星期一本欄講恒指見頂，引來兩類電郵，一類駡許沂光，話佢嘅說話不足信，另一類就問去邊處買票聽許沂光、施永青、馮志堅講座。大家想聽六月十日晚上講座嘅話，請打電話去23128800查詢。
恒指是否見頂，見仁見智，不過近期恒指走勢差劣，接連破位跌破150天平均線，加上日股潰不成軍，純粹睇走勢，係令人憂慮嘅。
我地並非日日鮮短期炒家，對股市唔驚得咁多，總之唔炒孖展，以充足現金持貨，可以瞓得着覺，否則嘅話，晚晚美國方面傳來不同消息，一時話聯儲局退市，一時話聯儲局維持買債步伐，足以令到你心緒不寧。目前股市之上升下跌，與央行放水有關，聯儲局係大阿哥，個個睇住伯南克有乜動靜，伯南克講任何一個字，都要小心度過，佢份工真係好難做，開水喉放水梗係容易啦，但何時閂水喉，閂水喉嘅速度，煞費思量，故此有位朋友對左丁山講：「我懷疑伯南克已經部署退市，但又驚一旦突然宣佈，世界股市反應太大，故此依家由聯儲局高層輪流放風，等市場逐漸習慣『狼來了』，聽得多咯，隻狼（閂水喉）先至真正現身，市場反應就冇咁驚慌啦。呢啲係超級強國嘅超級期望管理嚟㗎！」
是否如此，我地無從得知，一味靠估而已，但市場上游資太多，則是事實，既然太多游資到處流走，遲早出現亂子，央行都係慢慢收緊一啲，才是正路。但資金太多，唔等於你我及中小企有錢，只是落在銀行手上，而銀行偏好減少風險，鍾意借錢俾大企業，是故在商界亦出現貧富不均現象，大企業揸住幾百億現金，中小企就缺乏周轉性嘅營運資金（working capital）。美國大消費品（FMCG- Fast Moving Consumer Goods）集團如P&G，Mondelez，Johnson& Johnson，Anheuser-Busch InBev等居然以大蝦細，最近話畀啲廣告公司聽，佢地找數期會延長至75天甚至120天，而唔係現時嘅45天，搞到啲廣告公司紮紮跳，為之嘩然。喂，P&G廣告費要75天先至肯畀錢，廣告公司去邊度搵錢周轉呀？P&G話可以低息貸款畀廣告公司喎，真係搵老襯，明明要找數就唔找住，借番錢畀廣告公司要計利息，利率上升又怎麼辦？不少廣告公司係中小企，點同大企業揮呢？ 