上週更新 (9 Mar - 16 Mar) PARTIPRAL - ROAD TO FINANCIAL FREEDOM
http://partipral-hk.blogspot.hk/2014/03/9-mar-16-mar.html組合單位值: 108.75組合週回報: -4.53% (2014年回報: +3.18% / 3月回報: -5.15%)
現金水平: 11% (前週: -3%)
組合上週表現差勁, 買乜死乜, 情況異常慘烈. 個股操作, 博雅(434)跌穿績後低位, 剪掉大部份, 剩餘一注純粹賭公司長線會OK; 嘉裡物流(636)績後急挫但目前似乎仍是偏貴, 估值很可能要向下調整, 又是剪掉大部份; 彩票股買完即剪, 賭得錯, 港股板塊中最好應是華彩(1371), 但暫時唔敢再參與; 海信(921)搏反彈失敗, 又是要剪; 再加上死捱爛守的保利(3636)及時代(1023)仍然弱到嘔電, 股票組合價值大幅回落. 很艱難才搏到旺旺(151)績後有得升, 但忘記此股有期權, 正股就算買得很大盈利佔組合比重亦很細, 因此仍然無大作為.
目前情況是相當難搞, 個股跌到七彩, 但明顯未見恐慌. 很可能是有過1月份經驗, 暫時仍未見大規模撤退. 十二碼一係入一係唔入, 市況轉趨波動後, 頂多拉鋸幾日應該又再黎料. 自己睇得較淡, 因此目前不敢買貨之餘, 主力仍然是搏指數再急跌. 早前騰訊(700)入股京東商城後無力再升果然是調整先兆, 轉眼間已輕吻$550關口, 業績前應該會喘定, 暫時不做好也不做淡, 但買回少少金山(3888)搏業績. 騰訊轉穩, 下週拖低指數很可能會是仍死頂在高位的藍籌如和黃(13)之類, 重注淡倉; 中石化(386)早前人們睇得太好, 轉弱後跌勢應會加速, 繼續保留部份淡倉; 中國經濟數據差仍然是沽貨藉口, 資源股主力做淡中海油(883). 整體睇淡部署大概如此, 睇一個禮拜. 較長遠的做淡目標是中海外(688), 業績其實相當一般, 最大劑是分析員仍然看得好, 跌得最急一段應該仍未出現, 但目前價位不算特別值搏, 反彈上$20後應可以再開淡倉.
個股已經輸到不敢再買, 頂多低位再買少少西鋼(1266). 中信泰富(267)績後繼續走強, 西鋼業績應該可以憧憬, 股價已重返大升日起步點, 但沽壓不重, 明知是險著但仍大膽加注. 可能要守多半個月, 但公佈業績應對股價有所推動, 點都要搏; 理文手袋(1488)績前買多少少, 此股成交仍然非常薄弱, 若然業績再有差池, 分分鐘走唔甩, 因此就算很有信心亦不敢買太大. 其餘股票已經無乜心水, 光大(257)跌多點可能買回, 但買完可能升少少已經頂唔順要沽, 因此其實是哂氣, 手風奇差最好是什麼也不幹. 期權心水是買少少利豐(494), 此股近月波幅收窄後期權金平到嘔, 下週四(20/3)出業績後可能會有方向. 本來是想買上搏績後挾淡倉, 但睇落就算買齊即月$9 PUT和$11 CALL加埋都唔駛1毫子, 應該有數圍, 不如兩瓣買哂.
近期操作相當不順, 市況欠佳可以當是藉口, 但有實力的投資者應該是無懼風雨一樣有錢賺, 因此其實是能力問題. 自己的人生左右銘是中庸之道, 特別順境的時候要相信自己不會好運一世; 而特別逆境的時候亦要相信不會一世當黑. 套用目前環境, 應該算是經歷過非常好境後開始轉差, 似乎是有排捱, 因此買賣方面要更加謹慎, 儘量避免墮入下跌漩渦而不能自拔, 方能提升日後重整旗鼓的勝算.