📖 ZKIZ Archives

專家教路，決定是否轉工，眾多考慮因素之中，有一個一定上榜，是上司的能力。意思是，上司是叻人，下屬除了有充足學習機會，當上司扶搖直上，下屬還享受水漲船高的好處。

叻 上司為團隊創造融洽氣氛，上下士氣高昂，公平共享成功果實，返工可以是一種樂趣。可惜的是，以上只是假設，跟現實分別可以很大。各位試問吓身邊朋友，怎評 價上司，我相信不滿意上司表現的比例不少於八成。關於對上司的批評，最常見是縮骨，這類人在外面見到惡人，好似綿羊般純良，回到自己團隊則大聲發惡，下屬 最討厭這種作風。有些上司性格本身有問題，例如太懶、太火爆、太高傲等，直接影響與下屬關係。有些上司外表看似沒問題，但做事要求太高，對下屬定下太高標 準，導致關係欠佳。太落手落腳做事的波士，也容易令下屬煩厭，下屬感覺永遠有雙眼在背脊後監視，表現得慌失失。

現實中，廢 柴上司或者才是常態，遇到叻上司如中六合彩，不宜存奢望。既然現實是世上多廢柴上司，打工族應該接受現實，並且裝備自己，學習在一個廢柴當道年代怎自處。 第一件要做的事是，懂得欣賞廢柴的好處。我想到四個好處：一、靠自己。如果上司是叻，下屬做事出錯，最後有人把關。有些下屬甚至依賴上司，做事做七八成便 交貨，其餘靠上司執漏。但當上司是個廢柴，做完一件事後下屬須看完再看，確保沒問題，因為犯錯空間是零。當現實是要靠自己，問上司等於嘥氣。靠自己其實沒 什麼不好，能夠從工作中紮實鍛鍊，一天一天看着自己進步。二、保護自己。很多人認為上司的主要功能是，為團隊擋外面射過來的明箭和暗箭。例如集團內政治， 包括爭取資源、分配責任等，需要有相配職級的人在外捍衞團隊的權益，讓團隊安心做好分內事。當上司是條廢柴，即是玩政治也要靠自己。更重要是，出入睇路， 無人幫自己，辦公室可以很兇險。一早知道上司是條廢柴，或是好事，起碼不會錯放信任，一切清清楚楚。三、信團隊。公司一日到晚喊團隊精神的口號，不及得一 個廢柴上司製造的凝聚力。當上司是條廢柴，下屬知道最可信任的人，是最親近的同事。一個人看到和做到的始終有限，兼且暗箭難防，一定要靠朋友，而朋友只可 能是利益跟自己看齊的同事。所有事都變成敵我分明，自己這一邊是自己人，外邊的人永遠不可信。一些長久不變的友誼，催化劑是廢柴上司。能夠在辦公室交到知 心朋友，是一種福氣。四、消除猶豫。很多人對自己份工存有猶豫，究竟自己是否喜歡？是留下或離開？這些問題產生的困擾，可影響情緒，以至工作表現。但當上 司是條廢柴，工作環境已經是如此惡劣，閣下仍然喜歡這份工作，恭喜你，閣下找到真愛，這份情不可能是假的。真愛難尋，找得到，全靠有一個廢柴上司。

以 上千真萬確，不是怪論，因為世上真的充斥着廢柴上司，我們只能接受。關於上司的好與壞，一個有意思的問題是，如果上司英明，做事利落，有成績依據，但這個 人人品欠佳，應怎評價？換句話說，上司不是廢柴，但是一個衰人，怎辦？一個人辦是蘋果的喬布斯。喬布斯死後出版的自傳，把他描繪成一個狂人，為了工作六親 不認，自己女兒也不肯相認，遑論客氣對下屬。喬布斯為人狂妄，對人欠耐性，眼裡只懂得追求完美產品。喬布斯死後，很多人認為成功牽涉代價，喬布斯的成功是 天才級數，因此外界應該接受他性格上的缺陷。這種態度本身沒問題，我相信有不少人願意不顧一切追隨一個天才，視為必要之惡。我認為有問題的地方是，有人以 為喬布斯之成功，是因為他是一個衰人。喬布斯之所以成功，是因為他是喬布斯。

蔡東豪Tony Tsoi

上市公司精電國際前行政總裁，他曾任職投資銀行，在《信報》以筆名原復生撰寫財經專欄，對投資及求知有無限渴求，習慣早上四時起床寫作找樂趣。http://www.facebook.com/TONYTONGHOOTSOI

