📖 ZKIZ Archives

常言道：「靚女唔屙屎！」此真的是大錯特錯，消化排泄為身體重要機能之一，如果靚女長期排不出糞便，會引發健康各種大小危機，分分鐘連靚女也做不成。曾經擔任連卡佛買手的林佩詩（Lisa）正是曾深受便秘之害，結果在朋友介紹及姐姐林佩芝（Pat）的鼓勵下接觸了發酵茶，大大改善了身體健康之餘，更改變了她一向鍾情時裝的方向，創立了「Taboocha大杯茶」，讓生產及推廣發酵茶變成她生活及事業之重要部分。時裝美女轉型教人正視身體問題

姐姐Pat笑說：「你睇我阿妹個頭再加佢嘅一身衣著就知佢有幾fashion啦！」沒錯，今年二十八歲的Lisa雖然身穿圍裙，身處充滿家庭式工廠味道的廚房，但她比Rocker更有型的剷青短髮及一身爛牛配布鞋的打扮，仍然散發着陣陣「潮味」。在美國修讀時裝課程的Lisa曾於國際品牌做採購，但原來在美輪美奐的靚衫靚鞋工作背後，真的是有苦說不出。「當時因為工作上各種原因導致壓力好大，結果最先浮面嘅問題就係便秘。」她指最嚴重那時要三、四天才能成功排便一次，而且過程還極之痛苦。「都市人壓力大，好多時都有便秘問題，但基於尷尬又唔敢講。」壓力大更令Lisa出現失眠問題，排不到便又睡不好令皮膚敏感，令她反思到要真正的「靚」起來，身體健康比一切也重要。在喝發酵茶及減少吃加工食品的幫助下情況才得以改善。「後來開始去到廁所，雖唔係每日都有，但至少兩日有一次，已經係好大進步，感覺都舒服咗好多！」目前她成為了全素食者，主張吃生機食物（raw food），即是以不高於攝氏42度烹調食物，以完整保存食物中的天然酵素。

營養價值受肯定但港人口味未摸清

飲用發酵茶成功為Lisa的健康帶來一場逆轉勝。「開頭係因為需要而飲，後來因為家姐好鍾意發酵茶嘅味道，先慢慢由需要變成欣賞。」發酵茶因帶有茶字而經常被冠上傳統中國茶的形象，其實是帶微酸的有氣飲品，具清香之感。發酵茶英文名字為Kombucha，一般被稱為「茶菌」，而菌種就是進行發酵的最重要主體。目前大杯茶在生產時會進行兩次發酵，主要以綠茶及紅茶作茶底，在第二次發酵時會加入果汁及香草等。現總共有七種口味，包括有茉莉花、杞子薑、青檸羅勒、紅菜頭、黃薑菠蘿、洋甘菊及香草味。「發酵茶嘅優勢就係有益生菌和酵素幫助腸胃消化，而呢樣係菜汁同果汁提供唔到。」為了讓更多人願意嘗試發酵茶，大杯茶在今年頭特意把批發價減百分之三十，並設建議零售價為三十八至四十四元，以更接近一杯咖啡的價格。「有人飲完後話好似菠蘿炒飯、咕嚕肉。不過我估係因為試咗我哋個黃薑菠蘿味。」雖然發酵茶的味道對港人來說有點太「新鮮」，但Lisa指茉莉綠茶口味的清新一直以來也很受男女歡迎。「男士可能比較多飲青檸羅勒，可能佢哋對酸味的接受程度較高。女士就鍾意杞子薑。」Pat指某些人會認為發酵茶太酸，她認為是因為市面上飲品含糖量較高，導致香港人口味普遍也偏向太甜。

有姐的孩子像個寶

Lisa主力生產及研究新口味，經常靜靜地站在「養」着無數母菌的數十個巨大玻璃樽前專心細看它們的情況，而Pat則不時因與記者討論得太興奮而七情上面，兩姊妹雖也留着短髮，卻有種另類對比。「佢成日話自己係總統而我則係佢嘅首相，負責有效咁實踐佢嘅想法。」Pat原先是事務律師，做了七年因而儲得一筆積蓄，在妹妹決定辭去正職創業時用以投資作支持。後來因父親快要退休而需接管家族建材生意而離開律師的本業，轉為學做生意人。「本身主要以投資者身份支持Lisa，後來睇到佢愈嚟愈忙決定喺家族生意中抽出時間幫佢。」由從中環打滾變成每天進出荔枝角；從於法庭為別人抗辯轉為在不同的市集向人介紹發酵茶，轉變實非一時三刻可習慣。「以前打工每個月都有一定現金喺手，但而家做生意唔係話幾日就可以回本有賺，成個生活方式都改變咗。」她笑指現在不能再像以前般隨便地在中環喝杯百多元的飲品，每使一分一毫都會「諗過度過」，但她指一切也值得，起碼換來和家人更多的相處時間。「我倆成日都嘈，始終我做了佢姐姐咁多年難免好易就責怪佢。」Pat指兩人其實是很合拍，認為妹妹是個很有創意、對產品很執着的一個人，所以相信她所作的決定。二人在訪問時不時「互表不滿」，笑對方笨手笨腳，但轉個頭又會攬作一團。Lisa得戚地說：「我就知道佢絕對唔會離棄我。」指正因為大家都夠坦誠，才不會有所謂心病，大吵大鬧後依然不會「分手」。

