快樂假期期間，發生偽鈔事件，偽造一千元鈔票（俗稱金牛）在市面出現。因同時冇乜大新聞，偽鈔事件成為傳媒頭條新聞，全港鬧得熱烘烘，實則偽鈔比例低到極，金管局指截至去年11月，每一百萬張流通銀紙之中，只有1.4張係假嘢，大家駛唔駛咁驚呀？
被發現嘅假金牛係2003年版本（version2003），該版本之防偽特徵應用於2003至2008印行之中銀及滙豐金牛，市面上約有一億一千萬張，目前發現偽鈔有30張左右，多數係背面有「會展中心」標誌嘅。
左丁山經常在馬場出入，數年來積累埋幾十張千元鈔票（間中都會學人收嚇錢嘅，唔係成日輸錢啫，呢筆算係賭本），冇一次睇真過，相信其中一定有2003版本。呢日在中環中心停車場出車前為八達通增值以繳付停車場費，拿出一千蚊紙，預備增值九百，點知女職員話唔收金牛，只收五百或紅底，左丁山本想同佢講嚇道理，喂，滙豐一千蚊紙係香港法定貨幣噃（Legal Tender），你點可以唔收？最多咪用紫光燈照嚇先囉，但回心一諗，職員都係聽上頭指示行事嘅啫，兼且趕時間出車，都係慳番啖氣，用五百蚊紙增值就算。
年近歲晚，各商號、停車場拒收金牛，必然導至群眾搶住要五百蚊紙，釀成無謂「搶錢」風潮，困擾眾人。最多兩個星期之內，銀行已可為客戶兌換農曆年「新鈔票」，但突然之間，人人唔要一千蚊，要五百蚊，銀行夠唔夠咁多新五百元鈔票供應呀？連馬迷都癲埋一份噃，現在馬場內馬迷收錢之時，同樣唔肯收一千，要職員俾五百蚊紙，個別窗口根本冇足夠五百蚊紙供應，馬迷得個等字，到咗年初三賽馬，人群蜂擁入場，馬會要及早準備至好。
因現鈔全由政府及印鈔銀行發行管制，出咗問題自然應由政府及金管局解決。但事到如今，梁振英呢個適度有為政府未見有甚麼對策噃，唔通就咁讓各大店舖「封殺」金牛，讓過億張金牛變成廢物？簡直係大笑話，充份顯示政府無能之極，如果出現五百元、一百元偽鈔嘅話，全城又試拒收五百元、一百元呀？咁樣全港現鈔有何作用？梁振英口噏噏話民生無小事，依家有大事咯，都唔知佢去咗邊。 