這天你放工打開電腦、在網站click一click。究竟你是男是女？十八定廿二？住山頂定深水 埗？用iPhone定小米機？都已經不再是秘密。這些資料，在商家眼中，是「大數據」（Big Data），他們可透過大量用戶的數據行為，準確分析客人的喜好。現時「大數據」在淘寶都有得賣！成為大小商戶的重要武器。曾被同輩取笑bad taste的黎文（Leon），分析時裝數據，請IT人多過sales，令他開設的mydress，生意額由兩年前的零變成數百萬元。而時昌迷你倉老闆時 景恒，用「大數據」在定價上「劫富濟貧」，給予窮客更多優惠，銷售增加賺得更多！ 大家請做好準備，走入這個數據大時代。

「我第一日做呢盤生意，已經同自己講，我係做緊E-commerce，唔係單係賣衫！」時裝網站mydress的老闆Leon說。mydress代理韓國 及台灣時裝品牌，售價約二百多元一件，價錢平轉款快，成為OL界網上shopping新貴。但其實Leon只是「麻甩」一名，他說：「朋友個個話我著衫 bad taste，以前每季淨係識去izzue搞掂。」他試過親自去韓國入貨，但揀的衫無一件賣得出，被同事笑是「燈神」。不過「燈神」指今時今日入貨，已不用 靠老闆個人口味，睇的是「大數據」。「有一款bra，我睇落無乜特別，考慮將佢下架，點知同事睇完數據，發覺原來日本嗰邊好多人clicko架。最後重點 宣傳，再寫番多些介紹個bra的多重功能，最後賣咗幾萬件。」

推介網上無限loop

做生意開地鋪，「人流」都不夠網上世界多。mydress網站每日瀏覽人數達數萬，她們究竟喜歡哪件衫、哪件衫無人吼，或客人睇完這件，再看哪一件，老闆 Leon都掌握得一清二楚。數據來自自己網站、淘寶，甚至是台灣生產商及時裝網站，互相交換資料。由於網站每日要花五位數字賣廣告，能對準「單位」，才不 會虛發子彈。數據告訴Leon，晚上十時開始才是女士購物的黃金時間，這時賣廣告，命中率更高。「另外，mydress不時send折扣優惠俾客人，但每 個SMS要俾電訊供應商五毫子。如果send晒俾十萬個會員，已經要使五萬銀，但又唔係人人用。」他改變模式，將要清的存貨以款式及牌子分類，才再把折扣 優惠傳予target audience（目標客人）。「賣廣告要睇RI（return on investment），如果賣一萬蚊廣告，只賺到一萬蚊生意，本都回唔到。咁就死啦！至少要有二至四倍盈利。」記者在自己的手機，見到mydress的 廣告「老是常出現」。上facebook又有、上google search又有！某幾次終於忍不住買了幾件衫，Leon笑言這就是數據的「威力」，「你會喺唔同地方、見到唔同嘅mydress廣告。就係因為我哋見到 你嘅cookie，曾經入過mydress網站，睇過某一件衫，放咗落購物車，但最後又無check out。於是mydress電腦指明向你賣廣告，提你買！」

重點放首頁

靠「大數據」做生意，亦非零成本，Leon指要請程式員及分析員，但回報卻很大。因為從「數據」可知，一個女士看罷這件衫、會再看哪條褲，「多人咁樣瀏 覽，就可能分析到今期原來流行咁襯。我哋安排，每次有人看完A衫、下面就會列埋B褲、或者C袋，recommend佢哋點襯埋一套。」有OL便曾因不斷看 他們的「推介」，一次過買了數萬元衣服。Leon他們一日之內便把網站更新多次，「通常只有頭一、兩版先多人睇，我哋將愈多人click嘅放最前，無人 click嘅就放番後面，唔會浪費首頁。」mydress○九年創辦時，本來是一個時裝廣告網站，由讀者分享對時裝的看法，再找商戶落廣告，但一直無錢 賺。直至一二年，曾在淘寶任職海外業務及營運總監的Leon，認為mydress有發展空間並入股，再引入「大數據」。他把mydress改革，「初初都 係要試。連網站相片點擺先多人睇，都要不斷變。」靠「數據」來捉摸客人購物行為，生意愈做愈大，至今已有過百萬營業額。「如果data運用得好，搞完女性 時裝、再搞埋男裝、童裝，甚至將來搞百貨都唔係問題。」

