壹仔上期封面故事係獨家專訪「余卓文封刀黑幕」，講到有黑幕咁緊要，自然引起中大人興趣，左丁山也少不免讀一讀個古仔，看看有何黑幕。左丁山認識余教授，到威爾斯親王醫院睇中大教授私家症，心臟科主診醫生就係余教授，左丁山就搵過余教授檢查心臟，吃佢開出之血壓藥。
睇報導先知余教授係典型獅子山下故事，小時候一家六口住在慈雲山公屋（一百零七平方呎），標準中大學生原型也；由慈雲山到沙田，走上人生青雲路，個人成功故事相當勵志，今時今日之千禧年公屋青年人，可視余教授為模仿偶像，香港地，知識可以改變命運，讀書仍有出頭天，余教授係90年代年青畢業生成功最佳模範之一。邊個敢話獅子山下故事太老套？
但黑幕呢，在那裏？通篇報導之「奸角」就是中大校長沈祖堯，余教授係內科專家，應曾上過沈祖堯嘅課，老師變成校長，點解要坑一個優秀學生？砌低余卓文對沈祖堯究竟有何好處？據壹仔所云，余卓文指沈祖堯意圖將呂志和之一億元捐款「收歸國有」，唔想由余卓文個人處理，想將筆錢「分餅仔」俾全院唔同部門嘅自己心腹嫡系，但余卓文自認筆錢由佢努力（因呂志和欣賞佢嘅醫術）搵番嚟，一億可與骨科部門均分，心臟科可分得一半（五千萬）云，故此余卓文反對將筆錢「收歸國有」，令沈祖堯不快，要「處置」佢咁講。
如果係咁，真相好易知箒，請呂志和公開講一聲為何捐款，如何分配捐款，即時天都光晒，呂志和係大善長，講出來對佢聲譽地位絲毫無損，怕乜講呀。否則嘅話，按照港大、中大之正常捐款過程，如首先由醫生向病人勸捐，捐一千幾百萬就比較容易，捐上一億元嘅話，捐款人必定要求大學提交建議書，與校長見面、吃飯，與大學籌款部門商量捐款條件，前後起碼要傾兩三個月（如雙方皆有誠意嘅話），甚至更長，在校內並非大秘密，不過一日未確實，就向外保密而已。中大收到呂志和捐款後，按程序，跟建議書行事，向心臟科、骨科、幹細胞再生及神經科各自撥款五百萬元，餘款八千五百萬元歸校內研究委員會（由副校長張妙清（心理學教授主持））負責分配，各學系可提交研究建議，競爭撥款。咁樣做法有何黑幕可言？骨科陳啟明教授又唔見去投訴佢部門嘅五千萬元被收歸國有？壹仔記者有明顯立場，描寫沈祖堯係奸嘅，余卓文係受害人，呢個想法，不知從何而來。 