中環在線：李蘢怡阿媽想自己起樓 李華華
2008-12-03 AppleDaily
近年唔知有乜做嘅奀星李蘢怡，佢阿媽同後父富貴就係人都知，近年靠炒樓都賺唔少，o依家唔知係咪想試吓起埋樓，最近就向城規會申請，想重建西貢白沙頭間屋。呢間屋係蘢媽同佢老公喺06年以3230萬買番嚟，都有幾十年樓齡，土地係住宅用途，理應唔使申請，但好衰唔衰地皮踩喺住宅丙1類同丙3類兩種唔同用途類別，涉及唔同地積比，所以咪要求救城規會去解決技術問題囉。呢間屋佔地大約8220方呎，佢哋想起間3層高大屋，總樓面約3820方呎，地下係停車間、大門入口同電梯位，1、2樓就係廳同房，另外仲有個私家泳池o忝。佢哋想用0.464倍地積比起樓，比0.4倍嘅限制高小小，至於廳房樓底又想有11呎高，咁起法3層樓會超出咗高限嘅大約30呎，咪又要求城規會批准將樓高放寬到31呎囉。