讀者收入實是一般，好在都肯開口問，不是自負之輩，否則兩老身家未必可以久存。相信大家都羨慕人地中六合彩頭獎，亦知當中不少幸運兒係中獎後幾年都敗哂副身家，打回原形。原因是搵錢同守財是兩種能力，相近但不相同。六合彩幸運兒不懂守住財產，就算會投資都係亂買一通，好運既有高人指點，保住當中一半捱埋下半生。大老闊能守能增家財主因是在學習賺錢期間，亦訓練了守財力，否則「出快過入」，大老闆都不會留有資金越發越大了。中獎者是一例，二世祖又是一例，總之前人說富不過三代是有道理，此話為窮人留起一絲希望，盼到仔女一輩能和二世祖有個大逆轉。可惜有了家族信託後，要二世祖敗哂成副身家有點難度，窮人想要大逆轉真是要識時機，懂投資了。
讀者要好好學習如何去打理家財。真的用現有人工「在港生存」，自己都知咩事。另外讀者可以去中原網站看看近日屋苑成交價的，唔使agent話幾多就幾多。同埋比你係agent，都講個價高d啦。所以人到四十才不惑是對的。
讀者提及的葵涌、長沙灣、深井都不是初階投資者應買之地方。深井不見未來五年有交通改善，頂多食少少元朗水尾。長沙灣是尋寶之地，惟初階冇奪寶奇兵咁好身手都係唔好亂去，話唔定「中伏」既係自己! 葵涌居屋住下可以，買賣不必。
首先股票持倉不重，只是和樓房投資平分春色。計investment exposure不用將按揭欠款算在內的。你爭幾多錢都係跌一成就輸樓價之10%。如果你不介意對人對事，建議讀者不如轉做裝修或投資經紀，因為讀者只要不好踩中投資騙局，比心機打理手頭物業又整下套房，生活根本無憂。而放棄現職的機會成本很低，值得比勁一試。
浪翠園確實要「走」的，如果自己做deal，可省回不少傭金。樓要快走，反而股票可以留。現時恆生指數及上證指數市盈率偏低，8-10mil的股票portfolio不是處理重點。不如趁後生又未成家室時好好在工作學習一下，就算唔想涉足投資或裝修界別，都應好好發展現有事業。大陸收租等日後再說，攪好香港陣地再北望神洲都未遲。至於連租約賣，less10-15%是平常。如果係我就會係九龍或北角攪套房，一間樓收租都已經等於ugrad成份糧。但係攪套房，買舊樓而賺錢不是一兩年就習得之「功力」，所以讀者暫時只可以望而應開始落手去學。千里之行、始於足下。在此冕勵一眾年青人，放下身段落手去幹是必需的。讀者咁有心去問已是一個好開始，如果諗樣集中向你講介投資方案，那是一個賺你傭金之行為，而不時對你人生有益的。