「細路仔，知道什麼是戀愛嗎？」 人在中環
http://manincentral.blogspot.hk/2013/02/blog-post_1364.html這句說話，係
阿邊個接受《明報》訪問時所講的。
「中學生應否談戀愛」呢個辯題，真係老土到唔恨。我覺得搞笑既地方係，今時今日，居然仲會聽到有人大大聲講，中學生不應談戀愛：「 十五六歲不應拍拖！」放左幾日假，睡眼惺松之際睇到呢篇報導，仲以為發緊夢時光倒流三十年。
我中學既時候有拍拖，拍拖年齡都係十五六歲左右。你如果問我，果陣知唔知道「甚麼是戀愛」，我梗係唔知啦。不過我又想反問果位提出呢個問題既阿嬸，如果要佢答翻呢條問題，佢自己其實又識唔識答呢？
阿嬸比果班細路仔老幾十年，佢既文字功力同狡辯能力都應該高出果班十五六歲既「細路」好多皮。要答如此一個問題，位阿嬸應該可以輕輕鬆鬆嘔篇三五萬字既論文出黎，由進化論開始講到分析紅樓夢各人關係情感然後再深入研究不同種族戀愛文化諸如此類。講到天下無敵應該難佢唔到，但即使一個學富五車又懂吹水既人，又係咪等如「知道戀愛係乜春」？
比較容易接受一點既睇法係，一個人年紀越大，越成熟既話，就應該越知道「甚麼是戀愛」。細路仔之所以俾啲阿伯阿嬸串佢地唔知戀愛為何物，係因為佢地普遍心智唔成熟，唔能夠體察得到，「戀愛」既真蒂係乜。如果係咁講，一個人對「戀愛」既理解同年紀成正比既話，果啲百幾歲既人瑞應該個個係戀愛權威啦。過癮既係，好多阿伯阿嬸喜歡串爆班細路毛都未生齊就學人拍拖唔知醜，但班阿伯同阿嬸做左幾十年人，照道理應該好清楚「甚麼是戀愛」啦掛？但點解仲有不知幾多好似佢地咁上下年紀既人既婚姻關係，以致婚外既「戀愛關係」，都一Q樣混亂不堪？「阿叔阿嬸，你地知道甚麼係戀愛嗎？」
時光倒流二十年，小弟細細個拍拖既時候，俾人提醒得最多既有兩件事：1)讀書時拍拖會影響學業；2)後生仔血氣方剛，搞大左人地個肚你承受唔起。
第一點我有些少保留。事實上我覺得讀唔到書既，拍唔拍拖都係讀唔到書。讀得到書既，好睇拍拖既對像同過程，情況正如班財經演員既口頭禪：資產價格可升亦可跌，你響「有拖拍」期間既學業成績，都係一樣。像「那些年」裡面九把刀為左溝女努力發奮既例子，我查實見過好幾個。至於第二點嘛…我係個番書仔，我查實贊成外國果套：性教育其實早啲教有著數。
識得有個好保守既auntie，佢有個女，生得幾靚架。中學既時候，都有唔少男同學追。呢個auntie就係極為反對個女響求學時期談戀愛既果款阿媽。有男同學打電話黎問功課，一律會俾呢位auntie狠狠鬧走。auntie一聞到陣味，個女可能對某某男生有點好感，auntie會又生又死咁威脅個女千祈咪諗拍拖，否則脫離母女關係趕佢出屋企門口芸芸。佢個女係個孝順女，阿媽「以死相諫」，做女既唯有乖乖聽話就犯，大學畢業前，真係男仔都唔識多個。
呢位保守既auntie，過癮既地方係，用「求學時期」黎做界線。當佢個女一畢業，態度就180度轉變，認為女仔出黎做野之後，好應該搵返個男仔拍拖。auntie眼見佢班施拉朋友既囡囡，拍拖既拍拖，結婚既結婚，自己個女反而一直單身，身邊鬼影都冇隻，於是就好不耐煩地日夜轟炸個女要搵番個男仔拍拖。個女有日終於忍唔住，鬧返佢阿媽轉頭：「你又唔諗下，我讀書果陣，你幾專制幾獨裁，莫講話拍拖，連普通既男仔朋友都唔俾我識個。十幾年來都冇同異性溝通既經驗，忽然之間你衣家又逼我搵個男仔拍拖，我依家真係唔識點樣同男仔相處呀，點搵拖拍呀，媽？」真人真事，這位女孩子年近四十了，人生還是未拍過一次拖。
當我仲係十五六歲既「細路仔」果陣，自然唔知道甚麼是戀愛。今時今日既我，已由「細路仔」進化成中年發福既「中坑」，同一個問題，我仍然係唔識答。然而一段關係是否美滿，同「知唔知甚麼是戀愛」，我認為毫無關係，一切只在乎堅持。當年我十五六歲細路時，同我拍拖果位，同樣係「唔知戀愛是甚麼」既女同學，今天佢係我既太太，係我兩個小孩子既好媽咪。
阿嬸，唔知道甚麼是戀愛，又如何？
祝各位情人節快樂。