迷你倉定價「劫富濟貧」

去年時昌迷你倉老闆時景恒，斥資過百萬整理網上租倉系統，希望從中搜集關於迷你倉的「大數據」，來制定生意策略。運行一年，生意有約一成增長，「只要相關 數據結果、重複三十多次以上，就夠statistics importance可以參考。雖然投資好貴，但長期用可以抵銷番。」數據告訴時景恒，六、七月是每年租倉的旺季，但原來大部分這段時間租倉的客都只是短 租，並不是他那杯茶，「可能係暑假多人搬屋，佢哋短租居多。行家淨係知道旺季賣廣告吸客，我偏偏呢段時間唔賣廣告。九月入嚟嘅先係長客，等行家的倉滿晒， 我八、九月先出招吸長客。因為出面無晒倉，我可以唔使俾優惠添！」收集了不同客人年齡、階層的cookies，他可預測客人可承受的租金開支，以釐定加價 幅度。

用Mac機無着數

時景恒還可以知道客人用什麼電話、及什麼瀏覽器進入網站、來自哪一區及哪段時間登入，分析後給予不同折扣，他說：「你係用Mac機上網，再加 Chrome，我會assume你係知識分子，係有錢一點，咁就唔需要咁多折扣啦。又如果你係凌晨一點先上網，我又假設你應該好趕住用，又會無乜優惠。相 反，見你睇過好多次都未決定，一定係格價專家嚟嘅；又或者顯示你住平民區嘅，相對我俾嘅package又會平啲。」他指這種價格差異在各行各業一直運行， 不怕客人詐型，「好似酒店、機票、保險咁，個個客都唔同價，近來好流行嘅Uber都係。」他指外國的迷你倉數據系統更詳盡，能知道每小時整個地區的貨倉空 置率，這就能隨時調整價格。他希望未來香港可以做到這樣。另外，外國的迷你倉公司亦會追蹤客人的網上行為，從而決定價格，「如果個客係喜歡周圍唱嘅人，把 口衰嘅，接咗你呢個客，都費事加你租。嚟緊我哋都會朝呢個方向做。」除了定價，這些資料亦有助他們改善服務，他指每個客人登入網頁的頁面設計都會有點不 同，「如果年長一點嘅客人，手機版會自動將啲字體轉大隻。而後生仔客，我哋假設佢哋無老人家咁多嘢擺，會優先介紹啲細倉俾佢哋。」

數據有售淘寶賣$90

早於一二年，淘寶已推出「淘寶指數」網站，用家可免費獲得大量數據。記者試於該網站，打入連身裙、低胸及白色這三個關鍵字，就可知道最喜愛這類衣服的年齡 群、性別、消費能力等。淘寶指數甚至分析出，愛好連身裙的原來大部分也愛好寵物，還發現搜尋「低胸衫」的，以二十五至二十九歲的宅男居多。淘寶數據亦有深 入版，每一季數據只賣九十元，入場費平，故有不少小商戶使用。「數據」來源，來自手機。我們下載app時，很多時會被要求取得個人檔案資料、使用裝置時的 位置、甚至是否啟用Wi-Fi，故在手機大時代，無私隱可言。香港互動市務商會會長方保僑說：「除非你不去下載那個app，才可避免出賣手機上的私隱。」 他以Google Map做例子：「Google Map能準確地告訴你，現時由中環去將軍澳要幾耐，仲識得計埋塞車時間，就係因為佢實時拿了很多人手機上的數據資料。這些數據，你我都有份 contribute，你唔願意俾資料人，咁你就享用不到Google Map免費俾你的交通資訊了！」

「廢青」？我覺得呢個只係一個名詞嚟嘅啫。我叫王偉霖，洋名Eric，80後，在演藝學院畢業前已 獲nowTV聘用，但我唔想坐喺office，拒絕咗。一個人去咗working holiday，足足五年。呢五年，我先後去過英國、加拿大及澳洲，仲因此識咗有屋、有地、有森林嘅加拿大籍女友。最終分咗手，但咁多年工作兼part time，竟然儲到過百萬，好搵過留港工作！返來後我喺深水埗開「發達鳥」兌換店，專攻行家唔做嘅日圓「神沙」，試過一日賺得幾蚊。但唔緊要，起碼我將無 人要嘅銀仔變番做「錢」，我覺得有意義囉！

嗰個加拿大鬼妹女朋友，係我喺英國working holiday、做Starbucks時識嘅！我一畢業就申請，喺英國兩年；佢visa到期，我亦申請埋去加拿大。嗰時先知，女友原來好有錢，喺加拿大有 屋、有地，仲有個森林！佢屋企人係幫當地政府整滑雪車。喺嗰度一年，女朋友逼婚。諗深一層，如果真係結得成下半世唔使憂呀，但咁就一世我又唔甘心，最終都 係分手。返回香港，已儲咗六位數字，想創業，又差少少，結果再申請去澳洲打工。當地麵包師傅幾渴市，人工唔錯，一個鐘有二百蚊港紙。我打多幾份part time，做埋樓面、清潔、執頭執尾，食就食公司嘅，死慳死抵，四十度都唔開冷氣，一日做足十幾粒鐘，儲到七位數後，走人。返來後，我用幾十萬買咗深水埗 商場深之都三個鋪位（編按：著名死場）。兩個租出去，一個自己用。自用嗰間太細，最好就係做兌換店。

