| ||||||
娛樂圈仝人全線向北望，好似做咗廣東省政協嘅「星爺」周星馳，佢套賀歲片《西遊‧降魔篇》喺大陸上映八日，票房就破咗六億人仔，成為中國史上最快破六億嘅電影，並佔同期大陸賀歲片總票房逾八成。《西遊》大賣帶挈星爺做大股東嘅比高集團（8220）也被熱炒。 其實自舊年十二月底《西遊》宣傳造勢一出，比高股價慢慢由一毫五港紙谷到二月初高峰兩毫六，升幅高達七成三，近日升勢回穩，週一收報兩毫五仙五，大股東星爺身家有唔少進賬。炒之餘，股民千萬亦要留意，比高原來喺上週情人節出咗截至去年十二月九個月業績，做咗一億零二百萬生意，比去年同期跌四成二，更加蝕咗四千四百萬。業績報告力銷《西遊》力挽狂瀾，話部戲「加入魔法、靈異事件及具極強視覺特效的魔幻生物及周星馳招牌幽默喜劇元素。」而比高會將該片百分之三十股權，以四千六百萬售予一名獨立第三方，將於第四季業績確認。就係咁，星爺靠《西遊》呢一部戲，頂住比高。本刊去年八月底曾報導，比高集團投資的大陸戲院翻播舊戲、打造的《長江7號》卡通兒童傢具銷售點暫停，睇怕星爺要等《西遊》。比高股價曾經由一毫五插水至一毫一，之後一路冇起色。比高近日反彈係咪真係咁掂，就要放長雙眼睇。 天津劏房抄足香港 喺強國同胞心目中，香港最出名原來唔單只奶粉同LV，仲有馳名海外嘅豆腐膶劏房。最近天津市中心有個新樓盤，擺明用「高品質港式豪宅」做賣點，唔單只個名「水岸銀座」似到十足十，連內籠都貫徹香港嘅「豪宅」作風——夠「毫」，毫子嘅毫。「水岸銀座」仲起緊，三年後先入伙，同一幢有六座，分別叫「騰皇閣」、「蔚皇閣」、「御皇閣」等，個名聽落以為喺半山梅道、跑馬地豪宅，但打開樓書先知味道。好似開賣緊嘅第二幢樓高三十一層，每層竟然多達七十個單位。最細單位發展商叫「高檔魔術小戶型」，面積唔夠一百七十呎，加送通風口一個，因為根本冇窗，賣價盛惠十五萬人仔連裝修，呎價差唔多要九百蚊。最勁係經紀話，蚊型單位樓花已經賣晒。而成個樓盤最大單位亦唔夠七百呎，賣一百一十萬人仔。「毫宅」每層一劏七十，夾夾埋埋一幢就有二千一百七十個單位，假設每戶平均住兩人，每日都有四千幾人出入，要共用十部𨋢、兩條樓梯、一百個車位，真係手快有手慢無。「水岸銀座」嘅發展商係天津高盛房地產，以往啲樓盤都正正路路，今次破格之作即引來網民話似炮房、高級監獄，仲話睇平面圖以為係泊車位，簡直將咱們港式豪宅嘅精髓發揮到極致。 （時事組） | ||||||