📖 ZKIZ Archives

海外獎學金不再提 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20140106/18580128

去年財政預算案中，曾俊華司長提出設立獎學金基金四億八千萬元，估計每年有孳息二千四百萬元（即五釐回報），可資助本地二十名尖子學生到海外知名大學攻讀（即假設每人需要一百二十萬元讀完四年大學課程，每年三十萬元，如果尖子得哈佛耶魯取錄，呢筆錢未夠支付學費宿費及生活費用），讀完就必須回港教書至少兩年，教英文或幼兒教育。
呢個計划去年已被各界質疑，本欄在2013年3月5日亦有提及。好嘞，2014年1月15日輪到梁振英宣讀施政報告，之前放出消息，指那個尖子獎學金計劃已胎死腹中，政府不會再提。計劃煞停，並非政府莫財，特區政府有大把錢，只不過一年以來，呢個計劃完全引不起教育界興趣，恐怕即使推出，而無尖子學生申請，到時仲肉酸。
尖子師訓獎學金之不受歡迎，其實「有早知」，只不過去年特區政府急於追求政績，以為向教育方面派糖，可增民望而已。其實咁樣派糖，係完全不瞭解世情之閉門造車。請特區政府正式推行小班教學，政府怕花費太大，唔制；請政府年年撥款十億元做大學捐款配對基金，政府又以為大學好有錢，配對基金只會明益香港大學，唔制；於是諗出一筆小數目嘅四億八千萬元海外留學基金，但偏偏又要附加辣招，要學生回來做幼兒教師；坦白講（其實係人都知，怕只係政府唔知），香港會考、高考、文憑試尖子嘅第一志願，數十年不變，就係讀醫科、環球商業、藥劑、法律，讀文科之人已經少之又少，何況係讀教育？曾司長幾曾見過有十優狀元報讀香港教育學院，唔讀香港大學呀？
尖子師訓獎學金係未經深思、全不熟慮之作，實不知出自那一個部門智囊之腦袋，今年施政報告與財政預算案唔知會唔會有比此更傻嘅新意念呢？近日聽到政府會增加大學三年級嘅學額，俾副學士申請transfer，可能受到副學士學生歡迎，但同時又傳出政府無意支持大學增建學生宿舍，將資助宿舍建設嘅優先降低，此則自打嘴巴，一方面大學要增收副學士，即係學生人數增加啦，但另一方面又無意優先支援建設宿舍，邏輯何其混亂也。

PermaLink: https://articles.zkiz.com/?id=88240
Next Page
ZKIZ Archives @ 2019