換神沙賺差價

一間正常嘅 兌換店，起碼要千萬儲備，但我覺得多有多做、少有少做。我呢間「發達鳥」兌換店，特別嘅地方，係專去其他兌換店，搵來日圓等細面額嘅紙幣及硬幣，亦即「神 沙」，再用一個優惠利率兌俾客人。其實市面好多小型兌換店，都係換人民幣為主，但總有遊客用外幣兌港紙，佢哋收埋啲零碎外幣，去銀行兌換要俾手續費。而儲 埋唔兌，亦有貶值風險，尤其係日圓。呢啲鋪頭，就係我target，每日我會去收集零碎外幣。只要佢哋嘅匯率夠好，我轉頭兌俾客人就可賺差價了。開始時， 我連買入賣出係咩都唔知，問人都無人肯答，惟有慢慢試。仲試過去附近兌換店mark價，去得太密俾人認出趕走。開張頭一個月，每日只得一單生意，每次賺幾 蚊。悶得滯，買咗部PS4返嚟玩。玩玩吓，之後情願花時間同啲客傾偈，傾傾吓又真係會介紹人上嚟。到而家半年，叫儲到啲客，價都可以開得順啲。我仲用 WhatsApp同客人互動交流，競爭力大咗。而家雖然搵得唔多，但都夠自己出糧。有人話我呢啲係「廢青」，我覺得呢個只係一個名詞嚟嘅啫！我開鋪都唔係 為咗搵錢，要賺得多都唔留喺香港啦！話晒澳洲可以搵到四、五萬蚊一個月。我嘅目標，係想用自己力量去改變呢個市場！好似令無人要嘅銀仔變番做「錢」咁。打 工？我唔會去做大財團嘅一粒螺絲仔囉！

英國劍橋大學畢業的Michele和她的老外老公Laszlo，有一個「３Ｐ夢」。第一個Ｐ，是 Profit。Laszlo有六年釀酒經驗，二人於去年租下700呎工廈，經營相信是全港最細的手工啤酒廠。現月賺兩萬，算是過了關。第二個Ｐ，是 People。由於堅持限量生產，二人主力賣給老外和高級餐廳，卻令生意未能發大。第三個Ｐ，是Planet。他們計劃賺到錢後，利用太陽能發電製作啤 酒，並把殘渣作肥料施肥。二人坦言為理想多過賺錢！所以說，他們的「3P」，與大家想像的不一樣。

Michele和Laszlo的手工啤酒，取名「門神」，源自中國民間習俗中，守護門戶的神靈。門神啤酒一系列共五款，以中國神話人物為主題，分別是雷 神、玉皇大帝、齊天大聖、灶君和嫦娥。啤酒的味道也與神話人物相配合，例如以齊天大聖為主題的琥珀啤酒，含桃味，與孫悟空大鬧天宮、偷吃蟠桃的傳說有關。 而灶君黑啤，加了波特蜂蜜，味道香甜，源自家家戶戶都愛用蜜糖祭祀灶君，讓灶君向上稟告時只講甜言蜜語。

貨量貴精不貴多

這些故事包裝，香港人可能嫌老土，但老外十分受落。老闆夫妻檔會經常到高級餐廳、酒吧、會所和手作市集，親自向客人promote啤酒。Michele坦 言香港人對手工啤酒的認識不多，「本地人唔明白，點解要比工業啤貴幾十蚊。佢哋寧願花三、四十蚊買咖啡，都唔願意用相同價錢買優質嘅手工啤酒！」每一支手 工啤酒，都是兩人心血。由選材、釀製、包裝到品牌宣傳，都是Laszlo和Michele「一腳踢」。Laszlo每星期有五至六天回觀塘廠內，將來自不 同產地的麥磨碎，再把粉碎的麥放進不同溫度的水裡煮沸。之後加入啤酒花讓麥汁在機器內冷卻發酵，製成手工啤酒。工業啤講求速度快和成本低，讓啤酒發酵的氣 泡，是由機器打入去。Laszlo則堅持百分百天然製作，入樽時在底部放糖，讓酵母自然發酵，過程長達兩星期。一瓶三百三十毫升的門神啤酒，由製作到成品 需時達三個星期。由於廠房面積、釀酒機器和人手有限，一個月的產量只有二千四百瓶。

