ZKIZ Archives


郵輪碼頭 左丁山

http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130618/18301528
啟德郵輪碼頭在六月十二日端午節啟用,有一隻大郵輪來港贈興,支持支持。凡係大項目揭幕,總不會百分之一百盡如人意,有啲甩漏,在所難免嘅嘞,不必深究。以香港管理人轉身之快,效率之高,啲錯失好快就會搞番掂。但有啲嘢冇法子短期內改善嘅,就係整體配套設施。舊啟德機場內,除咗郵輪碼頭之外,其他乜都未起好,商場酒店住宅寫字樓全部冇,郵輪碼頭孤零零懸掛在維港,點會興旺呀?
旅遊專家W在碼頭開幕後對左丁山講:「有郵輪碼頭梗係好過冇,但如果話碼頭可以促進本地旅遊業就未免誇大一啲,一隻大船可以帶來幾千個富裕遊客,但並非豪客,佢地在香港頂多逗留一至兩日,而且有上一站、下一站,本港並非終點站,好多人購物唔會鬆手嘅,食又唔食得幾多,加上十年內啟德機場會係一個大地盤,難以聚財,我地做旅遊嘅,對碼頭冇乜厚望。」
加上香港處於夏季颱風地帶,一年有四個月冇船來港,下一次有船泊碼頭,要等到十月,如在郵輪碼頭內租用店舖,食西北風咩,有碼頭,無配套,怪只怪特區政府自1998年搬遷機場之後,竟然讓啟德地皮晒太陽十幾年,浪費光陰。碼頭用公帑興建,納稅人如何收回投資,望天打卦而已,凡係由政府推動,投資嘅商業項目,皆難以睇好。
公子L話昔年大郵輪泊海運碼頭就唔同景況,連佢父親都唔敢放假,因為昔日坐伊利莎白二世或總統輪到港嘅客人,非富即貴,普通中產根本冇資格坐郵輪旅遊,半島酒店一間老牌珠寶店每知有郵輪泊海運碼頭,就會預早向公子L父親訂定鑽石、珍珠,老闆平時懶懶閒,呢個時候就會金睛火眼吼到實晒,歡迎美國豪客,發市當三年。時移世易,總統輪已沒落,乘郵輪旅遊嘅人士,由歐美大豪客變成係歐美亞三大洲嘅高檔中產,購買力有預算限制,變成旺丁不旺財,故此公子L接手生意後,不再留意有甚麼郵輪到港,大陸遊客先至係米飯班主嘛。
PermaLink: https://articles.zkiz.com/?id=59507

Next Page

ZKIZ Archives @ 2019