ZKIZ Archives


荷李活馬場關門 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140108/18582837

加州朋友傳來一篇紐約時報長文,係2013年12月14日出版嘅,內容係講美國最著名馬場之一Hollywood Park(荷李活公園馬場),將於2013年12月22日舉行最後一場賽事,之後就會關門大吉,於是懷舊一番。
荷李活公園馬場在1938年6月10日開幕,當日有四萬人入場,馬場在洛杉磯日落大道嘅華納片場以南約十一里,在輝煌時期,荷李活大名人如卜合、鍾哥羅福、尊榮、佔美史超活、加利格蘭、希治閣等等經常在馬場露面,吸引不少影迷入場追星,生平事蹟已拍成電影嘅一匹歷史名駒Seabiscuit就在此馬場(1938年)贏得第一屆金盃。
俱往矣,美國馬場今天入場馬迷寥寥可數,就算入咗場,都坐在室內睇電視直播,同時賭埋其他馬場嘅賽事,於是龐大看台往往空空如也,全無人氣,連騎師與馬匹都冇釐士氣。由1983至2012年,荷李活公園馬場秋季賽事嘅平均入場人數下跌九成,由23,958人下降至3,189人,今年秋季賽事嘅總投注額有二億一千三百七十萬美元,其中只有二千零三十萬美元係現場投注,其餘95%全來自場外投注,故此有人話賽馬已變成係視像遊戲(video game)。
荷李活公園馬場在2005年由Bay Meadows Land Company買入,此公司已將三藩市附近嘅San Mateo之Bay Meadows Racecourse執咗,將馬場改建成為混合用途地產項目,相信荷李活馬場亦會用作地產發展,因為土地價值太高吖嗎。講起嚟,上星期五在《蘋果日報》出現嘅前匯豐助理總經理劉智傑就曾經帶左丁山去Bay Meadows跑馬,記得佢睇馬眼光銳利過人,仲帶挈左丁山贏錢㖭。LA及三藩市灣區大馬場讓路俾地產項目,集體歷史回憶一抹而空,香港馬場應該不會如此。但1997至2007年間,每季賽馬投注額大減三至四成,入場人數亦不斷下滑,曾經令人擔心香港賽馬事業已過了黃金日子。誰知近三年來投注額大幅度反彈,入場人數亦見增加,偏偏就在呢個時候,馬會「投注渠道部」削減電話投注人手,實在大煞風景。一位讀者/老馬迷在一月一日來電郵訴苦,指第一場開跑前35分鐘都冇人接聽電話,將1881轉往1886,令佢非常憤怒,不吐不快,其實用iPhone打電話嘅話,按字極不方便,投注部嘅負責人唔該體察下民情啦。

荷李 李活 馬場 關門 左丁 丁山
PermaLink: https://articles.zkiz.com/?id=88241

股票掌故 | 香港股票資訊 | 神州股票資訊 | 台股資訊 | 博客好文 | 文庫舊文 | 香港股票資訊 | 第一財經 | 微信公眾號 | Webb哥點將錄 | 港股專區 | 股海挪亞方舟 | 動漫遊戲音樂 | 好歌 | 動漫綜合 | RealBlog | 測試 | 強國 | 潮流潮物 [Fashion board] | 龍鳳大茶樓 | 文章保管庫 | 財經人物 | 智慧 | 世界之大,無奇不有 | 創業 | 股壇維基研發區 | 英文 | 財經書籍 | 期權期指輪天地 | 郊遊遠足 | 站務 | 飲食 | 國際經濟 | 上市公司新聞 | 美股專區 | 書藉及文章分享區 | 娛樂廣場 | 波馬風雲 | 政治民生區 | 財經專業機構 | 識飲色食 | 即市討論區 | 股票專業討論區 | 全球政治經濟社會區 | 建築 | I.T. | 馬後砲膠區之圖表 | 打工仔 | 蘋果專欄 | 雨傘革命 | Louis 先生投資時事分享區 | 地產 |
ZKIZ Archives @ 2019