學生Ｙ得到獎學金，走去美國學習、交流，見識先進地方，上堂受訓之後，就去咗孟加拉首都迪卡一間銀行做實習，因為獎學金規定得獎者要到第三世界受訓，實地認識落後地區嘅社會經濟情況嘅。佢班上有一位孟加拉同學，得到介紹，就去信孟加拉申請，銀行一口應承，但無薪水，仲要住在銀行擁有嘅「酒店」居住，要交屋租㗎，以香港水平而論，房租還算便宜，橫掂有獎學金在手，足夠食住使費，無所謂啦。不過行前學生Ｙ徵詢左丁山意見：「怕唔怕呢？我仲可以揀去北京做實習生㗎。」左丁山對佢講：「去北京，幾時都得，但去孟加拉工作三個月，機會難逢，以後你都唔知仲會唔會去孟加拉旅遊嘅，趁後生去見識吓！」
此乃農曆年前之事，學生Ｙ去到迪卡，眼見到處貧窮，人群處處，在街上拿出部古老諾基亞手機聽電話，就俾細路群包圍（佢收埋咗部三星手機在背囊，唔敢以之示眾），又有半打乞兒跟佢兩條街；每日早午晚三餐都係咖喱，酒店房間內蟑螂橫行，老鼠出沒，好彩廁所還算OK，至於銀行工作，實習生自然冇乜大作為，學吓銀行制度，跟出跟入，睇吓報告就是，唔做「影帝」（影印也）已算夠運。人在迪卡，方知何謂貧窮，何謂惡劣環境，在香港唔駛日日吞一粒抗虐疾藥丸，簡直係亞洲天堂。
做咗一半任期，孟加拉發生政治騷亂，十幾萬人上街，有炸彈爆炸，叫人不安。學生Ｙ父母為咗安全起見，急召佢回港。左丁山見到佢，唔，醒目咗噃，食咖喱食到臉孔瘦削，多咗少少世故，冇以前嗰種「香港仔天真款」，佢開始知道經濟發展並非必然，未能「創富」，焉能「配富」（分配財富），大家唯有鬥窮嘅啫。回來不久，迪卡近郊發生工廠大廈塌樓事件，至今已知死亡人數超過800人，因大廈內有多人失蹤，恐怕死亡人數會繼續增加。據CNN講，大廈倒塌主因係工廠內之發電機及工業機械過重，超出負荷力，加上建築時偷工減料之故。學生Ｙ話佢跟過銀行職員去一啲市內製衣廠考察，裏面工作環境幾得人驚，但孟加拉工業出口極度倚重製衣業，一年創滙二百億美元，佔全國出口77%，政府官員又貪污，根本無人理會工廠安全環境及規管；孟加拉勞動人口太多，女人好難搵工，做到車衣女工已算係男權至上社會中嘅女性優惠，箇中情況，非親歷其境，難以領略！ 