ZKIZ Archives


中環在線:賭王踩金沙冇人買 李華華

2009-04-03  AppleDaily





 

澳 門金沙賣資產撲水未有進展,一直話有興趣嘅賭王何鴻燊噚日出席一個慈善活動時,不忘揶揄一番,「冇人買o架,賭權仲係佢揸住,佢賣咗個牌就有人買」,一句 講晒,祝佢成功啦!澳門博彩業商會已決定去信澳門政府,要求盡快為碼佣上限立法,賭王話開多幾次會,兩三個月就成事啦,咁大家真係要拭目以待。

3賭王為獎學金贈興

講開賭王,噚日佢公子小賭王、新濠(200)主席何猷龍就用個人名義,捐咗30萬英鎊(約350萬港紙)畀蘇格蘭愛丁堡嘅納皮爾大學做獎學金,中港澳三地學生都可以受惠。

雖則話金融海嘯爆發後,裁員減薪消息不絕,樂善好施嘅香江市民捐錢都難免有啲手緊,之但係,頂級富豪賬面身家雖然縮水,點計都仲有大把,捐錢依然冇停手。

查實,小賭王喺舊年11月開始已經放棄收人工,粗略計每月冇咗幾十萬銀,對佢嚟講可能真係濕濕碎。佢噚日出席支票交贈儀式時,唔止太太,連阿爸賭王何鴻燊,同家姐女賭王何超瓊都嚟撐場。

寶哥哥朋友多

講 開又講,小賭王喺加拿大多倫多大學畢業,點解捐錢捐到去蘇格蘭大學呢?靚女公關同華華講,係世伯東亞(023)主席李國寶識得校長,介紹畀小賭王,知道間 學校有需要,於是一拍即合,而小賭王不嬲都有捐錢支持教學、青少年發展同埋環保咁話。華華覺得,呢單嘢除咗證明小賭王有錢出錢外,仲反映寶哥哥真係朋友多 囉!李華華[email protected]
 



PermaLink: https://articles.zkiz.com/?id=7118

Next Page

ZKIZ Archives @ 2019