| ||||||
呢頭騰訊嘅馬化騰高調接受部分傳媒訪問，話股價升到四百蚊只係一個數字，嗰頭佢老友馬雲仲未上到市，相當頭痕。阿里巴巴上市呢壇嘢，搞到一鑊粥，港交所固之然失去咗嚿千億肥豬肉，馬雲亦跌咗眼鏡，轉手啟動美國上市程序。本週日，馬雲突來港現身灣仔萬麗海景酒店，出席私人活動。小宗上前同佢傾談，佢全程笑笑口而不語。今次來港，佢有個目的，就係搵人傾吓點反擊。何解？唔服氣囉！ 據接近馬雲的消息人士話，馬雲認為外間對佢提出嘅合夥人制度有誤解，強調絕非以小控大，而是想保留阿里巴巴的獨有文化，「馬雲構思嘅合夥人制度，唔係想推舉董事局內所有董事，而係想推舉九個董事中嘅四個，並非想全控董事局。其中CEO一定要由合夥人選出，維持公司文化。」現時阿里巴巴的合夥人，由二十多個老臣子組成，有啲入職前只係做過bellboy等工作，但俾馬雲提拔而上位，足見阿里巴巴獨特嘅文化咁話。馬雲仲同友人講：「幾方人爭拗嘅，根本唔到point！」呢個方案，馬雲同港交所口頭講，form都未遞，就被人猛烈攻擊；佢向美國招手，對方即時「歡迎歡迎」！估值仲高啲，一定過千億美金，點揀唔使講啦！不過馬雲仍抱一絲希望，佢對香港點都有情意結。一來方便大陸同胞買股；二來美國要求好高透明度，內地有啲嘢，始終唔方便公開啩。馬雲準備嘅反擊，包括想開一個「聽證會」，邀請李小加等人出席；兩個咁「牛」嘅人辯論，實激戰連場。 貪大紫荊夠墜手 寶哥哥之東亞破肥龍產，連帶揭露四間金融機構夾埋借咗成七千萬俾佢（其中六千萬來自東亞），條數一啲都唔細。不過，佢借落嘅錢其實遠超此數。除咗東亞、渣打、創興及新地旗下的忠誠財務，佢仲同成二十幾間金融機構借錢。只不過啲數冇上述呢四間咁大，啲人未得閒或者費事請律師去追而已。橫豎都追唔番，請律師去追，你估貪律師費平乎？啤梨張都話有檔生意呀，肥龍乜都冇，竟然又會有二十幾間機構借錢俾佢。呢個窿冇任何抵押，佢靠乜咁有把炮呢？批窿之時，啲賓架又諗緊乜呢，又？唔知純屬巧合抑或咩嘢，批咗個窿冇耐，煲呔就俾咗個大紫荊過寶哥哥啦。契媽老早已經幫寶哥哥封蛇，以級數計，唔使講爵士都馨香過大紫荊多多聲，咁蛇大衞仲要個大紫荊做乜呢？唔通世間上冇功能遞減呢一回事？唔會o架。 國慶「送大禮」 本週二《明報》網站朝早一則報導，令好多人開心咗兩粒鐘，以為阿爺十一送大禮。事緣《明報》網站八點十分發放有關三任特首出席十一升旗儀式嘅消息，文末赫然出現「特首稍後將辭職」。報導隨即喺網上瘋傳，好多人心諗：「唔通梁振英大徹大悟，想俾香港人一條生路？」《明報》網站相隔近兩小時後，即係十點零四分靜靜雞為呢則報導作出修正，將「辭職」改為「致職」，錯完再錯；兩分鐘後再發出更正啟事同道歉聲明，將「辭職」改為「致辭」，聲明形容文章早前版本「出現重大錯誤」。小宗向《明報》友好查詢，佢哋話可能係早班同事一時手民之誤，唔係要同梁振英過唔去，但有人話：「大家心聲啫，十一希望嘛！」梁振英辭職變番致辭，有人喺明報網站留言：「明報，你實在太殘忍，令香港人空歡喜一場！」 Give me a break新盤試用「新牌仔」 家陣啲新樓，喺新界大西北嘅都要過萬蚊一呎，想買家俾得心悅誠服，用料當然要有番咁上下，唔可以再攞啲豐澤牌同美的空調來奉客吧！是故近年好多樓盤都用德國牌子，例如有Miele、Gaggenau、Poggenpohl、Siemens等，貪德國啲鋼水好噃。嫌太熟口熟面，發展商最近亦好積極發掘「新嘢」，好似來自中歐斯洛文尼亞（Slovenija）的Gorenje，就好多發展商都buy，新地、恒基、嘉里、新世界都有用佢哋嘅出品，賣緊嘅元朗盤溱柏，都隨樓附送佢哋嘅抽油煙機。唔講唔知，原來呢個牌子有約六十年歷史，响歐洲係設計頒獎禮常客，德國Red Dot Design Award、Plus X Award等都見佢身影。佢哋愛玩創意，其中有aqua-clean蒸氣清潔功能嘅焗爐，可用蒸氣溶解油脂；而負離子乾衣機則可抗敏感。另外將蒸氣同焗爐二合一嘅蒸爐，遲吓亦會有新盤用到。除咗中歐貨，新盤仲有用皇室貨，有三百幾年歷史的De Dietrich，原來係首個被法國皇室認可的御用商業品牌，近年亦成為咗新盤常客，天賦海灣、現崇山、上林、壹環等都用佢。咦，連市建局有份嘅壹環都用，唔怪之得市建局俾人話華而不實啦！ 金牙大狀講嘢無人駕駛減車費 港鐵司機開緊車剪指甲，有片為證，全城嘩然。片中見埋個樣，位司機仁兄被迫自首。查實個司機坐正喺車頭，有乜事，佢首當其衝，咁點解佢仲咁散漫？佢並非唔怕死，只不過由第一日起，地鐵列車已經可以不經人手全自動操作，故此啲司機至咁老定。列車不經人手全自動操作並非乜嘢新鮮事物。大家喺機場坐火車仔，幾時見過車頭有司機？先前波音公司更公布改裝F16戰鬥機，再唔使用飛機師。美國亦已有部分州開始俾無人駕駛嘅汽車通街行走。於此可見，地鐵老早就可以慳番一大筆司機人工。班尊貴的議員唔叫地鐵追上科技潮流無人駕駛，製造減價空間，反而要地鐵加強監督司機，莫非咁就叫為民發聲？ | ||||||