再看樓市 左丁山
2008-12-27 AppleDaily一位讀者Calvin好心水清，傳來電郵附上本欄七月四日寫嘅一篇「有樓賣樓？」，問左丁山事隔半年後點樣睇樓市。Calvin自稱係中產階級，手持現金，仲係租緊樓住。咁講法，Calvin已經避過一場小劫，起碼今年年初樓價上揚嘅時候冇入市，o依家可以笑得落。但見到樓價已經下滑兩成起碼，確實又難怪心思思嘅。本欄七月四日乃引述地產W之言。當日校友會午餐會嘅主題曲係講油價高漲，不過地產W畀校友纏住不放，故此講幾句，一講就話「有樓賣樓」，早賣好過遲賣，o依家事後檢討，佢的確講啱晒，前幾日《蘋果日報》大字標題報道印尼財團撻定（貝沙灣，De Monsa），原業主要入稟法庭追討。地產W當日講豪宅有跌冇升，講廠家風光不再，全部預測正確。今日又點呢？前著名地產分析師卓百德話明年樓價續跌，起碼跌兩成。既然Calvin咁有心機等，卒之等到樓價下跌，心郁郁想買樓自住，於是打電話問吓地產W。地產W唱淡有鋪癮，仍然睇跌，叫左丁山唔好買樓。左丁山整蠱佢：「喂，一位同學好似幫襯你一位夥計買咗一層七百呎噃，你係老闆，點解要倒夥計米，即係同自己間公司倒米啫！」地產W說：「做唔做到生意好閒啫，總之我有嗰句講嗰句，現在仍然唔係買樓時機。買樓嗰位同學係買來畀自己家人用嘅，佢計過供樓與租樓租金相差不太遠，於是肯拎一大筆首期出嚟。佢買嘅單位與屋苑，屬強勢樓，甚少炒家興波作浪嘅，平時供應甚少，住開嘅業主甚少賣樓，故此係個別情況，不可引伸到其他。」咁又畀佢講番掂，無謂同佢駁火吖。問佢對○九年樓市大勢點睇，佢話留番新年至講，因為一月初又會參加校友會午餐例會，依慣例搵齊啲校友投資專家講來年投資展望，而地產W就一定畀校友捉住講地產。既然如此，惟有放佢一馬，等到一月初先。讀者Calvin如果自覺有職位安全，唔驚炒魷或放無薪假期嘅，大可搵定一位相熟地產經紀，畀定心儀對象兩三個，然後慢慢吼，吼到鍾意先至講價，至於周圍去睇樓，就無謂浪費時間咯。