一月七日，蘋果日報頭版新聞居然係明報總編輯換人，原總編輯劉進圖兩年前接班，代替做咗執行總編輯、總編輯超過二十年嘅張健波，本以為佢有排做，想唔到只係兩年時光啫，大老闆就要換人。
報紙換總編輯，閒過立秋，蘋果自1995年創刊至今已經換了三四位，星島日報不久前都換咗總編輯，信報亦然，某些報紙由誰人做總編輯，我地根本唔知㖭，何解明報更換主帥，竟會成為頭版新聞，真係諗極唔明。碰啱當日沙膽虹專欄講到堅哥不時回港主持「鋤報大會」，根據壹仔傳統，「鋤書會」、「鋤報會」上講嘢最多，最大聲嘅就係揸弗人，於是一位敏感老友睇完沙膽虹專欄，立即打電話嚟問左丁山：「知唔知道沙膽虹有冇出事呀？佢會唔會調去主持互聯網媒體？」嚇？左丁山點知道是甚麼一回事，硬著頭皮打電話俾沙膽虹一問，佢又答得輕鬆：「我到此刻為止仲係揸筆寫字未搞新媒體。」
講起嚟，原總編輯、總裁調去搞新媒體，似乎係一個新風氣，首先去年信報總編輯陳景祥就被調往搞網站，然後星島報業集團CEO盧永雄辭職不幹，走去辦一份網上「巴士的報」，現在明報又話調派劉進圖去搞網站、新媒體，睇嚟所有現任報紙老總不妨及早學習新媒體先，以備待用，話唔埋大老闆聽日就話好欣賞佢地嘅新媒體創意嘅嘞。
由總編輯扯到新聞自由，係好自然一回事，不過現實地看，新聞自由也者，從來是媒體老闆的新聞自由，不是編輯記者的新聞自由，中外皆然。梅鐸係新聞集團大老闆，屬保守派，你睇嚇佢旗下嘅報紙、電視台有冇自由派人物做總編輯，做節目主持人呀？當然冇。凡自由派（Liberals）記者編輯都會投向MSNBC、CNN、衞報、紐約時報而不會加入霍士電視、華爾街日報、泰晤士報、太陽報等等。有之，亦只係做點綴品。正是物以類聚，大老闆嘅政治取向決定咗媒體嘅新聞大方向以及聘請編採人員嘅基本準則，左派寫手加入右派報紙，右傾人士投入大公文匯，你估特登搵交嗌咩。明報大股東張曉卿家族嘅政治取向，十八年來未曾明朗化，唔知佢地想乜，呢次撤換劉進圖，或者會漸漸露出真面目了。 