長實附屬公司Pearl Wisdom Ltd（PWL）在2月18日出售雍澄軒酒店房間，共三百六十個，三日內售罄，當時大量買家、投資者、炒家在晚上逼爆銷售現場，可見該項目大受歡迎。香港地，買樓自住也好，投資放租也好，炒賣摩貨也好，你情我願，絕無有人揸枝槍指住你要買之事。聲稱受資訊誤導而入錯貨，買錯樓之人，幾十年來，只係極少極少數。大抵香港啲樓以施永青講得最啱，覺得冇升值機會就冇人買，即使呎價好便宜！二○○三年之時人人悲觀，樓價低殘，但無殼蝸牛唔肯買樓喎，七年後樓價大升，無殼蝸牛就上街示威抗議樓價太高嘞！呢類故事三十年來不斷重演，但政客從來唔肯承認事實：樓價真係下跌之時，係冇乜人敢買樓嘅。
特區政府對PWL賣雍澄軒，廣受歡迎，惱羞成怒，隨即在2月22日推出雙倍印花稅（DSD），BSD，打擊商業性買賣，即時凍結咗雍澄軒之轉售市場，打殘地產代理生意至今，但政府對PWL拆售雍澄軒之事默認合法，發展局、地政署、屋宇署冇具體嘢講，無行動阻止。多得大律師郭榮鏗議員（可能與公民黨班大狀深入研究後）在3月4日致函證監會指出雍澄軒房間出售與「集體投資計劃」可能有關，證監會於是審視有關條例，向長實各方表示擬根據「證券及期貨條例」第213條在原訟法庭展開法律程序，向法院申請頒令取消該銷售項目，並向買方退回所有訂金及所有部份付款。
PWL及長實各方唔同意證監嘅法律觀點，你來我往之下，長實各方與證監卒之達成在5月13日宣佈之協議，取消雍澄軒酒店房間之銷售，因達成協議，證監會避免了展開法律程序。好嘞，已買入房間嘅人士，可取消買賣合約，取消上會供樓，向PWL攞番利息（P+2計），實際上並無金錢損失，較為複雜嘅係據報有38個房間已經轉咗手，二手買家與一手買家及PWL要個別傾掂佢，相信問題不大，因現時樓價普遍下跌，銀行估值亦跌，買家話要追討樓價差異根本不可能，要追雙倍訂金，PWL聲明買賣合約內並無雙倍賠訂之條款，想追討呀，或者搵郭榮鏗傾吓先啦。 