客路賣度身訂造

Laszlo製啤，老婆Michele負責推廣。她專揀有代表性的比賽參加，累積名氣。門神啤酒便於今年獲得日本精釀啤酒協會舉辦的亞洲啤酒大賽銅獎。去 年又獲得香港國際啤酒獎中，最佳香港生產啤酒獎。她表示，目前品牌重質多於重量，在挑選「合作對象」時十分嚴格。她說：「我哋要確保門神啤酒的銷售地點， 無論是賣家或買家，都識得欣賞手工啤酒！如果放喺餐廳售賣，呢間餐廳嘅菜式都要適合配搭門神啤酒！」你揀人，人揀你，Michele「冧客」當然亦有幾道 板斧。例如她與灣仔的古蹟活化餐廳The Pawn合作，特地配合餐廳，釀製了三種傳統英式啤酒，以反映餐廳富殖民地背景的歷史感。「另外有間本地以麻雀耍樂為主題的精品旅舍The Mahjong，我哋幫佢釀造特色啤酒，包裝仲繪上麻雀圖案，反映香港人平日嘅娛樂。」而赤柱高級餐廳Pinot Duck，選擇與門神合作，就是看中其啤酒設計融入本土文化，與店鋪中西合璧的裝潢及菜式相呼應。餐廳經理Roy打趣說：「門神啤酒嘅包裝是全人手，有時 瓶上貼紙會微微不對稱，恰恰更能凸顯佢嘅地道同埋手工，客人揸喺手，會感到工業啤酒搵唔到嘅另類溫馨感。」

限制以理想行先

現時門神啤設網上預訂，售予散客每支五十元；而批發給餐廳，每支約三十多元，由餐廳自定零售價，每支賣六十至九十元。生意營運了一年半，目前營業額大概八 萬，但扣除租金、材料、雜費後，盈利只有兩萬，還未計兩公婆人工！可見一瓶手工啤酒，利潤十分有限。而這門生意要賺更多的另一「限制」，可能是 Michele和Laszlo的想法。Michele說，有些宣稱自己是「本土」手工啤酒的生產商，其實是從外國大型的手工啤酒廠入貨，再到香港包裝，這 種營商手法不老實。她說：「咁樣手工啤酒運送嘅過程要好多時間，會影響產品嘅新鮮度。」為保質素，他們堅持門神啤酒直接在香港釀製，確保新鮮。而且由於廠 內的啤酒發酵裝置得八部，每部最多可供二百四十瓶啤酒進行發酵。每月生產二千多支，已經用到盡，有時需求太大，部分顧客更要等一個星期才能買到。不 過，Laszlo和Michele認為，理想比賺錢更重要！「我哋嘅願景，係能夠將啤酒廠設於有機農場，運用太陽能發電來釀造啤酒，並將麥和啤酒花的殘渣 用來施肥，平日俾人來參觀……」想法浪漫，但由於缺乏資金，他們坦言要想辦法改善營業額後，才能有錢再規劃。在香港地，當然要麵包行先！

營業資料

營業額：$80,000 租金：$20,000 雜費：$20,000 材料：$20,000人工：$0（兩夫妻自作業，無聘請員工） 盈利：$20,000

開業資料

裝修：$100,000 釀酒設備：$800,000 雜費：$300,000 合共：$1,200,000

一點意見

「香港啤酒」是亞洲首間手工啤酒廠，早年名為南華啤酒，後改名香港啤酒。現時酒廠產量每年可達60萬公升。董事Devin Otto Kimble認為，門神屬於超小型的生產商，生產成本高，他建議門神：1.善用「產量較有彈性」這個優勢，積極創新不同味道的啤酒，更可以因應不同客戶需 求，改變口味和包裝設計，此乃有固定生產線的大型生產商很難做到。 2.門神產量少，要走精緻貴價路線，最好多與五星級酒店等高級食肆合作，提高售價。雖然釀酒儀器貴，但要長遠發展離不開擴張規模。

正所謂窮不與富敵，富不與官爭，劉江華上任民政事務局局長，貴為青年事務委員會主席的劉鳴煒即認「老闆」，甚至出口護主，話劉江華冇得罪年輕人噃，反而對自己老豆仲帶啲批判性，大劉經常幾家大細出入福臨門，但從未見父子同行。

接受訪問時，劉鳴煒三次重申「非常之唔鍾意」福臨門呢間酒家，仲話「我由細到大都係非常之唔鍾意」；不過隔籬欄條友——中環寸嘴踢爆；親眼見過劉鳴煒喺灣 仔福臨門飲茶喎；嗱嗱嗱，唔係陪大劉歎茶，係陪外婆、寶詠琴阿媽，咁唔鍾意福臨門，都頂硬上陪外婆去，至少都係孝孫一名。

