ZKIZ Archives


李光耀.星加坡 左丁山


2011-5-2  AD




 

復活節假期中, 不少朋友往星加坡旅行,惡佬明係其中一位。惡佬明身為地盤總監,建造經驗豐富,今次久別星加坡十幾年之後,舊地重遊,最令佢印象深刻嘅就係星加坡城市建 設。住在金沙酒店,親身體驗新填海區,好佩服星加坡做事劍及履及,絕不拖泥帶水,如果係香港,剩係諮詢與環評,跟住有人申請司法覆核去反對,郁吓就係十 年,最佳例子就是啟德與西九地皮,至今仍然曬太陽。人地星加坡在此十年間已建成最新一個CBD,為大量外資銀行、基金公司提供充足寫字樓面積,呢啲外資行 想嚟香港開公司,聘請本地人都未必得,因為中環唔夠寫字樓,新嘅CBD(如西九)就只有一間ICC呀。惡佬明嘆一聲:「再過十年香港依然故我嘅話,點同星 加坡爭呀?」

我地爭新聞自由排名就得囉,香港不少評論員成日講起星加坡就話好,狠批特區政府無能力,其實佢地身在福中不知福,亂咁噏!華盛 頓有個機構叫做Freedom House,每年調查世界各地嘅新聞自由程度,列出排名榜,北韓包尾,排191,中國排181,大家都知道北韓與中國嘅新聞自由程度,毋須多講。第一名有 四個國家,就係芬蘭、愛爾蘭、挪威、瑞典,英國排到26、美國24、德國19、日本32、台灣47、西班牙47、法國40、泰國124、南韓70,我地香 港呢?係中游分子,排第72,與意大利相同,不過不失啦,至於星加坡,排第到151,仲低過伊拉克144,於此可見,國際人士唔認為星加坡有新聞自由。於 是乎,星加坡有冇電台評論員好似香港烽煙節目主持人咁多聲氣呢?梗係冇啦,冇咯喎,星加坡政府耳根清靜,話填海就填海,話起路就起路,邊度有人去申請法援 做司法覆核反對星加坡政府o架?即使有,我地幾時見過星加坡政府打輸官司?

李光耀最近接受華爾街日報訪問,指西方民主未必處處適用,但全世界都需要一個強大穩定嘅美國嚟維持秩序!佢認為中美互相需要,不會有大衝突,中美競爭之下,李光耀睇高美國一線,因為美國社會夠包容,而且美國講英文,英文可以吸引世界人才喎!


PermaLink: https://articles.zkiz.com/?id=24825

Next Page

ZKIZ Archives @ 2019