亞視唔識麗的呼聲 左丁山
http://hk.apple.nextmedia.com/supplement/columnist/%E5%B7%A6%E4%B8%81%E5%B1%B1/art/20130103/18120983星期日晚上睇完電視直播一場好波，車路士以二比一反勝愛華頓，正欲上床睡覺，突收到大記者來電，佢話睇亞洲電視國際台，褚簡寧訪問Uncle Ray，本是好節目，Uncle Ray主持一個電台節目六十年，創世界紀錄，已列入世界健力士大全，但當褚簡寧問Uncle Ray第一份工是否加入港台之時，Uncle Ray答No，佢第一份工其實係在Rediffusion（麗的呼聲），褚簡寧大概不知道香港曾有此古老有線電台，面有茫然之色，都唔緊要啦，大記者話，最恐怖者，就係亞視今天員工竟然不識亞視前身就是麗的呼聲，英文字幕居然出現咗Really Fusion出嚟，簡直嚇死人，令佢感嘆亞視製作如此兒戲，完全唔專業。
騎騎，有乜好嬲吖，今人不識少少歷史，亂咁作，或者食慣時興嘅粵式、西式、日式菜式混合體，統稱之為fusion，食慣聽慣咗。Uncle Ray八十幾歲老人家突然吐出一個上古名字Rediffusion，仲以為老人家發音錯誤，其實係Really Fusion㖭。
今日好多人時興講懷舊，講非物質文化遺產，講保育，實際上有幾多人真係識得舊事，都幾成疑問。餐飲界前輩楊位醒有一次對左丁山講：「韋基舜叫我搞番間真正懷舊食肆，推出標準古法粵菜，我怕冇人幫襯啫。」舜哥係一位真正識得舊事物之人，非80後講懷舊保育可比，時人懷舊食肆，往往在關門營業前一天，先至知道，湧去食番餐，影張相作為紀念，其實平時請佢地去都嫌食肆太舊、太老套。呢呢，近港大嘅老牌餐廳莎釐娜（Czarina）快停業嘞，有報紙例牌懷舊一番，實際係老闆以高價賣出地舖，要錢唔要老舖，純屬私人商業決定，旁人有甚麼可懷舊？餐飲Ｍ在港大讀書時，經常幫襯莎蓮娜，左丁山未去過，問佢餐廳是否好高級？餐飲Ｍ話：「真正高級嗰間叫做Copper Chimney，係揸車返港大嘅有錢仔女去嘅，我地啲窮學生在Sports Centre打完波就落去莎蓮娜飲羅宋湯，狂吃麪包當晚飯，Copper Chimney老早執咗啦。」問佢會唔會在莎蓮娜停業前去食番餐，佢話：「有乜好去，已經過咗讀書階段好耐咯，留番啲位俾現時港大同學去飲羅宋湯啦。」