金融逍遙客睇非洲動物大遷徙

游走於中港台併購、私募投資的金融多棲動物，現為多間上市公司主要股東及董事香港人去旅行，星馬泰日已去到悶，即使美加澳紐，對旅行常客亦唔吸引。有條件 尋幽探秘嘅讀者，逍遙客隆重推薦去睇非洲動物大遷徙。每年七、八月一年一度奇景，人生至少要見識一次。你可能話，又有內戰又有伊波拉，又冇靚仔又冇靚女， 到處污糟又亂又嘈，有咩好去？但逍遙客有幸去完一個識玩識歎肯雅大遷徙之旅，真正體會除了各種奇珍異獸及自然景觀外，非洲軟性服務也可做到那麼周到。英法 貴族在百多年前已紮根非洲，狩獵成為一種貴族玩意，因而世代培訓了一批又一批專門招呼貴客的黑人。呢批人雖然唔會太醒目，但聽教聽話，服務態度一流。全程 住宿，每日都幾乎能在長頸鹿陪伴下食早餐，然後在資深嚮導帶領下追尋獅子踪影，中午就在一望無際的草原上，享受工作人員準備的豐盛午餐。其中野外紮營一 站，大家各佔一小營房，四周點起火堆以防獅子好奇闖入，夜晚就喺鬣狗hyena吆嚎聲中呼呼大睡。七八月份非洲荒野，夜晚似香港冬天，帳篷麻雀雖小卻異常 乾淨。每次沖涼更是過癮，兩位黑人同胞煲完滾水，用一吊桶倒入篷後，熱水剛足夠使用三分鐘，但感覺到是此生最為滿足的一次淋浴。有次河邊呆等幾小時，想看 數萬角馬大軍渡河，卻意外捕捉到獅子生擒花鹿的鏡頭（如圖）。看着花鹿毫無反抗在獅子嘴巴中奄奄一息，正正提醒自己也是股海中的一隻小花鹿，隨時都會因想 飲啖水或食一根草，而做咗獅子嘅點心！

中環寸嘴知尾東海薈

工廈大王楊耀松長子，是各大有名食肆之VIP，喜歡研究城中有錢佬對食之要求，透過美酒佳餚，細味人生百態，讓讀者「嗒」落有味。上個禮拜有人挑我機，問 「中環寸嘴」點解落咗灣仔踢竇，我同你講，中環係食「租金」落肚咋，你估啲友喺中環返工餐餐喺中環食呀！多多唔夠你使呀；嗱，幾條友夾份搭的士去灣仔食， 花式同質素好過又平過中環o架，有時要留番個bufferzone俾自己嘛！灣仔都叫做中環邊皮吖！今次我殺去北京道一號間「東海薈」，自從鋪王鄧成波個 孻仔接手咗東海就變身婚宴場地，呢個位以前係王子飯店，喺中山有朵o架，大陸客「舂」入嚟以為仲係王子，我睇東海薈都執到啲大陸客仔嘅。鍾錦年代嘅東海， 座落尖東大富豪、中國城附近，酒樓有budget俾部長、廚房佬去跳舞、試食，希望啲媽咪帶啲火山孝子（編按：夜總會尋歡人士）去東海幫襯，真係「精」到 痺！不過最敗筆係買番何添、榮智健、徐國炯的股份，呢班闊佬點都帶到啲恒生、中信同股票佬啲生意去東海。其實我鍾意蒲尖沙咀o架，坐喺度望港島個景靚過對 面望番過嚟。食嘅嘢都係波叔個仔嘅助手柯打嘅，話等我試吓招牌菜，嗰日大雨天氣涼，食完都唔夠飽，臨尾整個鮮茄海鮮焗飯，夠晒分量。不過，我估東海薈呢位 老闆仔都幾「知尾」，個餐牌第一頁就列晒「其他收費」，一盒紙巾收五皮，一碟蒜子又廿皮，手抽袋又兩蚊雞，好吖，夠均真！我like呀。

壹週修正

上週《財經專題》專訪股壇「食力簡」簡志堅，內文犯下一個「大大」錯誤，把「食力簡」紅顏知己余紅萍的花名「大波萍」，寫成「大洪萍」，已向編輯、記者及 校對訓話，只是編輯部睇完余小姐玉照後，對其花名背後的理據產生疑問，只知道此花名是早年活躍於馬圈的正牌「食力簡」簡炳墀同余小姐起的。

