| ||||||
喺中環有大大小小嘅商會，目標都係一個——讓小圈子團結起來！不過近日其中一個商會——「華商會所」竟爆出內訌。個會有逾百年歷史，會員不乏律師、會計師，平均年齡都六、七十，但依然「好火」！呢個會本由內部嘅值理會同信託會共同管理，但舊年九月，時任值理會主席，即律師陳耀莊，希望修改會章，把對家的信託會「主席」改為「召集人」，這令信託會主席、同為律師嘅伍振豪不滿。伍遂致函會員，提到防止某方「爭取華商會所主席之虛名而缺德滅親長期獨攬華商整個會所之重演」，雙方招來招往。直至上週五，值理會改選，由伍振豪陣營悉數當選。小宗當日搵伍律師，贏硬嘅佢仍嬲爆爆：「我唔會接受你訪問！」 華商會所最值錢嘅資產，係位於中環干諾道中、樓高十七層嘅「華商會所大廈」。華商會所約五十年前，以二百多萬買入，今時今日市值約四億元。除咗其中四層出租，其餘樓層都係會所，有兩間中餐廳、兩間酒吧、一間西餐廳，仲有牌室、桌球室、書報室，兼有老式上海理髮室，洗剪吹連剃鬚都只係八十五蚊，唔少會員日日打躉。不過，要做會員都唔簡單，基本入會費六萬蚊，每月再交六百蚊，入會仲要有會員提議及和議，地位媲美馬會會員o架！ Give me a break獨沽一味賣蕉檔 叫得水果檔，梗係咩水果都任君選擇；但中環擺花街卻有一個水果檔，獨沽一味賣蕉！而且還只賣四種蕉！現時檔主阿儀是蕉檔第二代接班人，「點解只賣蕉？哈哈！我媽咪五十幾年前賣落，我跟佢咁做咋！」她一邊用草繩在檔上掛上一梳梳蕉，一邊說：「我只賣四種蕉；香蕉由菲律賓入口，五蚊一磅，最好賣；奶蕉是內地嘅，十蚊一磅，比較甜，易入口；大蕉都係內地嘅，五蚊磅，可幫助消化；皇帝蕉就由泰國入口，最貴，十三蚊一磅，不過因為細細粒，最啱俾老人家同小朋友食。」現場所見，不少OL來買香蕉當飯食，旨在減肥又減壓。「我有四兄弟姊妹，阿媽開蕉檔時生活簡單，賣蕉已可養大我哋四個！」兩年前，年近九十的媽媽患上老人痴呆，阿儀便接手來做。「都好辛苦o架，朝七晚七，喺繁忙時間，即朝早同午市，收錢都收唔切！媽媽養老都要好多錢，賣蕉的收入可以幫補嚇。」怎估到區區一個蕉檔，亦可悶聲發財！ 李錦記「拉布」贈賓客 今年係李錦記一百二十五週年，上週六，公司為表現慎終追遠嘅精神，竟然租咗十九部旅遊巴、帶領超過二千名世界各地嘅員工祭祖！晨早九點，成棚人由大埔總部去到大帽山，紀念一下創辦人及第二代話事人的豐功偉業。小宗睇到支半個人咁高嘅香燭，加埋幾千人嘅陣勢，都嚇咗一跳！夜晚，就喺灣仔會展筵開一百八十席，招待一班大客同夥記。與集團第三代李文達分屬老友的呂志和，都撇低平日經常陪伴嘅長腿model，帶埋夫人撐場。公司可能唔想得失任何一位客仔，喺入席後就不停播放各地的「客戶賀辭」，成班賓客等呀等，等咗兩個鐘都仲未有得食！第四代李惠森最後上台致辭，佢落台再問賓客意見，席上的林健鋒議員即刻投訴：「賀辭環節好似拉布咁！不過喜慶日子就唔會剪布喇！」現場即刻爆笑，林議員兜番句：「希望第二個125週年都可以嚟一齊食！」李氏家族祝埋酒，即刻開席！ 本週緬懷 小宗呢幾日摷番啲舊相，竟然發現李嘉誠巡視新盤嘅身影。九五年，李嘉誠去到剛開賣嘅麗港城示範單位視察，佢望住房內樸實嘅陳設，表情既認真又肉緊，一副體察民情的模樣。而家嘅誠哥，被問到碼頭工人罷工，頭也不回，坐車絕塵而去，寧不令人嘆息！ 有片睇 年年股東會，都係股民變飢民嘅時候。早年成日車小股東去元朗廠房開會、任食沙律意粉嘅生力啤（236），近年轉為喺酒店請大家任飲。現場見，生力啤準備咗一部啤酒機加兩個啤酒女郎為大家添飲。小股東飲完一杯又一杯，有股東仲自備花生果仁慢慢嘆！有股東飲到面都紅曬，有個仲飲醉亂講嘢。想知佢哋幾high？睇片啦！ 金牙大狀講嘢派糖㩒低通脹 消委會調查發覺，舊年超市價格升咗6.8%，而綜合消費物價指數隻係升咗4.1%，故此超市加價比通脹高近七成云云 ——（6.8-4.1）÷ 4.1×100%= 65.8%。咁係咪等於話大財團經營之超市狼過華秀隻狗？未必。須知綜合消費物價指數係個平均數，若然整體物價升咗4.1%，即係有若干物價嘅升幅高過呢個水平，亦有其他物價升少過呢個水平，故此超市價格高過平均水平唔出奇呀！乜嘢價格嘅升幅會低過4.1%？屋租囉。實際上舊年公屋租金非但冇加過，反而下跌咗7.1%。何以咁反常？咁就要多得財爺嘅派糖措施啦。佢非但寬免差餉又代繳租金，仲送埋電費，咁公屋租金指數有乜辦法唔下跌先？衣食住行各項消費中，租金佔之比重高達32%；三分一嘅消費價格因派糖而下跌，但財爺冇津貼人去超市買嘢，咁超市價格有乜辦法唔高過通脹先？超市可能有好多地方抵鬧，但其價格升幅高過通脹 —— 即使超出近七成 —— 唔係冇理由囉。 | ||||||