上星期「加拿大分娩」一文刊登後，有老友來電云：「加拿大福利好則好矣，你知唔知道要交幾多稅？」吾不知也。一位親戚移民多倫多二十餘年，好彩未失過業，有屋有車，叫做係中產階級，佢打電話返嚟對左丁山詳談加拿大福利主義國家，話自己交完稅、供完屋之後，月薪所剩無幾，每月小心謹慎使錢，不似在港姊妹兄弟家庭咁每月出外吃飯視若等閒。佢話：「我地買乜都要交銷售稅，買衫肉痛，到餐館肉痛，卒之捱到個女大學畢業，現在稍為鬆一口氣。交重稅，退休人士，醫療方面享受福利，係加拿大整個國家嘅選擇，香港人一定學唔到，香港人係唔使羨慕我地，社會情況完全唔同㗎。」
這個當然，如果唔係，咁多香港移民子女回流香港為乜嘢呀！福利主義社會一定要不斷有新人口交重稅嚟支持老人（似唔似龐氏計劃呢？）一旦新人口萎縮或是不願交重稅，或無能力交稅，整個制度就會陷入危機，最壞例子自不然就係歐豬國家之中嘅希臘。
香港人平時要求增加福利，但一旦講到加稅、擴濶稅基，就會群情洶湧，大力反對，以前唐英年推動GST便知難而退，特區政府至今不敢再提。環保講垃圾徵費，稍為收高啲就有人大鬧，甚至乎認為應該唔收，單憑教育感化市民咁天真，像是住在幻想國度，不知人間現實。
呢日碰到一位餐飲界人士，問佢垃圾徵費點睇？佢話餐飲業製造之垃圾，不如私人家庭咁多，況且廚餘係食客搞出嚟嘅，要餐廳付鈔（垃圾徵費）實在冤枉，佢諗出一條計仔，就係呼籲食客慳水慳碟（因請洗碗工人實在太貴），儘量減少換碟要求，最好一隻碟食到尾，骨頭菜渣堆滿一碟！呢枝笛有冇人聽？左丁山有啲懷疑，不過，業者總係要儘量試一試，唔得咪用過第二招囉，好似在外國一啲酒店浴室，同樣有一張紙卡話為了地球，請人客減少用水，儘量減少換浴巾。講得就好聽，但房間租金永遠有升冇跌，搵笨啦。 