關於熱刺球星Bale中文譯名一事，有兩位讀者來函表示意見，長期讀者Andrew話Bale係「皇馬球員」，以西班牙發音Ba-le讀做巴利，咪啱曬囉。左丁山不識西班牙文，但如果話Bale係皇馬球員，只不過係呢兩個星期之事箒，佢係威爾斯人，自少在英國踢波，在修咸頓球會青少年軍受訓，與禾確特同期，當年阿仙奴領隊雲格揀蟀，衰孤寒，二中選一，選中咗禾確特，唔肯要Bale，依家恨錯難返啦，禾確特早熟早殘，底質見曬，Bale仍有上升空間噃，可見雲格眼光不足。Bale之發音，自然應該依照英文發音，而唔係西班牙文發音。
另一位讀者庇來郵指出，「人的姓名沒有一致的」：
「我在英國文化協會就讀時，教師說英文字的讀音是按音標，不能從構成該字之字母而確定讀音，音標可在字典上找到，但人的姓名由於是不含意思，所以是沒有一致的讀音，他以Christine為例，讀出幾個不同的讀音，正確的讀音應問該姓名的人，當然亦有約定俗成，多數人的讀音，所以Bale是否要按意思是『一大包』的bale之讀音，實無定論。」
讀者庇所言或許有理，但本地電視足球或體育版評論員有冇問過Bale之姓氏讀音？幾難相信有咯，BBC講足球，Bale嘅發音就係近乎「卑路」而不是巴利嘞。
卑路係足球新星，兩季前仲係普通球員一名，所以討論佢嘅譯名還是有啲意思。一啲香港「約定俗成」，或講咗成百幾年嘅譯名，就無謂爭拗喇。呢日自雲咸街（Wyndham Street）南華大廈行落嚟，見到中原地產代理高層陳永傑與一班地產代理聚集街頭抗議三辣招，吸引不少人圍觀。「雲咸街」當然與英文讀音不符，相同錯譯例子有「漆咸」道，「嘉咸」街，英超球會「托定咸」熱刺，球星「碧咸」，英超球會「富咸」，總之逢係有ham跟尾，香港就一定譯作「咸」，應該係一百年前殖民地政府華人師爺之傑作，一直流傳至今，社會大眾講慣曬，無謂再推倒重來咯。
講番陳永傑等人上街抗議，在九月九日罷賣報紙廣告一日，實在有乜作用？諗唔通。總之梁振英以下各位高官一致堅持辣招不可撤消，地產代理冇得撈乃閣下之事，唔順呀？轉行可也。 