| ||||||
福臨門七哥徐維均在爭產案中輸俾五哥，另開新鋪「家全七福」，重新開始。 選址離灣仔福臨門不遠的群策大廈，裝修簡潔，完全冇富豪級奢華，咁低調？「富豪見慣歎慣，舒服先最緊要！」 唔鬥豪鬥浮誇，係咪有新諗頭撼低對手？「爸爸家傳的招牌菜，我做足五十年，發夢都識做！而家最重要保持水準，做出客人熟悉嘅味道。新菜？唔諗住。」 七哥講到明「家全七福」主打賣開幾十年嘅粵菜，乳豬、焗蟹蓋、炸子雞、荷葉飯，未食過都聽過係福臨門招牌菜。新店甚至連定價都幾乎同福臨門一樣，七哥話︰「我唔當呢間係新鋪，只係用咗新招牌，希望做得更好更細緻，總之勤力啲，加倍努力啦！」當門面和新意欠奉，純粹sell幾十年人情？路遙知馬力，說到底，講實力。當煮俾仔女食 老闆七哥日夜坐鎮，但講到出品質素，始終講究廚房班底，新店廚房廿多個師傅，「有幾個至少跟我工作廿幾三十年，有個仲接近四十年。」現任總廚及顧問從日本及深圳福臨門請回港，總廚陳師傅88年開始在九龍福臨門工作，之後調到日本店18年，另一位余師傅80年至08年在港九兩間鋪做過，現為深圳店總廚，深圳香港兩邊走，擔任香港店顧問。七哥解釋︰「你一定要俾啲細嘅上位，當年去日本開分店都係呢個原因。如果當初我伯爺唔係六十歲就金盆洗手，我都冇今時今日。我冇煮好耐喇，總要一步步放手，而家日日試菜，睇緊出品，唯獨是鮑魚一定要我自己揀。」 在家全七福吃海味貴價菜一定冇錯，因為七哥至今仍然堅持每個月親自去南北行揀貨，「學揀靚貨一定要試食，我由14歲跟爸爸入廚，日日跟佢去中環街市揀雞，去南北行揀鮑參翅，我比其他師傅着數，因為我有得食，食得多你就識分。而家會教啲仔女揀貨，買唔同嘅鮑魚一齊試味。鍾意食、要求高、有研究，當煮俾自己仔女食一樣，貨真價實，伯爺教落的。」 試業期間大劉捧場 新店的菜式熟口熟面，大廚跟着七哥家傳的食譜，煮了二三十年，功夫紮實，師傅說秘訣離不開新鮮︰「只要材料新鮮，肯花時間心機按着步驟去煮就會好，點心、小菜都要即叫即做，唔好一早整定。」聽落簡單，食過就知，要做到足料和心機，邊有咁易？荷葉飯用新鮮材料即叫即炒即蒸，連火鴨都是自己燒好再撕肉。天然吉品鮑魚預備功夫足足三天，才夠溏心軟滑甘香。鵝掌用本地新鮮貨，件頭細，但骨軟又夠膠質。燒賣的鮮豬肉要切得幼細，有客人柯打才包。每道菜都有竅妙都要仔細，七哥話齋︰「自己食得入口，先俾客人食，我闖蕩江湖幾十年，富豪幫襯幾十年，係貴，但冇話唔好。」新店9月12日才正式開幕，試業短短兩星期，大劉、何佐芝等富豪已經率先捧場。 實地試食：服務未算頂級 做得富豪飯堂，服務當然重要。傳媒採訪，一定服務周到。「家全七福」八月二十三日開始試業，究竟真正的服務態度一視同仁抑或大細超？咁就要由我試食王出動測試啦﹗早一日訂位，十分順利，接線阿姐更細心問貴姓之外可如何稱呼，增加親切感。到約定時間，遲到十五分鐘，兩位好友先取位。去到酒家，見到友人便對號入座。侍應端來矮櫈讓我放下手袋，很貼心，有五星酒店服務。但見友人面有怒氣，便問個究竟。友人甲說：「來到五樓，告訴門面X小姐四位，她竟然說無訂位記錄。」吓，咁都得？友人乙說：「於是我問是否六樓（五樓為大廳，六樓是VIP房）有記錄，樓面答『當然唔會』。」作為訂位的我，聽到覺得好無面。我知道我和友人都不像名人，亦無全身名牌，但「當然唔會」，言下之意即「睇你都唔似坐VIP房」？四位散客當然唔會安排坐六樓？可能係我小人之心，或者言者無心，但聽者好難無意。第一印象好重要，入到酒家，覺得被人白鴿眼，好難飲得杯落。點心每客$50至$70，蝦餃、燒賣、鳳爪、排骨等等一律$60，腸粉$70，最貴魚翅灌湯餃$140，供應款式同福臨門有九成似，點心名字、價位亦同福臨門一樣。不過點心紙上近50款點心，竟然有11款當日不供應，想吃流沙奶皇包都冇。服務算殷勤，為客人鋪餐巾、介紹菜式、主動安排甜品最後上和分食物，都是高消費酒家服務。而且我們講明想食小菜，侍應即推介坊間少有的陳皮蒸牛肉餅，並冇硬銷貴價菜。試業期間，甜品免費，雖然埋單先通知，都可以加分。服務恰到好處，不會過分熱情，最怕那些經常走過來問你意見的經理，好彩只係埋單時問問意見。每層坐滿約90位，侍應亦夠多，一舉手就有人招呼，但全程沒有主動為客人添茶，稍嫌不夠細心，相比起龍景軒，侍應一眼關七照顧周到，仲差啲。星期六飲茶，全店滿座。酒家樓底矮、無吸音牆，好彩大部分客為斯文人，未算嘈到拆天，但絕對唔靜。食物方面，脆皮豬腩仔為小食中最大驚喜，蟹肉瑤柱蛋白炒飯啖啖有蟹肉，飯粒乾身有嚼頭。大部分水準高，由通透彈牙不黏底的蝦餃皮便知道。如果我是一入門口便受到禮待的富豪，這餐一定食得很開心。 | ||||||