諗你都曾經聽過好多人打電話去電視臺問：「xxx（冧把）點睇呀？」，小弟都幾佩服班財演，好似問乜都答得到，其實大家有無諗過打上去電視臺個d係媒黎架呢？ 老狐貍都遇到好多呢d人，只係問幾個數字就想你搵埋資料，再長篇大論咁答佢，最好係guarantee升咁，小弟其實好反感，我覺得呢d係基本誠意，自己功課都未做就只去問人，人地俾左意見你又唔聽，例如叫左你沽你唔聽，自己諗住沽高d，最後跌左落黎問番人地點算。

4. 姓賴
記得老狐貍之前篇文嘛？炒股票的人姓乜？當然係姓賴啦，有時見到d投資者好搞笑，話之前聽左個朋友叫你買隻股票，講到天花龍鳳，後來跌左落黎又罵個朋友呃佢，老狐貍會諗開得戶口買股票都成年人啦，人地無用槍指你去買股，自己出左手輸左就賴朋友，而且唔識止蝕架咩？其實大家想想，你贏左只會話自己係股神，會唔會分俾個朋友先？如果係咁跌左落黎應唔應該怪人呢？自己檢討下啦。

投資呢D野各師各法，有D炒鬼只炒DAY-TRADE，絶不過夜，有D人睇一個浪，期間點郁都唔會沽，其實無話邊個方法好，自己找一個覺得舒服的方法，可以CONSISTENTLY 跑贏大市就夠了，畢非特都係咁者，你又叫佢做股神？

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

Let it go, Let it go…… 老狐狸

情境：係一間證券行的某一分行

時間：一個開市的早上

師奶甲：「仲乜新正頭皺曬眉頭呀？」

師奶乙：「本來都好地地既，上一日仲贏左隻XXX，執左萬幾蚊，點知今日聽電臺阿YYY叫買左隻ZZZ，結果倒輸幾千蚊…..如果俾我搵番我呢幾年輸既錢，真係唔會再炒股票了……..下刪數十字」

以上既情境由老狐貍仲係小朋友時已經見到不下數十次，但奇怪係呢D師奶永遠不滅，為市場註入源源不絶的動力（金錢），到今時今日，有時我放假經過銀行，仍然見到呢D熟悉的面孔，有時真係好想行去問下佢地，既然咁多年都係輸既，點解仲會日日係度打躉。

我諗好多時D客都好享受個種賭仔心態，覺得機會總會到，但往往就贏一隻輸一隻，我的前輩個代會叫呢d情況做「拉豬賠狗」，而小弟就慣常叫「打刧紅毛鬼，進貢法蘭西」，老狐貍覺得其實只要係紅毛鬼度贏得多，又何必怕輸少少俾個法蘭西呢？只係事實永遠係個法蘭西比較大咬，因為d客「敢輸唔敢贏」，輸就死坐，贏就即走。

講開輸贏呢個問題，老狐貍突然諗起以前係PAGEONE睇過的一本書的簡介（無錯，因為係打書釘睇番黎o既），書入面講一位成功網球手取勝之道 （如果無記錯唔記得係咪講美國網球名將阿加斯的，記錯勿插），以前呢位球手從來只會打d 靚到爆既波，但往往就因為攞位攞得太盡而出界，令佢個排名未能上到去，後來佢換左個教練，個教練叫個球手不要下下打d ACE波，要安全為上，因為只要守得好，對手往往會自己打失的，網球手後來轉左呢個打法，只要自己唔失，就打贏對手，結果成績就上左黎。

同一個道理，老狐貍覺得都可以套用係炒股的道理上，如果識我的朋友一定成日聽到我講：「唔贏唔緊要，千祈唔可以輸」，當然呢個世界邊有咁美滿，但個意思係自己一定要懂得風險控制，無論係註碼，止蝕都一定要貫徹執行，近期有讀者私訊老狐貍問：「你會唔會覺得早前買左隻四環藥業沽得太早？」，老狐貍隻四環藥業原本係近期比較有信心的股份，但出手個下註碼大了，又發覺個股價點解成日唔升，就係唔駛輸的情況下沽出去，隨後的大升當然令老狐貍揼到心口都穿，但若然隻股係跌的話，老狐貍就覺得自己做得叻叻了，呢D就係叫風險控制，若然買入去後「股價不似預期」，小弟係會斬得好狠的，但如果隻股對辦的話，我會LET IT GO, LET IT GO…….

如果大家仲係問緊我個兩隻股票，我早已經答左你，LET IT GO, LET IT GO……

如大家有興趣，歡迎大家加老狐貍的FANPAGE交流下啦

https://www.facebook.com/oldfoxfanclub

老狐貍

大股東註資，逆向收購之落實 老狐狸

在上一篇「馬後砲的心路歷程」一文中，談及隻高銳中國，此股是小弟在開市途中突然靈光一閃下，即時睇曬佢D資料，發現「天使」原來藏在年報細節裏，隨後不久便停了牌。
當日老狐貍發覺係隻天使係呢間公司會利用控股股東的資源在互聯網、物聯網、三網網融合中找機會，亦發覺其主席持有一間叫高銳視訊既公司，亦正正係今日復牌的焦點所在。
簡單講下出左既復牌公告先：
高銳中國物聯(1682.HK) (按：停牌前市值21.36億以364.5億向控股股東和其他10名獨立第三方購入「高銳視訊」(三網融合解決方案業務)，以$2.87元發127億股(折讓30.17%)收購上述公司。
交易完成後，大股東持股由62.01%升至63.13%，而高銳視訊另一股東方懿潤萱持股9.21%。

在交易完成後，股權分佈將非常集中，現有公眾股東只佔1.49%，頭5名出售高銳視訊股東已佔86.33%，但實際上其全為共同持有註入公司的友好，持股共98.51%，即係乾到無人有。

完成後的架構：

收購完成後公司將在中國提供三網融合解決方案及物聯網和智慧型城市綜合解決方案。

高銳視訊2013年及2014年的未經審核除稅後純利分別為人民幣5.048億和6.196億，即係話唔似流野。

好了，寫左咁多，咁即係點？

老狐貍覺得原來持有的小股東應該係高興的，因為大股東註入了一件大資產，又沒有在市場即時收錢(即供股)，原來持有高銳視訊的股東就算要套現都應該要公司股價D，加上成交大D至得，以其現時的股權原本已乾，當日勇字當頭買了的朋友或者可以賭下，至於無的朋友，我無乜意見了。

反正今次好彩俾小弟講中左，睇番市場除在呢隻好戰的狐貍外都無乜人講過，都算威威了，希望無人出黎抽我水啦。

如大家有興趣，歡迎大家加老狐貍的FANPAGE交流下

https://www.facebook.com/oldfoxfanclub

老狐貍