早知道肥佬黎經常去陸羽飲早茶，有一次佢話一個人飲茶無癮兼且起身遲咗，九點幾叫左丁山去陸羽陪佢傾嚇偈，咪走去食件包囉。估唔到佢平時早到六時十五分（根據李八方於六月二十八日報導）已在陸羽地下嘆茶，佢以前話過每早四點鐘起床讀書，大概搞到五點幾就由司機車佢去中環陸羽啩，相信佢唔係黃宜弘（被舊司機入稟法庭追討），司機晨早返工，唔會嘮嘈嘅。
星期五走上陸羽，夥計笑曰：「左生你早啲到就有免費點心食呢，黎生實會請埋你！」講笑，早上六點幾點可能人在陸羽噃！黎生請記者吃蝦餃、燒賣、叉燒包，每碟四十元，共一百二十元，對黎生濕碎到極。下次記者如站在門口，黎生心情好請吃點心嘅話，記者不妨叫煎粉果連湯（68元），鮮牛肉燒賣（45元，包冇豬肉夾雜），柱侯蒸排骨（45元，唯靈話係全港唯一用新鮮肉排嘅排骨燒賣），再整多一味蓮子蓉香粽（42元，號稱全港最正嘅蓮蓉粽）。價錢係貴啲，但黎先生請，有乜所謂吖。
食食嚇，餐飲Ｍ話都爹利街上海灘樓上開咗一間新餐廳「都爹利會館」，係一班有錢有魄力嘅富二代、富三代經營嘅，即係The Press Room、Classified嗰個集團，故此走高級路線，Ｍ太去試過，對啲粵式點心讚不絕口，但因為價錢幾貴嚇，故此生意甚為清靜，叫左丁山趁佢未旺之前，走去試一試。皇后大道中九號有間Island Tang（港島廳）就在都爹利街對面，啲點心亦有高水準，價錢當然不便宜，但生意旺咗之後，餐枱與餐枱之間也就冇乜空間可言，坐得幾擠迫，或者有客人因此而走咗去都爹利會館都唔定。
高格調高檔中餐廳在中環通常在晚上與假日要捱，等時間積累一批熟客，經營者如無資金支持，十分難捱，最怕捱得咁上下，廚師走咗，廚房換人，青黃不接之際，熟客會走曬，便難翻身。都爹利街晚上好清靜，Classified集團選擇在此開新餐廳，可說錢多人膽大，亦係實力雄厚之表示，咁又係嘅，老闆之一係龐太嘅孫，娶咗彤叔個孫女，雙劍合璧，確實非同凡響。 