金牙大狀講嘢高鐵、三跑香硬

民建聯為六一八甩轆「負荊」請罪，港澳辦主任王光亞撥冗接見，大隻廣話會盡快處理高鐵一地兩檢、三跑空牆咁講。通過高鐵撥款至今五年，一地兩檢懸而未決， 搞到個車站要點起法，茫無頭緒。若果話咁易就搞得掂，仲唔一早搞咗咩，使乜勞煩你王主任先？棘手之處，係《基本法》唔俾大陸邊檢喺香港執法，但唔執法又危 及國家安全，咁大壇嘢到區區港澳辦話事咩？同樣道理，大陸空域歸解放軍管，事關國防，又幾時輪到你港澳辦話事呀？盡快解決此兩大難題，講吖？家吓上邊遍地 火頭，而人人自危。一地兩檢、三跑空牆咁大壇嘢，除咗習大大，試問邊個夠膽揸主意先？縱有三頭六臂，你估習大大又得唔得閒理啲咁濕碎嘅嘢啦？高鐵、三跑呢 四、五千億元公帑，香硬啦！

中環人語迷你版

“蠢人做蠢事”估中邊個中環人講呢句說話，送你plantronics. Voyager Legend Signature Black藍牙耳機一個有意參加者，請於七月二十九日（星期三）下午一時後，將答案、姓名及聯絡電話電郵至 [email protected]小宗只接受電郵，郵寄免問。本刊員工及直系親屬不得參加。為求公平及杜絕偷步搶答起見，請於每個星期三 下午一時後來電郵競猜答案；在此之前發出之電郵作廢。超過一位讀者估中，先到先得，恕不接受上訴。答案及中獎者姓名將於下期本欄揭曉。

上週人語揭曉答案

“長期低息，已經將我們麻木。”湯文亮得獎者：Yip Muk Lam中獎時間：1:00pm 22/7/15

廣告時間

你有某財團嘅黑幕想爆？你知邊間上市公司造假？

你仲想舉報地產霸權嘅不公？

歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！

爆料熱線/whatsapp：6829 5929

經歷七月初的大波動，市況處於膠着狀態，摸魚身邊朋友都出現疲態。無他的，始終本來在「翻身月」，大家都抱住大時代列車再開的心情預備，誰不知一個希臘一個中國，把香港一度推落谷底，再來個迅速反彈。

摸魚有感這是個百廢待興的機會，賣殼活動又變得活躍起來，所以今次打算探討一隻剛剛完成賣殼的股票。澳優（1717）是一隻乳品製造公司，說起乳品製造， 相信大家都記得一兩年前，由於「單獨二孩」政策的推行，奶業股曾被熱炒過。這也是摸魚研究澳優的原因，因為從概念上，相信奶業股很快會再成為眾人焦點，而 澳優的好處是財技味十足又有業務支持。此外，「單獨二孩」政策未能有效解決中國人口老化問題，其中一個原因在於內地「八十後」及「九十後」的生育意願始終 偏低。有見及此，中國政府似乎打算再放寬生育政策，全面擴大至「全面二孩」，即「一孩政策」將成歷史，任何人都可以生育第二胎，如此一來，奶業股定必再度 成為焦點。澳優於二○一五年一月二十一日發公告指，有公司正洽談澳優約15%至20%的股權，每股價格會定於3元或以上，當時澳優僅2.44元，還有約兩 成的潛在升幅。要知道，若交易成真，這兩成的潛在升幅是近乎必勝的存在，但澳優股價沒有即日抽高，反而逐漸向上，反映貨源似乎一早已歸邊，直至3.01元 的全購協議出現，最高價都僅是3.19元。其實澳優有意賣殼已不是新鮮事，公司由於二○一一年的賬目出現問題，未能完成業績報表，所以二○一二年初開始停 牌。其間除要澄清賬目，還要面對聯交所指控違反上市規則指引。事緣澳優管理層知悉盈利持續向下，竟在發盈警之前宣布回購股份。雖然最終事件解決，但公司管 理層似乎無心戀戰，所以在二○一三年停牌期間仍發出公告指，正與其他公司洽談出售澳優，雖然最終告吹，但由此可見澳優有意出售公司並非今日的事。而今次澳 優成功出售也並非一步登天，二○一四年八月澳優成功滿足復牌條件後，同年十二月主要股東即向晟德及其子公司出售公司股份，使晟德及其一致行動人士持股量由 0.92%激增至26.76%。然後宣布有意收購後，晟德於市場上以2.7元至2.9元不停掃貨，並最終決定聯合其他買方，向所有股東提出全面要約，每股 價格為3.01元，僅較當初公告的「3元或以上」高0.01元。以3.01元計算，澳優公司市值高達29.7億元，但澳優現價才剛到3.07元，股價接近 全購價相對有防守力。而且買方除原來的晟德外，摸魚最感興趣的是台灣券商元大寶來也在這宗交易中參一把腳，認購價值約5,300萬元的股份。而元大系的參 一把腳，又未到要公開披露的5%，不禁令摸魚想入非非。澳優除了股價具防守力之外，擁有二孩政策的澳優，令其在業務上與概念上也是無懈可擊。

