📖 ZKIZ Archives

尖子來港 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130831/18402343

為校友會午餐會搵演講嘉賓，並非難事，但首先要決定講甚麼題目，先至困難，今次左丁山學精咗，費事自己諗到頭爆，打電話問一位千禧年左右畢業嘅校友，有乜題目鍾意聽呀？諗唔到佢竟然講：「喂，我地班同學好為子女升學感到煩惱呀，下星期啱啱開學，不如就講教育啦，搵人講甚麼是DSE、IB、ESF、直資、國際學校等等，我聽到頭昏腦脹呀！」哦，易辦事啦，立即搵退休校長Ｌ，佢做過官立中學校長，國際學校校長，在教育界甚為資深，對呢個題目好熟嘅箒。校長Ｌ一口應承，仲話：「校友中有好多校長，駛唔駛搵多幾個嚟講？」唔駛咯，由佢一個人講晒，在座校長校友加以補充便是。
香港人話教育制度複雜，原來外人就覺得到香港留學幾好。大記者呢日在紅磡坐火車去沙田，鄰座有一位強國人向佢問路，問清楚先至上車，返深圳搭飛機回鄉喎，鄉下就係東北大埠。大記者發揮記者本色，立即訪問佢：「你嚟香港做乜，血拼廣東道呀？」東北大漢話：「非也，我送兒子到香港大學讀商科，佢係高考尖子，得分近七百，北大清華都收，但我一心要佢到香港見識，希望佢畢業後就去美國深造，以後自由自在，留在海外工作，唔好回鄉落葉歸根。」有如此願望，好有決心噃。大記者又問：「你位公子啲英文得唔得呀？港大用英文教書嘅噃！」大漢答：「我自佢六歲開始，就盡量培養佢講英文，學英文，為留學做準備，佢亦生性，為英文苦拼十二年，今年港大面試人員亦話佢英文講得好，不負我一番苦心。」
就快到沙田，大記者再問：「商科係中文大學好啲嘅噃，點解唔送個仔入中大？」大漢答：「我唔知噃，但我知道香港大學整體排名高過中大好多，好似係亞洲最佳大學，梗係要兒子讀間最好嘅啦！」大記者係中大畢業生，為之無言以對。有人唔鍾意聽都好，大學嘅世界排名高，就容易吸引尖子學生，全世界都一樣，聽起嚟，內地有財政能力之人，一早吼住以香港嘅大學為跳板，躍向世界，北大清華雖有名氣，亦留他（她）們不住，箇中原因，唔駛睇陶傑都知。


PermaLink: https://articles.zkiz.com/?id=74571
Next Page
ZKIZ Archives @ 2019