ZKIZ Archives


切戒招積 左丁山


2009-02-21  AppleDaily





 

研 究主管K平時研究國家大事、世界大勢、香港政治經濟,放工之後,回家研究賽馬,交咗多年學費之後,近兩年開始脫胎換骨,由一位馬場善長仁翁變成向馬會攞錢 使之常客,經常輸,但輸得少,不時贏,但贏得大,每個月好似出多兩三份糧咁。左丁山聞之,特別喺二月一日請佢入馬場,近距離觀察,睇吓可唔可以偷師。當日 研究K一早聲明,佢嘅心水係第九場「新強勁」,其他場次冇興趣。果不其然,頭八場佢只係每場下注一百蚊,不傷脾胃,到咗第九場就狠狠地傾囊下注「新強勁」 一W三P(一注獨贏三注位置),下注注碼甚重,而「新強勁」順利贏馬,研究K大豐收;到咗二月十五日,佢又大棍扑中「祝福滿滿」與「善風」,左丁山為之服 晒。

研究K就話佢輸馬吔吔聲之時,我哋唔會知嘅,既然贏馬畀左丁山知道,就搵個藉口到IFC利苑吃午飯,搵埋公關大姐大,電腦J等。點菜之 時,居然要咗一條斤半重嘅東星斑,清蒸吃之,不亦快哉。誰知隔牆有耳,畀財務L撞到,飯後打電話嚟瘀左丁山:「喂,左丁山,o依家乜嘢時勢呀,係金融海 嘯,共度時艱嘅日子,你居然在利苑吃午飯點咗一條清蒸大東星,招積啲噃!」哎吔,多得研究K關照,食馬會嘅啫,咁都畀人彈?財務L話:「美國銀行CEO都 做騷啦,從夏洛蒂坐八小時火車去華盛頓出席國會聽證會,以示節儉,佢班行家唔敢在華盛頓一級餐廳大吃大喝啫!呢類政治正確工夫,你要學吓。」好彩啫,研究 K與左丁山都係小人物,住豪宅冇份,用二萬一千美元做一套Kiton西裝冇份,坐私家飛機更加冇份,久唔久搵到馬會錢,食番一餐靚嘅,唔使咁政治正確呀 嘛?如果我哋係曾司長、任總裁嗰種級數,到IFC利苑一定只會吃碗「臘味煲仔飯」算數!

 

隔一日,見到股票名家青姐,青姐話 大經紀T請佢到Domani吃午飯,感覺非常良好,心思思想再去過;最令佢心頭癢癢嘅,就係有其他人客食到兩點後,就走出花園外露天餐枱,坐在梳化,吃甜 品飲咖啡,噴雪茄,悠閒之至,好似下午唔使返工咁款,羨煞旁人。唉,我哋夠想學習仿效啦,不過如要強求,慎防傷身傷心。



PermaLink: https://articles.zkiz.com/?id=6027

Next Page

ZKIZ Archives @ 2019