渾水摸魚

一個是錯生紙醉金迷時代的偽文青，一個是混沌中的迷途小股童。兩個本來專門投資細股、拆解財技布局的炒家，最近踩過界在各財經傳媒撰文和辦報。https://www.facebook.com/muddydirtywater

遊雲南，走到中緬邊境不遠，翡翠集散地的騰衝。翡翠原石又名「賭石」，未切開的賭石，不知是寶是草，買賣賭石就如賭博，故賭石又指翡翠買賣。在騰衝兩天，多次聽到當地人說：「瘋子買，瘋子賣，還有瘋子在等待。」形容賭石買賣，亦反映他們了解買賣中的風險。

買股票，不知投資的公司是龍是蟲，與賭石無異。更甚是買了寶石般的股票，亦不了解寶石也有風險，財務報表或許可幫一些忙！

蘋果與瑞聲同病相憐

上 週，股壇中的寶石蘋果公司公布最新季度業績，在全球大賣的iPhone 6帶動下，對比去年同季，蘋果季度收入上升33%，來自中國的收入更增長逾一倍，毛利率和溢利率分別微升1%，至40%及22%。然而，對比表現強勁的同 年上一季，蘋果季度收入卻下跌14%，不如市場預期，蘋果股價因此回落約6%。蘋果公布季績後，在香港上市的蘋果概念股亦受累，瑞聲科技（2018）股價 單日下跌7%，恒指當日僅下跌1%；最無辜的，或是不做蘋果代工生產，但仍反覆被誤認是蘋果概念股的富智康（2038），單日下跌4%。股票價格波動，有 時比賭石更難捉摸，所以要了解投資公司的風險，才能保持平常心做決定。大家了解蘋果概念股的風險嗎？

恒指與瑞聲股價走勢相反

號 稱世界最大聲學產品製造商的瑞聲，市場佔有率約三成半，生產的麥克風、受話器和揚聲器，會賣到蘋果、三星等客戶，作為手機及其他產品的元件。2005年上 市，瑞聲十年間股價上升超過12倍。今年在4月底前，恒指上升了19%，瑞聲股價卻微跌1%。有趣的是，5月起至上週，恒指輾轉下跌11%，瑞聲股價卻反 而上升6%。今年初瑞聲股價的表現，或反映瑞聲2014年較失色的業績，2014年收入按年上升不足10%，是過去五年最差的一年，2010年至2013 年每年收入增長達21%至55%；毛利率及溢利率也由2013年的43%及32%，下跌至41%及26%。可幸，瑞聲四成的毛利率冠絕同行，與蘋果比肩， 瑞聲管理層最近就指同行的毛利率僅約兩成。而瑞聲5月初公布的2015年第一季業績，收入對比2014年同季上升24%，毛利率及溢利率也保持平穩。故亦 可解釋，為何瑞聲股價在逆市中，自5月起與恒指背馳。

成也蘋果，敗也蘋果

追逐蘋果概念股，有機遇，亦要知危險。瑞聲最大的危 險，就是來自蘋果。蘋果股價的波動已清楚顯示，蘋果有何異動，瑞聲將首當其衝，更確切的，就是集中風險（concentration risk）。瑞聲的年報就披露，瑞聲五大客戶的銷售額共佔總銷售額約四分之三，而最大客戶的銷售額亦佔總銷售額逾35%。換言之，瑞聲的訂單，甚至增長， 均集中依賴一小撮客戶。市場上一直指瑞聲的最大客戶是蘋果，失去蘋果訂單的結果會是怎樣？會否成也蘋果，敗也蘋果？冠絕同行的毛利率能維持多久，是瑞聲的 另一潛在風險。推陳出新，持續研究開發，是維持高毛利率的方法之一，財務報表正列出瑞聲的研發開支，一直佔收入約8%。現時，瑞聲的市盈率是18，若能保 持24%的收入增長及平穩的溢利率，股價不變下的市盈率將降至14；相較溢利反覆不定的富智康，或是偽蘋果概念股，市盈率卻是25。「禍兮，福之所倚；福 兮，禍之所伏。」是老子的名句，亦是投資的道理。財務學上看回報，一定也看風險，禍福必然共存！

林智遠Nelson Lam

執業資深會計師，會計專業發展基金主席，最愛與太太旅行，出名講talk及撰寫大學會計書，其著作已被翻譯成不同語言。目標以淺易簡單的方法，使牛頭角順嫂也能看懂會計數字和陷阱。