📖 ZKIZ Archives

要識中文 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130906/18410667

校長L到校友會午餐演講，介紹直資、津中、國際學校、官中、英基學校之異同，IB試與文憑試（DSE）之優點與不足之處，果然不愧係資深教育界人士，講咗半個鐘頭，仍然意猶未盡，如果係晚餐會就可以任佢講落去，但係午餐會呢，好多校友要在兩點鐘鬆人返工，左丁山逼住要校長L暫停，等啲校友發問，點知校長L十分細心，仲搵埋一位私校（幼稚園及小學）校長T博士作補充，T博士話貴子弟在一歲零八個月就要準備報讀幼稚園嘅嘞，因為二歲零八個月就可以讀K1，一年前要報定名。跟住T博士講咗不少選校要訣，然後校友發問。記得上次七月份講2013年下半年投資展望，到場者只有兩位女生，今次一話講教育箒，超過一半參加者係女校友，包括議員T嘅太太，可見女校友做咗媽咪之後，關心子女教育多過關注如何投資搵銀。
校長L係英文系師姐，喝令左丁山不得透露佢嘅部份談話內容，當然照辦啦，費事得罪一啲學校，不過兩位校長一致同意，為兒女選擇學校，首先要考慮一個問題：「你將來想個仔女做乜？」或者係，「給予仔女足夠靈活空間，在求學中途轉換方向。」呢兩個都係要深入思考，一時之間難以解答嘅問題，因為不知二十年後世界會是怎麼樣的，譬如有一個實例，A君與A太在1989六四之後，急急移民加拿大，在彼邦生下兩個女兒，讀咗幾年書後再回流香港搵工，但女兒已不懂中文，入唔到本地小學，於是從小學到中學都讀英基學校，雖苦讀中文仍然水準不佳，結果兩位千金都入到醫學院，但常以中文不佳而感到有所不足，引以為憾。T博士話如果20年後貴子弟仍要在亞洲搵工嘅話，不識中文或中文水皮，將是一個好大缺憾，可能連一份好工都搵唔到，英文更叻都冇用，讀英基或國際學校嘅本地學生就有好大機會如此。佢話現在幼稚園及小學以英語、普通話教學，最受歡迎，學生在家可以講廣東話，在小學階段不妨叫小孩子學埋法文、西班牙文、日文之類，因為申請國際學校讀中學，識中英文以外第三種語言者，有著數！譁，要求真係高，講極都講唔曬，難怪一到二時十分散會，兩位校長俾女校友包圍攞卡片。

PermaLink: https://articles.zkiz.com/?id=74862
Next Page
ZKIZ Archives @ 2019