你好新力，有父母提供之單位居住固然好，但有時人有退路反而令做事做不到底。賣樓賺左六十萬，但睇住佢再升多一百三十萬，咁你係賺左六十個定係輸左一百三十個，見仁見智。
住房已解決，妻兒可以待在家。留意以你現時工資，就當可以將收入60%儲起，持續20年，投資亦可跟通脹掛勾，儲到50歲可以有240個月*35000*60%=5.04mil，即在你50歲有相當於現今五百萬之購買力，但要維持生活至80歲(仲要係兩個人)，每月每人只可用5.0mil/360/2=$6944，所過退休生活絕對不是你想要的，加上醫病仲有雜費，好肯定如運用現有模式加上現有家庭月入，離財務自由越行越遠是肯定的事情。何況你而家提及只係每月儲$12000。
當然你有二百萬儲蓄，可以用一陣子，但就當上面計算加埋二百萬入去做考慮，究竟能否令你人生改善，或達至自身目標，你心中自有數。改變此象，請考慮兩件事，一係要太太出去工作，就當現今不方便，日後都必要。除非你個人月入可大幅增長。二是因要利用增加的家庭收入去擴展借貸力，才將成功買入三層樓之難度降低。
筆者見計盡借貸力為5.4mil，購買力為7.4mil。可勉強靠單人之力入哂三間樓，但睇市要好準，計劃進行所予誤差率很低，即係錯一次，三層樓之理想好快拜拜。不過你計唔計埋父母現住的樓為你第三間樓呢? 計埋會易很多。當然你問得都知係想靠自己能力去籌謀的，值得鼓勵。現可行策略為先等市再回，及後在新界西買入一間樓收租，近日中銀再行減息已說明銀行最尾都係要向市場屈服，不能隨金管局指引提高按揭利率。再加上日本「平錢」已高殺到港，銀行再唔減息應戰，將不能用息差收入去抵銷近年財富管理產品銷量下降之損失，所以息都係減唔落，買樓收租仍為你提供正現金流收入。
至於後市，其實在諗樣二月之文章已言中，白表居屋出爐後，三月至五月之樓市低潮會結束，但留意後市就算再升，已不會再見狂牛市。