本土意識強小店互撐增銷量

目前大杯茶主要作批發商，每月生產二千多瓶發酵茶批發給香港約二十個品牌，總共有約四十多個零售點，當中位於上環的小店OHM HK就是其中一間。負責人阿珊指：「知道佢哋係用公平貿易得來的茶葉做茶底，大部分都係用有機及本地材料，覺得好符合我哋鋪頭嘅理念。」OHM HK每月也會購入四十支大杯茶放在店內寄賣。除了健康飲食外，二人也擁有很多相同理念，包括今次以大杯茶名義贊助萬五元予何韻詩的演唱會。「我哋支持好多嘢，例如收養流浪狗、支持本地音樂又或是言論自由及環保。」Pat指早前以律師身份參加過白皮書遊行，如果人們也不再發聲就沒有機會。「好多人睇今次贊助覺得有政治因素，但我哋睇嘅好簡單，就係支持每個人都有實踐自己計劃嘅權利。」

開業資料（05/15）裝潢及器材$250,000容器及雜費$70,000總投資$320,000

營業資料（07/16）營業額$50,000租金$10,000薪金#$17,000雜費開支$20,000盈利$3,000

#包括Lisa全職薪金及一名兼職薪金

專家意見：要小心發酵過程出現害菌

養和醫院營養師柳慧欣也認同發酵茶的益菌確實有利腸道健康，特別是對便秘或肚瀉的人有幫助。「某些人食少少乳糖都會肚瀉，又或係唔鍾意乳糖製品嘅味道，就可以用發酵茶代替。」不過她補充，若製造過程中處理得不好，不單會產生了益菌更會有害菌，加上發酵過程會釋放小量酒精，因此建議抵抗力比較弱的人如孕婦、老人家和小孩就要小心飲用。「如果想自己品牌更好，長期嚟講每一批貨都可以攞小量去化驗睇吓有冇害菌，以證明產品安全性達標。」

撰文：黃綺敏攝影：鄭樹清、關永浩攝錄：廖健昌[email protected]

嘉諾撒聖心書院出過唔少女高官，陳方安生、任關佩英、鍾麗幗等；雖然候任特首林鄭來自嘉諾撒聖方濟各書院，其實與聖心及九龍St. Mary's屬「姊妹」學校；而林鄭做得成特首，都要「多謝家姐」，全國政協常委兼美心太子女伍淑清，與梁愛詩皆是「聖心妹」，兩人不單是校友也是閨密，聽講北上開政協會議都好鬼老死，好多時同房傾密偈，可謂去到另一化境，兩位來自師姑庵的女強人，是今次特首的「queenmaker」造女王者，力捧林鄭上位；現時林鄭同樣向「師姑庵」姊妹埋手組班，候任行政長官秘書長丁葉燕薇畢業於St. Mary's，財政司司長人選之一也是畢業於聖心的創興銀行副主席梁高美懿。林鄭組班，果然姊妹優先。

最巴閉中環車位

由澳門押業大王高可寧家族持有的中環德成大廈，雖然已有五十八年樓齡，但威水在地下設有停車位，景福珠寶創辦人楊志雲曾在高家旗下大友金行打工，後來自立門戶成立景福珠寶，中環店就在德成大廈附近，以往楊志雲夫人到中環，無位泊車，就可以泊在德成大廈這個罕有地面停車位，真係無錢無面都無得泊。事關要轉入德成大廈泊車，必須經過巴士專線，車輛須申請特別牌照先有資格泊呢個車位，車位之中，最巴閉呢個。

中環寸嘴我唔只識軟庫，仲識軟庫飯堂

工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。

有條銀行佬以為馬雲嘅阿里巴巴股票（NYSE：BABA）好sell過孫正義嘅軟庫Softbank（9984 TYO），寸寸貢話香港人淨係識馬雲，對孫正義陌生喎，你奶奶吖，軟庫中國我唔識？余錦基搞間「軟庫飯堂」，我睇條銀行佬都未去過！Softbank個老細孫正義早過馬雲去見Donald Trump，聯同主權基金投資五百億美金，Donald Trump即刻應牌謂會創造五萬個職位，孫正義梗係得，立即quantify到個win-win situation出嚟，所以呢個幾禮拜，《Financial Times》都寫佢幾日，買印度Snapdeal單買賣。東施效顰，馬雲抄功課又去見美國領導人，一貫大陸作風空槍上陣，嗌口號講完就算，有張相話同美國領導人見過面，喺啲鄉里面前抬高身價，依家仲講愛國情懷呀？而家主要係講為祖國發展，講回報！其實Softbank揸住阿里巴巴三成股份，又揸住Yahoo Japan、美國Sprint，以舊經濟角度秤佢嘅asset都夠數，而且呢啲股票係盤古初開之時Softbank買落，成本價超低，好似審胡椒粉咁，審中一家就掂，有個八妹問我：「阿楊，咁你有冇落疊買Softbank呀？」唏，我都要體驗吓呢啲新經濟投資策略嘛。不過呢個禮拜去幫趁吓余錦基間軟庫飯堂，攞吓靈感先！

莎莎郭work hard play hard

嘉莎老闆郭少明早排親自領軍，飛去新加坡見基金經理，雖然莎莎郭未能以英語跟坡佬溝通，基金佬見大老細親自上場誠意搭夠，都對「莎莎」另眼相看，其實郭少明work hard play hard，公司都有兩艘遊艇泊於深灣，短小精悍好似跑車咁，聽講莎莎郭玩厭咗艘遊艇都俾員工享用，所謂與眾同樂嘛。有次撞見佢同班朋友喺中環星記海鮮飯店包房食飯，嘩，與一眾男士攬頭攬頸飲到啤啤夫，真係玩得好盡興。