老友定期飯局，輪流做東，蛇年年末一餐，恰巧輪到地產/古董F做東，佢素來好客兼豪爽，話欣逢蛇年將盡，馬年將至，呢餐午飯就當係成班老友嘅尾禡飯或團年飯，食餐好嘅。佢口中所謂食餐好嘅，就係到港灣道一號，得閒到場者有十人，坐在小房間內，齊齊慶祝新年進步，身體健康，能不樂乎。
呢日係星期四，咁啱三日前嘅星期一，參加維特健靈（謝德富陳曦齡夫婦創辦）嘅中午雞尾酒會，香格里拉酒店宴會廳有人滿之患，可見謝陳呢對夫婦名醫嘅面子與號召力有幾大。主禮嘉賓董建華、馮國經等人離開後，一眾嘉賓逐漸散去，正思量點零鐘去邊度吃飯之際，俾議員L一手捉住，就坐佢架車走嚟港灣道一號，另外有兩位傳媒老總坐公司車嚟參加飯局。一個星期內到港灣道一號吃兩次午餐，都算有食神。議員L話自從立法會搬來添馬艦之後，坐車最快到嘅酒店就係君悅，因此佢成為港灣道一號常客，以往在舊址，立法會議員（有錢消費嗰班）多數係去香港會（只限會員）、麗嘉酒店，或行遠啲去鏞記四樓。不過麗嘉已拆，鏞記大佬已不在人世，議員L話佢嘅同黨起初多去中信海都，點知人地唔識佢係邊個，想訂間大房都訂唔到，吃過一兩次檸檬之後，咪就以港灣道一號為「飯堂」囉。
地產F當然亦是常客，故此招呼特佳，菜式味道雖非一百分，但亦無可投訴之處，講到價錢，最好咪問，有人請，食得開心。席間，與內地有聯繫嘅賓架N話，自習近平上台後，反貪腐風吹得好勁，內地一級食肆無不叫苦，但已有地方官私底下埋怨，做官人工幾低吓，小官有權不能用，不敢用嘅話（大家應該明白其中意思），做官做乜，不如下海營商，買個官返嚟做，不能冇回報嘅噃。呢個問題好現實，畢竟齋嗌政治口號難以醫肚供樓送子女到美國也。連帶所及，復受湯顯明事件影響，香港官場有樣學樣，高官請吃飯，每人頭不得超過450元，咁嘅數字，去鏞記4樓或港灣道1號都幾難找數，如果去外國訪問，譬如吳克儉去倫敦，到唐人街食都未必夠錢。唔怪得議員L話某局長想請佢食飯，議員L回應話不如由佢請，免局長為難！ 